1, 2. Агару Бичикти нениҥ учун сӱреен јакшы сый деп айдарга јараар?

НАЈЫГАР слерге сый берген болзын. Слерге кандый сезимдер келет? Најыгардыҥ слерди сананып, сый эткенине сӱӱнип, бу сыйды капшай ла ачып кӧрӧргӧ кӱӱнзеер болороор.

² Агару Бичик — Кудайдыҥ сыйы. Андагы бичилген јетирӱлерди база кандый да бичиктеҥ табып болбозыс. Темдектезе анда, Кудай теҥерини, јерди ле улусты канайып јайаганы керегинде айдылат. Анайда ок анда јӱрӱмниҥ кӱчтерин ӧдӧргӧ болужатан јӧптӧр бар. Оноҥ башка, Кудай јерди канайып рай эдерге сӧзин бергенин билип аладыс. Оныҥ учун Агару Бичикти сӱреен јакшы сый деп айдарга јараар!

3. Агару Бичикти ӱренип, слер нени билип аларыгар?

³ Агару Бичикти ӱренип, Кудайдыҥ слерле таҥынаҥ најылажарга турганын билип аларыгар. Оныла јакшы таныжып алзаар, слер јуук најылар болуп калараар.

4. Агару Бичик канча кире таркадылган?

⁴ Агару Бичик 2 800 кире тилге кӧчӱрилген. Бу бичик бастыра телекейде канча миллиард экземплярга кепке базылган. Јердиҥ ӱстинде 90 проценттеҥ кӧп улус Агару Бичикти бойыныҥ тӧрӧл тилине кычырар аргалу. Кажы ла неделеде миллионноҥ кӧп улус Агару Бичиктӱ болуп калат. Чындаптаҥ да, ӧскӧ андый бичик јок!

5. Агару Бичик Кудайдыҥ тыныла бичилген деп, нениҥ учун айдарга јараар?

 ⁵ Агару Бичик — Кудайдаҥ берилген бичик, ол Кудайдыҥ тыныла бичилген. (2 Тимофейге 3:16 кычырыгар.) «Агару Бичикти улус бичиген болзо, ол канайып Кудайдаҥ болотон?» — деп, кезик улус айдар аргалу. Је каруузы Агару Бичиктиҥ бойында бар: «Улус Агару Тынга баштадып, сӧсти Кудайдаҥ айткандар» (2 Петр 1:21). Тем кӧрӱп ийектер. Директор секретарьга самара бичизин деп јакару берет. Бу самараныҥ чӱмдеечизи кем болот? Секретарь эмес, директор. Анайып ла Агару Бичиктиҥ чӱмдеечизи кижи эмес, је Кудай болот. Улус Кудайдыҥ санаа-шӱӱлтезин бичиген. Айдарда, Агару Бичик Кудайдыҥ башкартузыла бичилерде, оны алаҥзу јогынаҥ «Кудай дыҥ сӧзи» деп айдарга јараар (1 Фессалоникадагыларга 2:13; 2 Кожултаны кӧрӱгер).

6, 7. Агару Бичиктеги јетирӱлер керегинде нени айдарга јараар?

⁶ Агару Бичик 1 600 јылдаҥ ажыра бичилген. Оны бичиген улус, башка-башка ӧйдӧ јаткан. Олордыҥ кезиги ӱредӱлӱ улус болгон: темдектезе, бирӱзи эмчи болгон. Кемизи де кыраачы, балыкчы, эмезе койчы болгон. Олордыҥ ортозында судурчылар, јаргычылар, керек дезе каандар да болгон улус бар. Агару Бичикти башка-башка улус бичиген де болзо, анда келишпестер (противоречия) јок *. Бӱдӱн бичикте текши бир тема болот.

⁷ Агару Бичиктиҥ Башталганы деп баштапкы бичигинде улустыҥ бастыра уур-кӱчтери недеҥ башталганы керегинде бичилет, а Ачылта деген калганчы бичигинде — Кудай уур-кӱчтердиҥ аайы-бажына канайып чыгары ла јердиҥ ӱстин канайып рай эдип кубултары керегинде айдылат. Агару Бичикте кижиликтиҥ тӱӱкизинде муҥдар тоолу јылдарга не болгоны бичилет. Анайда ок анаҥ Кудай берген сӧзин јаантайын бӱдӱрип турганын билип аларга јараар.

8. Агару Бичик наука јанынаҥ чын јетирӱлер айдат деп, темдер куучындап беригер.

