9-чы бӧлӱк

Бис «калганчы кӱндерде» јадып турганысты кайдаҥ билерис

1, 2. Бистер калганчы кӱндерде јадып турганысты кайдаҥ билерис?

 КУДАЙДЫҤ Каандыгы эмдиги кижиликтиҥ башкарузыныҥ системазына удура туруп чыгар ӧйдӧ бис јадып турганыс деп канайып бис бӱдӱмјилӱ болорыс? Кудай ончо јаманга ла шырага учын салып токтодор ӧй сӱреен јуук деп, кайдаҥ бис билерис?

² Бу ла мыны Иисустыҥ ӱренчиктери билер кӱӱндӱ болгылаган. Олор оныҥ каандыкла башкараар тужында ла «чактыҥ учында» кандый «темдек» болоры керегинде сурагылады (Матфейдеҥ 24:3). Иисус каруузын берип, телекейди кайкадатан учуралдарды ончо чике айтты. Ол учуралдар бойыныҥ айалгаларыла кижилик бу телекейдиҥ «ӧйиниҥ учына», «калганчы кӱндерине» јеткенин кӧргӱзер (Даниил 11:40; 2 Тимофейге 3:1). Бу јӱсјылда мындый колбош темдекти бис кӧрӧдис пе? Эйе, керек дезе ажындыра кӧрӧдис!

Телекейлик јуу-согуштар

3, 4. Бу ХХ-чи чактыҥ јуу-согуштары Иисустыҥ судурларына канайып келижет?

³ «Албаты албатыга, каандык каандыкка тӱймееп чыгар» — деп, Иисус озолодо айткан болгон (Матфейдеҥ 24:7). 1914 јылда бастыра телекей алдында јуу-согуштарга кӧрӧ, албатылардыҥ ла каандыктардыҥ јуу-согушка барганынаҥ аҥыланган јуу-согушка тартырткан. Бу чын болгон айалгала јӧпсинип, ол јууны тӱӱкичилер бир ӧйдӧ «Улу јуу-согуш» деп адап тургылаган болгон. Тӱӱкиликте бу баштапкы мындый јуу-согуш болгон, баштапкы телекейлик јуу-согуш. 20 000 000 кирези јуучылдарла тегин улустар јӱрӱмин јылыйткандар, бу тоо  мынаҥ озо болгон јууларда ӧлгӧндӧргӧ кӧрӧ канча кире кӧӧп.

⁴ Баштапкы телекейлик јуу-согуш калганчы кӱндердиҥ башталганын темдектеди. Бу учуралдар ла ӧскӧ дӧ учуралдар «оорулардыҥ башталганы» болор деп Иисус айткан (Матфейдеҥ 24:8). Бу чын болуп калды, нениҥ учун дезе экинчи јуу-согуш оноҥ тыҥ бускалаҥду болгон — 50 000 000 кирези јуучылдар ла тегин албаты јӱрӱмдерин јылыйткылады. ХХ-чи чакта јуу-согуштарда текши тоозыла 100 000 000 кирези кижилер ӧлтӱрткен, бу тоо алдына 400 јылдыҥ туркунына ӧлтӱрткен улуска кӧрӧ тӧрт катапка кӧп! Кандый јаан буру кижиликтиҥ башкарузында јадат!

Ӧскӧ керелер

5—7. Бис калганчы кӱндерде јадып турганыс деп база кандый ӧскӧ керелер бар?

⁵ Иисус калганчы кӱндерде болотон ӧскӧ дӧ темдектерди айткан: «Јаан јерсилкиништер, кезектей ачана-торо, оору-јобол [југуш оорулар]... болор» (Луканаҥ 21:11, ТК). Бу 1914 јылда башталган јетирӱлерге чик јок келижет, нениҥ учун дезе бу јеткерлер кыйын-шыраларды коркушту кӧптӧткӧн.

⁶ Јаантайын ла ал-камык тоо јӱрӱм апарып турган јаан јерсилкиништер болот. Јаҥыс ла испанка деген баштапкы телекейлик јуу-согуштыҥ кийнинде башталган грипп 20 000 000 кижини ӧлтӱрген, кезик тоолошторло 30 000 000 эмезе оноҥ до кӧп. Јӱс муҥдар јӱрӱмди СПИД апарат, узак эместеҥ база да миллиондор јӱрӱмди апарардаҥ айабас. Кажы ла јыл миллиондор тоолу улус, јӱректиҥ оорузынаҥ, рактаҥ ла ӧскӧ дӧ оорулардаҥ божогылап јат. Ӧскӧ миллиондор јӱргери торо ӧлӱмле ӧлгӱлейт. 1914 јылдаҥ бери јууларды, курсак-тамактыҥ једикпезин ле југуш ооруларды эчидип алган Откровение деген бичикте бичилген «таҥ аттарлу улустар» алаҥзу јогынаҥ кижиликтиҥ билезиниҥ коркуш кӧп улустарын ӧлтӱргилейт (Откровение 6:3—8).

