1, 2. Иегованыҥ најыларыныҥ тоозына кемдер кирген?

СЛЕР кемле најылажар эдеер? Байла, јарап турган кижиле эмезе куучындажарга јеҥил болуп турган кижиле, ол эмезе јакшы кылык-јаҥду кижиле најылажар болорыгар.

² Иегова да улусла најылажып јат. Темдектезе, Кудай Авраамды бойыныҥ најызы деп адаган (Исаия 41:8; Иаков 2:23). Анайда ок Давидти сӱӱп, оны «јӱрегиме јараган эр» деп айткан (Апостолдордыҥ ижи 13:22). А судурчы Даниилди Иегова «баалу кижи» деп адаган (Даниил 9:23).

3. Иегова нениҥ учун Авраамла, Давидле, Даниилле најылашкан?

³ Иегова нениҥ учун Авраамла, Давидле, Даниилле најылашкан? Нениҥ учун дезе олор Кудайды угуп турган јобош улус болгон. Темдектезе, Иегова Авраамга: «Мениҥ сӧзимди уккаҥ» — деп айткан (Башталганы 22:18). Кудайла, керек дезе, бӱдӱн албаты да најылажар аргалу. Оныҥ учун Иегова Израиль албатыга: «Мениҥ сӧзимди угыгар. Ол тушта мен слердиҥ Кудайыгар болорым, слер мениҥ албатым болорыгар» — деп айткан (Иеремия 7:23). Слер де Иегованыҥ најызы болорго турган болзогор, слерге база оны угар керек.

4, 5. Иегова бойыныҥ најыларын канайып корулайт?

⁴ Агару Бичикте Иегова «бастыра јӱрегиле Кудайга беринген кижиге болужарга, ийдезин берет» деп айдылат (2 Летопись 16:9). Сарын 32:8-те Иегова бойыныҥ најыла рына нени эдерге турганы керегинде айдылат: «Сеге оҥдомол берерим, кандый јолло баратанына ӱредип саларым. Јӧп берип, сени кӧрӱп турарым».

⁵ Кудайдыҥ ӧштӱзи бисти Иеговала најылашпазын деп јӱзӱн-базын буудактар тургузат. Је Иегова бисти корулап јат. (1 Петр 3:12 кычырыгар.) Иегованыҥ најылары болгоныстаҥ улам, ого акту јӱрегистеҥ иштеерге албаданадыс. Керек дезе кӱч те айалгаларда ого чындык артадыс. Агару Бичикте элчи Павел мынайып бичиген: «Кайракан — мениҥ болушчым, коркыыр немем јок» (Еврейлерге 13:6). Иегова биске де болужар деп, алаҥзыбай јадыс. Је бистиҥ Кудайла најылыгысты Сатана бузарга албаданат. Ол мыны канайып эдет?

6. Сатана улусты не деп бурулаган?

⁶ 11-чи бажалыктаҥ Сатана Иеговага удура туруп, оны тӧгӱнчи ле чындык эмес (несправедливый) деп бурулаганын билип алганыс. Ол Иегованы Адам ла Евага јакшыныҥ ла јаманныҥ нормаларын тургузатан арга бербеген деп бурулаган. Анайып ла ок ол Кудайдыҥ бастыра најыларын да Кудайды чыннаҥ сӱӱбей турган деп бурулаган. Оныҥ айтканыла болзо, олор Кудайдаҥ болуш аларга Оныла најылажып јат. Сатана, керек дезе, кажы ла кижини Кудайдаҥ туураладып ийер аргалу деп айткан. Бу керегинде Агару Бичиктиҥ Иов деп бичигинде айдылат. Је эмди, Иов кандый кижи болгон ло бис оноҥ неге ӱренер аргалу деп, билип алактар.

7, 8. а) Иов кандый кижи болгон? б) Сатана Иов керегинде нени айткан?

