1, 2. а) Слер кижиниҥ јӱк ле ады-јолын билер болзогор, оныла јуук таныш деп, нениҥ учун айдып болбозоор? Јартап беригер. б) Иисус Христосты улус кем деп сананат?

ТЕЛЕКЕЙДЕ јарлу улус кӧп. Слер олордыҥ кезигиниҥ, байла, ады-јолын да билереер. Је олордыҥ јӱрӱми керегинде ле олор кандый улус деп, билбес болорыгар. Оныҥ учун слерди олорло јуук таныш деп айдарга јараар ба?

² Слер 2 000 јыл кире кайра јӱрген Иисус Христос керегинде та нени де уккан ла болбойыгар. Је кӧп саба улус чынынча ол кандый кижи болгонын билбес. Та кем де оны тегин ле јакшы кижи деп айдат, кем де оны судурчы деп сананат, а та кем де оны Кудай деп айдат. Слер нени айдар эдигер? (12 Кожултаны кӧрӱгер.)

3. Кудай ла Иисус Христос керегинде билгирлерди нениҥ учун алар керек?

³ Је нениҥ учун Иисус Христос керегинде јакшы билер керек? Нениҥ учун дезе Агару Бичикте: «Ӱргӱлји јӱрӱм дезе — ол јаҥыс чын Кудай Бойыҥды, Сен ийген Иисус Христосты билери» — деп айдылган (Иоанн 17:3). Иегова ла Иисус керегинде билгирлер јерде рай болотон тушта ӱргӱлјиге јӱретен арга ачат (Иоанн 14:6). Иисус керегинде база нениҥ учун билгирлер алар керек? Не дезе, ол бистерге канайып јӱрер керек ле улуска канайып баштанар керек деп, јакшы тем кӧргӱзет (Иоанн 13:34, 35). 1-кы бажалыктаҥ бис Кудай ол кем деп би лип алдыс. Эмди дезе, Агару Бичик Иисус Христос керегинде нени айдып турганын кӧрӱп ийектер.

4. «Мессия» ла «Христос» деген сӧстӧр нени темдектейт?

⁴ Иегова Агару Бичик ажыра јердӧӧн Мессия, ол эмезе Христос, келер деп айдып салган. «Мессия» деп еврей тилге айдылат, «Христос» деп грек тилге айдылат, је бу сӧстӧрдиҥ учуры јаҥыс. Мессия ол эмезе Христос деп, Кудайдыҥ аҥылу амадузын бӱдӱрерге талдалган кижини айдат. Мессия Кудайдыҥ келер ӧй керегинде судурларыныҥ ончозын бӱдӱрип салар. Анайда ок оныҥ эткени бӱгӱнги де кӱнде бистиҥ јӱрӱмиске тузазын јетирер аргалу. Иисустыҥ чыкканынаҥ озо: «Мессия кем болгой не?» — деп, кӧп улус соныркаган.

5. Иисустыҥ ӱренчиктери оны Мессия деп, алаҥзыган ба?

⁵ Иисустыҥ ӱренчиктери оны Мессия деп бир де алаҥзыбаган (Иоанн 1:41). Темдектезе, Симон Пётр Иисуска: «Сен — Христос» — деп, чике айтты (Матфей 16:16). Је бис нениҥ учун Иисусты Мессия деп алаҥзыбас аргалу?

6. Иегова, акту кӱӱнинеҥ Мессияны танып ийерге кӱӱнзеген улуска нени эткен?

⁶ Иисустыҥ чыкканынаҥ кӧп јылдар озо, Кудайдыҥ судурчылары Мессия кем болотон деп оҥдоорго болужатан кӧп судурлар бичип салган. Бир тем кӧрӱп ийектер. Слерди вокзалда бир де кӧрбӧгӧн кижини уткып алзын деп кем-кем сураган болзын. Слерге ол кижиниҥ тыш-бӱдӱмин јазап айдып берзе, оны таап аларга јеҥил болор. Анайып ла ок Иегова судурчылар ажыра Мессия нени эдерин, оныла не болорын јазап айдып берген деп айдарга јараар. Бу ончо судурлар Иисуска бӱдӱп калды.  Бӱгӱнги кӱнде, судурлалган Мессия Иисус болгон деп, акту кӱӱнинеҥ билип аларга кӱӱнзеген кижи, бӱдӱмјиленип алар аргалу.

7. Кандый эки судур Иисусты Мессия деп керелейт?

