10-чы урок

Кудайдыҥ кӧрӧр кӱӱни јок керектери

Кудайдыҥ јаратпай турган керектерине канайда кӧрӧр керек? (1)

Кандый быкчу кылык-јаҥ јарабас? (2)

Христиан кижи тӧгӱнди канайып кӧрӧр учурлу? (3) каныгып ойноор ойындарды? (3) уурданышты? (3) базынышты? (4) спиритизмди? (5) аракыдашты? (6)

Кижи јаман керектердеҥ канайып айрылар аргалу? (7)

1. Кудайдыҥ ишчилери јакшыны сӱӱйдилер. Онойдо ок олор јаманды кӧрӧр кӱӱни јок болорго ӱренип алар учурлу (Псалом 96:10). Анайдарда, ол Кудайга јарабай турган керектердеҥ тууралап кыйары дегени. Кандый керектердеҥ?

2. Балыр кей јӱрӱм. Алыжардаҥ озо конгоны, ӧбӧгӧни ӱйин, ол эмезе ӱйи ӧбӧгӧнин ӧскӧ кижиле солып конгоны, уй-малла јуук колбулу болгоны, јуук тӧрӧӧндӧрлӧ алышканы ла эки эр кижи, эмезе эки ӱй кижи кожо јатканы — бу ончозы Кудайга удура коркушту јаан кинчектер (Левит 18:6; Римляндарга 1:26, 27; 1 Коринфяндарга 6:9, 10). Ол эмезе алышканын кереелеген бичик јокко јуртаган болзо, чын болзын деп бичикти јазадып алар, эмезе айрылыжар керек (Еврейлерге 13:4).

3. Тӧгӱндеш, каныгып ойнооры, уурданыш. Иегова Кудай качан да тӧгӱндебейт (Титке 1:2). Кудайдыҥ алдына јакшы кӧрӱнерге турган улуска тӧгӱндеерге јарабас (Притчалар 6:16—19; Колоссяндарга 3:9, 10). Бастыра каныгып ойноор ойындардыҥ бӱдӱмдери кижини ач болорына куйбуртат. Оныҥ учун христиандар атла јарыш болзын, бинго ло лоторея оноҥ до ӧскӧ каныгып ойноор  ойындарга турушпайдылар (Эфесяндарга 5:3—5). Христиандар ууры да этпейдилер. Уурдап алган не-немени биле тура, садып албай јат. Сурагы јогынаҥ ӧскӧ кижиниҥ не-немезин албай јадылар (Исход 20:15; Эфесяндарга 4:28).

4. Чугулдыҥ туткагы, базыныш. Чугулын токтотпозо, базынышка экелер аргалу (Бытие 4:5—8). Албан-кӱчле базынып турган кижи Кудайдыҥ најызы болор аргазы јок (Псалом 10:5; Притчалар 22:24, 25). Кем де биске јаманды эткен болзо, каарузын јаманла јетирери ле ӧштӧӧри јастыра (Притчалар 24:29; Римляндарга 12:17—21).

5. Тарма ла спиритизм. Кезик улус оору-јоболын јазып аларга, кӧскӧ кӧрӱнбес калју тынныҥ кӱчине баштангылайт. Кезиктери бойлорыныҥ ӧштӱлерин оорый берзин, ол эмезе ӧлӧ берзин деп тармаа эткилейт. Бу керектердиҥ ары јанында турган ийде,— Эрлик. Оныҥ учун христиандарга бу айдылган керектерге бир де туружарга јарабас (Второзаконие 18:9—13). Ӧскӧ улустыҥ тармаазына удура турарга эҥ артык кору — Иеговала мӱргӱӱл ажыра јуук колбуларды кичеегени (Притчалар 18:10).

6. Аракыдаш. Кичинек аракы, сыра ла аракылу суузындарды ичкенинде јастыразы јок (Псалом 103:15; 1 Тимофейге 5:23). Је кӧп ичкени ле аракыдаганы — Кудайдыҥ кӧзине јастыра (1 Коринфяндарга 5:11—13; 1 Тимофейге 3:8). Аракыны ӧткӱре кӧп ичкени, су-кадыкты ӱреер ле билени бызар. Ого ӱзери, кӧп аракы ичип турган кижи ӧскӧ дӧ јаман керектер эдердеҥ айабас (Притчалар 23:20, 21, 29—35).

7. Кудайга јарабас јаман керектер эдип турган улус, «Кудайдыҥ Каандыгын энчиленбес» (Галаттарга 5:19—21). Сен Кудайды чыннаҥ сӱӱп, ого јакшы эдерге албаданып турган болзоҥ, јаман кылык-јаҥнаҥ айрыла берер аргалу (1 Иоаннаҥ 5:3). Кудайдыҥ кӧзиниҥ алдына јаман керектерди, кӧрӧр кӱӱниҥ јок болзын деп ӱрен (Римляндарга 12:9). Кудайга јарагадый кылык-јаҥы тыҥып калган улусла јаантайын куучындажып јӱр (Притчалар 13:20). Јакшы једимге јеткен христиан најылар да болужын јетирер аргалу (Иаковтыҥ 5:14). Је эҥ ле тыҥ Кудайдыҥ болужына иженип, ого мӱргӱп тур (Филиппийецтерге 4:6, 7, 13).

[20, 21 бӱктер, јуруктар]

Кудай аракыдашты, уурданышты, каныгып ойноорын ла базынышты кӧрӧр кӱӱни јок.