Кудайдыҥ бӱдӱрерге турган кӱӱн-санаазы јууктап келедири
8-чи бӧлӱк
Кудайдыҥ бӱдӱрерге турган кӱӱн-санаазы јууктап келедири
1, 2. Кудай шыраны туураладарга, канайып эп-арга белетеген?
КӦП ЈӰСЈЫЛДАРДЫҤ туркунына, тӱймеп чыккан улустыҥ ла кӧскӧ кӧрӱнбес јайаандардыҥ башкарузы кижиликтиҥ билезин тӧмӧн тарткан. Је бистиҥ шыраларыска Кудай киришпезинеҥ артпаган. Оныҥ ордына Ол бастыра јӱсјылдардыҥ туркунына улусты јаманнаҥ ла кинчектеҥ јайымдаар эп-арга белетеген.
2 Едемде тӱймеен болгон ӧйдӧҥ ала, Кудай јерди улуска јадатан сӱрекей јараш јер эдип салар башкару эдерге турган Бойыныҥ кӱӱн-санаазын араайынаҥ ачкан (Бытие 3:15). Кийнинде Иисус, Кудайдыҥ тӧс чыгартылу элчизи болуп, бу келер Кудайдыҥ башкарузын Бойыныҥ ӱредӱзинде тӧс тема эткен. Оны кижиликтиҥ сок-јаҥыс ижемјизи болор деп Ол айткан (Даниил 2:44; Матфейдеҥ 6:9, 10; 12:21).
3. Иисус јердиҥ келер башкарузын канайда адаган ла нениҥ учун?
3 Иисус бу келер Кудайдыҥ башкарузын «Теҥеридеги Каандык» деп адаган, нениҥ учун дезе, ол теҥеринеҥ башкарар (Матфейдеҥ 4:17). Ол оны анайда ла «Кудайдыҥ Каандыгы» деп адаган, нениҥ учун дезе оныҥ Авторы Кудай болот (Луканаҥ 17:20). Кудайдыҥ башкарузына кемдер кирер ле ол Каандык нени бӱдӱрери керегинде судурларды бичизин деп јӱсјылдардыҥ туркунына Кудай Бойыныҥ ишчилерине болужын јетирген.
Јердиҥ јаҥы кааны
4, 5. Иисус Кудайдыҥ јарадып салган Кааны болуп турган деп Кудай канайда кӧргӱскен?
4 Шак Иисуска келер Кудайдыҥ Каандыгыныҥ Кааны керегинде эки муҥ јыл кирези кайра кӧп судурлар бӱткен. Ол бу кижиликле башкарар теҥериниҥ Башкараачызы болуп, Кудайла талдаткан болот. Иисус ӧлгӧн кийнинде, Кудай Оны теҥеридеги јӱрӱмге ийделӱ, качан да ӧлбӧс, кӧскӧ кӧрӱнбес тын эдип тиргискен. Оныҥ тирилижинде кӧп керечилер болгылаган (Деяниелер 4:10; 9:1—9; Римляндарга 1:1—4; 1 Коринфяндарга 15:3—8).
5 Оныҥ кийнинде Иисус «Кудайдыҥ оҥ колыныҥ јанына отурган» (Еврейлерге 10:12). Ондо Ол, Кудай Оны теҥеридеги Кудайдыҥ Каандыгыныҥ иштейтен Кааны эдип салатан ӧйди сакыган. Мынайып: «Сениҥ ӧштӱлериҥди Сениҥ буттарыҥныҥ алдына салып бербегенчем Мениҥ оҥ јаныма отур» — деп, Кудайдыҥ Псалом 109:1-де айткан сӧстӧрлӱ судуры бӱтти.
6. Иисус Кудайдыҥ Каандыгыныҥ Кааны болор некелтелерге келижип турган деп канайып кӧргӱскен?
6 Качан Иисус јердиҥ ӱстинде болордо, бу мындый јерге отуратан некелтелерге келижип турганын кӧргӱскен. Иисус јаман кӧрдӱрип истеткен де болзо, Ол Кудайдыҥ алдына ак-чек артарын талдап алды. Бу эткен керегиле, бир де кижи ченелте тушта Кудайга чындык артпас деген Сатананыҥ сӧстӧрин тӧгӱн деп Иисус кӧргӱсти. Кудай улусты бийик кеминде јайап јастырбаган деп, Иисус, бийик кеминде кижи, «Калганчы Адам» кӧргӱсти (1 Коринфяндарга 15:22, 45; Матфейдеҥ 4:1—11).
7, 8. Иисус јерде кандый јакшыны эткен, мынайып Ол нени кӧргӱсти?
7 Иисус Бойыныҥ иштеген тоолу ла јылдарыныҥ туркунына ончо кире эткен јакшыны качан бирде кандый башкараачы эткен? Кудайдыҥ агару тыныныҥ болужыла Иисус оору, кенек, кӧрбӧс, укпас, тили јок улустарды јаскан. Керек дезе Ол ӧлгӧн улусты да тиргискен! Качан Иисус каандыгыныҥ башкарузына келзе, бастыра јердиҥ ӱстинде кижиликке нени эдерин, Ол кичинек кеминде кӧргӱскен (Матфейдеҥ 15:30, 31; Лукадаҥ 7:11—16).
