Јердиҥ ӱстинде Чайык чын ла болгон. Кудай оны калју улусты јоголторго эткен. Је јакшы улусты ла тындуларды аргадап аларга, Кудай Нойго ковчег тутсын деп јакарган (Башталганы 6:11—20). Чайык чын ла болгон деп, бис алаҥзыбай бӱдер аргалу, нениҥ учун дезе ол керегинде Агару Бичимелде бичилген, а ол «Кудайдыҥ тыныла берилген» (2 Тимофейге 3:16).

•  Чын ба, тӧгӱн бе?

•  Чайык нениҥ учун болгон?

•  Чайык болор деп, улус билген бе?

•  Ковчег кандый болгон?

•  Ной ковчегти канча кире ӧйгӧ туткан?

•  Чайык керегинде кеп-куучындар ла чӧрчӧктӧр

 Агару Бичикле болзо, Ной чын ла болгон кижи. А Чайык улустыҥ сананып тапкан куучыны эмес, је чыннаҥ ла болгон учурал.

•   Агару Бичикти бичиген улус Ной чын ла болгон деп бӱткилеген. Темдектезе, Агару Бичикти бичииринде турушкан улус, Ездра ла Лука, тӱӱкичилер болгон. Олор Израиль албатыныҥ угы-тӧзин бичип турарда, Нойдыҥ угы-тӧзин база бичип салгылаган (1 Летопись 1:4; Лука 3:36). Анайда ок Матфей ле Лука Иисустыҥ Ной ло Чайык керегинде айткан сӧстӧрин база бичиген (Матфей 24:37—39; Лука 17:26, 27).

   Анайда ок судурчы Иезекииль ле апостол Павел Нойды Кудайга чындык ла бӱдӱмјизи бек кижи деп бичигендер (Иезекииль 14:14, 20; Еврейлерге 11:7). Ной чыннаҥ болбогон болзо, олор бисти оноҥ тем алзын деп кӱӱнзедер беди? Ной до, Кудайдыҥ ӧскӧ дӧ чындык ишчилери чын ла болгон улустар, оныҥ да учун бис олордоҥ тем алып турбай (Еврейлерге 12:1; Иаков 5:17).

•   Агару Бичикте Чайык керегинде оок-теек јетирӱлер бар. Анда Чайык керегинде чӧрчӧктӧрдӧ чылап «озо-озо чактарда болгон» деп сӧстӧрдӧҥ башталбай јат. Карын, Агару Бичикте Чайыктыҥ болгон јылы, айы, кӱни, оноҥ до ӧскӧ оок-теек јетирӱлери бичилип калган (Башталганы 7:11; 8:4, 13, 14). Анайда ок Нойдыҥ туткан ковчегиниҥ тууразы, узуны, бийиги канча кире болгоны база бичилген (Башталганы 6:15). Айдарда, Чайык — улустыҥ сананып тапкан куучыны эмес, је чын ла болгон учурал.

 Агару Бичикте Чайыктыҥ алдында «јер-ӱстинде улустыҥ кинчек-јаманы ажынып» калган болгон деп бичилет (Башталганы 6:5). Анайда ок «јердеҥ Кудайдыҥ кӱӱни јанган: ол неге де јарабас болуп ӱрелип, јаман керектерле толгон», не дезе јерде базыныш ла јескинчилӱ керектер кӧптӧгӧн (Башталганы 6:11; Иуда 6, 7).

 Јердиҥ ӱстиндеги мындый јаман айалга ӱй улусла конорго јерге тӱшкен калју ангелдердеҥ улам башталган. Бу ангелдердиҥ балдары нефилимдер болгон, олор улуска коркышту кӧп каршузын јетирген (Башталганы 6:1, 2, 4). Оныҥ учун Кудай јерди јаманнаҥ арутап, јакшы улуска јаҥы јӱрӱм баштайтан арга берген (Башталганы 6:6, 7, 17).

 Эйе. Кудай Нойго Чайык болор деп айдып, оныҥ билезин ле анайда ок тындуларды аргадаарга ого ковчег тутсын деп јакарган (Башталганы 6:13, 14; 7:1—4). Ной улуска келер тӱбек керегинде куучындаган, је олор оныҥ сӧстӧрин керекке албаган (2 Пётр 2:5). Агару Бичикте айдылганыла, улус «чайык чыгып ончозын кырганча... нени де сананбай јӱргендер» (Матфей 24:37—39).

 Ковчег бӱдӱмиле узун кайырчакка тӱҥей болгон. Оныҥ узуны — 133 метр кире, тууразы — 22 метр кире, бийиги — 13 метр кире болгон a. Ол агаштаҥ эдилген, оныҥ тышты да, ичи де чаганала сӱркӱштелген. Ковчегте ӱч этаж ол эмезе ӱч палуба болгон, анайда ок кӧп кыптар болгон. Ковчегтиҥ келтейинде эжик болгон, а ӱсти јаныла кӧзнӧктӧр эдилген болор. Оныҥ јабынтызы эки јанынаҥ суу агар этире келтейте эдилген болор (Башталганы 6:14—16).