Билениҥ тӧзӧӧчизи — Иегова. Ол ада-энелерге балдарын таскадатан молју берип салган (Колоссыдагыларга 3:20). Олор балдарын Кудайды сӱӱрине ле бӱдӱмјилӱ кижи болорына таскадар учурлу (2 Тимофейге 1:5; 3:15). Кызыгардыҥ эмезе уулыгардыҥ јӱрегинде не барын оҥдоп аларга албаданар керек. Анайда ок олорго тем болугар. Иегованыҥ сӧзи јӱрегеерде болзо, балдараардыҥ да јӱрегинде Кудайга сӱӱшти ӧскӱрерге јеҥил болор (Сарын 40:8).

АГАРУ БИЧИК НЕНИ АЙДАТ. «Кандый ла кижи угарга јылгыр болзын, сӧс айдарга, чугулданарга бачымдабазын» (Иаковтыҥ самаразы 1:19). Балагар слерге коркыбай баштанып турзын деп, кӱӱнзеп турган болороор. Слер олорды јаантайын угараар деп, олордо алаҥзу болбос учурлу. Айылыгарда бой-бойыгарга тоомјылу баштанып турган болзогор, балдараар бойыныҥ санааларын ла сезимдерин слерге куучындап турар (Иаковтыҥ самаразы 3:18). Је слер олорды арбанып эмезе ӱредип баштайтан болзогор, олор слерге немени ачыгынча куучындабас болор. Оныҥ учун олорго сӱӱжигерди јаантайын кӧргӱзип, чыдамкай болугар (Матфей 3:17; 1 Коринфтегилерге 8:1).

ТУЗАЛУ ЈӦПТӦР

• Бала куучындажарга турган болзо, оны лаптап угугар

• Балдарла јӱк ле кӱчтер болуп турган ӧйдӧ эмес, је јаантайын куучындажып туругар

АГАРУ БИЧИК НЕНИ АЙДАТ. «Керектиҥ аайын јакшы оҥдоп турган кижи једимдӱ болор» (Укаа сӧстӧр 16:20). Кезикте баланыҥ айдарга турганын тургуза ла оҥдоп болбозыҥ. Не дезе балдар кезикте немени кӧпчиде куучындайт, эмезе јазап сананбаган сӧстӧр айдат. «Јазап укпай јадып, каруу берген кижи тенек болот» (Укаа сӧстӧр 18:13). Оныҥ учун ачынарга меҥдебегер (Укаа сӧстӧр 19:11).

ТУЗАЛУ ЈӦПТӦР

• Балдар нени де куучындаза, лаптап угарга ла чугулданбаска белен болугар

• Слер бойыгар да олор кире болороордо кандый болгоныгарды ла нени баштапкы јерге тургузып туратаныгарды эске алып туругар

АГАРУ БИЧИК НЕНИ АЙДАТ. «Уулым, адаҥныҥ јакарганын угуп тур, энеҥниҥ јасагын артыргыспа» (Укаа сӧстӧр 1:8). Балдарды чыдадатан молјуны Иегова адага да, энеге де берген. Балдарыгарды слерди тооп ло сӧзигерди угуп турзын деп ӱредигер (Ефестегилерге 6:1—3). Балдар ада-энезиниҥ «бир санаалу» эмезин тургуза ла кӧрӱп ийет (1 Коринфтегилерге 1:10). Оныҥ учун оҥдошпостордыҥ аайына балдардыҥ кӧзинче чыкпаза торт болор, оноҥ ӧскӧ балдараар слерди тообой барардаҥ айабас.

ТУЗАЛУ ЈӦПТӦР

• Балдараарды канайып таскадарын ла каруузына канайып тургузарын куучындажып алыгар

• Балдарды таскадары јанынаҥ кӧрӱмигер башка болзо, бой-бойыгарды оҥдоп аларга албаданыгар

АГАРУ БИЧИК НЕНИ АЙДАТ. «Баланы чын јолго таскадып сал» (Укаа сӧстӧр 22:6). Балдарды ӱредери ле таскадары јеҥил неме эмес, олор јакшы немеге бойы ӱренип болбос. Оныҥ учун канайып таскадарын шӱӱп алар керек ле таскадарына тӱзедери база кирет деп ундыбас керек (Сарын 127:4; Укаа сӧстӧр 29:17). Је тӱзедери дегени јаантайын ла кату каруузына тургузарын темдектебей јат. Кандый бир ээжини бӱдӱрери нениҥ учун некелип турганын ада-энези балага јартап турар учурлу (Укаа сӧстӧр 28:7). Анайда ок, балдараарга Иегованыҥ Сӧзин сӱӱп турзын ла ондогы принциптерди оҥдоп турзын деп болужыгар (Сарын 1:2). Ол тушта олордыҥ уйады чын иштеер (Еврейлерге 5:14).

ТУЗАЛУ ЈӦПТӦР

• Балдарга Иегова чын ла бар тирӱ Кудай деп бӱдерге болужыгар. Олор Кудайга бӱдерге ле иженерге јараар деп, бӱдӱп турзын

• Интернеттеги ле социальный сетьтердеги јеткерлерди ле тузактарды билип турзын деп ӱредигер. Балдарга базынчыктап турган улустаҥ канайып коруланарын јартап беригер