Кыйын-шыранаҥ айрылган јер
2-чи бӧлӱк
Кыйын-шыранаҥ айрылган јер
1, 2. Мынаҥ башка кандый кӧрӱмнеҥ кӧп улус тудунат?
ЈЕ БАСТЫРА јер-ӱстинде миллиондор тоолу улустар чек башка кӧрӱмдӱ. Олор кижиликке кайкамчылу ӧй келип јаткан деп кӧргилейт. Бу ла мында, јерде, бастыра јаманнаҥ ла шыранаҥ айрылган амыр-энчӱ удабас ла болор деп олор јӧптӧгилейт. Ончо јаман неме удабас јоголып, јаҥы эл-јонду телекей тӧзӧлӧр деп, олор бек бӱткилейт. Ол јаҥы телекейдиҥ тӧзӧмӧли эмди ле бистиҥ ӧйдӧ салынып јаткан деп олор јӧптӧгилейт.
2 Јаҥы телекей јуу-согуштаҥ, казыр болорынаҥ, јаман керектердеҥ, чындык јогынаҥ ла јоксыраштаҥ јайым болор деп ол улус бӱдет. Ол јӱрӱмде оору-јобол, шыра, ый-сыгыт, керек дезе ӧлӱм де јок болор. Ол ӧйдӧ улус бийик кемине јединип, сӱрекей јараш јердиҥ ӱстинде ӱргӱлјиге ырысту јадар. Ого ӱзеери ӧлгӧн дӧ улус тирилип, ӱргӱлјиге јадар аргалу болор.
3, 4. Нениҥ учун бу улус бойыныҥ кӧрӱмине бӱдӱмјилӱ болуп јат?
3 Чынга бодоп турган мындый кӧрӱм јӱк ле кӱӱнзейтен амаду болор бо? Јок, болбос. Ол, бу кайкамчылу јӱрӱм болотон ӧй чын ла келер деген тӧзӧмӧлдӱ јаҥга тӧзӧлӧнӧт (Еврейлерге 11:1). Нениҥ учун олор бого чын ла бӱткӱлейт? Нениҥ учун дезе, оны бастыраны эдип ийер аргалу ак-айастыҥ Јайаачызы айткан.
4 Кудай сӧзин берип турганы јанынаҥ Библия айдат: «Слердиҥ Кудай Кайраканар слер керегинде айткан ончо јакшы сӧстӧрдӧҥ бир де сӧс калас артпаган; ончозы слерлерге бӱткен, бир де сӧс бӱтпей калбаган». «Кудай кижи эмес, Ого тӧгӱндеерге... Ол айдала этпес пе? Айткан сӧзин бӱдӱрбес пе?» «Сӧзин берип, Кайракан Саваоф айдат: Мен канайып санангам, анайып ла болор; Мен канайып темдектегем, анайып ла бӱдер» (Иисус Навин 23:14; Числа 23:19; Исаия 14:24).
5. Кандый сурактар каруу некейт?
5 Је Кудайдыҥ кӱӱн-санаазыла јерде јӱрӱм јараш болзын деген болзо, нениҥ учун мындый кӧп јаман керектер озо болзын деп Ол болдырткан? Эмди бастыра јаманды јоголторго, нениҥ учун Ол алты муҥ јыл сакыган? Бастыра ол јӱсјылдардыҥ кыйын-шыралары: Кудай бисти керексибей турган, эмезе Ол качан да болбогон ло јок деп, кӧргӱзер учурлу болор бо?
[Ӱренериниҥ сурактары]
