КУДАЙДЫҤ башкарузына удура болгон тӱйменнеҥ улам, улустыҥ јӱрӱми шакпыртту да болзо, Кудай улусты ижемји јок артыргыспаган. Агару Бичикте бичилет: «Кандый ла јайалган [шакпыртка бойыныҥ кӱӱниле эмес, Кудайдыҥ табыла кирген, ЈТ]. Је јайалган иженет, бойы да ӧлӱмниҥ кулданыжынаҥ јайымдалар деп, Кудайдыҥ балдарыныҥ јайымын ла магын ӱлежер деп» (Римдегилерге 8:20, 21). Кудай баштапкы эки кижиниҥ калдыктарына кижилик кинчектеҥ ле ӧлӱмнеҥ јайымдалар деп, бек ижемји берген. Ол тушта улус Иегова Кудайла јуук колбуларын орныктырар. Канайып?

² Адам ла Ева кинчек эдип, бойлорыныҥ балдарынаҥ јерде качан да ӧлбӧйтӧн јилбилӱ, ырысту јӱрӱм јӱрер арганы айрып салган. Јакшыны ла јаманды бойлоры талдайтан аргага болуп, олор бойыныҥ билезин кинчектиҥ ле ӧлӱмниҥ кулданыжына толып, садып ийген. Мындый биледе чыккан балдарды калју башкараачыларлу ыраак ортолыкка аткарган кулдарга тӱҥейлерге јараар. Кинчек ле ӧлӱм улуска андый ла калју башкараачылар болуп калган (Римдегилерге 5:14, 21). Је олорды кулданыштаҥ кем айрыыр? Не дезе олорды кулданышка ада-ӧбӧкӧзи садып ийген ине. Је бир јакшы кижи табылып, кулданышта јӱрген улусты јайымдаарга бойыныҥ уулын ийерде, ол керектӱ бааны тӧлӧп салган (Сарын 51:5; 146:4; Римдегилерге 8:2).

³ Кулдарды јайымдаган јакшы кижи — Иегова Кудай. Кулдардыҥ јайымы учун керектӱ бааны тӧлӧгӧн уул — Иисус Христос. Ол јерге келердеҥ озо Кудайдыҥ баштапкы туулган Уулы болгон (Иоанн 3:16). Иегова эҥ ле озо Иисусты јайаган, оныҥ кийнинде Јер-телекейдеги ончо немени Уулыныҥ болужыла јайаган (Колоссыдагыларга 1:15, 16). Иегова кайкал эдип, Уулыныҥ јӱрӱмин кижиге барбаган кыстыҥ ичине  салган. Анайып, бала толо кеминде болуп чыккан, оныҥ јӱрӱми Кудайдыҥ чындыгыныҥ некелтелерине јарагадый баалу болгон (Лука 1:26—31, 34, 35).

⁴ Иисус 30 јаш кире тужында Иордан сууда чӧҥӱрилген. Ол чӧҥӱрилип турарда, агару тынла эмезе Кудайдыҥ јаантайын иштеп турар ийде-кӱчиле майлаткан. Анайып ол Христос эмезе «Майлаткан» болуп калган (Лука 3:21, 22). Иисустыҥ јердеги јарлап иштегени ӱч јарым јыл болгон. Ол бойыныҥ ӱренчиктерин «Кудайдыҥ Каандыгы» керегинде ӱреткен. Кудайдыҥ Каандыгы — кижиликти Кудайла такып амыр колбуларлу болзын деп тургузылган теҥеридеги башкару (Лука 4:43;  Матфей 4:17). Иисус улуска ырысту јӱрерге не керектӱ болгонын билер болгон, оныҥ учун бойыныҥ ӱренчиктерине нени эдетениниҥ башкартузын берген. Агару Бичикти ачып, Матфейдиҥ бичигинеҥ 5—7-чи бажалыктарды кычырып, Иисустыҥ Кырдагы куучыныныҥ кезик ӱредӱлериле таныжып алыгар.

⁵ Иисус Адамга кӧрӧ Кудайдыҥ сӧзин јаантайын угуп јӱрген. «Ол кинчек этпеген» (Петрдыҥ 1-кы самаразы 2:22; Еврейлерге 7:26). Оныҥ учун Иисус јерде ӱргӱлјиге јӱрер јаҥду болгон. Је Ол Адамныҥ јылыйтып салганын Кудайга кайра экелерге «бойыныҥ јӱрӱмин» берген. Иисус кыйналыштыҥ тӧҥӧжине ӧлӱп, толо кеминде болуп јӱретен јӱрӱмнеҥ мойногон (Иоанн 10:17; 19:17, 18, 28—30; Римдегилерге 5:19, 21; Филиппыдагыларга 2:8). Мынайып, Иисус кижиликти ӧлӱм ле кинчектиҥ кулданыжынаҥ толып аларына керектӱ бааны тӧлӧп салган (Матфей 20:28). Бойыгарды эртен туранаҥ ала эҥирге јетире бажын кӧдӱрбей иштеп турган кулдыҥ ордына тургузып ийзегер. Слерди јайымдаарга јӱрӱмин берип, ордыгарга кул болгон кижиге слерде кандый сезимдер болор эди? Слер јаантайынга быйанду јӱрер болорыгар. Толынтынаҥ улам слерге Кудайдыҥ сӱреен јаан билезине кайра бурылып, кинчек ле ӧлӱм јок сӱӱнчилӱ ле ырысту јӱрӱм јӱрер арга берилген (2 Коринфтегилерге 5:14, 15).

⁶ Кудайдыҥ мындый буурсагын билип турзаҥ, Агару Бичиктиҥ ойгор сӧстӧрин оноҥ кӧп тузаланар кӱӱн келет. Темдектезе, анчада ла тузаланарга кӱч болуп турган улустыҥ јаманын таштаары керегинде бир башкару јетирӱни кӧрӧктӧр. 2-чи Урокто јарташкан Колоссыдагыларга 3:12—14-тӧ бичилген сӧстӧр санаагарга кирет пе? Бу ӱлгерлер бисти ачындырган кижиге ачынар шылтактар бар да болзо, улустыҥ јаманын таштаарга кӱӱнзеткен. «[Иегова, ЈТ] јаманыгарды таштаганы чылап, слер де бой-бойыгардыҥ јаманыгарды таштагар» — деген сӧстӧрди, нениҥ учун тузаланарын озо айдылган сӧстӧр јартайт. Иегова ла Иисус Христос ончо кижиликке нени эткенин тереҥ оҥдоп ийгенде, биске улустыҥ јаманын, анчада ла јастыразын оҥдоп, кунугып турган улустыҥ јаманын таштаар кӱӱн келет.