1-2. Ano ro nagapasadya sa mga alagad it Dyos? (Santiago 1:​22-25)

 GUSTO ni Jehova ag ku anang Unga nga mangin masadya kita. Ro nagsueat it Salmo 119:2 nagahambae: “Masadya ratong mga nagasunod sa anang mga pahanumdom, nga nagausoy kana it andang bilog nga tagipusuon.” Nagtao pa it pasalig si Jesus nga nagahambae: “Bulahan [o, masadya] pa gid ro mga nagapamati ku bisaea it Dyos ag nagatuman kara!”—Luc. 11:28.

² Bilang mga alagad ni Jehova, masadya kita. Ham-an? Abung mga rason. Ro sambato sa importante nga rason hay ginabasa naton adlaw-adlaw ro Bisaea it Dyos ag ginatinguhaan nga iaplikar ro atong mga natun-an.​—Basaha ro Santiago 1:​22-25.

3. Ano ro mga benepisyo kon ginaaplikar naton ro atong nabasahan sa Bisaea it Dyos?

³ Abu ro mga benepisyo kon ‘mangin mga manogtuman kita it bisaea.’ Halimbawa, kon ginaaplikar naton ro Bisaea it Dyos, mapasadya naton si Jehova ag nagapasadya man ra katon. (Man. 12:13) Habang ginatinguhaan naton nga sundon ro atong nabasahan sa Bisaea it Dyos, mas magaeapit ro atong relasyon sa atong pamilya ag magabakud pa gid ro atong pagpakig-amigo sa atong mga kakongregasyon. Basi naeksperyinsyahan mo eon ra. Dugang pa, malikawan naton ro mga problema nga naeksperyinsyahan it mga tawo nga owa nagasunod sa sugo ni Jehova. Kumbinsido kita pareho kay Haring David. Pagkatapos nang sambiton sa anang mga kanta ro kasugoan,  ag paghukom ni Jehova, nakahambae imaw: “Sa pagsunod kara, may mabahoe nga premyo.”​—Sal. 19:​7-11.

4. Ham-an buko’t maeumo nga mangin mga manogtuman ku Bisaea it Dyos?

⁴ Ro matuod, bukon pirme it maeumo nga mangin mga manogtuman ku Bisaea it Dyos. Tungod masako kita, kinahang-ean naton taw-an it oras ro pagbasa ag pagtuon it Biblia agud maintindihan naton kon ano ro gustong ipaobra katon ni Jehova. Sayuron naton makaron ro pila nga mga paagi nga makabulig katon nga mabasa it regular ro Biblia. Talakayon man naton kon ano ro makabulig katon nga mapamaeandungan ro atong mga nabasahan ag kon paano ra maaplikar sa atong kabuhi.

MAGTAO IT ORAS PARA MABASA RO BISAEA IT DYOS

5. Ano ro mga rason kon ham-an masako kita?

⁵ Kaeabanan nga mga alagad ni Jehova hay masako gid. Abung oras ro atong ginatao para asikasuhon ro iba-ibang responsibilidad nga ginahambae it Biblia nga importante. Halimbawa, kaeabanan katon hay nagatrabaho para suportahan ro atong sarili ag ro atong pamilya. (1 Tim. 5:8) Ro iba mat-a hay nagadipara sa mga nagamasakit o sa andang magueang eon nga mga kapamilya. Nagakinahang-ean man it oras ro atong pagdipara sa atong sarili. Dugang pa sa rayang mga responsibilidad, may mga asayment man kita sa kongregasyon. Sambato sa atong importante nga responsibilidad hay ro pagwali it mayad nga balita. Tungod may iba-iba kitang responsibilidad, paano naton mataw-an it oras ro regular nga pagbasa it Biblia, pagpamaeandong sa atong nabasahan, ag pag-aplikar sa atong natun-an?

6. Paano mo masigurado nga mabasa mo ro Biblia? (Tan-awa man ro piktyur.)

⁶ Para katon nga mga Cristyano, ro pagbasa it Biblia hay sambato sa “eabing mahaega [o, importante] nga bagay,” ngani dapat natong siguraduhon nga maobra ra. (Fil. 1:10) Parti sa tawo nga masinadyahon, ginahambae it unang salmo: “Ro anang kasadya hay sa kasugoan ni Jehova, ag ginabasa na ro  Anang kasugoan sa mahinay nga limog adlaw ag gabii.” (Sal. 1:​1, 2) Ginapakita kara nga kinahang-ean naton taw-an it oras ro pagbasa. Ano ro pinakamanami nga oras sa pagbasa it Biblia? Iba-iba ro atong sabat. Ro importante, ruyon nga iskedyul hay makabulig kimo nga mabasa it regular ro Biblia. Si Victor naghambae: “Naila ako magbasa it Biblia sa agahon, maskin bukon ako it sanay magbugtaw sa rayang oras. Tungod malinong pa ro palibot ag ro ang isip hay matawhay, mas makapukos gid ako it mayad.” Pareho man baea kara ing sitwasyon? Pangutan-a ing sarili, ‘Ano baea ro pinakamanami nga oras nga basahon ko ro Biblia?’

