Indi kita dapat mag-isip nga ginsikway ni Jesus o gin-aywanan imaw ku 70 nga mga disipulo tungod owa eang sanda makaibahan sa una nga Paihapon ku Ginuo. Gusto eang ni Jesus nga makaibahan ro anang mga apostoles sa ruyong okasyon.

Ro 12 ag ro 70 hay pareho na nga mga disipulo. Una nga nagpili si Jesus it 12 nga mga eaki halin sa anang mga disipulo nga gintawag nana nga mga apostoles. (Luc. 6:​12-16) Habang sa Galilea, “gintawag ni Jesus ro Dose ka mga Apostoles” ag “ana sanda nga ginpadaea sa pagwali ku Ginharian it Dyos ag sa pagpamayad it mga masakiton.” (Luc. 9:​1-6) Kat sa Judea eon si Jesus, “nagpili [imaw] it 70 a nga iba pa ag ginpapanaw sanda it tigdaywa-daywa.” (Luc. 9:51; 10:​1, NWT.) Ngani, may mga disipulo si Jesus sa iba-ibang lugar nga nagawali parti kana.

Ginaselebrar gihapon it mga Judio nga nangin disipulo ni Jesus ro Paskwa kada dag-on, ag posible nga kaibahan ro andang mga pamilya. (Ex. 12:​6-11, 17-20) Habang nagapaeapit ro kamatayon ni Jesus, nag-agto imaw ag ro anang apostoles sa Jerusalem. Pero owa nana ginhambaean ro tanan na nga mga disipulo halin sa Judea, Galilea, ag Perea nga magtipon ag magselebrar it Paskwa nga magkaibahan. Ginapakita kara nga gusto ni Jesus nga ro mga apostoles eang ro anang makaibahan sa rayang okasyon. Ginhambae na kanda: “Mabuhay eon ro akong handum nga makisaeo kinyo sa raya nga paihapon sa owa pa ako mag-antus.”​—Luc. 22:15.

May mayad nga rason si Jesus sa pag-obra kara. Maeapit eon lang imaw mamatay bilang “ro Kordero it Dyos nga nagabuoe ku saea kung kalibutan!” (Juan 1:29) Matabo ra sa Jerusalem, kon siin igto ginahaead ro mga sakripisyo para sa Dyos. Ro kamatayon ni Jesus ro magatao it kalayaan nga mas mabahoe pa sa maobra it literal nga kordero nga ginakaon it mga Israelita sa gabii nga nakalaya sanda sa Ehipto. (1 Cor. 5:​7, 8) Tungod sa kamatayon ni Jesus, ro dose nga apostoles hay mangin parti it ginpatindog nga pundasyon it mga myembro ku Cristyanong kongregasyon. (Efe. 2:​20-22) Makapainteres nga ro baeaan nga syudad it Jerusalem hay may “12 ka mga bato” nga pundasyon nga nasueatan “ku mga ngaean ku 12 ka mga apostoles kung Kordero.” (Pah. 21:​10-14) Huo, ro matutom nga mga apostoles hay may importante nga papel sa pagtuman ku katuyuan it Dyos. Ngani, maintindihan naton kon ham-an gusto ni Jesus nga makaibahan na sanda sa pinakaulihi nga Paskwa ag sa kon ano ro mabueos kara—ro Paihapon ku Ginuo.

Ro 70 ag ro iba pang disipulo hay owa nakaibahan ni Jesus sa paihapon. Pero, ro tanan nga disipulo nga nangin matutom hay makabenepisyo gihapon sa gin-umpisahan ni Jesus—ro Paihapon ku Ginuo. Tanan nga mga disipulo nga nangin pinili nga mga Cristyano hay mangin parti it kasugtanan ku ginharian nga ginhambae ni Jesus sa mga apostoles sa ruyong gabii.​—Luc. 22:​29, 30.