4-чи урок

Эрлик — ол кем андый?

Эрлик Јелбис кайдаҥ алынган? (1, 2)

Эрлик улусты канайып тӧгӱндейт? (3—7)

Нениҥ учун биске Јелбиске удурлажар керек? (7)

1. «Јелбис» деген сӧстиҥ учуры ол, та кем де кемди де калју тӧгӱндеп, јаман айдып турганыла бодолду. «Эрлик» — ол «ӧштӱ», эмезе «удурлажаачы» дегени. Ондый аттарла Кудайдыҥ эҥ ле калју ӧштӱзи адалат. Озо ло баштап ол Кудайла кожо теҥериде јадып, бийик кеминде бӱткен ангел болгон. Је кийнинде ол бойы керегинде ӧйинеҥ ӧткӱре кӧп сананып, Кудайдыҥ колында бажыратан јаҥду башкарузын керексий берген (Матфейдеҥ 4:8—10).

2. Бу ангел, Эрлик, јылан ажыра Евала куучындажа берген. Кудайдыҥ сӧзин укпазын деп, ол Еваны тӧгӱндеген. Анайып Эрлик Кудайдыҥ «бийленерин», ол эмезе эҥ бийик Кудайдыҥ турган јерин ӧштӧп јамандаган. Эрлик сурак тургускан: Кудай бойыныҥ албатызыла чын башкарып, улузыныҥ јилбизӱн тооп турган ба? Анайда ок Эрлик алаҥзу тургускан: бир де болзо кижи бойын акту јӱрегинеҥ Кудайга беринип, тынын кысканбай чындык артар ба? Мындый кылык-јаҥыла Эрлик Кудайдыҥ ӧштӱзи боло берген. Мынаҥ улам ол Эрлик Јелбис деп адалган (Бытие 3:1—5; Иов 1:8—11; Откровение 12:9).

3. Эрлик улусты бойына бажырзын деп, олорды тӧгӱн ажыра тартып аларга албаданат (2 Коринфяндарга 11:3, 14). Оныҥ улусты тӧгӱндейтен бир эп-сӱмези — тӧгӱн кудайлык јаҥ. Кудайлык јаҥ Кудай керегинде тӧгӱнге ӱредип турган болзо, ол Эрликтиҥ амадузын бӱдӱрет (Иоаннаҥ 8:44). Тӧгӱн кудайлык јаҥныҥ бажыраачылары акту јӱрегинеҥ чындык Кудайга бажырып турган деп бойлорында сананар аргалу. Је чынынча, олор Эрликке иштегилейт. Ол — «бу чактыҥ кудайы» (2 Коринфяндарга 4:4).

4. Эрликтиҥ улусты бойыныҥ башкарузына бактырар база бир эп-сӱмези — спиритизм. Улус бойлорын аргадарга ла ӧскӧзине каршу јетирерге калју тындарды кычыргылап, онойдо ок келетен ӧйди озодоҥ айдып, кайкамчылу керектер эткилейт. Бастыра бу болуп турган керектердиҥ кийнинде калју ийде — Эрлик турат. Кудайдыҥ кӱӱнин јандырбаска бис канайып та спиритизмле колбулу болбос учурлу (Второзаконие 18:10—12; Деяниелер 19:18, 19).

5. Онойдо ок, Эрлик улусты ӧйинеҥ ӧткӱре албатызыныҥ угы-тӧзиле оморкозын деп кӱйбӱредип, олорды политикалык организацияларга бажыраарына јилбиркедип тӧгӱндейт. Кезикте улус олордыҥ албатызы эмезе угы-тӧзи  (раса) ончозынаҥ артык деп бодогылап јат. Је бу чын эмес (Деяниелер 10:34, 35). Анайда ок эмдиги кижиликтиҥ уур-кӱчтерин политикалык организациялар јоголтып салар деген шӱӱлте бар. Ого бӱдӱмјилӱ улус Кудайдыҥ Каандыгын јаратпай јат. Је кижиликтиҥ курч сурактарыныҥ аайы-бажына јаҥыс ла Кудайдыҥ Каандыгы чыгар аргалу (Даниил 2:44).

6. Эрликтиҥ улус тӧгӱндер база бир эп-сӱмези — олорды јаман кылык-јаҥга ийде салары. Иегова кинчектӱ јӱрӱмнеҥ айрылзын деп јакарат, нениҥ учун дезе кижиге ол кандый каршуузын јетирип турганын ол билер (Галаттарга 6:7, 8). Кезик балыр јӱрӱмге темиккен улус сени олор ло тӱҥей јӱрзин деп кӱӱнзегилеп турганынаҥ айабас. Је ондый јаман јӱрӱмди сенеҥ чынынча Эрлик кӱӱнзейт деп ундыбай јӱр (1 Коринфяндарга 6:9, 10; 15:33).

7. Сени Иегованаҥ туура эдерге Эрлик истежерине ле удурлаштуруга экелер аргалу. Сениҥ Библия ӱренип турганыҥа јуук улузыҥныҥ кемизи де сӱрекей тыҥ ачынардаҥ айабас. Кезиктери каткырыжып шоодор до. Је сен бойыҥныҥ јӱрӱмиҥле кемге учурлу? Эрлик сени Иегова керегинде билерге токтозын деп коркыдар. Эрликке јеҥип аларга бербе! (Матфейдеҥ 10:34—39; 1 Пётрдыҥ 5:8, 9). Јелбиске удурлажып турзаҥ сен Иеговага сӱӱнчи јетирериҥ, онойдо ок сен оныҥ бийленеринеҥ тудунып турганыҥды кӧргӱзериҥ (Притчалар 27:11).

[9 бӱк, јуруктар]

Улусты тӧгӱн кудайлык јаҥ, спиритизм ле национализм тӧгӱндеп аскыртат.

[9 бӱк, јурук]

Иегова керегинде билгириҥди улалтып, Эрликке удурлаш!