⁷ Эки судур кӧрӱп ийектер. Баштапкызы: судурчы Михей, Мессия јаан эмес Вифлеем деген калада чыгар деп, Иисустыҥ чыкканынаҥ 700 јыл озо судурлаган (Михей 5:2). А Иисус кайда чыккан? Вифлеем деген калада! (Матфей 2:1, 3—9). Экинчизи: судурчы Даниил Мессияны б. э. 29-чы јылында келер деп судурлаган (Даниил 9:25). Бу судурлар, Иисусты — келер болгон Мессия деп керелеп турган судурлардыҥ јӱк ле экӱзи. (13 Кожултаны кӧрӱгер.)

8, 9. Иисустыҥ чӧҥӱрилген тужында болгон учурал оны Мессия деп, канайып керелейт?

⁸ Анайда ок Иегова бойы да Иисусты Мессия деп керелеген. Иегова Крестеечи Иоаннга Мессияны танып ийетен темдек кӧргӱзерге сӧзин берген. Анайып, б. э. 29-чы јылында, Иисус Иордан сууга чӧҥӱрилип келерде, Иоанн бу темдекти кӧрӱп ийген. Бу керегинде Агару Бичикте мынайып айдылат: «Иисус креске тӱжеле [чӧҥӱрилип], ол тарый суудаҥ чыгып келерде, Ого теҥери ачылды. Ол кӱӱле чилеп Ого тӱжӱп келеткен Кудайдыҥ Тынын кӧрӱп ийди. Теҥеридеҥ ӱн чыкты: „Бу Мениҥ сӱӱген Уулым, Оныҥ Бойында Мениҥ јакшылыкту табым“» (Матфей 3:16, 17). Мынайып, Иоанн Иисусты Мессия деп оҥдоп ийген (Иоанн 1:32—34). Иисус Иегованыҥ  тыны тӱшкен кӱнде Мессия болуп калган. Анайып, Кудай Иисусты Башчы ла Каан эдип кӧстӧгӧн (Исаия 55:4).

⁹ Айдарда, Агару Бичиктиҥ судурлары, Иегованыҥ бойыныҥ сӧстӧри, Иисустыҥ чӧҥӱрилип јаткан тушта теҥеридеҥ болгон темдек Иисусты келер болгон Мессия деп, керелеп јат. Је эмди Иисус Христос кайдаҥ келген ле ол кандый кижи болгонын кӧрӱп ийектер.

10. Агару Бичик Иисустыҥ јерге келердеҥ озо јӱрӱми керегинде нени айдат?

¹⁰ Иисус Христос јерге келердеҥ озо, узак ӧйгӧ теҥериде јӱрген деп, Агару Бичикте айдылат. Бу Михейдиҥ Мессия «јебрен ӧйлӧрдӧҥ бери» бар болгон деген сӧстӧрине келижет (Михей 5:2). Иисус јерге келердеҥ озо теҥериде јӱргенин бойы да канча катап айткан. (Иоанн 3:13; 6:38, 62; 17:4, 5 кычырыгар.) Иисуста јерге келердеҥ озо Иеговала аҥылу колбулар бар болгон.

11. Иегова Иисусты нениҥ учун тыҥ баалап јат?

¹¹ Иегова Иисусты тыҥ баалап јат. Нениҥ учун? Нениҥ учун дезе Иегова Иисусты ончо немени јайаардаҥ озо јайаган. Мынаҥ улам ол «ончо јайалганныҥ башталганы» деп адалат (Колоссыдагыларга 1:15) *. Иегова Иисусты база нениҥ учун сӱӱп турган дезе, Иегова јӱк оны бойы јайаган (Иоанн 3:16, ЈТ). Арткан не-немени Иегова јӱк ле Иисусла кожо јайаган (Колоссыдагыларга 1:16). Анайда ок Агару Бичикте јӱк ле Иисус «Сӧс» деп адалат. Бу дезе, Иегова ангелдерге ле улуска јетирӱни Иисус ажыра бердиргенин кӧргӱзет (Иоанн 1:14).

12. Иисус Христос ло оныҥ Адазы бир кудай эмес деп, бис кайдаҥ билерис?

¹² Кезик улус Иисус Христос ло оныҥ Адазы бир кудай деп бӱдет. Је Агару Бичик бу керегинде нени айдат? Иисус јайалган болордо, ондо башталганы бар. Је Иеговада башталганы јок, карын ол бойы ончо немени јайаган (Сарын 90:2). Иисус Кудайдыҥ Уулы болуп, качан  да Кудайдыҥ јерин блаажарга сананбаган. Агару Бичикте Адазы Уулынаҥ јаан деп, чике айдылат. (Иоанн 14:28 кычырыгар; 1 Коринфтегилерге 11:3.) Анайда ок Агару Бичикте јаҥыс ла Иегова «Кӱчтӱдеҥ Кӱчтӱ Кудай» деп айдылат (Башталганы 17:1). Јер-телекейде оноҥ улу ла оноҥ кӱчтӱ кем де јок. (14 Кожултаны кӧрӱгер.)

