1, 2. Мӱргӱӱлди нениҥ учун Кудайдыҥ аҥылу сыйы деп айдарга јараар? Агару Бичик мӱргӱӱл керегинде нени айдып турганын нениҥ учун билер керек?

БИСТИҤ болчок Јер учы-кыйузы јок Орчылаҥга кӧрӧ, чек кичинек деп билдирет, а Јердеги улус — оноҥ кичинек. Иегованыҥ кӧзине јердиҥ ӱстиндеги бастыра албатылар сууныҥ бир тамчызындый деп, Агару Бичикте айдылат (Сарын 115:15; Исаия 40:15). Андый да болзо, Сарын 145:18, 19-та мынайып айдылган: «Иегова, оны акту јӱрегинеҥ кычырып, болуш сурап турган улустыҥ ончозына јуук. Ол Оноҥ айап тургандардыҥ кӱӱнин бӱдӱрер, болуш сураган кыйгызын угуп, олорды аргадаар». Бисте Кудайга мӱргӱйтен арга бары, кандый јакшы! Иегова, Јер-телекейдиҥ Јайаачызы, бистиҥ јаныста болорго кӱӱнзейт. Ол бистиҥ мӱргӱӱлдеристи угарга белен. Мӱргӱӱл — кажыбыска ла Кудайдаҥ берилген аҥылу сый.

² Је Иегова бистиҥ мӱргӱӱлдеристи јӱк ле оныҥ табы аайынча мӱргӱп турзаас, угар. Оныҥ учун Агару Бичик мӱргӱӱл керегинде нени айдып турганын билип алактар.

3. Кудайга нениҥ учун мӱргӱӱр керек?

³ Иегова бистерди оныла куучындажып турзын деп кӱӱнзеп турганын бис кайдаҥ билерис? Филиппыдагыларга 4:6, 7 кычырып ийигер. Сананып ийзеер де: Јер-телекейдиҥ Јайаачызы слерле таҥынаҥ јилбиркеп,  слерди ого кӱчтереерди ле сезимдереерди куучындап турзын деп кӱӱнзейт.

4. Иеговага јаантайын мӱргӱп турганыс оныла најылыгыска кандый камаанын јетирер?

⁴ Мӱргӱӱл бистерге Иегованыҥ јуук најызы болорго болужат. Најылар бойлорыныҥ санаазын, сезимдерин ле санааркаштарын бой-бойына јаантайын куучындап турза, олордыҥ најылыгы тыҥып јат. Иегова Агару Бичик ажыра бистерге бойыныҥ санааларын ла сезимдерин ачып, келер ӧйдӧ нени эдерин айдып салган. Слер де ого бойыгардыҥ тереҥ сезимдереерди јаантайын айдар аргалу. Ол тушта Иеговала слердиҥ најылыгар оноҥ тыҥ болор (Иаков 4:8).

5. Иегова кезик мӱргӱӱлдерди укпай турган деп кайдаҥ билерис?

⁵ Иегова бастыра мӱргӱӱлдерди угуп турган ба? Јок. Судурчы Исаияныҥ ӧйлӧринде Иегова Израиль албатыга: «Слер кӧп мӱргӱп те турган болзогор, колдорыгар  кӧп кан тӧккӧн учун, мен слерди укпай јадым» — деп айткан (Исаия 1:15). Айдарда, бис Иеговага јарабай турган керектер эдип турзаас, оноҥ ыраап каларыс. Анайып ол бистиҥ мӱргӱӱлдеристи укпай барар.

6. Кудай бисти уксын деп, биске нениҥ учун ого бӱдер керек? Бӱдӱп турганыс недеҥ кӧрӱнер?

⁶ Кудай бистиҥ мӱргӱӱлдеристи уксын деп кӱӱнзеп турган болзоос, ого бӱдер керек (Марк 11:24). Элчи Павел мынайып јартаган: «Бӱдӱмји јокко, Кудайга јараар арга јок. Ол бар деп, Оны чын бедиреп јӱрген улуска кайрал болор деп, Кудайга келип турган кижи бӱдер учурлу» (Еврейлерге 11:6). «Мен бӱдедим» — деп айдары ас, бӱдӱп турганыгарды керектерле кӧргӱзер керек. Канайып? Кудайдыҥ кажы ла сӧзине уккур болор керек. (Иаков 2:26 кычырыгар.)

