1. Слерде кандый сурак чыгар болор?

БУ БИЧИКТИ ӱренип, слер Агару Бичиктиҥ кӧп ӱредӱлерин билип алдаар, темдектезе: ӱргӱлји јӱрӱм керегинде, божоп калган улусла не болуп турганы керегинде ле тирилиш керегинде (Јарлыкчы 9:5; Лука 23:43; Иоанн 5:28, 29; Ачылта 21:3, 4). Слер Иегованыҥ Керечилериниҥ туштажуларына јӱрӱп баштайла, олор Кудайга чын бажырып турган деп бӱдӱмјиленген болороор (Иоанн 13:35). Мынаҥ улам Иеговала слердиҥ најылыгар тыҥып, ого иштейтен кӱӱнигер келген болор.  Андый болзо, слер: «Эмди мен нени эдер учурлу?» — деп, сурап турган болороор.

2. Бир эфиоп кижи нениҥ учун сууга чӧҥӱрилерге кӱӱнзеген?

² Андый ла сурак Иисус Христостыҥ ӧйинде јӱрген бир эфиоп кижиде болгон. Ол айткан: «Бат, суу; креске тӱжерге кем меге буудактап јат?» (Апостолдордыҥ ижи 8:26—36). Ол нениҥ учун сууга чӧҥӱрилерге кӱӱнзеген? Иисус Христостыҥ ӱренчиктериниҥ бирӱзи, Филипп, Иисусты Мессия деп, эфиопко јартап берерде, бу чындык оныҥ јӱрегине томулып, сууга чӧҥӱрилерге кӱӱнзеткен.

3. а) Иисус бойыныҥ ӱренчиктерине нени јакарган? б) Чӧҥӱрилери канайып ӧдӧр учурлу?

³ Агару Бичикте Иеговага иштеер кӱӱндӱ кижи чӧҥӱрилер учурлу деп јарт айдылат. Иисус Христос бойыныҥ ӱренчиктерине: «Ончо калыктарды ӱредигер. Олорды Аданыҥ, Уулыныҥ ла Агару Тынныҥ адыла кресте[гер]» — деп, јакару берген (Матфей 28:19). Христос бойы база сууга чӧҥӱрилген. Суу оныҥ јӱк ле бажына урулган эмес, ол бӱдӱнге сууга кирген (Матфей 3:16). Бӱгӱн христиандар чӧҥӱрилер тушта, анайып ла сууга бӱдӱнге кирер учурлу.

4. Сууга чӧҥӱрилери нени кӧргӱзет?

⁴ Сууга чӧҥӱрилери кижиниҥ акту кӱӱнинеҥ Кудайдыҥ најызы болуп, ого иштеерге турганын кӧргӱзет (Сарын 40:7, 8). Чӧҥӱрилер алдында нени эдер керек?

5. а) Чӧҥӱрилерге турган болзогор, слерге озо ло баштап нени эдер керек? б) Иегованыҥ Керечилериниҥ јууныныҥ туштажуларына нениҥ учун јӱрер керек?

⁵ Чӧҥӱрилердеҥ озо, Иегова ла Иисус Христос керегинде билгирлер алар керек. Агару Бичикти ӱренип  баштайла, слер билгирлер алып баштаганаар. (Иоанн 17:3 кычырыгар.) Је бу јӱк ле баштапкы алтам. Не дезе, Агару Бичик Иегованыҥ табын «толо билерге» кӱӱнзедет (Колоссыдагыларга 1:9). Бу јанынаҥ слерге Иегованыҥ Керечилериниҥ јуундарыныҥ туштажулары болужар. Бу туштажуларга улам сайын јӱрӱп, Кудайла колбулараарды тыҥыдып алараар (Еврейлерге 10:24, 25).

6. Чӧҥӱрилердеҥ озо Агару Бичикти канча кире јакшы билер керек?

⁶ Иегова слерди чӧҥӱрилердеҥ озо Агару Бичикти ӱзе билзин деп сакыбай јат. Ол мыны сууга чӧҥӱрилерге кӱӱнзеген эфиоп кижидеҥ де сакыбаган (Апостолдордыҥ ижи 8:30, 31). Кудай керегинде билгирлерди бис чактыҥ-чакка аларыс (Јарлыкчы 3:11). Оныҥ учун сууга чӧҥӱрилерге, Агару Бичиктиҥ тӧс ӱредӱлерин билип, олорло јӧпсингени једер эди (Еврейлерге 5:12).

