Иисус Христос — Кудай керегинде билгирге тӱлкӱӱр
4-чи бажалык
Иисус Христос — Кудай керегинде билгирге тӱлкӱӱр
1, 2. Телекейдиҥ кудайлык јаҥдары канайып Кудай керегинде билгирдиҥ тӱлкӱӱрин ӱрегилеп салгылаган?
СЕН бойыҥныҥ тураҥныҥ эжигиниҥ јанына турала тӱлкӱӱрлерле уружадыҥ. Бозогодо соок ло караҥуй, капшай айлыҥа кирер кӱӱниҥ келет, је эжикти канайтсаҥ да ачылбайт. Сен керектӱ тӱлкӱӱрди алдыҥ ошкожыҥ, је сомок ачылбайт. Коркушту јаман сезим! Сен ойтоло бойыҥныҥ тӱлкӱӱрлериҥди ајыктайдыҥ. Керектӱзин сен алгаҥ ба? Айса болзо оны кем де сындырып салган?
2 Бу темдек Кудай керегинде билгирге, бу телекейдеги кудайлык јаҥдардагы булгаштарды јакшы кӧргӱзет. Кӧп сабалары чынынча Иисус Христостыҥ учурын ӧскӧртип, бу Кудай керегинде билгирди ачып турган тӱлкӱӱрди ӱрегилеп салгандар. Кезик кудайлык јаҥдардыҥ бӧлӱктери Иисусты бӱдӱнге керексилебей, бу тӱлкӱӱрди чек таштагылап ийгендер. Ӧскӧлӧри Иисустыҥ учурын солугылап, Бастыраны эдип ийер Кудайга чылап ого бажыргылайт. Кандый да болгон болзо, бис Иисус Христос кандый јаан учурлу болуп турганыныҥ аайы-бажына чыкпазас, Кудай керегинде билгир биске бектӱлӱ болуп артар.
3. Нениҥ учун Иисусты Кудай керегинде билгирге тӱлкӱӱр деп адаарга јараар?
3 «Сени, јаҥыс чындык Кудайды ла Сениҥ ийген Иисус Христосты билери, ӱргӱлји јӱрӱм дегени бу» — деп, Иисустыҥ сӧстӧри сениҥ сагыжыҥа байла кирип турган болор (Иоаннаҥ 17:3). Качан Иисус бу сӧстӧрди айдып турарда ол мактанбаган. Библия Христос керегинде чике билгирлердиҥ учурлузын јаҥыс катап темдектебей јат (2 Пётрдыҥ 1:8; 2:20; Ефесяндарга 4:13; Колоссяндарга 2:2). «Ол [Иисус Христос] керегинде бастыра судурчылар керелейт» — деп, апостол Пётр ајаруга алат (Деяниелер 10:43). «[Иисуста] бастыра баалу ойгорлор ло билгирлер бектелген» — деп, апостол Павел бичиген (Колоссяндарга 2:3). Анайда ок, Иегова бастыра бойыныҥ амадуларын Иисус ажыра эдер деп Павел айткан (2 Коринфяндарга 1:20). Анайдарда, Иисус Христос — Кудай керегинде билгирге тӱлкӱӱр. Бистиҥ Иисус керегинде билгирлерис Кудайдыҥ амадуларында оныҥ учурына да, оныҥ чын ла бар болгонына да бир де кичинек јастыраларлу болбос учурлу. Је нениҥ учун Иисустыҥ кийнинеҥ барып јаткан улустар ого Кудайдыҥ амадуларында баштап апаратан учур бергилейт?
КЕЛЕР БОЛГОН МЕССИЯ
4, 5. Мессияга кандый ижемјилер салылган ла Иисустыҥ ӱренчиктери бойыныҥ ӱредӱчизин кем деп тооп тургулаган болгон?
4 Иегова Кудайдыҥ озолондыра айдып салган Ӱренин (Семя) Кудайдыҥ чындык ишчилери Авельдиҥ ӧйлӧринеҥ бейин энчикпей сакыгылаган (Бытие 3:15; 4:1—8; Еврейлерге 11:4). Ӱрен Оныҥ амадуларында Мессияныҥ, ол эмезе «Майлалганныҥ» учурын бӱдӱрер деп Кудай ачкан. Мессия ‘килинчектерди таҥмалап салар’, анайда ок оныҥ Каандыгыныҥ улу болоры Псаломдордо озолондыра айдылган (Даниил 9:24—26; Псалом 71:1—20). Бу Мессия кем болды?