PAMAEANDUNGI ING GINABASA

7-8. Ano ro pwedeng magpugong katon agud makabenepisyo it mayad sa atong ginabasa? Magtao it ilustrasyon.

⁷ Ro matuod, maskin regular kita nga nagabasa, posible nga owa naton ra naintindihan it mayad. May ginbasa ka eon baea ag indi mo eon rayon ra haeos matandaan? Pwede man ra matabo kon nagabasa kita it Biblia. Basi nagplano kita nga basahon ro sangka kapitulo it Biblia kada adlaw. Mayad gid ron. Dapat mag-obra kita it mga plano ag tinguhaan nga abuton ra. (1 Cor. 9:26) Manami gid nga umpisahan ro pagbasa it Biblia. Pero abu pa kitang dapat obrahon agud makabenepisyo it mayad sa Bisaea it Dyos.

⁸ Isipa ra: Kinahang-ean it mga tanum ro tubi agud mabuhi. Pero kon mag-uean it mabaskog sa sueod eang it pilang oras ag magpunpon ro tubi, indi eagi masuyop it eugta ro tubi. Kon matabo ron owa’t pueos ro uean. Mas mayad nga amat-amat nga magtugpa ro uean agud masuyop it eugta ro tubi ag mabuligan ro mga tanum nga magtubo. Pareho karon, likawan naton nga magdali kon nagabasa it Biblia nga indi eon naton mapamaeandungan, matandaan, ag maaplikar ro atong nabasahan.​—Sant. 1:24.

9. Ano ro atong obrahon kon napan-uhan naton nga nagadali kita sa pagbasa it Biblia?

⁹ Napan-uhan mo eon baea ro ing sarili nga nagadali sa pagbasa it Biblia? Ano ing dapat obrahon? Maghinay. Magtao it  oras agud pamaeandungan ro ing ginabasa o habasa eon. Bukon man gid ra it malisud. Tungod kon tama ing pagtan-aw sa pagpamaeandong, mas maeumo kimo nga isipon it mayad kon ano ing nabasahan. Nakadepende kimo kon mauno’t buhay ing oras nga gamiton sa pagtuon agud makapamaeandong. Pwede ka man makapili it matag-od nga mga bersikulo agud may oras ka pa nga makapamaeandong sa ing nabasahan. Si Victor nga ginsambit kaina, naghambae: “Ginatinguhaan ko nga makabasa it Biblia maskin matag-od eang, mga sangka kapitulo eang. Tungod agahon pa ako nagabasa, mapamaeandungan ko ra sa bilog nga adlaw.” Mahaba man o matag-od ing basahon, ro importante hay ginabasa mo ra it mahinay agud makabenepisyo ka it mayad kara.​—Sal. 119:97; tan-awa ro kahon nga “ Mga Pangutana nga Pwede Mong Isipon Habang Nagabasa.”

10. Magtao it halimbawa kon paano mo maaplikar ing natun-an. (1 Tesalonica 5:​17, 18)

¹⁰ Anong oras ka man nagabasa it Biblia o mauno’t haba ing oras nga ginatao kara, mag-usoy it paagi kon paano mo rayon ra maaplikar. Habang nagabasa ka it sangka parte ku Bisaea it Dyos, pangutan-a ing sarili, ‘Paano ko maaplikar rayang impormasyon nga akong natun-an makaron o sa paeaabuton?’ Halimbawa, ginabasa mo ro 1 Tesalonica 5:​17, 18. (Basaha.) Pagkatapos mong basahon rayang daywang ka bersikulo, pwede kang magpundo ag isipon kon regular ka baea nga nagapangamuyo ag may kalidad baea ra. Pwede mo mang isipon ro mga bagay nga ginapasaeamatan mo gid. Basi may tatlo ka nga espisipiko nga mga bagay nga gusto mong pasaeamatan kay Jehova. Maskin pilang minuto mo eang nga ginpamaeandungan ing natun-an, makabulig ra kimo nga maintindihan ro Bisaea it Dyos ag obrahon kon ano ro ginahambae kara. Kon ginaaplikar mo ing nabasahan sa Biblia kada adlaw, makabulig man ra kimo nga mangin mas mayad nga alagad ni Jehova. Pero, ano ing obrahon kon nakita mo nga abu pa ing mga paeauswagon?