13. Нениҥ учун Агару Бичикте Иисус — «кӧрӱнбес Кудайдыҥ сӱр-кебери» деп айдылат?

¹³ Иегова ла оныҥ Уулы, теҥери ле јер јайалардаҥ озо канча миллиард јылдарга кожо иштенген. Мынча кире ӧйгӧ олор бой-бойын тыҥ сӱӱп баштаган деп алаҥзыбайдыс! (Иоанн 3:35; 14:31). Иисус бастыра јанынаҥ Адазына тӱҥей, оныҥ учун Агару Бичикте: «Ол — кӧрӱнбес Кудайдыҥ сӱр-кебери» — деп айдылат (Колоссыдагыларга 1:15).

14. Кудайдыҥ Уулы канайып кижи болуп чыккан?

¹⁴ Иегованыҥ сӱӱген Уулы теҥерини артыргызып, јерге келерге белен болгон. Је бу јакылтаны бӱдӱрерге, ого кижи болуп чыгарга келишкен. Иегова бу кайкалды канайып эткен? Иегова Мария деген кысты эр кижиле конбогон до болзо, табынып алзын деп эдип салган. Мынаҥ улам Мария толо кемдӱ бала табып, оны Иисус деп адаган (Лука 1:30—35).

15. Слер Иегова керегинде кӧптӧдӧ канайып билип алар аргалу?

¹⁵ Агару Бичикте Матфейдиҥ, Марктыҥ, Луканыҥ ла Иоанныҥ Сӱӱнчилӱ јары деп јарлу тӧрт бичиктеҥ слер Иисустыҥ јӱрӱми ле кылык-јаҥы керегинде билип алар аргалу. Анайда ок Иегова керегинде кӧптӧдӧ билип алараар, нениҥ учун дезе Иисус адазына сӱреен тӱҥей.  Керек дезе, бир катап Иисус: «Мени кӧргӧни, Аданы кӧргӧни ол» — деп айткан (Иоанн 14:9).

16. Иисус неге ӱреткен? Бу ӱредӱлер кемниҥ болгон?

¹⁶ Кӧп улус Иисус Христосты «Ӱредӱчи» дежип туратан (Иоанн 1:38; 13:13). Ол неге ӱреткен? Иисус озо ло баштап «Каандык керегинде Сӱӱнчилӱ Јар» јарлаган. Бу јар кандый Каандык керегинде болгон? Бу Каандык теҥеридеҥ јерле башкарып, Кудайга уккур улуска алкыштар экелетен Кудайдыҥ башкарузы болот (Матфей 4:23). Иисустыҥ бастыра ӱредӱлери Иегованаҥ болгон. Иисус: «Мениҥ ӱредӱӱм Менийи эмес, Мени Ийгендийи» — деп, бойы айткан (Иоанн 7:16). Иисус Кудайдыҥ амадузын — Каандык керегинде сӱӱнчилӱ јарды ончо улус уксын деп кӱӱнзегенин билер болгон.

17. Иисус кайда ӱреткен? Улусты ӱредерге ол нениҥ учун ӧйин ле ийде-кӱчин кысканбаган?

¹⁷ Иисус кайда ӱреткен? Кайда ла улус јуулган јерлерде: калаларда ла јурттарда, синагогаларда ла ӧргӧӧдӧ, садуныҥ тепсеҥдеринде ле улустыҥ айылдарында. Улус ого келер деп сакыбай, бойы улуска баратан (Марк 6:56; Лука 19:5, 6). Иисус улусты ӱредерге ӧйин ле ийде-кӱчин кысканбаган, нениҥ учун дезе ол Кудайдыҥ јакарузын бӱдӱрип јатканын оҥдоп туратан ла оныҥ сӧзин јаантайын угар болгон (Иоанн 8:28, 29). Анайда ок Иисус улусты килеген, оныҥ учун јарлаган. (Матфей 9:35, 36 кычырыгар.) Иисус кудай јаҥдардыҥ башчыларыныҥ улуска Кудай ла оныҥ Каандыгы керегинде сӱӱнчилӱ јарды куучындабай турганын кӧрӱп, улуска болужарга кӱӱнзегенинеҥ улам, сӱӱнчилӱ јарды јарлаган.

