13-чи урок

Чындык кудайлык јаҥды канайып табар?

Ончо кудайлык јаҥдар Кудайга јарайт па, ол эмезе бирӱзи ле бе? (1)

Нениҥ учун телекейде христиандар деп аданып турган кудайлык јаҥдар кӧп? (2)

Чындык христиандарды канайда аҥылап таныыр? (3—7)

1. Иисус чындык бир кудайлык јаҥ тӧзӧгӧн. Оныҥ учун бӱгӱнги кӱнде Иегова Кудайга бажырып турган бир ле бӧлӱк, ол эмезе чындык уламјы болор учурлу (Иоаннаҥ 4:23, 24; Эфесяндарга 4:4, 5). Јӱрӱмге баштап апарар чичке јолло јӱк ле тоолу улус барар деп Библия ӱредип јат (Матфейдеҥ 7:13, 14).

2. Христиандардыҥ јуунына Иисустыҥ апостолдоры божогон кийнинде јастыра ӱредӱлер ле христиан эмес јаҥдар кирер деп, Библияда айдылган болгон. Анайда ок јаан салтарлу улус кудайзак улусты Христостыҥ эмес, а олордыҥ кийнинеҥ барарына јединип алар деп бичилген (Матфейдеҥ 7:15, 21—23; Деяниелер 20:29, 30). Оныҥ учун эмдиги ӧйдӧ бойлорын христиандар деп аданып турган кудайлык јаҥдар кӧп. Чындык христиандар кем деп, канайып таныыр арга бар?

3. Христиандардыҥ эҥ ле аҥылу темдеги — олордыҥ бой-бойлорын акту-кӱӱнинеҥ сӱӱри (Иоаннаҥ 13:34, 35). Чындык христиандар ортодо, бир албатыныҥ угы-тӧзи (раса), ӧскӧ албатынаҥ артык деп, ол эмезе терезиниҥ ӧҥи артык деп аҥылаарына ӱреткилебей јат. Онойдо ок ӧскӧ ороондордыҥ албатызын јаман кӧрзин деп олор ортодо ӱретпей јат (Деяниелер 10:34, 35). Оныҥ учун чындык христиандар јуу-согушка турушпайдылар. Олор бой-бойлорына акалу-сыйынду чылап баштынгылайт (1 Иоаннаҥ 4:20, 21).

4. База бир темдеги — Библияны тереҥ тоогоны. Чындык христиандар оны Кудайдыҥ Сӧзи деп, ондогы бастыра бичилген не-немеге бӱткӱлеп јат (Иоаннаҥ 17:17; 2 Тимофейге 3:16, 17). Кижиниҥ кӱӱн-санаазынаҥ ла чӱм-јаҥдарынаҥ Кудайдыҥ Сӧзи олорго эҥ учурлу (Матфейдеҥ 15:1—3, 7—9). Олор јаантайын ла Библия аайынча јӱрерге кичеенгилейт. Оныҥ да учун, олордыҥ улуска Кудай керегинде куучындаганы,  эткен керектеринеҥ кыйбай јат (Титке 1:15, 16).

5. Чындык кудайлык јаҥныҥ улустары Кудайдыҥ адын тооп јӱрер учурлу (Матфейдеҥ 6:9). Кудайдыҥ ады — Иегова деп, Иисус улуска Кудайдыҥ ады керегинде куучындаган. Чындык христиандар база анайда эдер учурлу (Иоаннаҥ 17:6, 26; Римляндарга 10:13, 14). Сениҥ јериҥде улуска Кудайдыҥ ады керегинде кем куучындайт?

6. Чындык христиандар Кудайдыҥ Каандагы керегинде јарлап куучындар учурлу. Ондый ок ишти Иисус бӱдӱрген. Ол јаантайын Каандык керегинде куучындаган (Луканаҥ 8:1). Бу ла ок јетирӱни ол бойыныҥ ӱренчиктерине бастыра јердиҥ ӱстине јарлазын деп јакыган (Матфейдеҥ 24:14; 28:19, 20). Јердиҥ ӱстине амыр-энчӱни јаҥыс ла Кудайдыҥ Каандыгы экелер деп чындык христиандар бӱткилеп јат (Псалом 145:3—5).

7. Иисустыҥ ӱренчиктери бу калју јер-телекейдиҥ керектерине турушпайдылар (Иоаннаҥ 17:16). Олор политикага ла социал куурмакчылга киришпейдилер. Олор эмдиги албатыныҥ санаазынча, чӱм-јаҥдары да аайынча јӱрбейдилер (Иаковтыҥ 1:27; 4:4). Сениҥ билер кудайлык јаҥ уламјыда бу тоологон чындык христиандардыҥ аҥылу темдектери барын айдып болорыҥ ба?

[26, 27 бӱктер, јуруктар]

Чындык христиандар бой-бойлорын сӱӱжип, Библияны тереҥ тооп ло Кудайдыҥ Каандыгы керегинде улуска куучындагылайт.