5 Андрей деп атту јиит еврей, Назареттеҥ келген Иисустыҥ сӧстӧрин угуп турарда, кандый сезимдерлӱ болгонын сананып кӧр. Андрей бойыныҥ аказына Симон Пётрга јӱгӱргенче келеле: «Бис Мессияны таап алдыс» — деп айтты (Иоаннаҥ 1:41). Иисустыҥ ӱренчиктери ол — келер болгон Мессия деп бӱдӱмјилӱ болгылаган (Матфейдеҥ 16:16). Чокумдап айтса, Иисус озолондыра айдылган келер Мессия, ол эмезе Христос деп, чындык христиандар бойлорыныҥ бӱдӱмјизи учун јӱрӱмин де берерге белен болгылаган. Олордо мындый бӱдӱмјилӱ болорго кандый тӧзӧлгӧ болгон? Иисустыҥ мессия болгоныныҥ ӱч тӧс чынын керелеерин шиҥдеп кӧрӧктӧр.
ИИСУСТЫҤ МЕССИЯ БОЛГОНЫНЫҤ ЧЫНЫН КЕРЕЛЕЕРИ
6. а) Берер болгон Ӱрен кандый уук-тӧстӧҥ келер болгон ло, Иисус шак бу ук-тӧстӧҥ чыкканын бис кайдаҥ билерис? б) Нениҥ учун б. э. 70 јылыныҥ кийнинде, ол Мессия деп кем де чынын кереелеп болбой јат?
6 Иисустыҥ угы-тӧзи — оныҥ мессия болгоныныҥ баштапкы чынын керелеери. Иегова бойыныҥ ишчизине, Авраамга, келер болгон Ӱрен оныҥ билезинеҥ чыгар деп айткан. Бого тӱҥей ижемјини Авраамныҥ уулы Исаак, Исаактыҥ уулы Иаков, анайда ок Иаковтыҥ уулы Иуда алгандар (Бытие 22:18; 26:2—5; 28:12—15; 49:10). Јӱсјылдардыҥ кийнинде ууламјы Мессияныҥ угы-тӧзин Давид Каанга экелди, узак сакыган Ӱрен оныҥ угы-тӧзинеҥ болор деп ого айдылган болгон (Псалом 131:11; Исаия 11:1, 10). Иисус бу ла ук-тӧстӧҥ болгон деп Матфей ле Луканыҥ Јакшылыкту Јарларыныҥ јетирӱлери чынын јартайт (Матфейдеҥ 1:1—16; Луканаҥ 3:23—38). Иисуста кӧп ӧштӱлер болгон до болзо, олордыҥ кемизи де јебрен ӧйдӧҥ бери бичилген ээлбеде јарлу угы-тӧзиниҥ бичигин јаратпай блаашкылабаган болгон (Матфейдеҥ 21:9, 15). Оныҥ угы-тӧзи керегинде бир де алаҥзу болбогоны јарт. Је б. э. 70 јылында, качан римляндар Иерусалимди јуулап аларда, еврейлердиҥ угы-тӧзи керегинде бичиктери јоголтылып калган. Ол ло ӧйдӧҥ бери кем де мессия болорго бойыныҥ чынын јартап болбой јат.
7. а) Иисус Мессия болгон деп, кандый экинчи чынын керелеери бар? б) Михейде 5:2-деги судур Иисуска канайып бӱткен?
