ИЕГОВА Кудайла танышканы слерге кандый туза экелер? Кӧп туза экелер. Темдектезе, слер миллион тоолу улуска токунал берип болбой турган: «Бис нениҥ учун јайалганыс?» — деген сурака карууны билип аларар. Мындый сурак слерде де болгон болор. Бойыныҥ ӧйинде «јердиҥ ончо каандарынаҥ» бай болгон бир ойгор каан јӱрӱмниҥ учурын оҥдоп аларга албаданган (2 Летопись 9:22; Јарлыкчы 2:1—13). Бу каанныҥ ады Соломон. Ол бийик јаҥду, алтын-мӧҥӱн јӧӧжӧлӱ ле эҥ ойгор кижи болгон. Јӱрӱмниҥ учурын бедиреп, мындый шӱӱлтеге келген: «Анайдарда, айдылган сӧстӧрдиҥ учуры мындый: чындык Кудайдаҥ айап, Оныҥ јакылталарын бӱдӱрип јӱр — кижинеҥ некелип турганы бу» (Јарлыкчы 12:13). Ӧскӧ улуска кӧрӧ Соломонныҥ јӱрӱминиҥ ченемели канча катапка кӧп болгоны јарт эмей. Оныҥ учун Соломонныҥ айткан шӱӱлтезин ајаруга алар керек (Јарлыкчы 2:12).

² Кудайдаҥ коркыыры — кӧскӧ кӧрӱнбес ийденеҥ тыҥ коркып турарын темдектебей јат. Карын, акту јӱректеҥ сӱӱп турганысты ачындырбаска кӱӱнзегенин темдектеп јат. Слер кемди де акту јӱректеҥ сӱӱп турган болзогор, ол кижиге јакшыны эдерге ле оны ачындырбаска албаданарар. Мындый ла сезимдер Иегованы сӱӱп баштазар болор.

³ Слер Агару Бичикти кычырып тура, Кудайга не јарап турганын ла не јарабай турганын билип аларар. Анайда ок јерди нениҥ учун јайаганын база билип аларар. Иегова — «Ол чындык Кудай, јердиҥ Јайаачызы, оны бек эдип, тегин јерге эмес, улусла толтырылзын деп јайаганын» — Агару Бичик аҥылап кӧргӱзет (Исаия 45:18). Иегова јерди улуска белетеген, олор оны ла ондогы  тирӱ јайалгандарды кичеер учурлу болгон (Башталганы 1:28). Иегова улусты јаҥыс ла мындый амадулу јайаган ба?

⁴ Јок, Иеговада оноҥ до башка јаан амаду болгон. Баштапкы кижи, Адам, Иегова Кудайла аҥылу колбуларлу болуп, Јайаачыла таҥынаҥ куучындажар аргалу болгон. Адам јаҥыс ла бойыныҥ санааларын айдар аргалу болгон эмес, је Кудай ого нени айтканын угар аргалу болгон (Башталганы 1:28—30; 3:8—13, 16—19; Апостолдордыҥ ижи 17:26—28). Оныҥ учун Адам ла Евада Иегова Кудайды јакшы билип аларга ла Оныла јуук колбуларын тыҥыдатан јаан арга болгон. Олор Иегованы билип, Ого тӱҥейлежип јӱрген болзо, јӱрӱми сӱӱнчилӱ болор эди, нениҥ учун дезе Ол «сӱӱнчилӱ Кудай» (1 Тимофейге 1:11, ЈТ). «Јакшысынзын деп, биске ончозын элбеде берип» турган Кудай, баштапкы кижини Эдем садта, райда, јатыргызып, ӱргӱлјиге јӱрер арга берген (1 Тимофейге 6:17; Башталганы 2:8, 9, 16, 17).

⁵ Кижи ӱргӱлјиге јӱрер бе? «Јок, тӧгӱн неме куучындабагар!» — деп, айдар болорор. Андый да болзо, бойыгардыҥ санаа-шӱӱлтегерди айдарга меҥдебегер. Бӱгӱнги кӱнде билимчилер клеткалардыҥ карып турганыныҥ шылтагын јаҥы ла оҥдодыс деп санангылайт. Клетка бӧлӱнген сайын хромосоманыҥ учында теломера деп адалган генетикалык материалдыҥ учы кыскарып јат. Клетка 50—100 катап бӧлӱнгениниҥ кийнинеҥ теломералар эскирип, клеткалардыҥ кӧбизи бӧлӱнбей барат. Је билимчилердиҥ калганчы ачылталарыла болзо, теломераза деп адалган ферменттиҥ болужыла кижиниҥ клеткалары токтобой бӧлӱнер аргалу. Кудай ӱргӱлји јӱрӱмди бу ферменттиҥ болужыла берер деп темдектебей турган да болзо, је бу ачылта ӱргӱлји јӱрӱм болор аргалу деп керелеп јат.

⁶ Баштапкы эки кижи ӱргӱлји јӱрӱмге јайалганы керегинде Агару Бичиктеги куучынга бӱдерге јараар. Улус Иегова Кудайла колбуларын ӱргӱлјиге тыҥыдар аргалу болгон. Олор неге керектӱ јайалганын оҥдоп, нени эдер учурлу болгонын эдип, кӱнӱҥ-кӱнге теҥеридеги Адазыла најылыгын тыҥыдар эди. Олордыҥ јӱрӱми кунукчылду ла кӱч болбос эди. Адам ла Евада сӱреен јакшы јакылта болгон — јерди толо кеминде улусла толтырып салары. Олордыҥ ижи јаантайын јилбилӱ ле тузалу болор эди. Чыннаҥ ла сӱӱнчилӱ ле толо јӱрӱм! (Башталганы 1:28).