MAGPLANO IT MGA GOAL NGA KAYA MO EANG ABUTON

11. Ano ro pwedeng magpaeuya sa ing buot? Magtao it halimbawa.

¹¹ Kon nagabasa ka it Biblia, pwedeng mag-euya ing buot tungod narealisar mo nga abu ka pa gali nga dapat pauswagon. Isipa rayang sitwasyon: Sa rayang adlaw nabasa mo sa Biblia ro paandam parti sa pagpakita it paboritismo. (Sant. 2:​1-8) Nakita mo nga kinahang-ean mo gali bag-uhon ing pagtratar sa iba. Mayad gid ron! Rayon, pagkasunod nga adlaw nabasa mo kon ham-an importante ro pagkontrol sa ing ginahambae.  (Sant. 3:​1-12) Narealisar mo nga nakahambae ka it buko’t manami o negatibo. Ngani nangin determinado ka gid nga maghambae it makapalig-on ag positibo. Pagkasunod eon man nga adlaw, ro ing ginbasa hay paandam parti sa pagpakig-amigo sa kalibutan. (Sant. 4:​4-12) Napan-uhan mo nga kinahang-ean mo gali pilion ro ing ginabasa, ginatan-aw ag ginapamatian. Ku pang-ap-at nga adlaw, basi naeuyahan ka eon it buot tungod pamatyag mo kaabu ing dapat pauswagon o baeag-uhon.

12. Ham-an indi ka dapat maeuyahan it buot kon nakita mo sa ing pagbasa it Biblia nga abu ing dapat bag-uhon? (Tan-awa man ro footnote.)

¹² Kon nakita mo nga may mga baeag-uhon ka, indi maeuyahan it buot. Pamatuod ra nga may mayad ka nga tagipusuon. Ro tawo nga mapainubuson ag maminatud-on sa anang sarili hay nagabasa it Biblia ag nagausoy it paagi agud mag-uswag. a Tandai man nga ro pagsuksok it “bag-o nga kinaugali” o personalidad hay padayon nga proseso. (Col. 3:10) Ano ro makabulig kimo agud padayon nga mangin manogtuman ku Bisaea it Dyos?

13. Paano ka makaobra it mga goal nga kaya mo eang abuton? (Tan-awa man ro piktyur.)

¹³ Imbes nga iaplikar mo eagi ing tanan nga nabasahan, mag-obra it mga goal nga kaya mo eang abuton. (Hulu. 11:2) Pwede mo rayang obrahon: Mag-obra it listahan it mga bagay nga kinahang-ean mo pauswagon, ag rayon magpili it sambato o daywa nga gusto mong unahon. Pwede man nga sa masunod lang rayon ro iba pa nga gusto mong pauswagon. Alin ing gustong unahon?

14. Alin ro goal nga gusto mong umpisahan?

¹⁴ Pwede kang mag-umpisa sa sangka goal  nga para kimo hay madali eang abuton. O pwede mo mang unahon ro mga bagay nga sa pamatyag mo hay kinahang-ean mo gid pauswagon. Kon nakadesisyon ka eon sa ing unahon, mag-research sa atong mga publikasyon. Halimbawa, pwede mong gamiton ro Watch Tower Publications Index o ro Giya sa Pagtuon Para sa mga Saksi ni Jehova. Mangamuyo kay Jehova nga taw-an ka nana it ‘kagustuhan ag ikasarang’ nga maabot ro ing goal. (Fil. 2:13) Rayon, iaplikar ro ing natun-an. Kon haabot mo eon ing unang goal, posible nga ganahan ka pa gid sa pag-abot it iba pa nimong goal. Ngani, kon napauswag mo ro sangka Cristyanong ugali, mas maeumo eon kimo nga pauswagon ro iba pang ugali.

TINGUHAI NGA IAPLIKAR RO BISAEA IT DYOS

15. Ham-an iba ro mga alagad ni Jehova sa kaeabanan nga nagabasa it Biblia? (1 Tesalonica 2:13)

¹⁵ May mga tawo nga nagahambae nga pilang beses eon nanda habasa ro Biblia. Pero nagapati gid baea sanda sa ginahambae kara? Ginaaplikar ag ginasunod baea nanda kon ano ro ginahambae kara? Makasueobo, ro kaeabanan kanda hay owa nagasunod. Iba ro mga alagad ni Jehova! Pareho ku unang mga Cristyano kato, ginabaton naton ro Biblia “bilang bisaea it Dyos.” Ginatinguhaan man naton nga iaplikar ro atong mga natun-an sa Biblia sa atong kabuhi.​—Basaha ro 1 Tesalonica 2:13.

16. Ano ro makabulig katon nga mangin mga manogtuman it Bisaea?

¹⁶ Buko’t madali nga basahon pirme ag iaplikar ro Bisaea it Dyos. Basi nalisdan kita magtao it oras sa pagbasa o dalion lang naton ro pagbasa it Biblia ag indi eon naton ra mapamaeandungan. O basi maeuyahan kita it buot sa tanan nga dapat natong pauswagon. Maskin nalisdan ka, kaya mo ron sa bulig ni Jehova. Kabay nga mangin determinado kita nga batunon ro anang bulig ag mangin mga manogtuman it Bisaea ag bukon it mga manogpamati eang. Makasigurado kita nga kon pirme natong ginabasa ro Bisaea it Dyos ag ginaaplikar ra sa atong kabuhi, mangin mas masadya kita.​—Sant. 1:25.