Јаҥы телекейдиҥ тӧзӧмӧли эмди салынат
11-чи бӧлӱк
Јаҥы телекейдиҥ тӧзӧмӧли эмди салынат
1, 2. Бистиҥ кӧзибистиҥ алдында не болот, Библияныҥ судуры незиле бӱдет?
БАЗА бир кайкамчылу неме ол, эмди ле тургуза ӧйдӧ Сатананыҥ эски телекейиниҥ учы јууктап келедерде, Кудайдыҥ јаҥы телекейиниҥ тӧзӧмӧли салынып турганы. Бистиҥ кӧзибистиҥ алдына колбузы јок телекейди удабас солыйтан эл-јонды Кудай ончо албатылардыҥ улустарынаҥ јууп, олордоҥ јаҥы јердиҥ тӧзӧмӧлин баштап јат. Библияда 2 Петрдыҥ 3:13 -те бу јаҥы эл-јон «јаҥы јер» деп адалат.
2 Библияныҥ судуры анайда ок айдат: «Калганчы кӱндерде [бис јадып турган ӧйдӧ]... кӧп албатылар баргылап, айдыжар: келигер, Кайраканныҥ кырына чыгарыбыс [оныҥ чындык бажырыжы]... Ол бистерди Бойыныҥ јолдорына ӱредер; Оныҥ орук јолдорыла јӱрерис» (Исаия 2:2, 3).
3. а) Исаияныҥ судуры кемдер ортодо бӱдет? б) Ол керегинде Библияныҥ калганчы бичиги канайда айдат?
3 Бу судур эмди «Кудайдыҥ јолдорына» багынып, «Оныҥ орук јолдорыла јӱргендерге» бӱдӱп јат. Библияныҥ калганчы бичигинде бу амыр-энчӱ сӱӱп, биригип Кудайга иштеп турган, чындык телекейлик карындаштык јон керегинде «ончо уктардаҥ ла ӱйелердеҥ, албатылардаҥ ла тилдердеҥ... сӱрекей кӧп улус» деп айдылат. «Бу улус, улу ачу-коронноҥ келгендер» — деп, Библия анайда ок айдат. Олор бу јаман телекейдиҥ учында аргаданып чыгарын бу темдектейт (Откровение 7:9, 14; Матфейдеҥ 24:3).
Чындык телекейлик карындаштык
4, 5. Иегованыҥ Керечилериниҥ телекейлик карындаштыгыныҥ бары канайда аргалу болгон?
4 Миллиондор тоолу Иегованыҥ Керечилери Кудайдыҥ јакаруларыла, јолдорыла акту јӱректеринеҥ јӱрерге албадангылайт. Олордыҥ ӱргӱлји јӱрӱмге калганчы ижемјизи — Кудайдыҥ јаҥы телекейи. Кудайдыҥ јасактарын бӱдӱрип тура, олор эмдиги ӧйдӧ лӧ јаҥы телекейде башкаруныҥ бӱдӱмине багынарга беленин кӧргӱскилеп јат. Бойлорыныҥ угы-тӧзин, терезиниҥ ӧҥин кӧргилебей, олор бастыра јаҥыс некелтелерге багынат — ол некелтелер Кудайдыҥ Сӧзинде тургузылган. Бот нениҥ учун олор — чындык телекейлик карындаштык, Кудайдыҥ тӧзӧгӧн јаҥы телекейлик эл-јоны (Исаия 54:13; Матфейдеҥ 22:37, 38; Иоаннаҥ 15:9, 14).
5 Иегованыҥ Керечилери кайкамчылу телекейлик карындаштыкту болгоны учун, макты бойлорына алынгылабай јат. Кудайдыҥ јасактарын бӱдӱрип турган улус оны Кудайдыҥ јаан тыныныҥ салтарыныҥ једими деп олор айдат (Деяниелер 5:29, 32; Галаттарга 5:22, 23). Бу — Кудайдыҥ кереги. Иисус айткан чылап: «Улус эдип болбос немени Кудай эдип ийер» (Луканаҥ 18:27). Анайдарда, бек теҥери-телекейди эдип ийер аргалу болгон Кудай, анайда ла ок бек колбуларлу эл-јонды да эдер аргалу.
6. Иегованыҥ Керечилериниҥ карындаштыгын нениҥ учун эмдиги ӧйдиҥ кайкалы деп адарга јараар?
