2-чи урок

Кудай — ол кем андый?

Чындык Кудай — ол кем андый, оныҥ ады кем? (1, 2)

Оныҥ бӱдӱми кандый? (3)

Оныҥ тӧс кебеделдери кандый? (4)

Ого бажырарга сӱрлер ле сӱр-темдектер тузаланарга јараар ба? (5)

Кудайды кандый эки эп-аргала билип аларга јараар? (6)

1. Улус кӧп не-немелерге бажырып јат. Је Библияда јӱк ле бир ЧЫНДЫК Кудай бар деп айдылат. Теҥериде ле јерде бар јок не-немени Кудай јайаган. Биске ол јӱрӱм берген болордо, јӱк ле ого, Јаҥыс Кудайга, бажырар керек (1 Коринфяндарга 8:5, 6; Откровение 4:11).

2. Кудайда сӱреен кӧп титулдар бар, је јӱк ле јаҥыс атту. Кудайдыҥ ады — ИЕГОВА. Кӧп саба Библияныҥ кӧчӱриштеринде Кудайдыҥ адын јоголтып, Кайракан ла Кудай деп титулдарла солыган. Је Библияныҥ баштапкы тӧс бичигинде Кудайдыҥ ады «Иегова» 7 000 катап туштаган болгон! (Исход 3:14; Осия 12:5).

3. Иеговада бӱдӱм бар, је кижидийинеҥ башка. «Кудай ол тын» — деп, Библияда бичилет (Иоаннаҥ 4:24). Тын — ол бистиҥ јӱрӱмнеҥ канча катап бийик јӱрӱмниҥ кебери. Кудайды  бир де кижи качан да кӧрбӧгӧн. Иегова теҥериде јадып, ончо не-немени кӧрӱп јат (Псалом 10:4, 5; Иоаннаҥ 1:18). Агару тын дегени ол не? Ол Кудай бойы эмес. Ол Кудайдыҥ иштеп турар ийде-кӱчи (Псалом 103:30).

4. Иегова керегинде Библия кӧпти ачат. Ондо оныҥ тӧс кебеделдери кӧргӱзилет — сӱӱш, чындык, ойгор ло ийде-кӱч (Второзаконие 32:4; Иов 12:13; Исаия 40:26; 1 Иоанныҥ 4:8). Библияда Кудай анайда ок килеҥкей, быйанзак, јаманын таштаарга белен, буурзак, чыдамкай деп айдылат. Биске балдардый сӧс уккур болуп, Кудайдаҥ тем алар керек (Эфесяндарга 5:1, 2).

5. Кудайга бажырып турала, сӱр-кеберлерге, јуруктарга, сӱр-темдектерге мӱргӱӱрге јараар ба? Јок! (Исход 20:4, 5). Бис јаҥыс ла ого бажырар учурлу деп, Иегова айдат. Ол бойыныҥ магын кемле де, неле де ӱлешпес. Сӱр-кеберлердиҥ биске болужар арга-чагы јок (Псалом 113:12—16; Исаия 42:8).

6. Кудайды канайып јакшы билип алар эп-арга бар? Ол эп-арганыҥ бирӱзи — айландыра оныҥ јайагандарын кӧрӱп, не керегинде айдылганын тереҥжиде шӱӱп кӧрӧӧри. Кудайдыҥ јайагандары оныҥ улу ийде-кӱчтӱзин ле ойгорын кӧргӱзет. Бастыра јайаган не-немелеринеҥ оныҥ сӱӱжи кӧрӱнет (Псалом 18:2—7; Римляндарга 1:20). Кудайды билип алар экинчи эп-арга — Библияны ӱренери. Ол кандый Кудай болгонын Библия ажыра канча катапка кӧп айдып јат. Анда анайда ок кижиликке нени кӱӱнзегенин ле бистиҥ кажыбыстаҥ ла нени некеп турганын јетирет (Амос 3:7; 2 Тимофейге 3:16, 17).

[5 бӱк, јуруктар]

Бис Кудай керегинде оныҥ јайагандары ла Библия ажыра биледис.