⁷ Анайда ок Иисус курмакчы керектер кӧптӧӧрин озолодо айткан, бис эмди оны база кӧрӧдис. Ол айткан: «Јасак јогы кӧптӧгӧнинеҥ улам, кӧп улуста сӱӱш соор» (Матфейдеҥ 24:12).

8. Тимофейдиҥ 2-⁠чи јетирӱзиниҥ 3 -⁠чи бажалыгында судур бистиҥ ӧйгӧ канайып келижет?

⁸ Оныҥ кийнинде библиялык судур мораль јабызаар деп озолодо айткан, эмди ол јарт кӧрӱнет: «Калганчы кӱндерде кӱч ӧйлӧр башталар. Оныҥ учун улус бойлорын сӱӱр, акча сӱӱр, улуркак, чӱмеркек, тили коронду, ада-энезиниҥ сӧзин укпас, быйанын јетирбес, ак-чеги јок, кыйгас, јӧпсинишпес, копчы, тудунып болбос, казыр, јакшыны сӱӱбес, садынчак, уйалбас, теркеек, кычаны Кудайга кӧрӧ кӧп сӱӱр, тыш бӱдӱми чындык ла ак-санаалудый, је оныҥ кӱчтеринеҥ кыйыжып калган болор... Калју ла тӧгӱнчи улустар јаман керектерге ты ҥып ӧзӧр» (2 Тимофейге 3:1—13). Бу ӱзе бистиҥ ле кӧзиске бӱдӱп калды.

База бир шылтак

9. Теҥериде кандый учурал јердеги калганчы кӱндер башталганыла келишти?

⁹ Бу јӱсјылда кыйын-шыра коркушту кӧптӧп турганы учун каруулу база бир шылтак бар. 1914 јылда калганчы кӱндердиҥ башталганыла келишкен, кижиликти јаан јеткердиҥ алдына тургускан коркушту учурал болды. Библияныҥ калганчы бичигиниҥ судурыныҥ јетирӱзиле, ол ӧйдӧ «теҥериде јуу-согуш болгон: Михаил [теҥериде башкарып турган Христос] ле Ангелдери јелбегенге [Сатанага] удура јуулашты, Јелбеген ле оныҥ ангелдери [кӧрмӧстӧри] олорго удура јуулашты, је туруп болгылабады, теҥериде олорго база јер табылбады. Бастыра телекейдиҥ санаазын булгап турган Сатана ле јелбис деп адалып турган улу јелбеген, јебрен јылан, јер јаар тӱжӱре ташталган, оныҥ ангелдери оныла кожо тӱжӱре ташталган» (Откровение 12:7—9).

10, 11. Сатана ле оныҥ кӧрмӧстӧри јер јаар таштатканы кижиликке кандый салтарын јетирди?

¹⁰ Бу кижиликтиҥ билезине кандый салтарын јетирди? Судур оноҥ ары айдат: «Јерде ле талайда јадып тургандарга ачу-корон, нениҥ учун дезе слерлерге коркушту казыр јелбис тӱжӱп келди, ого кӧп эмес ӧй арткан деп ол билер!» Чын, Сатананыҥ бийленижи учына једип келеткен деп ол билер, оныҥ учун оныҥ системазыла ол бойы јоголтыларыныҥ алдында ол улусты Кудайдаҥ туураладарга бар-јок кӱчин салат (Откровение 12:12; 20:1—3). Бу кӧскӧ кӧрӱнбес тындар јайым кӱӱндериле каршу тузаланганда кандый јаман, јӧй болгылап калган. Олордыҥ салтарынаҥ улам, анчада ла 1914 јылдаҥ бери, јерде кандый јеткерлӱ айалгалар болуп калган!

¹¹ «Јердиҥ ӱстинде албатыларда санааркаш ла алаҥзыш... телекейге келип јаткан коркыштаҥ улус јеткер сакып, коркып, тындары чыгар» — деп, Иисустыҥ бистиҥ ӧйгӧ озолодо айтканы кайкамчылу эмес (Луканаҥ 21:25, 26).

Кижиликтиҥ ле кӧрмӧстӧрдиҥ башкарузыныҥ учы јуук

12. Бу система божордоҥ озо, кандый калганчы артып калган судурлардыҥ бирӱзи бӱдер учурлу?

¹² Кудай эмдиги калју телекейди јоголтордоҥ озо, база канча кире бӱтпеген судурлар артты? Кӧп эмес. Калганчы судурлардыҥ бирӱзинде 1 Фессалоникийецтерге 5:3-те айдылат: «Качан „амыр-энчӱ ле иженчи“ деп айдыжып турза, ол тушта кенетийин олорго каршу једижер». Бу калју телекейдиҥ учы «качан айдыжып турза», ол тушта башталар деп бу кӧргӱзет. Качан кижиликтиҥ ајарузы улустыҥ сакып турган келер амыр-энчӱ ле иженчизинде болзо, качан тӱбекти улус сакыбай турза, ол тушта сакыбас јанынаҥ јоголтыш келер.

