1-2. (a) Ano ro sitwasyon sa Judea kato kat ginsueatan ni apostol Pablo ro mga Hebreo? (b) Ham-an insakto gid rayang sueat sa panahon nanda?

 NAEKSPERYINSYAHAN it Hebreong mga Cristyano kato nga nagaestar sa Jerusalem ag Judea ro abung kalisdanan pagkatapos nga namatay si Jesus. Nag-umpisa ro mapintas nga paghingabot sa bag-o eang nga ginporma nga Cristyanong kongregasyon. (Binu. 8:1) Pagtaliwan rayon it 20 nga dag-on, nag-antus man ro mga sumoeunod it Cristo tungod sa tiggueotom ag kapobrehon. (Binu. 11:​27-30) Pero, ku mga 61 C.E., naeksperyinsyahan it mga Cristyano ro matawhay nga panahon kon ikumpara sa panahon nga magaabot ro paghingabot. Sa ruyong panahon, nakabaton sanda it sueat halin kay apostol Pablo. Rayang sueat hay insakto gid sa andang kinahang-ean.

² Ro sueat para sa mga Hebreo kato hay insakto gid sa panahon tungod ro katawhay nga andang naeksperyinsyahan hay indi magabuhay. Ro gintao nga pahanumdom ni Pablo hay makabulig gid sa mga Cristyano nga matiis ro kalisdanan nga maeapit lang nandang maagyan. Ro ginhula ni Jesus parti sa pagguba it Jerusalem hay maeapit eon matabo. (Luc. 21:20) Maskin si Pablo o ro mga Cristyano sa Judea hay owa kasayod it insakto nga petsa kon hin-uno ra matabo. Ro importante, ratong mga Cristyano hay may panahon pa para mahanda ro andang sarili sa pagpabakud it andang pagtuo ag pagtiis.​—Heb. 10:25; 12:​1, 2.

3. Ham-an dapat mangin interesado gid ro mga Cristyano makaron sa libro it Hebreo?

³ Maeapit eon naton maeksperyinsyahan ro kasakitan nga mas grabi pa sa naagyan it Hebreong mga Cristyano kato. (Mat.  24:21; Pah. 16:​14, 16) Ngani talakayon naton ro praktikal nga mga pahanumdom nga gintao ni Jehova sa mga Cristyano kato nga makabulig man katon makaron.

‘MAGPADAYON SA PAGKAHAMTONG’

4. Ano ro mga kalisdanan nga naeksperyinsyahan it Judiong mga Cristyano kato? (Tan-awa man ro piktyur.)

⁴ Ro mga Judio kato nga nangin Cristyano hay nakaeksperyinsya it grabi nga kalisdanan. Dati, ro mga Judio ro ginpili nga katawhan ni Jehova. Sa Jerusalem nagagahum ro mga hari nga nagarepresentar kay Jehova, ag ro templo igto ro sentro it pagsimba. Ginasunod it matutom nga mga Judio ro Mosaikong Kasugoan base sa ginaturo kanda it andang relihiyusong mga lider. Ratong mga pagturo hay naggiya kanda sa kon ano ro andang kaunon, sa pagpati parti sa pagpatuli, ag sa andang pagpakig-iba sa mga bukon it Judio. Pero, halin kat namatay si Jesus, owa eon ginabaton ni Jehova ro andang mga ginahaead sa templo. Nangin kalisdanan gid ra para sa Judio nga mga Cristyano tungod nasanay sanda nga ginasunod ro Mosaikong Kasugoan. (Heb. 10:​1, 4, 10) Maskin ro hamtong nga mga Cristyano kapareho ni apostol Pedro hay nalisdan man nga sundon rayang mga pagbag-o. (Binu. 10:​9-14; Gal. 2:​11-14) Tungod sa rayang bag-o nga mga pagpati, ginhingabot it mga lider ku relihiyon it mga Judio ro mga Cristyano.