7. Агару Бичиктеги билгирлер слерге кандый камаанын јетирген?

⁷ Агару Бичикте: «Бӱдӱмји јокко, Кудайга јараар арга јок» — деп айдылып калган (Еврейлерге 11:6). Оныҥ учун чӧҥӱрилердеҥ озо бӱдӱп турганын тыҥыдар керек. Јебрен Коринфтиҥ кезик улузы Иисустыҥ ӱренчиктери неге ӱредип турганын угала, «бӱдӱп, креске тӱштилер» деп, Агару Бичикте айдылат (Апостолдордыҥ ижи 18:8). Анайда ла ок слер де Агару Бичиктеҥ билгирлер алып, Кудайдыҥ берген сӧзине ле Иисустыҥ тайылгазы кинчектеҥ ле ӧлӱмнеҥ јайымдаар аргалу деп бӱдӱп баштаганаар (Иисус Навин 23:14; Апостолдордыҥ ижи 4:12; 2 Тимофейге 3:16, 17).

8. Билип алганаарды улуска куучындаарга, слерди не кӱӱнзедер?

⁸ Агару Бичиктеҥ алып турган билгирлер јӱрӱмигерге тузалу болуп турганын кӧрӱп турзагар, слердиҥ  бӱдӱмјигер тыҥыыр. Мынаҥ улам билип алганаарды база кемге де куучындаар кӱӱнеер келер болор (Иеремия 20:9; 2 Коринфтегилерге 4:13).

9, 10. а) Алган билгирлереерди кемге куучындаарга јараар? б) Јуунла кожо јарлап баштаарга нени эдер керек?

⁹ Јаҥы билгирлерди слер билегердиҥ улузына, најылараарга, айылдаштараарга эмезе кожо иштеп турган улуска куучындаарга кӱӱнзеер болороор. Је мыны ајарыҥкай болуп, черчеҥ ле јалакай эдерге албаданыгар. Кийнинде слерде јуунла кожо јарлайтан арга болор. Качан слерге мындый кӱӱн келзе, бу керегинде слерле Агару Бичикти ӱренип турган кижиге айдыгар. Ол слерди јарчы болорго белен деп кӧрӱп турза, анайда ок слер Агару Бичиктиҥ принциптерин тузаланып турган болзогор, ол слерле кожо јуунныҥ эки аксагалына јолугарга куучындажып алар.

¹⁰ Аксагалдар слердиҥ Агару Бичиктиҥ тӧс ӱредӱлерин оҥдоп турганаарга, ӱредӱлерге бӱдӱп, олорды тузаланып турганаарга, анайда ок чыннаҥ ла Иегованыҥ Керечизи болорго турганаарга бӱдӱмјиленерге, слерле куучын ӧткӱрер. Бу куучыннаҥ коркыбас керек, не дезе, аксагалдар јуунныҥ улузын, ол тоодо слерди де кичееп, кӧрӱп јат (Апостолдордыҥ ижи 20:28; 1 Петр 5:2, 3). Бу куучынныҥ кийнинде, слер эмди јуунныҥ улузыла кожо јарлап болороор бо деп, аксагалдар айдып берер.

11. Јуунла кожо јарлаардаҥ озо, нениҥ учун јӱрӱмисте солынталар эдер керек?

¹¹ Аксагалдар слерге јарчы болорго јӱрӱмигерде база та нени де солыыр керек деп, айдардаҥ айабас. Је нениҥ учун андый солынталарды эдер керек? Бис Кудай керегинде куучындап турзаас, Кудайдыҥ чы гартылу улузы болодыс, оныҥ учун бистиҥ јӱрӱмистеҥ Кудайдыҥ ишчизи болуп турганыс кӧрӱнип турар учурлу (1 Коринфтегилерге 6:9, 10; Галаттарга 5:19—21).

12. Нениҥ учун ончо улуска кинчегин алынар керек?

¹² Сууга чӧҥӱрилердеҥ озо база бир јаан учурлу алтам эдер керек. Элчи Петр айткан: «Кинчектеригер арчылзын деп, кинчегерди алынып, Кудайга баштаныгар» (Апостолдордыҥ ижи 3:19). Кинчекти алынары ол не дегени? Ӧткӧн ӧйдӧ эткен јастыра керектер учун бойына тыҥ ачуурканары. Темдектезе, слер балыр јӱрӱм јӱрген болзоор, кинчегерди алынар керек. Керек дезе бастыра јӱрӱмине чын јӱрерге албаданган да улуска кинчегин алынар керек, нениҥ учун дезе, ончо улус кинчектӱ болгонынаҥ улам, Кудай олордыҥ кинчегин таштазын деп, керексинип јадылар (Римдегилерге 3:23; 5:12).