8 Качан Иисус јерде болордо, сӱреен кӧп јакшыны эткен, керек дезе Оныҥ Иаков деп ӱренчиги айтты: «Иисустыҥ мынаҥ да башка эткени кӧп, је Ол керегинде быжу бичизе, бичилген бичиктерди телекей бойына да бадырып болбос деп санандым» (Иоаннаҥ 21:25) *.
9. Нениҥ учун акту јӱректӱ улус Иисуска келгилеп туратан?
9 Иисус улуска сӱрекей јаан сӱӱштӱ болуп, јалакай ла килеҥкей болгон. Ол јокту-јойу ла базынчык улуска болушкан да болзо, јарлу ла бай улустарга удура болбоды. «Шыралап јӱргендер, уур бастыргандар, Меге ончогор келигер, слерди энчиктирерим; Мениҥ тӧҥӧмди алынып алыгар, јобош бойымнаҥ ӱренигер, тыныгарга амыр табарыгар. Мениҥ тӧҥӧм јакшылык, Мениҥ јӱгим јеҥил» деген Иисустыҥ толо сӱӱштӱ кычыртузына улус акту јӱрегинеҥ келгилеп туратан (Матфейдеҥ 11:28—30, АМК). Кудайдаҥ јалтанып турар улус сӱӱнгилеп Ого келип, Оныҥ башкарузын сакыгылайтан (Иоаннаҥ 12:19).
Кожо башкараачылар
10, 11. Јерле башкаратанда Иисусла кем туружар?
10 Канайып кижиликтиҥ башкаруларында кожо иштеп турар јамылу тӧзӧлмӧлӧр бар эди, онойып ла Кудайдыҥ теҥеридеги Каандыгында болор. Јерле башкаратан Иисустаҥ башка база туружаачылар болор керек, нениҥ учун дезе кем Иисусла јуук колбулу болгон, олорго Ол каандар чылап кижиликле кожо башкарар деп сӧзин берген (Иоаннаҥ 14:2, 3; Откровение 5:10; 20:6).
11 Анайдарда, Иисусла теҥериде јӱрӱмге кӧп эмес тоолу улус тиргизилер. Олор кижиликке чактыҥ-чакка алкыштар экелер Кудайдыҥ Каандыгыныҥ курамазына кирип јадылар (2 Коринфяндарга 4:14; Откровение 14:1—3). Анайып, кижиликтиҥ билезине ӱргӱлји алкыштар экелетен башкаруныҥ тӧзӧмӧлин кӧп чактардыҥ туркунына Иегова салыптыр.
Камаан јок башкаруга учы-тӱби
12, 13. Эмди Кудайдыҥ Каандыгы кандый керектерге белен?
12 Бу јӱсјылда Кудай чын ла јердиҥ керектерине киришти. 1914 јылда Христостыҥ башкарузыла Кудайдыҥ Каандыгы тургузылган деп библиялык судур кӧргӱзип турганын 9 -чы бӧлӱкте шӱӱп кӧрӧрис. Эмди ол башкару Сатананыҥ бастыра системазын јоголторго белен. Бу Каандык «[Христостыҥ] ӧштӱлериниҥ ортозында башкарарына» белен (Псалом 109:2).
13 Ол керегинде Даниил 2:44 судурда айдылат: «Ол каандыктардыҥ кӱндеринде [бистиҥ ӧйдӧ бар башкарулар тушта] Теҥеридеги Кудай чактыҥ-чакка јоголбойтон каандык тургузар [теҥериде], ол каандык ӧскӧ албатыга берилбес [кижиликтиҥ башкарузы база качан да тургузылбас]; ол [Кудайдыҥ Каандыгы] бастыра каандыктарды јоголтор, бойы дезе ӱргӱлјиге турар».
14. Кижиликтиҥ башкарузы јоголтылган соҥында, кандый алкыштар болор?
14 Качан Кудайдаҥ камааны јок кандыйла башкару јоголтылза, Кудайдыҥ Каандыгыныҥ башкарузы ончо кеминде болор. Каандык теҥеринеҥ башкарып турган учун, оны улус качан да ӱреп болбос. Башкаруныҥ јаҥы озодо болгон бойыныҥ јеринде болор — теҥериде, Кудайда. Кудайдыҥ башкарузы теҥеринеҥ јерди шиҥжӱлеп турганда, кем де тӧгӱн кудайлык јаҥдар ла, кижиликтиҥ кӱӱнге кирбес философияларыла, политикалык ӱредӱлериле булгалып, азып јӱрбес. Ончо бу немениҥ нези де болоры јарадылбас (Матфейдеҥ 7:15—23; Откровение 17-неҥ 19-ка јетире бажалыктар).
[Кӧчӱрӱ]
^ Иисустыҥ бастыра јӱрӱми керегинде бичилген јетирӱни Коруучы Шибениҥ Биригӱзиле 1991 јылда чыгарылган «Качан бирде јӱрген эҥ улу кижи» деген бичигин кӧр.
[Ӱренериниҥ сурактары]
[18 бӱктеги јурук]
Качан Иисус јерде болордо, Ол оору улустарды јазып, ӧлгӧн улустарды тиргискен, мынайып Ол јаҥы телекейде нени эдерин кӧргӱскен.
[19 бӱктеги јурук]
Кудайдыҥ Теҥеридеги Каандыгы Кудайдаҥ камааны јок ончо бӱдӱм башкаруларын јоголтор.