7 Бӱдӱп калган судурлар — экинчи чынын керелеери. Еврей Бичимелдерде кӧп тоолу судурлар Мессияныҥ јӱрӱминиҥ башка-башка јандарын чокум јарт кӧргӱскендер. Улу башкараачы јаан эмес Вифлеем калада чыгарын, Михей деп судурчы б. э. о. сегизинчи чакта озолондыра айткан. Израильде эки Вифлеем болгон, оныҥ учун судур олордыҥ бирӱзин, каан Давидтиҥ чыккан Вифлеем — Ефрафаны чике кӧргӱскен (Михей 5:2). Иосиф ле Мария, Иисустыҥ ада-энези, Вифлеемнеҥ 150 чакырым кирези тӱндӱктей Назаретте јаткылаган. Качан Мария барлу болордо, римниҥ императоры Цезарь Август бастыра улуска тооалышка бичидерин туулган калаларында ӧтсин деп јакару берген *. Оныҥ учун Иосифке бойыныҥ барлу ӱйиле кожо Вифлеемге атанарга келишкен, ондо ло Иисус туулган (Луканаҥ 2:1—7).
8. а) 69 «јетилик» качан, оноҥ кандый учуралла башталган? б) 69 «јетилик» канча кире улалган, оноҥ ол тӱгенген соҥында не болды?
8 Б. э. озо Vl чакта, Иерусалимди орныктырар деген јакару чыккан соҥында 69 «јетилик» («неделе», ЭмК) ӧткӧн кийнинде «Башчы Мессия» келер деп, судурчы Даниил озолондыра айткан болгон (Даниил 9:24, 25). Кажы ла бу «јетилик» јети јылга тӱҥейлештирилген *. Библиялык ла бастырателекейлик тӱӱкиликле, Иерусалимди орныктырары керегинде јакару б. э. озо 455 јылда чыккан болгон (Неемия 2:1—8). Оныҥ учун б. э. озо 455 јылдаҥ ала 483 јыл (69х7) ӧткӧн кийнинде Мессия келетен учурлу болгон. Бу бисти б. э. 29-чы јылына экелет. Бу ла јылда Иегова Иисусты агару ийдезиле майлаган. Мынайда Иисус «Христос» («Майлалган» дегени), ол эмезе Мессия болуп калган (Луканаҥ 3:15, 16, 21, 22).
9. а) Псалом 2:2 канайып бӱтти? б) База кандый судурлар Иисуска бӱтти? (Таблицаны кӧр.)
9 Иисусты келер болгон Мессия деп бастыразы керектегилебеген эмей, не дезе мындый болоры Еврей Бичимелдерде озолондыра айдылган болгон. Псаломдо 2:2 «Јердиҥ каандары тургулап чыккылайт, Кайраканга удура ла Оныҥ Майлатканына удура јайзаҥдар кожо јӧптӧшкилейт» — деп, Каан Давид Кудайдыҥ болужыла озолондыра айткан болгон. Бу судур, бир ороонноҥ кӧп ороондордыҥ башкараачылары Мессияга, эмезе Иегованыҥ Майлатканына, табару эдерге биригер деп кӧргӱзет. Анайдала болуп калды. Иудейлердиҥ кудайлык јаҥыныҥ башкараачылары, каан Ирод ло римниҥ башкараачызы Понтий Пилат, Иисусты ӧлтӱрерине кожо турушкылады. Керек дезе каргышту ӧштӱлер Ирод ло Пилат, ол тушта кенетийин јуук најылар боло бергилеген (Матфейдеҥ 27:1, 2; Луканаҥ 23:10—12; Деяниелер 4:25—28). Иисустыҥ мессия болгоныныҥ оноҥ ары чынын керелеерин билип аларга, «Кезик јарлу мессиялык озолондыра айткандар» деген таблицаны кӧрӱгер.
10. Иегова Иисусты оныҥ берер болгон Майлатканы деп канайып кереледи?
10 Иегова Кудайдыҥ керелегени — Иисус мессия болгонын кӧргӱскен, ӱчинчи чынын керелеери. Иисус келер болгон Мессия деп улустарга јетирзин деп Иегова ангелдерди ийген (Луканаҥ 2:10—14). Ого коштой, Иисус јерде јадып турарда, Иегова оны тооп турганын кӧргӱзерге, бойы теҥеринеҥ ӱнденип айткан (Матфейдеҥ 3:16, 17; 17:1—5). Иегова Кудай Иисуска кайкалдар эдер ийде берген. Бу кайкалдардыҥ кажызы ла Иисус мессия болгон деп Кудайдыҥ чынын керелеери болгон, нениҥ учун дезе Кудай качан да куурмакчыларга кайкал эдерге ийде бербеген. Анайда ок Иегова Јакшылыкту Јетирӱни бичиирине агару ийдени тузаланган, оныҥ учун Иисустыҥ мессия болгоныныҥ чынын керелеери тӱӱкиликте эҥ ле кӧп тилдерге кӧчӱрилген ле текши таркадылган бичиктиҥ, Библияныҥ, бӧлӱги болуп калган (Иоаннаҥ 4:25, 26).