13. «Кудайга баштанары» нени темдектейт?

¹³ Јастыра керектер эткениске јӱк ле ачуурканары једер бе? Јок. Элчи Петр анайда ок Кудайга баштаныгар деп айткан, ӧскӧртӧ айтса озогы јӱрген јастыра јӱрӱмди токтодып, јаҥы јӱрӱм баштаар керек. Темдектезе, слер кандый да калага баштапкы ла катап барып јадыгар. Кандый да ӧйдӧ слер јастыра барып јатканаарды оҥдоп ийеле, нени эдеригер? Токтой тӱжӱп, кайра бурылып, чын јолдӧӧн чыгараар. Анайып ла ок, слер Агару Бичикти ӱренип тура, бойыгардыҥ јӱрӱмеерде та нени де солыыр керек деп ајарып ийер болороор. Ол тушта слер «Кудайга баштанарга» — ӧскӧртӧ  айтса, керектӱ солынталар эдип, чын јӱрӱм баштаарга белен болороор бо?

14. Кудайга учурланары нени темдектейт?

¹⁴ Сууга чӧҥӱрилер алдында эдетен база бир јаан учурлу алтам — Иеговага учурланары. Учурланып јатсагар, јӱк ле Иеговага бажырараар ла озо ло баштап оныҥ кӱӱн-табын бӱдӱререер деп, аҥылу мӱргӱӱлде Иеговага сӧзигерди бередигер (Јаҥды такыганы 6:15).

15, 16. Кижини Кудайга учурланарга не кӱӱнзедер?

¹⁵ Јӱк ле Иеговага бажырар деп сӧзин бергенин, бастыра јӱрӱминде бир ле кижиле јуртаар деп сӧзин бергенине тӱҥейлеерге јараар. Мыны бир темниҥ болужыла кӧрӱп ийектер. Јиит уулга бир кыс јарап баштаган. Ол оныла там ла јууктада таныжып турза, бир канча ӧйдиҥ бажында оны сӱӱй бергенин оҥдоп, оныла биле тӧзӧӧргӧ кӱӱнзейт. Бу сӱреен каруулу ла јаан учурлу алтам деп оҥдоп то турган болзо, ол мыны эдерге белен болот, не дезе, ол оны сӱӱп јат.

¹⁶ Анайып ла Иеговала канча ла кире јуук таныжып турзагар, оны сӱӱп турганаарды ла ого акту јӱректеҥ иштеерге турганаарды бир канча ӧйдӧҥ оҥдоп ийеригер. Мынаҥ улам Кудайга иштереер деп, мӱргӱӱлде сӧзигер берерге кӱӱнзееригер. Агару Бичикте, Иисустыҥ кийнинеҥ барарга кӱӱнзеген кажы ла кижи, бойынаҥ бойы мойноор учурлу деп айдылат (Марк 8:34). Бу не дегени? Бу Кудайга јаантайын сӧсуккур болорын темдектейт, не дезе, оныҥ кӱӱн табын бӱдӱрери бойыстыҥ кӱӱнистеҥ ле амадуларыстаҥ јаан учурлу болот. (1 Петр 4:2 кычырыгар.)

17. Кезик улус нениҥ учун Кудайга учурланбай јат?

 ¹⁷ Кезик улус берген сӧзин бӱдӱрип болбос деп коркып, Иеговага учурланбай турган болор. Андый улус Иегованы чӧкӧтпӧскӧ кӱӱнзейт. Је та кем де Кудайга учурланбаза, бойыныҥ эткен керектери учун кату каруузына турбас деп сананат.

18. Каруулу болорынаҥ коркыбаска, слерге не болужар?

¹⁸ Иегованы сӱӱп турзагар, каруулу болорынаҥ коркыбазыгар. Анайда ок сӱӱп турзагар, бойыгардыҥ сӧзӧӧрди бӱдӱрерге бастыра кӱчигердеҥ албаданарыгар (Јарлыкчы 5:4; Колоссыдагыларга 1:10). Анайда ла ок Кудайдыҥ табын бӱдӱрерин ӧткӱре кӱч деп сананбазаар да. Элчи Иоанн: «Кудайдыҥ јакылталарын бӱдӱрип јӱрзебис — Оны сӱӱп јадыбыс. Оныҥ јакылталары уур эмес» — деп бичиген (1 Иоанн 5:3).