5. Sa ano dapat maghaeong ro mga Cristyano kato?

⁵ May daywang ka grupo nga nagakontra sa Hebreong mga Cristyano kato. Sambato kara hay ro relihiyusong lider it mga Judio nga nagatratar sa mga Cristyano pareho it apostata. Dugang pa, may pila nga mga Cristyano nga nagaaku nga mga sumoeunod sanda it Cristo pero padayon gihapon nandang ginasunod ro Mosaikong Kasugoan para indi sanda paghingabuton. (Gal. 6:12) Ano ro nakabulig sa mga Cristyano kato nga mangin matutom kay Jehova?

6. Ano ro ginpalig-on ni Pablo nga obrahon it anang mga isigka-Cristyano kato? (Hebreo 5:14–6:1)

⁶ Sa anang sueat para sa mga Hebreo, ginpalig-on ni Pablo ro anang mga isigka-Cristyano nga tun-an it mayad ro Bisaea it Dyos. (Basaha ro Hebreo 5:14–6:1.) Gingamit na  ro Hebreong Kasueatan agud ipaathag kanda nga mas mayad ro paagi it mga Cristyano sa pagsimba kay Jehova kaysa sa paagi it mga Judio. a Sayod ni Pablo nga kon abu ro andang nasayran ag naintindihan nanda ro kamatuoran, mas maeumo para sa mga Cristyano nga makilaea ag malikawan ro saea nga mga ideya nga pwede kandang magpataeang.

7. Ano ro mga kalisdanan nga atong naeksperyinsyahan makaron?

⁷ Pareho sa Hebreong mga Cristyano kato, naeksperyinsyahan man naton makaron ro saea nga mga impormasyon ag mga ideya nga kontra sa mga pagsueondan ni Jehova. Ginahambae it mga nagakontra katon nga sobrang strikto ro atong nabase sa Biblia nga pagpati parti sa sex. Ro mga ugali ag pagpati it mga tawo sa kalibutan hay nagaeayo nga nagaeayo sa kon ano ro pagtan-aw it Dyos sa mga bagay. (Hulu. 17:15) Ngani, dapat nga pabakuron naton ro atong ikasarang sa paghisayod ag paglikaw sa mga ideya nga ginagamit it mga nagakontra katon agud paeuyahon kita o pataeangon.​—Heb. 13:9.

8. Ano ro dapat natong obrahon agud mangin hamtong kita sa espiritwal?

⁸ Mayad gid kon tandaan naton ro pahanumdom ni Pablo sa Hebreong mga Cristyano kato nga padayon nga mangin hamtong sa espiritwal. Nagakahueogan ra nga dapat natong tun-an it mayad ro Biblia agud mas makilaea naton si Jehova ag matuead ro anang kaisipan. Maskin bautismado eon kita, dapat nga padayon naton rang obrahon. Mabuhay eon o bag-o paeang kita sa kamatuoran, dapat natong basahon ag tun-an it regular ro Bisaea it Dyos. (Sal. 1:2) Ro mayad nga rutina it personal nga pagtuon hay makabulig katon nga mapabakud ro sangka ugali nga ginpabahoe ni apostol Pablo sa anang sueat para sa mga Hebreo: ro pagtuo.​—Heb. 11:​1, 6.

RO PAGTUO HAY MAKAEUWAS SA ATONG KABUHI

9. Ham-an importante gid nga may mabakud nga pagtuo ro Hebreong mga Cristyano kato?

⁹ Kinahang-ean it Hebreong mga Cristyano kato ro mabakud nga pagtuo agud maeuwas sanda sa nagapaabot nga kasakitan sa Judea. (Heb. 10:​37-39) Nagpaandam si Jesus sa anang mga sumoeunod nga kon makita nanda ro Jerusalem nga napalibutan it nagakampo nga militar, kinahang-ean nanda nga magpaeagyo sa kabukiran. Rayang paandam hay para sa tanan nga Cristyano, nagaestar man sanda sa syudad it Jerusalem o sa maeapit nga mga baryo sa Judea. (Luc. 21:​20-24) Kon may mag-ataki kato nga militar, ro mga tawo hay nagaagto sa mga syudad tungod may pader ra nga makaprotekta kanda. Para kanda, ro pagpaeagyo sa kabukiran hay buko’t praktikal. Ngani, kinahang-ean gid ro mabakud nga pagtuo para masunod si Jesus.

