Gin-unga ako ku 1934. Ro ang mga ginikanan hay taga-Switzerland ag nagsaylo sa Timmins, sangka banwa nga may mga minahan sa Ontario, Canada. Ku mga 1939, si nanay hay nag-umpisa sa pagbasa it magasin nga Watchtower ag naga-attend man imaw sa mga miting it mga Saksi ni Jehova. Ginadaea na ako igto ag ro ang an-um nga mga igmanghod ag owa magbuhay nangin Saksi ni Jehova imaw.

Owa gid naila si tatay sa anang desisyon, pero palangga ni nanay ro kamatuoran ag determinado imaw nga mangin mainunongon kay Jehova. Ginpakita na ra kat ginbawae ro mga ueobrahon it mga Saksi ni Jehova sa Canada ku naunang mga binuean it 1940. Ag pirme nang ginapakitaan it kabuot ag pagrespeto si tatay, maskin ginahambaean imaw kara it maeain. Ro manami nga halimbawa ni nanay hay nakabulig kamon nga magmaeanghod nga batunon man ro kamatuoran. Masadya gid kami nga amat-amat nga nagbag-o si tatay ag mas mabuot eon imaw kamon.

Kat tig-ieinit ku 1950, nag-attend ako sa asembliya nga may tema Theocracy’s Increase sa syudad it New York. Kat nakilaea ku ro mga igmanghod halin sa bilog nga kalibutan ag nabatian ro interbyu it mga nakaeskwela sa Gilead, napalig-on gid ako kara nga dugangan ro akong maobra sa pag-alagad kay Jehova! Nangin mas desidido ako nga magsueod sa bilog panahon nga ministeryo. Pag-uli ko sa baeay nag-apply eagi ako it regular payunir, pero nagsabat ro branch office sa Canada nga kinahang-ean ko anay nga magpabautismo. Ngani, nagpabautismo ako ku Oktubre 1, 1950. Pagtaliwan it sang buean, nangin regular payunir ako ag nakabaton it ang unang asayment sa Kapuskasing. Rayang banwa hay maeayo gid halin sa ang naestaran.

 Kat tigbueoeak ku 1951, gin-imbitahan it branch office ro mga Saksi nga kaantiguhan mag-French nga kon pwedeng magsaylo sanda sa probinsya it Quebec nga nagahambae it French. Mabahoe gid ro pagkinahang-ean igto. Tungod nagahambae ako it French ag English, ginbaton ko ro imbitasyon ag gin-asayn ako sa Rouyn. Owa ako igto it kilaea, ro ang sayod eang hay adres nga ginhambae ko kaina. Pero nangin maayos ro tanan. Nangin mayad nga mag-amigo kami ni Marcel ag masadya gid ako nga nag-alagad sa masunod nga ap-at nga dag-on. Ag ku ulihi, nangin espesyal nga payunir ako.

Habang sa Quebec, masadya gid ako nga nakabaton it imbitasyon nga makaeskwela sa pang-26 nga klase it Gilead sa South Lansing, New York. Naggradweyt ako ku Pebrero 12, 1956, ag gin-asayn ako sa nasyon nga ginatawag makaron nga Ghana, b West Africa. Pero bago ako magpanaw, kinahang-ean ko anay nga magbalik sa Canada it mga “pilang domingo” hasta maayos eon ro akon nga mga dokumento sa pagpanaw.

Naghueat ako it pitong buean iya sa Toronto para sa ratong mga dokumento. Sa panahon ngaron, nagaestar ako sa baeay it pamilyang Cripps ag nakilaea ko ro andang unga nga bayi nga si Shiela. Pareho kaming naila sa kada isaea. Kat gusto ko eon kunta nga magpakasae kami, nag-abot ta ang visa. Ginpangamuyo namon ni Shiela ro parti kara ag nagdesisyon nga mag-agto ako sa akong asayment. Pero nagkasugot man kami nga magsueoeatan sa kada isaea ag hueaton kon hin-uno kami pwedeng magpakasae. Bukon ra it maeumo para kamon, pero narealisar namon nga raya gali ro tama nga desisyon.

Pagkatapos it sang buean nga pagbyahe sakay it tren, barko, ag eroplano, nakaabot ako sa Accra, Ghana. Gin-asayn ako igto nga mag-alagad bilang manogdipara it distrito. Ngani kinahang-ean ko nga magbisita sa bilog nga Ghana pati man ro kaiping nga mga nasyon nga Ivory Coast (Côte d’Ivoire makaron) ag Togoland (Togo makaron). Haeos pirme ako nga nagabyahe it isaeahanon gamit ro jeep nga gintao it branch. Na-enjoy ko gid ra!

 Kon weekend, may asayment ako sa pangsirkito nga mga asembliya. Owa kami it mga Assembly Hall. Ngani nagapatindog lang ro mga igmanghod it temporaryo nga mapanilungan nga may poste nga butong ag atop nga dahon it niyog para may proteksyon sa init it adlaw. Tungod owa it refrigerator ro kapeterya, nagadaea it buhi nga mga sapat ro mga igmanghod ag igto lang ginakatay ag ginaeaha para ipakaon sa mga naga-attend.