7. а) Нениҥ учун тоомјылу ла јобош болуп мӱргӱӱр керек? б) Акту јӱректеҥ мӱргӱӱри дегени нени темдектейт?

⁷ Кудайга тоомјылу ла јобош болуп мӱргӱӱр керек. Бис каанга эмезе президентке мынайып ла тоомјылу баштанар эдис. А Иегова — Кӱчтӱдеҥ Кӱчтӱ Кудай, оныҥ учун ого оноҥ тоомјылу баштанар керек (Башталганы 17:1; Сарын 138:6). Анайда ок акту јӱректеҥ мӱргӱӱр керек. Бир ле сӧстӧрди такып-такып айтпай, чыннаҥ неде керексинип турганаарды айдар керек (Матфей 6:7, 8).

8. Бис Кудайдаҥ нени-нени сураган болзоос, бойыстыҥ јаныстаҥ нени эдер учурлу?

⁸ Бис Кудайдаҥ нени-нени сураган болзоос, мӱргӱӱлдерис аайынча јӱрерге бойыстыҥ јаныстаҥ бастыра кӱчисле албаданар керек. Темдектезе, бис Иегованаҥ кӱнӱҥ-сайынга керектӱ немелер сураган болзоос, ол бистиҥ ордыбыска ӱзе эдип салар деп сананбайдыс. Карын иштеҥкей болуп, кандый ла ишти эдерге белен болодыс  (Матфей 6:11; 2 Фессалоникадагыларга 3:10). Ол эмезе Иегованы биске кандый бир ченелтелерле тартыжарга болушсын деп сураган болзоос, ченелте боло бергедий айалгалардаҥ кыйып турар керек (Колоссыдагыларга 3:5). Эмди дезе мӱргӱӱл керегинде кезик сурактарды шӱӱжип ийектер.

9. Бис кемге мӱргӱӱр учурлу? Иоанн 14:6-да айдылганыла Кудайга кем ажыра мӱргӱӱр керек?

⁹ Бис кемге мӱргӱӱр учурлу? Иисус Христос ӱренчиктерин «теҥеридеги Адабыска» мӱргӱзин деп ӱреткен (Матфей 6:9). Анайда ок ол: «Мен — јол, чындык ла јӱрӱм. Мен ажыра келбегенче, Адага кем де келип болбос» — деп айткан (Иоанн 14:6). Айдарда, јӱк ле Иеговага мӱргӱӱр керек. Је мӱргӱӱлди Иисус Христос ажыра айдар керек. Иисус Христос ажыра мӱргӱӱри дегени нени темдектейт? Бу дезе, Иисус Иегованыҥ амадузында јаан учурлу јерде турганыла јӧпсинерин темдектейт. Ол бистерди кинчектеҥ ле ӧлӱмнеҥ јайымдаарга јерге келген (Иоанн 3:16; Римдегилерге 5:12). Анайда ок Иегова оны Улу абыс ла јаргычы эдип кӧстӧп салган (Иоанн 5:22; Еврейлерге 6:20).

10. Кудайга канайып мӱргӱӱр керек?

¹⁰ Канайып мӱргӱӱр керек? Иегова бисти тизеленеле, отурала эмезе турала мӱргӱзин деп некебей јат. Је Иеговага мӱргӱп јатсаас, бистиҥ отурганыс эмезе турганыс тоомјылу болор учурлу деп, Агару Бичик ӱредет (1 Летопись 17:16; Неемия 8:6; Даниил 6:10). Иегова озо баштап кижиниҥ јӱрегин кӧрӧт. Кандый ла јерде, кандый ла ӧйдӧ мӱргӱӱрге јараар. Иегова, керек дезе, ичисте де мӱргӱгенисти угуп јат (Неемия 2:1—6).

11. Не керегинде мӱргӱӱрге јараар?