⁷ Иов 3 600 кире јыл кайра јӱрген јакшы кижи болгон. Иегова јердиҥ ӱстинде Иовтый кижи јок деп айткан.  Нениҥ учун дезе Иов Кудайды тооп јӱрген ле јаманды кӧрӧр кӱӱни јок болгон (Иов 1:8). Ол чыннаҥ ла Кудайдыҥ најызы болгон.

⁸ Сатана Иовты Кудайдаҥ та нени де аларга ла болуп најылажып турган деп бурулап, Иеговага мынайып айткан: «Сен оны бойын, айылын ла ончо бар немезин корулап тургаҥ эмезиҥ бе? Сениҥ алкыжыҥнаҥ улам оныҥ малы бастыра јерге таркап калган. Је колыҥды сунуп, оныҥ ончо бар немезине тийип ийзеҥ, ол сени каргап салбас па?» (Иов 1:10, 11).

9. Иегова Сатанага кандый арга берген?

⁹ Айдарда, Сатана Иовты Иегованаҥ болуш аларга болуп, ого иштеп турган деп бурулап, оны Кудайдаҥ туураладып салар аргалу деп айткан. Је Иегова Иовко алаҥзыбаган, оныҥ учун Сатанага Иовты ченеер арга берген. Анайып, Иов Иегованы чыннаҥ ла сӱӱп турган ба деген сурак јартала берер эди.

10. Иов кандый ченелтелерге табарткан, је ол нени этти?

¹⁰ Озо баштап Сатана Иовтыҥ мал-ажын јоголтып јат: малыныҥ кезигин уурчылар уурдай берген, кезиги ӧлӱп калган. Оноҥ Сатана Иовтыҥ јалчыларын ӧлтӱрген. Анайып Иов ӱзе немезин јылыйтып јат. Је Сатана тӱбектиҥ ӱстине тӱбек эдип, Иовтыҥ 10 балазын ӧлтӱрип јат. Андый да болзо, Иов Иеговага чындык арткан. Агару Бичикте айдылат: «Ончо бу немеде Иов јастырбаган ла Кудайды бир де бурулабаган» (Иов 1:12—19, 22).

11. а) Иов база кандый ченелтеге табарткан? б) Ол нени эткен?

¹¹ Је Сатанага бу да ас болгон. Оныҥ учун Иеговага: «Оныҥ эди-сӧӧгине тийип ийзеҥ, ол сени каргап салбас па?» — деп айткан. Сатана Иовты коркышту јаман ооруга  табарткан (Иов 2:5, 7). Је Иов тӱҥей ле Иеговага чындык артып: «Бойымныҥ ак-чегимнеҥ ӧлӧрдиҥ ӧлгӧнчӧ јана баспазым!» — деп айткан (Иов 27:5).

12. Иов Сатананы тӧгӱнчи деп, канайып кӧргӱскен?

¹² Иов Сатананыҥ бурулажынаҥ улам шыралап турганын билбеген. Ол бу кыйын-шыраны Иегованаҥ деп сананган (Иов 6:4; 16:11—14). Је андый да болзо, Иеговага чындык арткан. Анайып, Иов Кудайды, болуш аларга болуп эмес, је оны чыннаҥ сӱӱген деп јартала берген. Дьяволдыҥ Иов керегинде айтканы ӱзе тӧгӱн болгон.

13. Иовтыҥ Кудайга чындык артканынаҥ не јарт боло берген?

¹³ Иов Кудай ла Сатананыҥ ортозында кандый куучын болгонын билбеген де болзо, Кудайга чындык артканыла Сатананы тӧгӱнчи деп кӧргӱскен. Иов чындык артканы учун Кудайдаҥ кайрал алган (Иов 42:12—17).

14, 15. Сатана кажыбысты ла канайып бурулайт?