10. Ano ro gin-obra it mga Cristyano kato tungod may mabakud sanda nga pagtuo? (Hebreo 13:17)

¹⁰ Kinahang-ean man it Hebreong mga Cristyano kato nga magsalig sa ginpili ni Jesus nga magpanguna sa kongregasyon. Ratong mga nagapanguna ro nagatao it espisipiko nga mga instruksyon sa kongregasyon kon hin-uno sanda magpaeagyo ag kon ano ro andang mga obrahon. (Basaha ro Hebreo 13:17.) Ro Griego nga termino nga gingamit sa Hebreo 13:17 para sa “tumana” hay nagatukoy sa isaeang ka tawo nga kumbinsido sa pagtuman tungod nagasalig imaw sa tawo nga nagtao it instruksyon. Bukon eang ra it basta pagtuman tungod sanda ro may awtoridad sa pagtao it instruksyon. Ngani, kinahang-ean it Hebreong mga  Cristyano nga palig-unon ro andang pagsalig sa mga nagapanguna kanda bago mag-abot ro kasakitan. Kon matinumanon nga nagasunod ro mga Cristyano sa mga nagapanguna kanda sa matawhay paeang nga panahon, mas madali eon kanda magsunod sa panahon it kalisdanan.

11. Ham-an kinahang-ean it mga Cristyano makaron ro mabakud nga pagtuo?

¹¹ Pareho it Hebreong mga Cristyano kato, kinahang-ean man naton ro pagtuo. Tungod nagakabuhi kita sa panahon nga kaeabanan nga mga tawo hay nagabalewala ag nagainsulto sa paandam it Biblia parti sa katapusan ku rayang sistema it mga bagay. (2 Ped. 3:​3, 4) Dugang pa, maskin ginahambae it Biblia ro mga detalye parti sa matabo sa mabahoe nga kasakitan, may mga bagay nga owa pa naton nasayran. Kinahang-ean gid naton it mabakud nga pagtuo kon mag-abot eon ro katapusan ku rayang sistema it mga bagay ag dapat kumbinsido gid kita nga buligan kita ni Jehova sa panahon ngaron.​—Hab. 2:3.

12. Ano ro makabulig katon agud maeuwas sa mabahoe nga kasakitan?

¹² Dapat man natong pabakuron ro atong pagtuo sa ginagamit ni Jehova nga paeaagyan makaron agud giyahan kita—“ro masaligan ag maaeam nga sueoguon.” (Mat. 24:45) Kon mag-umpisa eon ro mabahoe nga kasakitan, makabaton kita it espisipiko ag makaeuwas kabuhi nga mga instruksyon pareho sa habaton it Hebreong mga Cristyano kato kat ginpalibutan sanda it mga Romano. Raya eon ro panahon agud pabakuron naton ro atong pagsalig sa mga nababaton natong instruksyon halin sa mga nagapanguna sa organisasyon ni Jehova. Kon makaron paeang hay nalisdan eon kita nga magsunod sa mga instruksyon, mas malisdan gid kita kon mag-abot eon ro mabahoe nga kasakitan.