 ¹¹ Не керегинде мӱргӱӱрге јараар? Кудайдыҥ табы аайынча ӱзе ле неме керегинде мӱргӱӱрге јараар. «Оныҥ табыла нени суразабыс, Ол бисти угуп турган» — деп, Агару Бичикте айдылат (1 Иоанн 5:14). Кудайдаҥ бойыска нени-нени сураарга јараар ба? Эйе, јараар. Бис Иеговага бастыра немени најыбыска чылап куучындаар аргалу. Мӱргӱӱлде санаагарды ла сезимдеригерди ачарга уйалбагар (Сарын 62:8). Јастыра керектер этпеске, Кудайдаҥ агару тын сураарга јараар (Лука 11:13). Чын тӱп-шӱӱлтеге келерге, ойгор сурагар, а кӱчтердиҥ аайына чыгарга, ийде-кӱч сураарга јараар (Иаков 1:5). Анайда ок Кудайдаҥ јаманысты таштазын деп, сураар керек (Ефестегилерге 1:3, 7). Улус учун база мӱргӱӱр керек, темдектезе, билегистиҥ ле јуунныҥ улузы учун (Апостолдордыҥ ижи 12:5; Колоссыдагыларга 4:12).

12. Озо ло баштап не керегинде мӱргӱӱр керек?

¹² Озо ло баштап не керегинде мӱргӱӱр керек? Иеговала колбулу сурактар ла оныҥ табы керегинде мӱргӱӱр керек. Анайда ок оныҥ биске ончо эдип турганы учун быйанысты акту јӱрегистеҥ айдып турар керек (1 Летопись 29:10—13). Иисус јерде болордо ӱренчиктерин шак бу керегинде мӱргӱӱрге ӱреткен. (Матфей 6:9—13 кычырыгар.) Иисус олорды озо ло баштап Кудайдыҥ ады агарулалзын деп мӱргӱӱрге ӱреткен. Экинчизинде, Кудайдыҥ Каандыгы келип, Иегованыҥ табы јер-ӱстине бӱтсин деп мӱргӱӱрине ӱреткен. Мыныҥ кийнинеҥ бойыска керектӱзин де сураарга јараар. Бис озо ло баштап Иеговала колбулу сурактар керегинде мӱргӱп турзаас, оныла колбуларысты баштапкы јерге тургузадыс деп кӧргӱзедис.

13. Мӱргӱӱлдердиҥ узуны канча кире болор керек?

 ¹³ Мӱргӱӱлдердиҥ узуны канча кире болор керек? Бу керегинде Агару Бичикте айдылбаган. Ӱзе неме айалганаҥ камаанду болот. Темдектезе, ажанар алдында кыскарта мӱргӱӱрге јараар. Је Иеговага быйанысты эмезе бойыстыҥ санааркаштарысты куучындап турзаас, мӱргӱӱлдерис узун болордоҥ айабас (1 Самуил 1:12, 15). Је улусты кайкадарга, Иисустыҥ ӧйинде јаткан  кезик улус чылап, ӧнӧтийин узак мӱргӱзе јастыра болор (Лука 20:46, 47). Мындый мӱргӱӱлдерди Иегова укпай јат. Ол акту јӱректеҥ айткан мӱргӱӱлдерди баалап јат.

14. Кӱн туркунына канча катап мӱргӱӱр керек, нениҥ учун?

¹⁴ Кӱн туркунына канча катап мӱргӱӱр керек? Иеговала канча ла кире кӧп куучындажарга јараар. Агару Бичик бисти: «Јаантайын мӱргигер», «Туркаары мӱргигер» — деп кӱӱнзедет (Матфей 26:41; Римдегилерге 12:12; 1 Фессалоникадагыларга 5:17). Нениҥ учун дезе Иегова бисти јаантайын угарга белен. Бис Кудайга оныҥ сӱӱжи ле кысканбазы учун быйанысты кӱнӱҥ сайын айдар аргалу, анайда ок јӱрӱмиске башкарту берип, болужып, чыдал берзин деп сураар аргалу. Иеговага мӱргӱйтен арганы чыннаҥ ла баалап турзаас, оныла куучындажатан арганы јаантайын табып турарыс.

15. Нениҥ учун мӱргӱӱлдиҥ учында «аминь» деп айдар керек?

 ¹⁵ Нениҥ учун мӱргӱӱлдиҥ учында «аминь» деп айдар керек? «Аминь» деген сӧс «чын» эмезе «андый ла болзын» дегенин темдектейт. Мӱргӱӱлдиҥ учында «аминь» деп айдып, сӧстӧрис акту јӱрегистеҥ болгонын кӧргӱзедис (Сарын 41:13). Улусла кожо мӱргӱгениниҥ учында «аминь» деп айтканыс, мӱргӱген кижиниҥ сӧстӧриле јӧп болгонысты кӧргӱзет. «Аминь» деп, ӱнденип эмезе ичисте айдарга јараар (1 Летопись 16:36; 1 Коринфтегилерге 14:16).

