5-чи урок

Кудай јерге нени эдерге амадап салган?

Нениҥ учун Иегова јерди јайаган? (1, 2)

Нениҥ учун јер эмди сӱреен јакшы ла јараш јер (рай) эмес? (3)

Калју улусла не болор? (4)

Оору улуска келер ӧйдӧ Иисус нени эдер? карыган? божогон? (5, 6)

Келер ӧйдӧги јакшылыкту алкыштарды аларга нени эдер керек? (7)

1. Иегова јердиҥ ӱстине улусты ырысту ла ӱргӱлјиге јатсын деп јерди јайаган. Јердиҥ ӱстине јаантайын сӱӱнчилӱ ле чындык кижилик толо јадып јуртазын деп Кудай кӱӱнзептир (Псалом 113:24; Исаия 45:18). Јер качан да јоголтылбас, ол ӱргӱлјиге болор (Псалом 103:5; Екклесиаст 1:4).

2. Кижини јайаардаҥ озо, Кудай јерде эптӱ јер талдап, сӱреен јакшы ла јараш јер эдип салган. Оны Едемниҥ сады деп адаган. Ого баштапкы эр ле ӱй кижини, Адам ла Еваны, јатыргызып салган. Кудай олорды бала-баркалу болуп, бастыра јердиҥ ӱстин толтырзын деп кӱӱнзеген. Анайып, улус бастыра јердиҥ ӱстин бир эмештеҥ јараш јер эдип кубултар эди (Бытие 1:28; 2:8, 15).

3. Адам ла Ева билип тура, Кудайдыҥ јасагын бускан. Оныҥ учун Иегова олорды јараш Едемниҥ садынаҥ сӱрӱп ийген. Сӱреен јакшы ла јараш јер јылыйтылган (Бытие 3:1—6, 23). Је Иегова јерди нениҥ учун јайаганын ундыбаган. Ол јерди ӱргӱлјиге улус јадар јакшы ла јараш јер эдип кубултарага сӧзин берет. Кудай бойыныҥ амадузын канайып бӱдӱрер аргалу? (Псалом 36:29).

4. Јер јакшы ла јараш болордоҥ озо, оноҥ калју-јаман улус јайладылар учурлу (Псалом 36:38). Бу керек јаманды јоголтор Кудайдыҥ јуузында — Армагеддондо болор. Оныҥ кийнинде Эрлик 1 000 јылга кӱлӱде болор. Анайдарда, јерге каршуу јетиргедий кем де болбос. Тирӱ јӱк ле Кудайдыҥ албатызы артып калар (Откровение 16:14, 16; 20:1—3).

5. Оныҥ кийнинде јердиҥ ӱстиле 1 000 јылдыҥ туркунына Каан Христос Иисус башкараар (Откровение  20:6). Араайынаҥ ол кижиниҥ санаазынаҥ ла эди-канынаҥ кинчекти јайладып салар. Адам ла Ева јастырардаҥ озо ончо јанынаҥ бийик кеминде болуп бӱткен. Улус ол ӧйдӧ ондый ла бийик кемине келер. Ол тушта оору-јобол, карыыры ла ӧлӱм јок болор. Оору улус оору-јоболдоҥ айрылар, карып калган улус ойто кайра јиит болуп калар (Иов 33:25; Исаия 33:24; Откровение 21:3, 4).

6. Иисус башкарган муҥјылдыктыҥ туркунына, Кудайга чындык улус бастыра јердиҥ ӱстин сӱреен јакшы ла јараш јер эдип кубултар (Луканаҥ 23:43). Кудай онойдо ок, јӱрӱмге миллиондор тоолу божоп калган улусты јердиҥ ӱстине тирилтер (Деяниелер 24:15). Бу улус Кудайдыҥ некелтелерин бӱдӱрип турза, олор јердиҥ ӱстине ӱргӱлјиге јӱрер аргалу. Бӱдӱрбезе — чактыҥ-чакка јоголып калар (Иоаннаҥ 5:28, 29; Откровение 20:11—15).

7. Кудай баштапкызынаҥ ала јердиҥ ӱстине нени амадаганын, мынайып једимдӱ божодор. Келер ӧйдӧги бу алкыштарды сениҥ алар кӱӱниҥ бар ба? Ондый болзо, Иегова керегинде билгириҥди улалтып, оныҥ некелтелерин бӱдӱрӱп јӱр. Бу тушта јуугындагы Каандыктыҥ Кыбында, Иегованыҥ Керечилериниҥ јуунына јӱрери болуш болор (Исаия 11:9; Еврейлерге 10:24, 25).

[10 бӱк, јурук]

Јылыйтылган јараш јер.

[11 бӱк, јурук]

Армагеддонныҥ кийнинде јер ойто сӱреен јараш ла јакшы јер болор.