⁸ Агару Бичик — наукалык та, школдыҥ да бичиги эмес, је качан наука јанынаҥ кандый бир јетирӱ айтса, онызы јаантайын чын болот. Чӱмдеечизи Кудай болгон бичик шак мындый болор учурлу. Темдектезе, израиль албатыга Левит деген бичиктеги јакарулар, ооруларды таркатпаска болушкан. Мындый јакарулар, оорулар бактериялардаҥ  ла вирустардаҥ улам болот деп, улустыҥ оҥдоп баштаганынаҥ канча киреге озо бичилген болгон. Анайда ок Агару Бичикте јер неге де илинбеген деп айдылат (Иов 26:7). Керек дезе кӧп саба улус јер јалбак деп бӱдӱп турарда, Агару Бичикте јер болчок деп бичилген (Исаия 40:22).

9. Агару Бичиктиҥ бичиичилериниҥ чынды јажырбай бичигени не керегинде айдат?

⁹ Агару Бичик кандый бир тӱӱкилик учуралдарды бичигенде, сӱреен чын бичийт. Бого кӧрӧ, тӱӱкиниҥ кӧп бичиктери чынды јетире айтпай јат, не дезе олордыҥ чӱмдеечилериниҥ кезиги чынды јажырып јат. Тӱӱкичилер, јаҥжыкканы аайынча, јуу-согушта бойыныҥ албатызыныҥ јеҥдирткенин јажырып ийет. Је Агару Бичикти бичигендер израиль албатыныҥ јуу-согуштарда јеҥдиртип турганын јажырбаган. Анайда ок олор бойлорыныҥ да јастыраларын јажырбай, ачыгынча бичиген. Темдектезе, Моисей бойыныҥ јаан јастыразын ла Кудай оны јастыразы учун канайып кату-каруузына тургусканын јажырбай бичиген. Бу учурал керегинде Тоолор деп бичиктеҥ кычырарга јараар (Тоолор 20:2—12). Агару Бичикти бичигендердиҥ јетирӱлерди јажырбай чын бичигенинеҥ, бу бичик Кудайдыҥ башкарузыла бичилген деп кӧрӱнет. Айдарда, бис Агару Бичикке бӱдер аргалу.

10. Агару Бичиктиҥ јӧптӧри биске нениҥ учун болужар аргалу?

¹⁰ Ончо Чийим, эмезе Агару Бичик, «Кудайдыҥ тыныла берилген. Ол улусты ӱредерге, кинчекти илезине чыгарарга, јӱрӱмди тӱзедерге, акту эдип таскадарга тузалу» (2 Тимофейге 3:16). Агару Бичиктиҥ јӧптӧри биске нениҥ учун болужар аргалу? Нениҥ учун дезе бисти Иегова јайаган, оныҥ учун бистиҥ санааларысты ла сезимдеристи оҥдоп јат. Кудай бисти бойыстаҥ артык билер ле бис ти ырысту болзын деп кӱӱнзейт. Анайда ок биске не тузалу ла не каршулу болорын билет.

11, 12. а) Матфейдиҥ сӱӱнчилӱ јарыныҥ 5—7 бажалыктарында кандый јӧптӧр бичилген? б) Агару Бичиктеҥ база нени билип аларга јараар?

¹¹ Матфейдиҥ Сӱӱнчилӱ јарыныҥ 5—7 бажалыктарында, Иисустыҥ ойгор јӧптӧри бичилген: ырысту болоры јанынаҥ, улусла јакшы колбуларлу болоры јанынаҥ, анайда ок канайып мӱргӱӱри керегинде ле акча-манатка кандый кӧрӱмдӱ болоры керегинде. Бу јӧптӧр 2 000 јыл кайра бичилген де болзо, олор эмди де тузалу.

¹² Агару Бичикте анайда ок принциптер бар. Иегова принциптердиҥ болужыла бисти улусла амыр јӱрерине, иштеҥкей болорына ла билелик колбуларды тыҥыдарына ӱредет. Агару Бичиктиҥ принциптери бистиҥ кажыбыска ла: кем де болзоос, кайда да јатсаас, кандый да кӱчтерге туштазаас болужар аргалу. (Ачылта 1:3 кычырыгар; 3 Кожултаны кӧрӱгер.)

13. Судурчы Исаия Вавилон керегинде нени судурлаган?

¹³ Агару Бичикте бичилген судурлардыҥ кӧбизи бӱдӱп калган. Темдектезе, судурчы Исаия јебрен Вавилон кала јемирилип калар деп судурлаган (Исаия 13:19). Керек дезе бу канайып болорын чике бичип салган. Бу каланы сӱреен бек каалгалар (ворота) ла кала ажыра агып турган суу корулаган. Је бу суу сооло берзе ле каалгалары бӧктӧлбӧй артып калза, кала јуу јогынаҥ јууладып алар деп, Исаия судурлаган. Керек дезе Вавилонды јуулап алатан кижиниҥ адын да — Кир болор деп, айдып салган. (Исаия 44:27—45:2 кычырыгар; 4 Кожултаны кӧрӱгер.)