13. Ham-an importante gid ro pahanumdom sa Hebreo 13:5?

¹³ Habang ginahueat nanda ro instruksyon nga magpaeagyo, kinahang-ean it Hebreong mga Cristyano kato nga magkabuhi it simple nga ginalikawan ro “paghigugma sa kwarta.” (Basaha ro Hebreo 13:5.) May pila kanda nga nag-antus it tiggueotom ag kapobrehon. (Heb. 10:​32-34) Kon dati hay handa sanda nga magsakripisyo para sa mayad nga balita, posible nga may pila kanda nga nag-umpisa sa pagsalig sa proteksyon nga matao it manggad. Pero maskin mauno’t abu ro andang kwarta, indi gid ra makaproteksyon kanda sa magaabot nga pagkawasak it Jerusalem. (Sant. 5:3) Ro matuod, kon ro materyal nga bagay ro pinakaimportante sa kabuhi it sangka tawo, malisdan imaw sa pagpaeagyo ag pag-aywan sa anang baeay ag mga pagkabutang.

14. Paano ro mabakud nga pagtuo makaapekto sa atong mga desisyon makaron parti sa materyal nga mga bagay?

¹⁴ Kon mabakud ro atong pagtuo nga maeapit eon ro katapusan ku rayang sistema it mga bagay, makabulig ra katon nga malikawan ro materyalismo. Sa ratong panahon, “ihaboy nanda ro andang mga pilak sa mga daean” tungod marealisar nanda nga “maskin ro andang pilak o bueawan hay indi makaeuwas kanda sa adlaw it kaakig ni Jehova.” (Ezeq. 7:19) Imbes nga magpukos sa pagpaabu it kwarta, kinahang-ean naton nga magdesisyon agud pasimplehon ro atong kabuhi pero balanse gihapon. Eakip kara ro paglikaw nga mag-utang kon bukon man it kinahang-ean o sobra nga pagtao it atensyon sa atong pagkabutang. Likawan man naton nga mangin pinakaimportante sa atong kabuhi ro materyal nga mga bagay nga may una kita. (Mat. 6:​19, 24) Pwedeng matestingan ro atong pagtuo parti sa materyal nga mga bagay ag sa iba pa habang ginahueat naton ro pag-abot ku katapusan it rayang sistema.

 “KINAHANG-EAN MAGTIIS KAMO”

15. Ham-an kinahang-ean gid it Hebreong mga Cristyano kato ro pagtiis?

¹⁵ Kinahang-ean nga magtiis it Hebreong mga Cristyano kato sa andang pag-alagad kay Jehova habang nagalala ro sitwasyon sa Judea. (Heb. 10:36) Maskin nakaeksperyinsya ro pila sa Hebreong mga Cristyano kato it grabi nga paghingabot, abu ro nangin Cristyano sa panahon nga matawhay ro sitwasyon. Ginsambit ni Pablo nga maskin gintiis nanda ro andang naagyan nga mga pagtesting sa andang pagtuo, owa pa nanda naagyan ro pag-antus nga naeksperyinsyahan ni Jesus, ro pag-antus hasta sa punto it kamatayon. (Heb. 12:4) Pero habang nagaabu ro mga Cristyano, nagdugang man ro kaugot ag kapintas it mga Judio nga nagakontra kanda. Pilang dag-on bago ron, nagkagulo sa Jerusalem kat nagwali si Pablo. Sobra sa 40 nga mga Judio ro nagpanumpa nga “indi sanda magkaon ukon mag-inom hasta nga mapatay nanda si Pablo.” (Binu. 22:22; 23:​12-14) Maskin pa sayod nandang kaugtan ag pagahingabuton sanda, kinahang-ean gihapon it ratong mga Cristyano nga padayon nga magtipon sa pagsimba, magwali it mayad nga balita, ag magpadayon sa pagpabakud it andang pagtuo.

