АВРААМ библиялык тӱӱкиде Кудайга тыҥ бӱткен кижи, ӧзӱм алынып јаткан Ур деп каладагы амыр-энчӱ јӱрӱмин артыргызып салган. Ол канча да кире ӧйгӧ Харранда јаткан, арткан јӱрӱминде байкандарда (палатка) јадып, кӧчкин кижи болуп јӱрген (Башталганы 12:1—3; Апостолдордыҥ ижи 7:2—7; Еврейлерге 11:8—10). Андый да болзо, бис ол керегинде мындый сӧстӧр кычырадыс: «Ол јӱрӱмниҥ бастыра јанын толо јӱрӱп, јажы једип божогон» (Башталганы 25:8, ЭК). Оныҥ јӱрӱми недеҥ улам толо болгон? Ол божоор алдында јӱк ле бастыра јӱрӱминиҥ туркунына эткен ижине кӧрӱп, сӱӱнип турган карып калган кижи болбогон. Авраам сӱрекей тыҥ бӱткенинеҥ улам Иегованыҥ најызы деп адаткан (Иаковтыҥ самаразы 2:23; Исаия 41:8). Ол сӱӱнчини анчадала Јайаачы Кудайла јуук колбуларын ӧскӱрип тыҥытканынаҥ улам алган.

² Слер Кудайла најылыкты тыҥыдып ӧскӱрзегер, 4000 јыл кайра јаткан Авраам чылап јӱрӱмниҥ учурын ла сӱӱнчини таап алар аргалу болорор. Јер-телекейдиҥ Јайаачызыныҥ најызы болоры дегенин оҥдоорго јеҥил эмес те болзо, Кудайла најылажар арга бар. Канайып? Слерге озо ло баштап Ол  керегинде билгирлер алып, Оны сӱӱр керек (1 Коринфтегилерге 8:3; Галаттарга 4:9). Јайаачыла јакшы колбуларлу болзогор, слер јӱрӱмигердиҥ учурын оҥдоп, сӱӱнчилӱ јӱреригер.

³ Иисус Христостыҥ толынты тайылгазын алынып тузаланарга кӱӱнзегендерге, Иегова ырысту јӱрӱм јӱрерге болужып турган башкарту берген (Исаия 48:17). Адам јаманды ла јакшыны бойы билерге шӱӱп алала, Кудайга удура туруп чыкканын эске алып ийзегер. Иегова улусты Уулыныҥ толынты тайылгазыла толып, улуска кинчектиҥ ле ӧлӱмниҥ кулданыжынаҥ јайымдалар арга берген де болзо, бу толынтыны аларын кажы ла кижи бойы шӱӱп кӧрӧр учурлу, анайып јакшыныҥ ла јаманныҥ ээжилерин бойы тургуспас керек. Бис Иисустыҥ толынты тайылгазын алынып тургандарга тургузылган Кудайдыҥ јасактарына ла башкару јӧптӧрине багынар учурлу.

⁴ Агару Бичикти ӱренип, андагы башкару јетирӱлерди тузаланып турзагар, Кудайдыҥ јакшыны ла јаманды ылгаштыратан ээжилери сӱреен баалу деп, алаҥзу јогынаҥ бӱдӱмјиленеригер (Сарын 19:7—9). Иегованыҥ Моисей деп судурчызы чылап, Кудайга мындый сӧстӧрлӧ баштанарга кӱӱнзеер болорор: «Мен сениҥ кӧзиҥе јараган болзом, Сени билип турарга јолдорыҥды меге ачсаҥ деп сурап турум» (Чыгыш 33:13; Сарын 25:4). Агару Бичикте «уур-кӱч ӧйлӧрдӧ» слерге чын јолды кӧргӱзип беретен башкару јетирӱлер бичилген (2 Тимофейге 3:1). Мынаҥ улам Кудайга слердиҥ быйанду болгоныгар там ла тыҥыыр, анайда ок Иегованы јакшы билерге ле Оныла најылыкты тыҥыдарга кӱӱн келер.

⁵ Авраам јӱрӱмин толо јӱрӱп, карыйла божоп калган, је ӧлӱм јоголголокто, јӱрӱм андый ла кыска болуп артат. Бис канча да јашту болзос, божоор кӱӱнис јок. Бу тегиннеҥ эмес, нениҥ учун дезе «Ол улустыҥ јӱректерине ӱргӱлји јӱрерин салып койгон до болзо, олор чындык Кудайдыҥ эдип турган ончо керектерин бажынаҥ ала учына јетире качан да оҥдоп болбос» (Јарлыкчы 3:11). Бис ӱргӱлјиге де јӱрзес, Иегованыҥ ончо јайалгандарын јетире оҥдоп болбозыс. Иегованыҥ эдип турган кайкамчылу ончо ижин тоолоп алар арга јок.  Бис олорды шиҥдеп кӧрӱп, ӱренип ле бого сӱӱнип јӱрер аргалу! (Сарын 19:1—4; 104:24; 139:14).