6 Анайдарда, Кудайдыҥ јаҥы телекейле башкараар аайын, Оныҥ Бойыныҥ эмди баштап салган јаҥы телекейлик тӧзӧмӧлинеҥ кӧрӧргӧ јараар. Ого ӱзеери, Бойыныҥ Керечилери јанынаҥ эткен ижи, чынынча — эмдиги ӧйдиҥ кайкалы. Нениҥ учун? Нениҥ учун дезе Иегованыҥ Керечилеринеҥ Ол угы-тӧзиниҥ, терезиниҥ ӧҥиниҥ, кудайлык јаҥыныҥ јилбӱлериниҥ тартыштарынаҥ улам качан да јайрадылбас телекейлик карындаштык тӧзӧп салган. Иегованыҥ Керечилериниҥ тоозы миллиондор болуп, 200 -теҥ ажыра талаларда јадып тургулаган да болзо, олор бек колбуларла булагандый бир буудый. Бу бастыра тӱӱкиликте кайкамчылу телекейлик карындаштык чыннаҥ ла эмдиги ӧйдиҥ кайкалы — Кудайдыҥ кереги — болуп јат (Исаия 43:10, 11, 21; Деяниелер 10:34, 35; Галаттарга 3:28).
Кудайдыҥ албатызын таныыры
7. Иисустыҥ сӧстӧриле, Оныҥ јолыла чындык барып јаткандар канайда танылар?
7 Кудай Бойыныҥ јаҥы телекейиниҥ тӧзӧмӧлине кандый улусты тузаланып турганын база канайып танып ийерге јараар? Темдектезе, Иоанныҥ 13:34, 35 -те Иисустыҥ сӧстӧрин кем бӱдӱрет? Ол јарлаган: «Слерге јаҥы јакылта берип јадым, бой-бойыгарды сӱӱгер; Мен слерди канайып сӱӱгем, слерлер анайып ла бой-бойыгарды сӱӱгер. Бой-бойыгардыҥ ортогордо сӱӱш болзо, мынаҥ улам ончозы слерди Мениҥ ӱренчиктерим деп таныгылар». Иегованыҥ Керечилери Иисустыҥ сӧстӧрине бӱткилеп, ого келиштире јӱргӱлейт. Кудайдыҥ Сӧзиниҥ ӱреткениле, олор «бой-бойлорына кичеҥкей сӱӱштӱ» (1 Петрдыҥ 4:8). Олор «сӱӱшке кийинип алдылар, нениҥ учун дезе ол бирликтиҥ бийик кеминдеги колбузы» (Колоссяндарга 3:14). Анайдарда олорды ончо телекейде бириктирип турган неме — карындаштык сӱӱш.
8. 1-кы Иоанныҥ 3:10—12-де айдылганыла, Кудайдыҥ албатызы база канайда танылат?
8 1 Иоанныҥ 3:10 —12-де анайда ла ок айдылып јат: «Кудайдыҥ балдарыла Сатананыҥ балдары мынайда танылат: кажызы ла, чындыкты этпей турганы, Кудайдаҥ эмес, ого тӱҥейлеп бойыныҥ аказын сӱӱбей турганы. Нениҥ учун дезе башталганынаҥ бери слер укканарла, бистер бой-бойлорысты сӱӱзин деп јетирӱ болгон, је тӧгӱнчиниҥ болуп, бойыныҥ аказын ӧлтӱрген Каиндий чилеп эмес». Оныҥ учун Кудайдыҥ албатызы телекейлик карындаштык болуп, јаман керектерге турушпайдылар.
База бир аҥылу темдек
9, 10. а) Калганчы кӱндерде Кудайдыҥ ишчилерин кандый иш аайынча танып ийерге јараар? б) Матфейдеҥ 24:14 -ти Иегованыҥ Керечилери канайда бӱдӱрет?
9 Кудайдыҥ ишчилерин танып ийер база бир арга бар. Иисус телекейдиҥ учы керегинде Бойыныныҥ судурында бу ӧй калганчы кӱндер болуп нени учурлаар деген темдер тоолоп берди (9 -чы бӧлӱкти кӧр). Ого кирип турган судурлардыҥ бирӱзинде, Матфейдеҥ 24:14 -тӧ айдылат: «Бу Каандыктыҥ Јакшылыкту Јары бастыра јер-телекейде ончо албатыларга керелеп јарлалган соондо, ол тушта учы-тӱби келер».