11. Иисустыҥ Мессия болгоны канча кире тереҥ тӧзӧлгӧлӱ?
11 Бу тӧс чынын керелеери, Иисус келер болгон Мессия деп, јӱстер кирези чын болгон керектер јартайт. Ол керегинде «бастыра судурчылар керелегилеп турарда», оны Мессия деп бодорго чындык христиандарда бастыра тӧзӧмӧлдӧр бары јарт боло берет. Чын, христиандар оны Кудай керегинде билгирге тӱлкӱӱр деп кӧргӱлеп јат (Деяниелер 10:43). Је Иисус Христостыҥ мессия болгонын јартап турган бу чын болгон керектердеҥ башка, ол керегинде оноҥ до кӧп билип аларга јараар. Темдектезе, оныҥ угы-тӧзи керегинде нени билерис? Ол бойы кем болгон?
ИИСУСТЫҤ КИЖИ БОЛОРДОҤ ОЗО ЈӰРӰМИ
12, 13. а) Иисус јерге келердеҥ озо теҥериде јӱрген деп бис кайдаҥ билерис? б) «Сӧс» дегени кем ле кижи болордоҥ озо ол нени эткен?
12 Иисустыҥ јӱрӱмин ӱч ӧйгӧ бӧлӱрге јараар. Баштапкы ӧйи оныҥ јерде чыгарынаҥ канча кире озо башталган. Михейде 5:2-де Мессияныҥ угы-тӧзи «ӱргӱлји кӱндердиҥ башталганынаҥ бери» деп айдылат. Ол «ӱстинеҥ», ол эмезе теҥеринеҥ келген деп Иисус ачыгынча айткан (Иоаннаҥ 8:23; 16:28). Јерге келердеҥ озо ол теҥериде канча кире ӧй јӱрген?
13 Иисус Кудайдыҥ јаҥыскан туулган уулы деп адаткан, нениҥ учун дезе Иегова оны бойы јайаган болгон (Иоаннаҥ 3:16). Оныҥ кийнинде Иегова Иисусты, «кандый ла јайаандардаҥ озо чыккан јайаанды», бастыра арткан калганын јайаарга тузаланган (Колоссяндарга 1:15; Откровение 3:14). Иоанныҥ 1:1-де «Сӧс» (Иисус кижи болор алдындагы јӱрӱминде) «баштап ла» Кудайда болгон деп айдылат. Анайдарда, качан «јер ле теҥери» јайаалып каларда Сӧс Иеговада болгон. Качан Кудай: «Кижини Бойыстыҥ кеберисле јайаарыс» — деп айдарда, ол Сӧскӧ баштанган болгон (Бытие 1:1, 26). Онойдо ок, Сӧс Кудайдыҥ «јурукчызы» («уус болушчызы» ЭмК) болгон болор. Ол Притчаларда 8:22—31 бичилген ойгорды чокумдап кӧргӱзери болуп, Иегованыҥ башкарузыла бастыра бар немелерди јайаарына болушкан. Сӧс јайалганыныҥ кийнинде ле јерге кижи болордоҥ озо, Кудайла кожо теҥериде узаак ӧйгӧ болгон.
14. Нениҥ учун Иисус «кӧрӱнбей турган Кудайдыҥ кебери» деп адалган?
14 Колоссяндарга 1:15-те Иисус «кӧрӱнбей турган Кудайдыҥ кебери» деп, адалганы кайкамчылу эмес! Кӧп јӱсјылдардыҥ туркунына јуук билижеринеҥ улам, сӧс уккур Уулы Адазына — Иеговага сӱреен тӱҥей болуп калган. Бу Иисустыҥ Кудай керегинде јӱрӱм берер билгирдиҥ тӱлкӱӱри болуп турганыныҥ база бир шылтагы. Иисустыҥ бастыра јерде эткен керектери, Иегова бойы анайдала ок эдер болгонына чике келижет. Оныҥ учун Иисусты там ла јакшы билип тура, бис Иегова керегинде бойыстыҥ билгиристи ээлбедип јадыс (Иоаннаҥ 8:28; 14:8—10). Анайдарда, Иисус Христос керегинде кӧӧпти билер керек болгоны јарт.