14, 15. Исаияныҥ судуры канайып бӱткен?

¹⁴ Вавилон керегинде айдылган судурдыҥ кийнинеҥ 200 јыл ӧдӧ берерде, каланыҥ стенелерине ӧштӱниҥ  черӱзи јууктап келген. Бу черӱни кем башкарган? Исаияныҥ судурлаганыла, Персияныҥ кааны — Кир болгон. Бу судурдыҥ ӧскӧ оок-теек јетирӱлери бӱткен бе?

¹⁵ Ол тӱн Вавилонныҥ улузыныҥ јыргап јаткан ӧйи болгон. Олор бойлорын коруда деп бодогон, не дезе, олордыҥ калазын бек стенелер ле суу корулаган. Је бу ок ӧйдӧ каланыҥ стенелериниҥ тыш јанында, Кир бойыныҥ черӱ зиле субак (канал) казып, сууны ӧскӧ јерге агызып ийген. Суу јабызай берерде, Персияныҥ јуучылдары оны кечип, ӧдӧ берген. Је калага канайып кирер? Судурда айдылганыла каалгалар ачык артып калар болгон. Анайып, Кир Вавилонды јуу-согуш јогынаҥ јуулап алган.

16. а) Исаия Вавилон керегинде база нени судурлаган? б) Бу судур бӱдӱп калган деп, бис кайдаҥ билерис?

¹⁶ Анайда ок, Исаия Вавилондо база качан да улус јатпас деп судурлаган. Ол мынайып бичиген: «Анда кем де качан да јуртабас» (Исаия 13:20). Бу судур бӱткен бе? Эйе. Бӱгӱнги кӱнде Вавилон болгон јерде (Ирактагы Багдадтаҥ тӱштӱк јаар 80 километр) эмдигенче јаҥыс јемириктер турат. Анда кем де јуртабай јат. Иегова Исаия ажыра: «Оны [Вавилонды] јалмуурла јоголто јалмап саларым» — деп јарлаган (Исаия 14:22, 23) *.

17. Кудайдыҥ берген сӧзине нениҥ учун бӱдерге јараар?

¹⁷ Агару Бичиктиҥ кӧп судурлары бӱдӱп калган. Айдарда, келер ӧй керегинде судурлар база бӱдӱп калар. Оныҥ учун Иегова јердиҥ ӱстин рай эдер деп берген сӧзине бис  алаҥзыбай јадыс. (Титке 1:2 кычырыгар.) Иегова бойыныҥ берген сӧзин јаантайын бӱдӱрип салат (Тоолор 23:19) *.

18. Кудайдыҥ Сӧзи керегинде Павел нени айткан?

¹⁸ Анайдарда, Агару Бичик ӧскӧ бичиктердеҥ незиле аҥыланып турганын билип алдыс. Анда келишпестер јок. Анда наука ла тӱӱки јанынаҥ јаантайын чын јетирӱлер айдылат. Анайда ок Агару Бичик ойгор јӧптӧрдиҥ бичиги ле кӧбизи бӱдӱп калган судурлардыҥ бичиги деп билип алдыс. Је бу бичик ӧскӧ дӧ јанынаҥ тузалу болот. Элчи Павел: «Кудайдыҥ сӧзи јӱрӱп, бойыныҥ ижин эдет» — деп айткан. Бу нени темдектейт? (Еврейлерге 4:12 кычырыгар.)

19, 20. а) Агару Бичик бойысты оҥдоп аларга канайып болужат? б) Слер Агару Бичикти, Кудайдыҥ сыйын, баалап турганаар деп, канайып кӧргӱзер аргалу?

¹⁹ Агару Бичик слердиҥ јӱрӱмигерди солыыр аргалу. Бу бичик бойысты оҥдоп аларга болужат. Оны кычырып, бис бойыстыҥ санааларысты ла сезимдеристи јакшы оҥдоп аладыс. Темдектезе, бистиҥ санаасла бис Кудайды сӱӱп турганыс ошкош, је чынынча болзо, Кудайды сӱӱри дегени — Агару Бичиктиҥ ӱреткениле јӱрерин темдектейт.

²⁰ Агару Бичикти чыннаҥ ла Кудайдыҥ бичиги деп айдарга јараар. Кудай бу бичикти бисти кычырзын, шиҥдезин ле сӱӱзин деп кӱӱнзейт. Оны шиҥдеерге албаданзаас, бу сый учун Кудайга быйанысты кӧргӱзерис. Кудай келер ӧйдӧ улуска нени эдерге турганы керегинде Агару Бичикте бичилип калган. Келер бажалыкта бу керегинде чокумдап куучындажарыс.