19. Иеговага учурланарынаҥ нениҥ учун коркыбас керек?

¹⁹ Иегова ого учурланарга кӱӱнзеп тургандардаҥ јек јок болорын сакыбай јат. Ол бистеҥ эдип болбос неме некебей јат (Сарын 103:14). Ол биске чын јӱрерге болужар деп сӧзин берет (Исаия 41:10). Агару Бичик: «Бойыҥныҥ оҥдомолыҥа иженбей, бастыра јӱрегиҥле Иеговага ижен... Ол сениҥ јолдорыҥды тӱзедип салар» — деп, кычыру эдет (Укаа сӧстӧр 3:5, 6).

20. Иеговага учурланган кийнинде нени эдер керек?

²⁰ Слер Иеговага учурланып салган болзоор, экинчи алтамга — сууга чӧҥӱрилерине белен болодыгар.

21, 22. Слер Кудайга иштеерге турган кӱӱнигерди улус алдына канайып кӧргӱзер аргалу?

²¹ Слер Иеговага учурланып, сууга чӧҥӱрилерге кӱӱнзеп турганаарды јууныгардыҥ аксагалдарыныҥ  јӧбиниҥ координаторына айдыгар. Ол аксагалдардыҥ кемизин-кемизин слерле Агару Бичиктиҥ тӧс ӱредӱлерин шӱӱп кӧрзин деп сураар. Олор слерди чӧҥӱрилерге белен деп кӧрӱп турза, јуукта болотон Иегованыҥ Керечилериниҥ курултайында чӧҥӱрилерге јараду берер. Курултайда сууга чӧҥӱрилериниҥ учуры јарталатан куучын-эрмек айдылар. Оноҥ јетирӱчи, сууга чӧҥӱрилерге турган улуска эки јеҥил сурак берер.  «Эйе» деп каруу берип, слер Кудайга иштеерге турган кӱӱнигерди улус алдына айдып јадыгар (Римдегилерге 10:10).

²² Ол тушта слер сууга чӧҥӱрилерге белен болороор. Слерди бӱткӱлинче сууга чӧҥӱрер. Сууга чӧҥӱрилери  ончозына, слер Иегова Кудайга учурланып, Иегованыҥ Керечили болуп калганаарды кӧргӱзет.

23. «Аданыҥ, Уулыныҥ ла Агару Тынныҥ адыла» сууга чӧҥӱрилери нени темдектейт?

²³ Иисус ӱренчиктерине «Аданыҥ, Уулыныҥ ла Агару Тынныҥ адыла» сууга чӧҥӱрилер керек деп айткан. (Матфей 28:19 кычырыгар.) Бу, Иегованыҥ јаҥына багынып турганысты, Кудайдыҥ амадузында Иисус Христостыҥ учурын оҥдоп турганысты, анайда ок Иегова бойыныҥ табын бӱдӱрерге агару тынын тузаланып турганын оҥдоп турганысты темдектейт (Сарын 83:18; Матфей 28:18; Галаттарга 5:22, 23; 2 Петр 1:21).

24, 25. а) Сууга чӧҥӱрилери нени темдектейт? б) Калганчы бажалыкта не керегинде айдылар?

²⁴ Сууга чӧҥӱрилип, слер, сӱрлеп айтса, алдындагы јӱрӱмигерге ӧлӱп каладыгар, а суудаҥ чыгып — Кудайдыҥ ишчизи болуп, јаҥы јӱрӱм баштап јадыгар. Слер та кандый да кижиге, организацияга эмезе ишке учурланып јаткан эмезигер деп ундыбагар. Слер бойоордыҥ јӱрӱмигерди Иеговага учурлап јадыгар.

²⁵ Учурланганы ла сууга чӧҥӱрилгени, слердиҥ Иеговала најылыгарды алаҥзу јогынаҥ тыҥыдар (Сарын 25:14). Је сууга чӧҥӱрилген ле кижи аргаданар деп сананбас керек. Нениҥ учун дезе Иисустыҥ айтканыла: «Учына јетире чыдашканы... аргадалар» (Матфей 24:13). Сууга чӧҥӱрилери — аргаданарыныҥ јӱк ле баштапкы алтамы. Иеговала баалу колбуларды јылыйтпаска нени эдер керек? Бу суракты бис калганчы бажалыкта шӱӱжерис.