ИИСУСТЫҤ ЈЕРДЕГИ ЈӰРӰМИ
15. Иисус нениҥ учун бийик кеминде кижи болуп туулган?
15 Иисустыҥ јӱрӱминиҥ экинчи ӧйи мында, јерде, ӧткӧн. Кудай оныҥ јӱрӱмин Кудайдаҥ јалтанып турган Мария деп иудей кыстыҥ ичине теҥеринеҥ кӧчӱрип ийзин деп ол белен јӧпсинген. Иегованыҥ јаан кӱчтӱ агару тыны, эмезе оныҥ иштеп турган ийдези, Марияга «кӧлӧткӧзин тӱжӱрди», ол бала табынып, кийнинде бийик кеминде балалу болды (Луканаҥ 1:34, 35). Иисус једикпестер энчиленбеген, нениҥ учун дезе ол јӱрӱмди бийик кеминдеги Тӧзӧӧчинеҥ алган. Ол јобош, тӧп биледе таскадылган агашла уузанар Иосифтиҥ бир канча балдарыныҥ баштапкы ӧй уулы болгон (Исаия 7:14; Матфейдеҥ 1:22, 23; Марктаҥ 6:3).
16, 17. а) Иисус кайкалдар эдерге ийдени кайдаҥ алган, оноҥ кандый кайкалдар ол эткен? б) Иисус кандый кебеделдер кӧргӱскен?
16 Качан Иисус 12 јашту болордо, оныҥ Иегова Кудайга тынын кысканбай берингени јарт боло берди (Луканаҥ 2:41—49). Иисус чыдайла, одус јаштуда бойыныҥ ижин баштаарда, ол улуска тереҥ сӱӱжин јетирген. Качан Кудайдыҥ агару тыны ого кайкалдар эдерге берилерде, ол оору, аксак, тил јок, кӧзи кӧрбӧс, укпас ла кодурланып оорыйтан терениҥ оорузыла ооруп турган улустарды килеп јаскан (Матфейдеҥ 8:2—4; 15:30). Иисус муҥдар тоолу торолоп калган улустарды азыраган (Матфейдеҥ 15:35—38). Бир катап бойыныҥ најыларын аргадаарга ол јотконды токунаткан (Марктаҥ 4:37—39). Керек дезе ол ӧлӱп калган улустарды да тиргискен (Иоаннаҥ 11:43, 44). Бу кайкалдар — алаҥзу јоктоҥ чын болгон тӱӱкилик учуралдар. Керек дезе Иисустыҥ ӧштӱлериде ол ‘кӧп кайкалдар эткен’ деп јӧпсингилеген (Иоаннаҥ 11:47, 48).
17 Иисус бастыра ороом ло јоруктап, улусты Кудайдыҥ Каандыгы керегинде ӱреткен (Матфейдеҥ 4:17). Ол сӱреен јакшы чыдамкай ла керсӱ болорыныҥ темдегин артыргызып салган. Керек дезе качан ӱренчиктери оны уур айалгада тургузарда, «Тын-јула — сергек, эт-кан — ӧлӱ» — деп, ол килеп айтты (Марктаҥ 14:37, 38 ТК). Андый да болзо, Иисус чындыкты керексибей тургандарга ла коруланып болбос улустарды базынып тургандарга бойын јалтанбас ла турумкай кӧргӱскен (Матфейдеҥ 23:27—33). Анайда ок ол бойыныҥ Адазыныҥ сӱӱжиниҥ темдегинеҥ бийик кеминде тем алынган. Бийик кеминде эмес улус келер ӧйгӧ ижемјилӱ болзын деп, Иисус ӧлӧрине де белен болгон. Анайдарда, Иисусты Кудай керегинде билгирге тӱлкӱӱр деп бодорына бисте бастыра тӧзӧлгӧлӧр бар! Эйе, ол — тирӱ тӱлкӱӱр! Је нениҥ учун тирӱ? Бу суракка каруу берерге, оныҥ јӱрӱминиҥ ӱчинчи ӧйин кӧрӱп ийектер.