10 Бу судурдыҥ бӱдӱп турганын бис кӧрӧдис пе? Эйе, кӧрӧдис. 1914 јылдаҥ бери, качан калганчы кӱндер башталарда, Иегованыҥ Керечилери Иисустыҥ кӧргӱзип берген эп-аргазыла Кудайдыҥ Каандыгы керегинде јакшылыкту јетирӱни айылдар сайын бастыра јер-телекейле куучындагылайт (Матфейдеҥ 10:7, 12; Деяниелер 20:20). Миллиондор тоолу Керечилер ончо талаларда улустарла јаҥы телекей керегинде куучындажарга олорго баргылайт. Сен бу бичикти алдыҥ, нениҥ учун дезе Кудайдыҥ Каандыгы керегинде бичиктерди миллиондор экземплярларга кепке базып таркадары Иегованыҥ Керечилериниҥ ижине кирет. Телекейлик масштабта айылдаҥ-айылга куучындап турган улустаҥ сен база кемди-кемди билериҥ бе? Марктаҥ 13:10 кӧргӱскениле, учы-тӱби келердеҥ «озо» куучындаганы ла ӱреткени ӧткӱрилип калар учурлу.
Экинчи улу тартышту сурактыҥ каруузы
11. Иегованыҥ Керечилери Кудайдыҥ башкарузын алынып, база неге јединедилер?
11 Кудайдыҥ јасактарын ла јакылталарын бӱдӱрип тура, Иегованыҥ Керечилери база бир једимге једет. «Улус тыҥ ченелтеде болуп, Кудайга чындык артып болбос» деген Сатананыҥ сӧстӧрин олор тӧгӱн деп кӧргӱстилер. Анайып олор кижиниҥ чындыгыла колбулу экинчи улу тартышту суракка каруузын бергилейт (Иов 2:1—5). Ончо албатылардаҥ миллиондор улус бир биригӱ кӱрее тӧзӧп, Керечилер Кудайдыҥ башкарузына чындыгын кӧргӱзет. Олор Сатанага кыстадып, бийик кеминде эмес те болзо, Иегова Кудай эҥ бийик деген тартышту суракта Кудайдыҥ јанында тургулайт.
12. Керечилер бойыныҥ бӱдӱмјизинде кемге тӱҥейлежет?
12 Бӱгӱн Иегованыҥ миллиондор Керечилери бойлорыныҥ керелерин алдындагы ӧйдиҥ Кудайга беринген чындык керечилердиҥ тоозына бириктирет. Олордыҥ бир-кезигин эске алза ол: Авель, Ной, Иов, Авраам, Сарра, Исаак, Иаков, Девора, Руфь, Давид ле Даниил (Еврейлерге 11-чи бажалык). Библияныҥ айтканыла, олор «булуттый керечилер» (Еврейлерге 12:1). Олор ло олордоҥ до ӧскӧлӧри, бого Иисустыҥ ӱренчиктерин кошкондо, Кудайга чындыгын кичегендер. Иисус Бойы да бийик кеминде чындыгын кичееп, улу тем кӧргӱсти.
13. Сатана керегинде чынды Иисустыҥ кандый сӧстӧри керелейт?
13 Иисус кудайлык јаҥдардыҥ башкараачыларына Сатана керегинде айтканын бу керелейт: «Эмди дезе, Кудайдаҥ уккан чындыкты слерге айткан Кижини, Мени, ӧлтӱрерге бедиренедигер... Слердиҥ адагар Сатана, слер адагардыҥ кычазын бӱдӱрерге јадыгар; ол эҥ баштапкызынаҥ бери кижи ӧлтӱреечи болуп, чындыкка турбай калган, не дезе ондо чындык јок; качан ол тӧгӱндеп турза, ол бойындыйын айдат, нениҥ учун дезе ол тӧгӱнчи ле тӧгӱнниҥ адазы» (Иоаннаҥ 8:40, 44).
Сен нени талдап аларыҥ?
14. Јаҥы телекейдиҥ тӧзӧмӧлиле эмди не болуп јат?
14 Иегованыҥ Керечилеринеҥ Кудай тӧзӧп јаткан телекейлик биригӱ кӱреези, Јаҥы телекейдиҥ тӧзӧмӧли, там ла ары тыҥып јат. Кажы ла јыл јӱс муҥдар улус чике билгирге тӧзӧлӧнип, бойлорыныҥ јайым кӱӱн-табыла тузаланып, Кудайдыҥ башкарузын алынат. Олор јаҥы телекейдиҥ эл-јоныныҥ бӧлӱги болуп, Кудай эҥ ле бийик деген тартышту суракта Кудайдыҥ јанына тургулап, Сатананы тӧгӱнчи деп керелегилейт.