May kabueo-bueo kami nga mga eksperyinsya sa ruyong mga asembliya. Sang beses kat nagadiskurso si Herb Jennings, c nga sangka misyonero man, may nakabuhi nga baka sa kapeterya. Nagdinaeagan ra sa tunga it stage ag ku manogpaeamati. Nagpundo sa paghambae si Herb ag ro baka hay nagasala-sala. Nagbueoligan ro ap-at nga brother agud dakpon ra ag ibalik sa kapeterya. Naghinibayag kara ro mga igmanghod.

Sa ruyong domingo it asembliya, ginpapamantaw ko ro The New World Society in Action nga video sa kaeapit nga mga baryo. Para maobra ra, nagabitay ako it puti nga tela sa daywang ka poste o puno agud mapatan-aw ro video. Naila gid sanda kara! Para sa kaabuan, raya ro pinakauna nga video nga napamantaw nanda. Kabaskog gid ro andang palakpak kat nakita nanda ro eksena nga may ginabautismuhan. Nakabulig rayang video nga marealisar it nagapamantaw nga ro mga Saksi ni Jehova hay nagahiusa sa bilog nga kalibutan.

Pagkatapos it mga daywang dag-on sa Africa, eksayted gid ako nga mag-attend sa 1958 nga internasyonal nga kunbensyon sa syudad it New York. Masadya gid ako nga makita si Sheila, naghalin imaw sa Quebec ag igto imaw nagaalagad bilang espesyal payunir. Nagasueoeatan eang kami dati, pero makaron magkaibahan eon kami’t uman. Ginsampit ko imaw nga magpakasae ag ginbaton na ra. Nagsueat ako kay Brother Knorr d ag ginpangutana kon pwede makaeskwela si Sheila sa Gilead ag ibhan ako sa Africa. Nagsugot imaw. Ku ulihi nag-abot si Sheila sa Ghana. Ginkasae kami sa Accra, ku Oktubre 3, 1959. Nabatyagan gid namon nga ginpakamayad kami ni Jehova tungod gin-una namon imaw sa among kabuhi.

Ku 1961, naasayn kami sa Cameroon. Ginpangabay ako nga magbulig sa mga ueobrahon sa  bag-ong branch office. Masako gid ako nga mayad tungod naasayn ako nga magdumaea sa mga ueobrahon sa Cameroon. Abu pa ang dapat tun-an. Ku 1965, nasayran rayon namon nga nabdos si Sheila. Nalisdan gid ako nga isipon nga mangin ginikanan eon kami. Pero kat eksayted eon kami sa rayang bag-ong responsibilidad ag nagaplano nga magbalik sa Canada, may makasueobo gid nga natabo.

Nahushusan si Sheila ag ginpasayod kami it doktor nga ro among unga kunta hay eaki. Mga sobra 50 dag-on eon ro nagtaliwan, pero indi gid namon ra malipatan. Maskin nasubuan kami sa natabo, nagpabilin kami sa asayment nga among nailaan.

Haeos pirme nga ginahingabot ro mga igmanghod sa Cameroon tungod neutral sanda sa politika. Nangin mas malisud ro andang sitwasyon kon panahon it nasyonal nga eleksyon, ag mas naglala ra ku Mayo 13, 1970, kat opisyal nga ginbawae ro mga Saksi ni Jehova. Ginkumpiska it gubyerno ro manami nga bag-ong pasilidad it branch, kon siin limang buean paeang kami nga nakahalin igto. Sa sueod it sang domingo, pwersahan nga ginpahalin sa Cameroon ro tanan nga misyonero, kaibahan kami ni Sheila. Nalisdan kami nga aywan ro mga igmanghod tungod palangga namon sanda ag nabaeaka kami kon paano nanda atubangon ro masunod nga mga inadlaw.

Nagtener kami it an-um nga buean sa branch office it France. Padayon ko nga gin-obra igto ro tanan para makasuporta sa mga kinahang-eanon it mga igmanghod sa Cameroon. Ku Disyembre it ruyong dag-on, naasayn kami sa branch it Nigeria nga nagaasikaso man sa ueobrahon sa Cameroon. Manami gid ro pagbaton kamon it mga igmanghod sa Nigeria, ag na-enjoy namon ro pag-alagad igto sa sueod it mga pilang dag-on.

Ku 1973, kinahang-ean namon nga mag-obra it malisud gid nga desisyon. May ginabatyag nga seryosong masakit si Shiela. Habang sa kunbensyon kami sa New York, nagtangis si Shiela ag naghambae kang: “Indi ko eon kaya magpadayon! Gaoy eon ako ag pirme akong nagamasakit.” Magkaibahan kami nga nagaalagad sa West Africa it sobrang 14 nga dag-on. Proud gid ako sa anang katutom, pero kinahang-ean namong mag-obra it pila nga mga pagbag-o. Pagkatapos maistoryahan ro among sitwasyon ag sinsero nga nagpangamuyo parti kara, nagdesisyon kami nga magbalik sa Canada, kon siin mas mabueong imaw it mayad. Ro pag-aywan sa among asayment bilang misyonero ag bilog panahon nga pag-alagad ro pinakamalisud ag pinakamasubo nga desisyon nga among gin-obra.