¹⁴ Иовло болгон учурал бистерге јаан ӱредӱ болот. Кандый? Сатана бисти, Кудайдаҥ болуш аларга болуп, Иеговага иштеп турган деп айдат. Дьявол: «Кижи бойыныҥ јӱрӱми учун ончо бар немезин берип ийер» — деп айткан (Иов 2:4). «Кижи» деп сӧслӧ Сатана јӱк ле Иовты эмес, је ончо улусты Кудайга акту јӱрегинеҥ иштебей турган деп бурулаган. Иовтыҥ божогонынаҥ ала канча јылдар ӧдӱп калган да болзо, Сатана Иегованы бурулап, оныҥ ишчилерин — јаҥыс бойын сӱӱр улус деп айдат. Оныҥ учун Иегова: «Уулым, ойгор бол, јӱрегимди сӱӱндир. Ол тушта мени јамандаганга каруу берер аргалу болорым» — деп айткан (Укаа сӧстӧр 27:11).

¹⁵ Слер де Иегованыҥ најызы болорго ло оныҥ сӧзин угуп турарга сананып алзаар, Сатананы тӧгӱнчи  деп кӧргӱзереер. Јӱрӱмеерде јаан солынталар эдер керек те болзо, Иегованыҥ најызы болорго сананып алганаарга качан да ачуурканбазаар! Бу јанынаҥ нениҥ учун јазап шӱӱп сананар керек? Нениҥ учун дезе Сатана слерди, јӱрӱмигерде кӱчтер боло берзе, Кудайды укпазаар деп бурулап, Кудайды садып ийзин деп албаданат. Ол мыны канайып эдет?

16. а) Улусты Иеговага иштебезин деп, Сатана нени эдет? б) Сатана слерге кандый табарулар эдер аргалу?

¹⁶ Иеговала најылыгысты бузарга, Сатана јӱзӱн-башка эп-аргаларла тузаланат. Темдектезе, Агару Бичикте айдылганыла, Сатана улуска табару эдерге, «кемди јуда салайын деп бедиреп, ыркыранган каракула чылап базып» јӱрген (1 Петр 5:8). Ол мындый табаруларды канайып эдет? Нӧкӧрлӧр, тӧрӧӧндӧр, ол эмезе ӧскӧ дӧ улус, бисти Иегованыҥ табын бӱдӱрбезин деп, Агару Бичикти ӱренерине чаптык эдер болор (Иоанн 15:19, 20) *. Дьяволдыҥ база бир табарузы — улусты тӧгӱндеери. Ол «јарыктыҥ ангели» болуп тӧгӱнденип јат (2 Коринфтегилерге 11:14). Анайда ок Сатананыҥ база бир эп-аргазы — ол бисти Иеговага иштеерине турбас улус деп бӱдӱмјилеерге албаданып турганы (Укаа сӧстӧр 24:10).

17. Бис нениҥ учун Иегованыҥ сӧзин угуп јадыс?

¹⁷ Бис Иегованы угуп турзаас, Сатананы тӧгӱнчи деп кӧргӱзип јадыс. Кудайга сӧсуккур болорго биске не  болужар? Агару Бичикте мынайып айдылат: «Кудайыҥ Иегованы бастыра јӱрегиҥле, бастыра бойыҥла, бастыра ийде кӱчиҥле сӱӱп јӱр» (Јаҥды такыганы 6:5). Бис Иеговага сӧс уккур болодыс, не дезе оны сӱӱп јадыс. Бис Иегованы канча ла кире тыҥ сӱӱзеес, ончо ло кире ого сӧсуккур болорго албаданадыс. Элчи Иоанн: «Кудайдыҥ јакылталарын бӱдӱрип јӱрзебис — Оны сӱӱп јадыбыс. Оныҥ јакылталары уур эмес» — деп бичиген (1 Иоанн 5:3).

18, 19. а) Иеговага кандый керектер јарабай турган? б) Иегова бистеҥ кӱчис јетпес неме некебей јат деп, бис кайдаҥ билерис?