13, 14. Иисус кандый тӱбектиҥ ӧйи керегинде судурлаган ла ол неле божоор?

¹³ Сатананыҥ салтарында бу телекейдиҥ ӧйи тӱгенип келедири. Иисустыҥ тӱбек керегинде айткан ӧйинде бу телекейдиҥ учы келер: «Ол тушта улу тӱбек болор, ондый тӱбек телекей башталганынаҥ ала эмдиге јетире болбогон до, база болбос» (Матфейдеҥ 24:21).

¹⁴ «Улу тӱбектиҥ» эҥ бийик једими Кудайдыҥ Армагеддон деген јуу-согужында болор. Даниил судурчыныҥ сӧстӧриле бу, Кудай «бастыра каандыктарды јоголтотон» ӧй болор. Бу Кудайдаҥ камааны јок иштеп турган кижиликтиҥ ончо башкаруларыныҥ учын темдектеер. Оныҥ теҥеридеги каандык башкарузы улустыҥ бастыра керектерин ајаруга алар. Башкару база качан да «ӧскӧ албатыга» берилбес деп, Даниил озолодо айткан (Даниил 2:44; Откровение 16:14—16).

15. Сатана ла оныҥ кӧрмӧстӧриниҥ салтарыла не болор?

¹⁵ Ол ӧйдӧ Сатана ла оныҥ кӧрмӧстӧриниҥ бастыра јаман салтары токтодылып калар. Бу кӧскӧ кӧрӱнбес тӱймеп чыккан јайаандар «албатыларды јилбиркедер» аргазы јок болор эдип јоголтылар (Откровение 12:9; 20:1—3). Олор ӧлӱмге јаргылаткан, олорды јоголтыш сакып јат. Кижилик олордыҥ јӧй лӧ јаман салтарынаҥ айрылза кандый јеҥил боло берер!

 Кем тирӱ артар? Кем артпас?

16—18. Бу системаныҥ учында кем тирӱ артар, кем артпас?

¹⁶ Бу телекейге Кудайдыҥ јаргызы келзе кем тирӱ артар? Кем тирӱ артпас? Библияныҥ кӧргӱскениле, Кудайдыҥ башкарузын кӱӱнзеп тургандар коруладып, тирӱ арткылаар. Кудайдыҥ башкарузын кӱӱнзебей тургандар корулалбас, је Сатананыҥ телекейиле кожо јоголтылар.

¹⁷ Притчаларда 2:21, 22-де айдылат: «Чындык улус [Кудайдыҥ башкарузына багынып тургандар] јердиҥ ӱстине јадар, ак-чек улус ондо јӱрер; а јасакјоктор [Кудайдыҥ башкарузына багынбай тургандар] јердиҥ ӱстинеҥ јоголтылар ла курмакчылар оноҥ јайладылар».

¹⁸ Псалом 36:10, 11-де анайда ла айдылат: «База эмеш ле, оноҥ ак-чеги јок кижи јок болуп калар... Јобош улус јерди энчиркенер, толо амыр-энчӱле јилбиркеп јакшызынып јӱрер», 29-чы ӱлгер кожот: «Чындык улус јерди энчиркенип, чактыҥ-чакка ондо јадар».

19. Биске кандый јӧпти јӱрегиске алынар керек?

¹⁹ Псалом 36:34-тӧ: «Кайраканга ижен, Оныҥ јолынаҥ тудун; јерди сени энчиркензин деп Ол сени кӧдӱрип апарар; качан чындыгы јок улус јоголтылып јатса, сен кӧрӧриҥ» — деп, айдылган јӧпти бистерге јӱрегиске алар керек. 37-чи ле 38-чи ӱлгерлерде айдылат: «Ак-чек кижини ајарып тур, чындык кижини кӧрӱп тур; нениҥ учун дезе ондый кижиниҥ келер ӧйи — амыр-энчӱ. А јасак јоктор ончозы јоголтылар; ак-чеги јок кижиниҥ келер ӧйи јоголтылар».

20. Кайкамчылу ӧйдӧ јадып турганыс деп нениҥ учун бис айдар аргалу?

²⁰ Кудай бисти кичееп турган ла Ол удабастаҥ чыннаҥ ла ончо јаманды ла кыйын-шыраны јоголторын билерде кандый токуналду ла кӧдӱрӱҥилӱ! Бастыра бу кайкамчылу судурлардыҥ бӱдер ӧйи ондый јуук деп билерде, кандый јакшы!

[Ӱренериниҥ сурактары]

[20 бӱктеги јурук]

Библия калганчы кӱндердиҥ «темдегин» кӧргӱзер учуралдарды озолодо айткан.

[22 бӱктеги јурук]

Удабас Армагеддондо Кудайдыҥ башкарузына багынбай тургандар јоголтылар, а чыннаҥ ла багынып тургандар аргаданып, чындык јаҥы телекейде јаткылаар.