Pag-abot namon sa Canada, nagtrabaho ako sa akong amigo nga nagabaligya it mga saeakyan, sa sangka banwa sa North it Toronto. Nagrenta kami it apartment, nagbakae it secondhand nga mga gamit, ag nakasaylo kami nga owa it utang. Ginpasimple namon ro among kabuhi nga nagaeaum nga makabalik it uman sa bilog panahon nga pag-alagad. Nakibot kami tungod owa namon ginapaabot nga makabalik eagi kami kara.

 Kada sabado, nagaboluntaryo ako sa construction site para sa bag-o nga Assembly Hall sa Norval, Ontario. Sa owa magbuhay, naasayn ako bilang manogdumaea sa Assembly Hall. Nagamayad-ayad eon ro pamatyag ni Shiela, ag nabatyagan namon nga makaya eon nana rayang bag-ong asayment. Ngani nagsaylo kami ku Hunyo 1974, sa apartment it Assembly Hall. Masadya gid kami nga makabalik sa bilog panahon nga pag-alagad!

Nagapasaeamat gid kami nga padayon nga nagmayad ro kondisyon ni Shiela. Pagtaliwan it daywang dag-on, ginbaton namon ro asayment sa pangsirkito nga ueobrahon. Ro sirkito hay sa Manitoba, sangka probinsya it Canada nga kilaea bilang sangka maeamig gid nga lugar. Pero nabatyagan gid namon ro mainit nga pagpalangga it mga igmanghod igto. Natun-an namon nga buko’t importante kon siin kami nagaalagad, ro importante hay padayon kami nga nagaalagad kay Jehova maskin siin man kami.

Pagkatapos it mahabang dinag-on sa pangsirkito nga ueobrahon, naimbitahan kami nga mag-alagad sa Bethel it Canada ku 1978. Owa magbuhay, natun-an ko ro masakit pero importante nga leksyon. Sa sangka espesyal nga miting sa Montreal, naasayn ako nga magtao it sang oras ag tunga nga diskurso sa French nga linggwahe. Makasueobo nga owa ko nabuoe ro atensyon it mga manogpaeamati, ag ginhambaean man ako it sangka brother nga taga-Service Department parti kato. Aminado ako nga dati pa man, bukon man gid ako it mayad nga speaker. Pero matsa indi ko mabaton ro ginhambae na kang. Magkaiba ro amon nga personalidad, ag para kang sobra imaw nga istrikto. Owa man ngani imaw nagtao it komendasyon. Gin-isip ko nga bukon ma’t para kakon ro ratong pahanumdom tungod bukon ko’t gusto ro paagi it paghambae ag kon sin-o ro naghambae kara.

Pagtaliwan it pilang adlaw, gin-istorya ako it sangka myembro ku Komite it Branch parti sa natabo. Gin-aku ko nga owa ko ginbaton it mayad ro pahanumdom ag ginhinuesuean ko ra. Gin-istorya ko rayon ro brother nga nagtao kakon it pahanumdom ag ginpatawad na ako. Indi ko gid malipatan rayang eksperyinsya nga nakatao kakon it leksyon nga mangin mapainubuson. (Hulu. 16:18) Abung beses nga ginpangamuyo ko ra kay Jehova, ag determinado eon ako nga indi mag-isip it negatibo sa mga pahanumdom nga mabaton ko.

Sobra sa 40 nga dag-on eon ako iya sa Bethel it Canada. Ag halin ku 1985, nagkapribilehiyo ako nga mag-alagad sa Komite it Branch. Ku Pebrero 2021, ro ang palangga nga si Shiela hay nagtueog sa kamatayon. Owa’t eabot nga nahidlaw ako kana, may ginabatyag man ako nga masakit. Pero masako ako sa pag-alagad kay Jehova ag masadya ako nga ‘owa ko haeos mapan-uhan ro pagtaliwan it mga inadlaw.’ (Man. 5:20) Maskin abu nga kalisdanan ro ang haagyan, mas abu gihapon ro kasadya nga akong naeksperyinsyahan. Ro pag-una kay Jehova sa ang kabuhi ag ro masadya nga bilog panahon nga pag-alagad sa sueod it 70 nga dag-on hay makaaeayaw gid. Ginapangamuyo ko nga kabay padayon man nga unahon it bataon nga mga igmanghod sa andang kabuhi si Jehova. Kumbinsido ako nga ma-enjoy man nanda ro makaaeayaw ag masadya nga kabuhi nga posible eang kon nagaalagad kita kay Jehova.