16. Paano makabulig katon ro sueat para sa mga Hebreo agud may tama kita nga pagtan-aw sa paghingabot? (Hebreo 12:7)

¹⁶ Ano ro nakabulig sa Hebreong mga Cristyano kato nga matiis ro mga paghingabot nga andang naeksperyinsyahan? Sayod ni Pablo nga kinahang-ean gid nanda ro tama nga pagtan-aw sa paghingabot. Ngani, ginpaathag na nga pwedeng pasugtan it Dyos nga matestingan ro atong pagtuo bilang parte it pagsanay sa mga Cristyano. (Basaha ro Hebreo 12:7.) Rayang mga pagsanay hay makabulig sa isaea nga mapauswag ro importante nga Cristyanong mga ugali. Kon magpukos ro Hebreong mga Cristyano sa mayad nga mga resulta it paghingabot, mangin mas maeumo kanda nga magtiis.​—Heb. 12:11.

17. Ano ro natun-an ni Pablo parti sa pagtiis it paghingabot?

 ¹⁷ Ginpalig-on ni Pablo ro Hebreong mga Cristyano kato nga mangin determinado nga tiison ro mga paghingabot. Makatao gid it mga pahanumdom si Pablo parti kara. Bilang dating manoghingabot it mga Cristyano, sayod na kon ano ro mga paghingabot nga andang maagyan. Sayod na man kon paano tiison ro iba-ibang klasi it paghingabot tungod naeksperyinsyahan na ra kat nangin Cristyano eon imaw. (2 Cor. 11:​23-25) Ngani, sigurado gid si Pablo kat ginhambae na kon ano ro kinahang-ean para makatiis. Ginpadumdom na ro mga Cristyano nga kon nagatiis sanda it mga paghingabot, kinahang-ean nanda nga magsalig buko’t sa andang sarili kundi kay Jehova. Naghambae si Pablo nga may kaisog: “Ro Ginuo [si Jehova] imaw ro akong Manogbulig, owa ako it kahadlokan.”​—Heb. 13:6.

18. Paano ro pagkasayod sa paeaabuton makabulig katon nga matiis ro paghingabot?

¹⁸ Ro pila sa atong mga igmanghod makaron hay nagatiis it mga paghingabot. Mapakita naton ro mainunongon nga pagsuporta kanda paagi sa pagpangamuyo ag pagbulig kanda sa praktikal nga mga paagi. (Heb. 10:33) Klaro nga ginahambae it Biblia nga ro “tanan nga gustong magkabuhi it dyosnon sa paghiusa kay Cristo Jesus pagahingabuton.” (2 Tim. 3:12) Tungod karon, kinahang-ean naton tanan nga magpahaum sa malisud nga panahon nga magaabot. Padayon kita nga magsalig gid kay Jehova ag makasigurado kita sa anang bulig nga matiis ro ano mang paghingabot nga atong maagyan. Sa insakto nga panahon, taw-an na it kapahuwayan ro tanan nga matutom nga nagaalagad kana.​—2 Tes. 1:​7, 8.

19. Ano ro praktikal nga mga paagi nga makabulig katon agud mangin handa sa mabahoe nga kasakitan? (Tan-awa man ro piktyur.)

¹⁹ Sigurado nga nakabulig gid sa unang siglo nga mga Cristyano ro sueat ni Pablo para sa mga Hebreo nga mangin handa sa kasakitan nga andang maagyan. Ginpalig-on ni Pablo ro anang mga igmanghod nga tun-an ag intindihon it mayad ro Kasueatan. Paagi kara, mas madali nandang masayran ag malikawan ro mga pagturo nga pwedeng magpaeuya sa andang pagtuo. Ginpalig-on na man sanda nga pabakuron ro andang pagtuo agud mangin handa sanda sa pagsunod sa mga instruksyon ni Jesus ag sa ratong mga nagapanguna sa kongregasyon. Ag ginbuligan na sanda nga mangin matiniison ag tan-awon nga ro mga paghingabot hay tsansa nga masanay sanda it andang mapinalanggaon nga Ama. Kabay nga iaplikar man naton rayang pahanumdom halin sa Biblia. Makabulig ra katon nga magtiis it matutom hasta sa katapusan.​—Heb. 3:14.