Баштапкы чакта, Иерусалимде башкару јӧп элчилердеҥ ле аксагалдардаҥ турган. Бу јаан эмес акалардыҥ бӧлӱги майлаткан христиандардыҥ јуундарына болуш јетирип турган јаан учурлу шӱӱлтелерге келип туратан (Апостолдордыҥ ижи 15:2). Кандый бир чечимге келердеҥ озо, олор кӧдӱрилген сурак керегинде Бичимелдерде не айдылып турганын шӱӱжип, Кудайдыҥ тыныныҥ башкартузы аайынча эткилеген (Апостолдордыҥ ижи 15:25). Бӱгӱн Иегованыҥ Керечилери анайып ла эдип јат.

Кудай Башкару јӧпти Бойыныҥ табын бӱдӱрерге тузаланат. Башкару јӧптӧ иштегилеп турган майлаткан акалар Кудайдыҥ Сӧзин тыҥ баалап јадылар, олордо јӱрӱмде ле ич-кӧгӱс јанынаҥ сурактарда јаан ченемел бар. Олор кажы ла неделеде телекейлик карындаштык керексиништерди шӱӱжип јартажарга јуулыжып јат. Баштапкы чакта чылап бу акалар Агару Бичикке тӧзӧлӧнгӧн башкартуны самаралар, јорыкчы кӧрӧӧчилер, анайда ок ӧскӧ дӧ ишчилер ажыра берип јадылар. Мынаҥ улам Кудайдыҥ албатызыныҥ ортозында санаазында ла керектеринде бирлик болуп јат (Апостолдордыҥ ижи 16:4, 5). Башкару јӧп ич-кӧгӱс курсакты белетеерине ле каруулу акаларды кӧстӧӧрине молјулу, анайда ок Каандык керегинде јарлаар ишти ичкерледерге јӧмӧжип јадылар.

Кудайдыҥ тыныныҥ башкартузыла башкарынат. Башкару јӧп Эҥ бийик Бийди, Иегованы ла јуунныҥ Бажын — Иисусты јаантайын угуп јадылар (1 Коринфтегилерге 11:3; Ефестегилерге 5:23). Бу акалар Кудайдыҥ албатызыныҥ ортозында бойлорын башчылар деп бодогылабай јат. Олор ӧскӧ майлаткан христиандарла кожо «Кураан [Ииисус] кайдаар ла барганда, Оны ээчип турган улус» (Ачылта 14:4). Башкару јӧптиҥ акалары бистиҥ олор учун мӱргӱӱлдеристи тыҥ баалап јадылар.

• Баштапкы чактыҥ башкару јӧби кемдердеҥ турган?

• Башкару јӧп бӱгӱнги кӱнде Кудайдыҥ башкартузын канайып бедиреп јат?