16. Иегова мӱргӱӱлдериске карууны берип турган деп, нениҥ учун айдарга јараар?

¹⁶ Иегова мӱргӱӱлдериске карууны берип турган деп, нениҥ учун айдарга јараар? Нениҥ учун дезе Агару Бичикте ол «мӱргӱӱлдердиҥ Угаачызы» деп адалат (Сарын 65:2). Иегова миллиондор тоолу улустыҥ акту јӱрегинеҥ мӱргӱгенин угуп, каруузын берет.

17. Иегова мӱргӱӱлдерге канайып каруу берет? Темдер куучындап беригер.

¹⁷ Иегова мӱргӱӱлдерге каруу берерге, ангелдерди эмезе јердеги ишчилериниҥ кемизин-кемизин болуш эдип ийет (Еврейлерге 1:13, 14). Темдектезе, Агару Бичикти оҥдоп аларга мӱргӱп турган кижиге тургуза ла Иегованыҥ Керечилери келген учуралдар ас эмес болот. Бу, ангелдердиҥ «Јакшылыкту Јарды» бастыра јердиҥ ӱстинде таркадарга, эрчимдӱ туружып турганын кӧргӱзет. (Ачылта 14:6 кычырыгар.) Анайда ок Иегова ака-эјелерди керектӱ ӧйдӧ болуш эдип ийип, бистиҥ мӱргӱӱлдериске каруу берет (Укаа сӧстӧр 12:25; Иаков 2:16).

18. Иегова мӱргӱӱлдерге база канайып каруу берет?

 ¹⁸ Иегова мӱргӱӱлдерге база канайып каруу берет? Кандый бир кӱчтиҥ аайына чыгарга биске башкарту ла ийде-кӱч керек болзо, Иегова биске агару тынын берер аргалу (2 Коринфтегилерге 4:7). Ол эмезе биске кандый бир јӧп чыгарар керек болзо, Иегова бойыныҥ Сӧзинеҥ керектӱ шӱӱлтени таап аларга болужар. Канайып? Агару Бичикти таҥынаҥ кычырып јада, кандый бир шӱӱлтеге ајару эдип ийеристеҥ айабазыс. Эмезе биске керектӱ шӱӱлтени Иегова јуунныҥ туштажузында кемниҥ-кемниҥ јартамалы ажыра айдып берер аргалу. Айса болзо, Агару Бичиктеҥ керектӱ шӱӱлтени аксагалдардыҥ кемизи-кемизи биске айдып берер (Галаттарга 6:1).

19. Иегова мӱргӱӱлиске каруу бербей турган деп билдирип турза, нени ундыбас керек?

¹⁹ Је кезикте Иегова мӱргӱӱлдериске каруу бербей турган деп билдирер болор. Ундыбагар: биске не керектӱзин ле оны качан ла канайып беретенин Иегова јакшы билер. Кезикте кӧп катап мӱргӱп, сураар керек — мынайып Иеговага бистиҥ сурап турган немегис биске чыннаҥ керектӱ болуп турганын кӧргӱзедис. Мынайда албаданганыс Кудай карууны берер деп, алаҥзыбай турганысты кӧргӱзет (Лука 11:5—10). Кезикте мӱргӱӱлистиҥ каруузы бистиҥ сакыганыстаҥ башка болордоҥ айабас. Темдектезе, бис Иегованы кандый да уур-кӱчти јӱрӱмистеҥ јоголтып салзын деп сураганыс, је ол мыныҥ ордына оны ӧдӱп чыгатан ийде-кӱч берген. (2 Коринфтегилерге 4:7 кычырыгар.)

20. Иеговага нениҥ учун јаантайын мӱргӱӱр керек?

²⁰ Бисте Иеговага мӱргӱйтен арга бары кандый јакшы! Бир де алаҥзыбагар: Иегова бисти угуп јат (Сарын 145:18). Иеговага канча ла кире кӧп мӱргӱп турзаас, ончо ло кире бистиҥ најылыгыс тыҥып јат.