18. Слерге Иисус Христостыҥ кандый кылык-јаҥы эҥ ле тыҥ јарап турган?

¹⁸ Иисус Христос сӱӱштӱ, килеҥкей, јалакай ла ачык-јарык кижи болгон. Керек дезе ого балдар да тар тылатан (Марк 10:13—16). Ол улусты чырай бӱдӱжиле ылгабайтан, кандый ла чындык эмести ле карын аларын (взятка) јаман кӧрӧтӧн (Матфей 21:12, 13). Иисустыҥ ӧйинде ӱй улуста кӧп јаҥ болбогон ло улус олорды тообой туратан. Је Иисус ӱй улусты баалап, олорго тоомјылу баштанган (Иоанн 4:9, 27). Анайда ок Иисус сӱреен јобош болгон. Бир катап ол јалчылардыҥ ижин эдип, элчилериниҥ буттарын јунган (Иоанн 13:2—5, 12—17).

19. Иисустыҥ улуска не керектӱ болгонын оҥдоп турганы ла олорго болужарга кӱӱнзегени кандый учуралдаҥ кӧрӱнет?

¹⁹ Иисус улуска не керектӱ болгонын оҥдоп, олорго болужарга тыҥ кӱӱнзеген. Мынызы Кудайдыҥ болужыла эткен кайкалдарынаҥ кӧрӱнет (Матфей 14:14). Бир катап Иисуска капкаш балулу кижи базып келеле: «Мени арутайын дезеҥ, арутап ийериҥ» — деди. Иисуска бу кижиниҥ шыралап турганын кӧрӧргӧ ачу болгон, оныҥ учун ол оны килеп, ого болужар кӱӱни келген. Иисус ого колыла тийип: «Арутайын, ару бол» — деди. Бу ла ок ӧйдӧ капкаш балулу кижи јазыла берди! (Марк 1:40—42). Ол кижиниҥ сӱрекей тыҥ сӱӱнгенин сананып ийзеер!

20, 21. Иисус Кудайга сӧсуккур болотоныныҥ эҥ јакшы темин кӧргӱскен деп, нениҥ учун айдарга јараар?

²⁰ Иисус Кудайга сӧсуккур болотоныныҥ эҥ јакшы темин кӧргӱсти. Кандый ла айалгаларда, керек дезе удурлажулар да болуп турарда, ол Адазына чындык арткан. Оны Сатана да ченеп турарда, ол кинчек этпеген (Матфей 4:1—11). Анайда ок јуук улузы, тӧрӧӧндӧри оны Мессия деп бӱтпей, керек дезе оныҥ «санаазы энделген» деп айдып та турарда, ол Кудайдыҥ јакылтазын  токтобозынаҥ бӱдӱрген (Марк 3:21). Ӧштӱлери оны кыйнап, коркышту тыҥ базынып та турарда, ол Кудайга чындык артып, олордоҥ ӧчин албаган (1 Петр 2:21—23).

²¹ Керек дезе, Иисустыҥ ӧлӱми кыйын-шыралу болгон до болзо, ол ӧлӧрдиҥ ӧлгӧнчӧ Иеговага чындык арткан. (Филиппыдагыларга 2:8 кычырыгар.) Иисустыҥ јердеги јӱрӱминиҥ калганчы кӱнинде ӧткӧн кӱчтерин сананып ийзеер де: каруулга алдыртканын, Кудайды јамандаган деп бурулатканын, садынчак јаргычыларга ӧлӱмге јаргылатканын, улуска шоодып каткыртканын, римниҥ јуучылдарына базындырганын ла учы тӱбинде кыйынду ӧлӱмин — тӧҥӧшкӧ кададып салганын. Христос божоп јадала: «Бӱтти!» — деп айт ты (Иоанн 19:30). Божогон соондо, ӱчинчи кӱнде Иегова оны кӧскӧ кӧрӱнбес тын эдип тиргизип алган (1 Петр 3:18). Бир канча неделенеҥ Иисус теҥеридӧӧн кайра барып, «Кудайдыҥ оҥ јанына отурып», Кудай оны Каан эдип тургузарын сакып баштаган (Еврейлерге 10:12, 13).

22. Иисус Адазына чындык болуп артканынаҥ улам, биске кандый арга ачылды?

²² Иисус Адазына чындык артканынаҥ улам, бистерге јердеги райда ӱргӱлјиге јӱретен арга ачылган. Бу Иегованыҥ амадузы болгон. Келер бажалыкта, ӱргӱлјиге јӱретен ижемјибисте ле Иисустыҥ ӧлӱминде кандый колбу барын билип аларыс.