¹⁸ Иегова кезик керектерди јаратпай јат. Олордыҥ кезигин слер  «Иегованыҥ кӧрӧр кӱӱни јок керектердеҥ кыйыгар» деген рамканаҥ кычырар аргалу. Бу керектердиҥ бир-бирӱзи слерге андый ла јаман эмес деп билдирер болор. Је слер бу рамкадагы берилип калган библиялык ӱлгерлерди тереҥжиде шӱӱп сананзаар, Иегованы  угары нениҥ учун ойгор болот деп оҥдоп ийеригер. Мынаҥ улам слер бойоордыҥ јӱрӱмигерди солыыр керек деп, оҥдоп ийер болороор. Солынарга јеҥил эмес болор. Је солынган кийнинде, јӱрегерде сӱӱнчи ле амыр сезереер, нениҥ учун дезе анайып, слер чыннаҥ ла Кудайдыҥ најызы болгоныгарды кӧргӱзедигер (Исаия 48:17, 18). Бис јӱрӱмисти солып алар аргалу деп, нениҥ учун алаҥзыбай јадыс?

¹⁹ Иегова качан да бистеҥ кӱчис јетпес неме некебей јат (Јаҥды такыганы 30:11—14). Нениҥ учун дезе ол бистиҥ најыбыс, ол бисти бойыстаҥ јакшы оҥдоп јат. Анайда ок ол бистиҥ аргаларысты ла једикпестеристи билер (Сарын 103:14). Элчи Павел айткан: «Кудай чындык, Ол кӱчигер јетпес ченелтелерди болдыртпас, је ченелте тужында оны ӧдӱп чыгар арга берер» (1 Коринфтегилерге 10:13). Иегова бисти јастырбазын деп болужар.  Ол биске кандый ла кӱчтерди ӧдӱп чыгарга артыгынча ийде-кӱч берер деп сӧзин берет (2 Коринфтегилерге 4:7).

20. Бис Иегованыҥ кандый кылык-јаҥдарына ӱренер учурлу, нениҥ учун?

²⁰ Иегованыҥ најызы болорго, бистерге Кудайга јарабай турган керектерди јӱк ле этпей барар керек эмес, је оныҥ сӱӱп турганын сӱӱр керек (Римдегилерге 12:9). Иегованыҥ најылары кандый болор учурлу деп, Сарын 15:1—5-те бичилип калган. (Кычырыгар.) Кудайдыҥ најылары оныҥ сӱреен јакшы мындый кылык-јаҥдарына ӱренип јат: «сӱӱш, сӱӱнчи, амыр, узакка чыдажыш, быйанзыш [јалакай], буурзаш, бӱдӱмји, јобожыш, тудуныш» (Галаттарга 5:22, 23).

21. Кудайга јарап турган кылык-јаҥдарга ӱренип аларга, слер нени эдер аргалу?

²¹ Мындый кылык-јаҥдарга ӱренерге биске не болужар? Агару Бичикти јаантайын кычырып, шиҥдеер керек (Исаия 30:20, 21). Анайып Иеговага сӱӱжигер ӧзӱп, Кудайга оноҥ тыҥ сӧсуккур болорго кӱӱнзеригер.

22. Иегованы нениҥ учун угар керек?

²² Бойыстыҥ јӱрӱмисте солынталар эткенисти эски кийимди уштып, јаҥызын кийип алганына тӱҥдештирерге јараар. Агару Бичик бисти «јебрен кижини» уштып, «јаҥы кижини» кийип алыгар деп айдат (Колоссыдагыларга 3:9, 10). Мынайып эдерге кӱч келижердеҥ айабас, је бис Иегованы угуп, бойыстыҥ јаман кылыгысты ла јӱрӱмисти солып турзаас, Кудайдаҥ «улу кайрал» аларыс (Сарын 19:11). Анайдарда, Иеговага сӧсуккур болугар. Кудайдаҥ та нени де аларга болуп эмес, је ого акту сӱӱжигердеҥ улам иштеп, Сатананы тӧгӱнчи деп кӧргӱзигер. Ол тушта слер чыннаҥ ла Иегованыҥ најызы болорыгар!