Христиан ӱй кижи Кудайга бажырарында качан ла нениҥ учун бажын јабар учурлу? Бу тема аайынча, Кудайдыҥ тыныла бичилген элчи Павелдиҥ санаа-шӱӱлтелерин кӧрӱп ийеектер. Ол биске Кудайды мактаар чын јӧптӧр чыгарзын деп, керектӱ башкарту берип јат (1 Коринфтегилерге 11:3—16). Павел ајаруга алгадый ӱч шылтак аҥылап айдат: 1) ӱй кижи нени эдип тура, бажын јабар учурлу; 2) ол мыны кандый айалгаларда эдер учурлу ла 3) ол бу јӧпти кандый кӱӱнле бӱдӱрер учурлу.

Нени эдип тура. Павел мӱргӱӱл ле судурлап турганы керегинде айдат (4, 5 ӱлгерлер). Мӱргӱӱл — ол Иеговага тоомјылу баштанары. Судурлап турганы — христиандардыҥ Агару Бичиктиҥ болужыла ӧткӱрилип турган кандый ла ӱредӱлерин темдектейт. Павел ӱй кижини мӱргӱп эмезе улусты Агару Бичиктеги чындыкка ӱредип турза, бажын јаантайын јабып турзын деп айдат па? Јок. Бу дезе, ӱй кижи кандый айалгада мӱргӱп, ол эмезе ӱредип турганынаҥ камаанду.

Кандый айалгаларда. Павел биледеги ле јуундагы эки айалга керегинде айдат. «Ӱй кижиге баш — ӧбӧӧни... Бажын јабынбай мӱргип эмезе судурлап турган кажы ла ӱй кижи бойыныҥ бажын уйатка тӱжӱрет» (3, 5 ӱлгерлер). Иегова  ӧбӧӧнин билениҥ бажы эдип тургускан. Ӱйи, Иегованыҥ эр кижиге берген молјуларын бӱдӱрип тура, ӧбӧӧниниҥ јаҥын јетире тообой турза, оны уйатка тӱжӱрер эди. Темдектезе, ӱйине ӧбӧӧни кӧзинче Агару Бичикле ӱредӱ ӧткӱрер керек болзо, ол бажын јабып, оныҥ јаҥын тооп турганын кӧргӱзет. Оныҥ ӧбӧӧни сууга чӧҥӱрилген де, чӧҥӱрилбеген де болзо, ол бажын јабар учурлу, нениҥ учун дезе ӧбӧӧни билениҥ бажы *. Ол јажы јетпеген сууга чӧҥӱрилип калган уулынныҥ кӧзинче мӱргӱӱрге эмезе ӱредӱ ӧткӱрерге турза, анайда ла ок бажын јабар учурлу, нениҥ учун дезе уулы билениҥ бажы эмес те болзо, христиан јуунда јаҥ сууга чӧҥӱрилген эр улуска берилген болот.

Јуун керегинде Павел бичийт: «Кем сӧс блаажарга кӱӱнзезе, ого айдатаным бу: бисте де, Кудайдыҥ серкпелеринде де [јуундарында, ЈТ] ӧскӧртӧ этпей јат» (16 ӱлгер). Христиан јуунда башкаратан јаҥ сууга чӧҥӱрилип калган эр улуска берилген (1 Тимофейге 2:11—14; Еврейлерге 13:17). Аксагалдарга ла болушчы ишчилерге јӱк ле эр улус кӧстӧлӧт, олорго Кудай Бойыныҥ ӱӱрин кичеезин деп јакарып јат (Апостолдордыҥ ижи 20:28). Је кезикте чӧҥӱрилип калган аканыҥ молјузын христиан ӱй кижиге бӱдӱрерге келижет. Темдектезе, јарагадый чӧҥӱрилген ака јок болзо, ол јарлаар иштиҥ туштажузын ӧткӱрер аргалу. Ол эмезе, ого амадап алган айылдагы Агару Бичикти ӱренерин чӧҥӱрилип калган аканыҥ кӧзинче ӧткӱрерге келижер болор *. Мындый учуралдарда, јуунда ла чылап, христиан ӱй кижи эр улустыҥ молјузын бӱдӱрип јатканын оҥдоп, бажын јабып алар учурлу.

Је эје-сыйынга Кудайга бажырар кажы ла айалгада бажын јабары керек јок. Темдектезе, качан христиан туштажуларда јартамал берип турза, бойыныҥ ӧбӧӧниле эмезе чӧҥӱрилген ӧскӧ акала айылдар сайын јарлап јӱрзе, сууга чӧҥӱрилбеген балдарыла ӱредӱ ӧткӱрип јатса эмезе мӱргӱп турза.  Андый да болзо ӧскӧ сурактар чыгып келердеҥ айабас, бу тушта эје бе, сыйын ба канайдарын билбей турган болзо, ол бичиктерле шиҥжӱ ӧткӱрер аргалу *. Мыныҥ кийнинде канайдарын билбей турган болзо, бу кӧргӱзилген јурукта чылап, уйады аайынча бажын јабып та алза, јастыра болбос.

Кандый кӱӱнле. 10-чы ӱлгерде нениҥ учун христиан ӱй кижиге бу некелтени бӱдӱрер керек деп, эки шылтак бичилген: «Ӱй кижи бажын јабынар учурлу. Мынызы дезе, ол јаҥныҥ алдында јӱрген деп, ангелдерге темдек болор». Озо баштап «јаҥныҥ... темдеги» деп сӧстӧргӧ ајарып ийеектер. Ӱй кижи бажын јабынып, Иегованыҥ јуундагы сууга чӧҥӱрилген эр улуска берип салган јаҥын тооп турганын кӧргӱзет. Анайып ол Иеговага сӱӱжин ле чындыгын кӧргӱзет. База бир шылтагы «ангелдерге» деген сӧстӧрдӧҥ кӧрӱнет. Ӱй кижи бажын јабынып, јаан ийде-кӱчтӱ кӧскӧ кӧрӱнбес јайаандарга канайып камаанын јетирет?

Теҥериде ле јерде Иегованыҥ организациязында Кудайдыҥ јаҥын канайып тооп турганын ангелдер јилбиркеп кӧргӱлеп јат. Олор бу толо кемдӱ эмес улустаҥ база тем алар аргалу. Олорго Иегованыҥ организациязындагы јаҥга база багынар керек эмей, нениҥ учун дезе ӧткӧн ӧйлӧрдӧ ас эмес ангелдер бу ченелтени ӧдӱп болбогон (Иуданыҥ самаразы 6). Кезик учуралдарда, христиан ӱй кижи јуундагы чӧҥӱрилип калган аканаҥ сагышту ла ченемелдӱ болот, је андый да болзо, ого белен багынып турганын, ангелдер база кӧрӱп јат. Ӧскӧ учуралдарда христиан ӱй кижи Христосло кожо башкарар майлаткан болор аргалу. Учы-тӱбинде андый христиан ӱй кижи теҥериде Христосло кожо башкарып, ангелдердеҥ  бийик јаҥду болор. Ангелдерге кандый јакшы тем! Мынаҥ кӧргӧнисте, ончо эје-сыйындар аҥылу кӱндӱле кайралдалат, анайда ок миллиондор тоолу чындык ангелдер кӧзинче Кудайдыҥ јаҥына багынып, чындык артып, јобош ло сӧсуккур болор аргалу!