15. Келер ӧйдӧ Иисус кандый ылгашту иш ӧткӱрер?
15 Христос «койлор» ло «эчкилер» ылгаштырар ӧйдӧ, олор Кудайдыҥ башкарузын јарадып, Христостыҥ «оҥ колыныҥ јанына» турарга јарамыкту болгылаар. Калганчы кӱндер керегинде бойыныҥ судурында Иисус айткан: «Ончо албатылар Оныҥ алдына јуулыжар, Ол олорды койчы койлор ло эчкилерди ылгагандый бой-бойлорынаҥ ылгаар. Ол бойыныҥ оҥ колыныҥ јанына койлорды тургузар, эчкилерди сол колыныҥ јанына тургузар». Койлор — ол, Христостыҥ карындыштарыла биригип, олорго болужын јетирип, Кудайдыҥ башкарузына багынган јобош улус. Эчкилер — ол, Кудайдыҥ башкарузын керексибей, Христостыҥ карындаштарын јектеген тескери улус. Учы-тӱби кандый болгой не? Иисус јарлайт: «Чындык эмес улус [эчкилер] ӱргӱлјиге јаргыладар, а чындык улус [койлор] ӱргӱлји јӱрӱмге аткарылгылаар» (Матфейдиҥ 25:31—46, «Јакшылыкту Јетирӱ Кудайдаҥ»).
16. Сен келер сӱрекей јараш јердиҥ ӱстине јӱрер кӱӱндӱ болзоҥ, сеге нени эдер керек?
16 Кудай чын ла бистерди кичееп јат! Удабастаҥ Ол кайкамчылу сӱрекей јараш јер берер. Сен ол сӱрекей јараш јерге јӱрер кӱӱниҥ бар ба? Эйе болзо, Кудай керегинде билгириҥди тереҥжидип, билип алганыҥа келиштире јӱргениҥле, Кудайдыҥ иштерине бойыҥныҥ быйаныҥды кӧргӱс. «Кайраканды табар арга бар болзо, бедирегер; качан Ол јуук болзо — адагар Оны. Чындык эмес кижи јолын артыргыссын, јасагы јок кижи — сагыштарын артыргыссын, Кайраканга баштанзын, Ол ого јобош болор» (Исаия 55:5, 6).
17. Кемге иштеер деген талдашта нениҥ учун ӧй јылыйтарга јарабас?
17 Ӧй јылыйтарга јарабас. Бу калју телекейдиҥ учы сӱреен јуук. Кудайдыҥ Сӧзи јӧп берет: «Эл-јонды ла эл-јондогы не-немелерди сӱӱбегер: кем эл-јонды сӱӱп турган, ондо Адабыстыҥ сӱӱжи јок... Эл-јон ло оныҥ кычазы ӧдӱп јат, а Кудайдыҥ кӱӱн-табын бӱдӱрип тургандар чактыҥ-чакка јӱрер» (1 Иоанныҥ 2:15—17).
18. Кудайдыҥ кайкамчылу јаҥы телекейин бӱдӱмјилӱ сакыыр арганы сеге кандый эдетен керектер берер?
18 Эмди Кудайдыҥ албатызы јаҥы телекейде ӱргӱлји јӱрӱм јӱрерине ӱренет. Ол јараш јерди орныктырар ич-кӧгӱстик ле ӧскӧ дӧ керектӱ ӱредӱ алынат. Бис сени Кудайды, Башкараачыны, талдап алзын деп ле эмди бастыра јердиҥ ӱстинде јӱрӱм аргадар ишти јаратсын деп јӧп бередис. Иегованыҥ Керечилериле Библияны ӱренип, чыннаҥ ла бистерди кичееп, кыйын-шыраны јоголтор Кудай керегинде билгириҥди кӧптӧт. Анайып сен бойыҥ јаҥы телекейдиҥ тӧзӧмӧлиниҥ бӧлӱги болорыҥ. Ол тушта сен алаҥзу јогынаҥ Кудайдыҥ јалакайын кӧрӱп, бу кайкамчылу јаҥы телекейде јӱрӱмди сакыыр аргалу болорыҥ.
[Ӱренериниҥ сурактары]
[31 бӱктеги јурук]
Иегованыҥ Керечилери чындык телекейлик карындаштыкты тӧзӧгилеп јат.
[32 бӱктеги јурук]
Кудайдыҥ јаҥы телекейиниҥ тӧзӧмӧли эмди салынат.
