Кудай биске бойыныҥ амадузын ачат
4-чи бӧлӱк
Кудай биске Бойыныҥ амадузын ачат
1, 2. Ак санаалу улустыҥ сурактарына Кудай каруузын берип турган деп бис кайдаҥ билерис?
СӰӰШТӰ Кудай оны бедиреп турган ак санаалу улуска чыннаҥ ла Бойыныҥ амадузын ачып јат. Ол немениҥ учурын оҥдоорго албаданып турган кижиликке сурактардыҥ каруузын берип јат. Темдектезе, мындый суракка: нениҥ учун Ол кыйын-шыраны токтотпой турган?
2 «Оны [Кудайды] бедирезеҥ, Оны таап аларыҥ» — деп Библия угузат. «Теҥериде јажыттар ачып турган Кудай бар». «Кайракан Кудай Бойыныҥ кулдарына, судурчыларына, јажыттарын ачпастаҥ нени де этпей јат» (1 Паралипоменон 28:9; Даниил 2:28; Амос 3:7).
Каруулар кайда?
3. Нениҥ учун Кудай шыраны токтотпой турган деген сурактыҥ каруузын бис кайдаҥ таап аларыс?
3 Кудай нениҥ учун шыраны токтотпой турган ла ол јанынаҥ Ол нени эдерге турган деген сурактардыҥ каруулары оныҥ ийдезиниҥ башкарузыла бистиҥ тузабыска бичилген јетирӱде бар. Бу јетирӱ — Оныҥ Сӧзи, Агару Бичимел. «Бастыра Бичимел Кудайдыҥ Ийдезиниҥ болужыла бичилген, ӱренерге, илезине чыгарга, тӱзединерге ле чындыкка турарына тузалу, Кудайдыҥ кижизи бийик кеминде болуп, кандый ла јакшы керекке белен болзын» (2 Тимофейге 3:16, 17).
4, 5. Библияны мындый кайкамчылу эдип не эдет?
4 Библия — чын ла кайкамчылу бичик. Ондо кижиликтиҥ тӱӱкизи керегинде эҥ ле чындык јетирӱ бар. Керек дезе ондо кижини јайаардаҥ озо ӧй керегинде бичилип калган. Анайда ла ок, ол эмдиги ӧйгӧ келижет, нениҥ учун дезе оныҥ судурлары бистиҥ ӧйдиҥ ле анайда ок келер ӧйдиҥ учуралдарыла колбулу.
5 Мынаҥ ӧскӧ кандый да бичик мындый чике тӱӱкиликле тузаланбай јат. Темдектезе, јебрен классиктердиҥ колбичимелдеринеҥ јӱк ле тоолу бичиктер бар. Је Библияныҥ толо, эмезе бӧлӱктериниҥ колбичимелдери сӱреен кӧӧп: 6 000 кирези — Еврей Бичимелдер («Эски Јакылтаныҥ» 39 бичиги), 13 000 кирези колбичимелдер — Христиан Грек Бичимелдердеҥ («Јаҥы Јакылтаныҥ» 27 бичиги).
6. Алдында ӧйдӧ Кудайдыҥ болужыла бичилген Бичимелдер ле эмдиги ӧйдиҥ Библиязы тӧс учурыла тӱҥей деп нениҥ учун бис бӱдер аргалу?
6 Бастыраны эдип ийер Кудай Бойыныҥ ийдезиниҥ болужыла Библияны бичидип, колбичимелдерде бичилгенди кубулбай барзын деп кичеенген. Оныҥ учун эмдиги бистиҥ Библияларыс чынынча алдындагыдый ла баштапкы Агару Бичимелдий. Мыны оҥдоп алатан бистиҥ база бир аргабыс ол, Грек Христиан Бичимелердеҥ кӧчӱрип бичиген кезик колбичимелдердиҥ ӧйи бир ле јӱсјылдаҥ чыгат. Јебрен телекейдиҥ бичиичилериниҥ эмдиги бар кӧп эмес колбичимелдериниҥ копиялары каа-јаада авторлордыҥ бичиген ӧйиниҥ бир-канча јӱсјылдарыныҥ ӧйин темдектейт.
Кудайдыҥ сыйы
7. Библия канча кире элбеде таркадылган?
7 Библия — тӱӱкиликте эҥ ле элбеде таркадылган бичик. Ӱч муҥга јуук экземплярлар кепке базылып чыгарылган болгон. Бу тоого мынаҥ башка кандый да бичик јууктабай јат. Анайда ок Библия, эмезе оныҥ бӧлӱктери 2 000 -га јуук тилдерге кӧчӱрилген. Анайдарда, бодоштырып айтса, Библия телекейдиҥ эл-јоныныҥ 98 процентине билерине јеҥил.
8—10. Бисте Библияны шиҥдеп кӧрӧрине тургадый кандый шылтактар бар?
8 Оныҥ учун Кудайдаҥ берилген бичик деп, тыш ла ич јаныныҥ чындыктары ӱзе барын јӧптӧп турган бичикти бистер шиҥжӱлеп, ајаруга алатаныс јарт *. Ол јӱрӱмниҥ учуры неде, телекейлик учуралдар нени темдектеп турганын ла келер ӧй нени экелерин јартап јат. Ӧскӧ кандый да бичик мынайып эдер аргазы јок.
9 Чын, Библия — ол Кудай кижиликтиҥ билезине кычыру эткени. Оныҥ иштенер кӱчиниҥ, эмезе ийдезиниҥ болужыла оны 40 кирези кижилер бичигендер. Анайып, Кудай бисле Бойыныҥ Сӧзи, Агару Бичимели, ажыра куучындажат. Апостол Павел бичиген: «Бистеҥ уккан Кудайдыҥ сӧзин слер улустыҥ сӧзиндий эмес, је Кудайдыҥ сӧзиндий алынганар, кандый ол чынынча бар» (1 Фессалоникийецтерге 2:13).
10 Американыҥ Бириктирген Штаттарыныҥ 16 -чы президенти Авраам Линкольн Библияны: «Кудай улуска качан-бирде берген эҥ ле баалу сый — деп адап,— ...Ол јокко бис јакшыны ла јаманды билип албас эдибис» — деп айтты. Оныҥ учун шыра канайда башталган, нениҥ учун Кудай олорды токтотпой турган ла ол јанынаҥ нени эдерге турганы керегинде бу баалу сый нени айдат?
[Кӧчӱрӱ]
^ Библияныҥ чындыгы керегинде оноҥ быжу јетирӱлерди «Библия — Кудайдыҥ сӧзи бе, эмезе кижиниҥ бе?» деген Коруучы Шибениҥ Обществозыныҥ 1998 јылда (орус.) чыгарган бичигинеҥ кӧр.
[Ӱренериниҥ сурактары]
[10 бӱктеги јурук]
Кудайдыҥ болужыла бичилген Библия, ол кижиликтиҥ билезине кычыру эткени болот.