⁶ Ӱргӱлји јӱрӱм бӱгӱнги ле кӱндий кӱчтерле толо болзо, слерге ӱргӱлјиге јӱрер кӱӱн келбес болор. Је бу бисти санааркатпас керек. Агару Бичикте: «Оныҥ берген сӧзиле, чындык јӱрӱп турган јаҥы теҥерини ле јаҥы јерди сакып јадыбыс» — деп, сӧстӧр айдылат (Петрдыҥ 2-чи самаразы 3:13). «Јаҥы теҥери» дегени бастыра јерле башкаратан теҥеридеги јаҥы башкаруны — Кудайдыҥ Каандыгын темдектейт. «Јаҥы јер» дегени Каандыктыҥ башкарузына сӧс-уккур болгон јаҥы албатыны темдектейт. Иегова удабас бу сӧстӧр бӱдӱп калзын деп, «јерди кырып тургандарга» удура туруп чыгар (Ачылта 11:18; Петрдыҥ 2-чи самаразы 3:10).

⁷ Је бу качан болор? Иисус албатылар ортодо јуу-согуштар болор, «ачана-торо болор, алыстап јер силкинер», «оору-јобол» ло «јарамас кӧптӧӧр» деген сӧстӧр «чак тӱгенердиҥ темдегине» кирет деп айткан (Матфей 24:3—13; Лука 21:10, 11; 2 Тимофейге 3:1—5). Оноҥ ары Ол: «Мыныҥ ончозы бӱдӱп турганын кӧрӧр болзогор, Кудайдыҥ Каандыгы јуук деп билеригер» — деп, судурлап айткан (Лука 21:31). Иегова калју улусты јоголтор ӧй коркушту тӱрген келип јат.

⁸ «Кӱчтӱдеҥ кӱчтӱ Кудайдыҥ улу кӱниниҥ» учында Иегова бастыра јерди јаманнаҥ арутап салза, бистиҥ јер рай болуп солунар (Ачылта 16:14, 16; Исаия 51:3). Ол тушта «акту улус јерди энчиленип, ӱргӱлјиге анда јадар» (Сарын 37:29). Је божоп калган улусла не болор? «Бого кайкабагар, нениҥ учун дезе сӧӧк салар јерде јаткандардыҥ ончозы Оныҥ ӱнин угар ӧй једип келедири. Ак кылынып јӱргендери јӱрӱм јӱрерге тирилер; јаман кылынып јӱргендери буруга каларга тирилер» (Иоанн 5:28, 29). Иегова кажы ла кижини баалап јат, оныҥ учун божоп калган улусты ончозын тирилтерге кӱӱнзейт. Билимчилер улусты ген инженерияныҥ болужыла клонировать эдерге санангылайт, је Јайаачы Иегова мындый аргала  тузаланбас. Ол толынтыла толып алган улустыҥ кемизин де ундыбай, божогон улусты ончозын тиргизер. Эйе, слерде божогон јуук улузыгарла райда туштажатан ижемји бар!

⁹ Райдагы јӱрӱм кандый болор? Јер сӱӱнчилӱ улусла толор, олор Јайаачыны бир ӱнле мактаар. «Кем де: „мен оору“ — деп айтпас» (Исаия 33:24; 54:13). Кем де стресске эмезе эмоциялык ла психикалык ооруларга табартпас. Ончо улуста курсак артыгынча болор, кажы ла кижи Кудайдыҥ амадаганы аайынча јилбилӱ иштӱ болор (Сарын 72:16; Исаия 65:23). Улус тындулар ла бой-бойлоры ортодо амыр јӱрер, је эҥ ле аҥылузы — «Кудайла амыр јӱрери» (Римдегилерге 5:1; Сарын 37:11; 72:7; Исаия 11:6—9).

¹⁰ Райда јадарга ла чыннаҥ сӱӱнчилӱ болорго нени эдер керек? Иисус Христос: «Мӧҥкӱ јӱрӱм дезе — ол јаҥыс чын Кудай Бойыҥды, Сен ийген Иисус Христосты билери» — деп айткан (Иоанн 17:3). Оныҥ учун Иегова ла Иисус Христос керегинде, анайда ок Кудай слердеҥ нени сакып турганы керегинде билгирлерди оноҥ ло ары алыгар. Ол тушта слер Иегова Кудайдыҥ табын бӱдӱреригер, анайып слер сӱреен сӱӱнчилӱ јӱрӱм аларыгар.