ИИСУС БӰГӰНГИ КӰНДЕ
18. Бӱгӱнги кӱнде бис Иисус Христосты бойыста канайып сананар учурлу?
18 Библияда Иисустыҥ ӧлгӧни керегинде айдылып та турган болзо ол тирӱ! Б. э. I-кы чагында јаткан јӱстер тоолу улус, оныҥ тирилгениниҥ керечилери болгон (1 Коринфяндарга 15:3—8). Оныҥ кийнинде, озолондыра айдылганыла Кудай ого теҥеридеги каандык јаҥды берер ӧйди сакып, ол бойыныҥ Адазыныҥ оҥ колыныҥ јанына отурды (Псалом 109:1; Еврейлерге 10:12, 13). Оныҥ учун бис Иисусты бойыска канайып сананар учурлу? Бис оны мал азыраар тоскуурда јаткан аргазы јок огош бала деп бодорыс па? Ол эмезе божор алдына шыра-јоболдогы кижи чилеп пе? Јок эмей. Ол — јаан ийде-кӱчтӱ башкарып турган Каан! Удабас ла ол бистиҥ шыралап калган ырыс јок јеристиҥ ӱстине бойыныҥ башкарузын тургузар.
19. Бу ла јуук келер ӧйдӧ Иисус нени эдер?
19 Откровениеде 19:11—15-те Иисус Христос чындыгы јок улусты јоголторго амадап турган јаан ийде-кӱчтӱ келип јаткан Каан деп чокум бичилген. Бу теҥериниҥ чындык сӱӱштӱ Башкараачызы, миллион улустардыҥ шыра-јоболын токтодорго канайып амадайт не! Анайда ок оныҥ јерде јӱрӱп тура артыргыскан бийик кеминдеги теминеҥ, тем аларга албаданып тургандарга ол болужар кӱӱндӱ (1 Пётрдыҥ 2:21). Ол бу улусты теҥеридеги Кудайдыҥ Каандыгыныҥ јердеги албатызы болуп ӱргӱлјиге јатсын деп, тӱрген јууктап келеткен Армагеддон деп адалып турган, «Бастыраны тудатан Кудайдыҥ јуу-согушту улу кӱнинде» артыргызып аларга кӱӱнзейт (Откровение 7:9, 14; 16:14, 16).
20. Иисус бойыныҥ муҥјылдык башкарар ӧйинде кижиликке нени эдер?
20 Озолондыра айдылган Иисустыҥ муҥјыл башкарар ӧйинде, бастыра јерде амыр-энчӱ болзо, ол бастыра кижиликке туза болзын деп кайкалдар эдер (Исаия 9:6, 7; 11:1—10; Откровение 20:6). Иисус ончо ооруларды јазып, ӧлӱмди токтодып салар. Ол миллиардтар тоолу ӧлгӧндӧрди ӱргӱлјиге јерде јадар аргалу болзын деп тиргизер (Иоаннаҥ 5:28, 29). Сен бу бичиктеҥ мессиялык Каандык керегинде база билип алзаҥ, оныла алаҥзу јогынаҥ јӱрегиҥ томулар болор. Керек дезе Каандык башкарып турган ӧйдӧ бистиҥ јӱрӱмис кандый кайкамчылу болорын бис сананып та болбой јадыс. Оныҥ учун Иисус Христос керегинде, канча ла кире кӧпти билер керек! Эйе, Иисус ӱргӱлји јӱрӱмге апарар — Кудай керегинде билгирге тирӱ тӱлкӱӱр, оныҥ учун оны бис качан да ычкынбай, темдекте тутканыс сӱреен учурлу.
[Кӧчӱрӱлер]
^ Бу албатыныҥ тоозын алып бичиири Римниҥ империязына калан јуур арга берип турган болгон. Мынайда Август «калан јууйтанды каандыкла базып калан јуузын деп ийер» деген башкараачы керегинде судурдыҥ бӱдерине бойы билбей јӧмӧшкӧн. Бу ла судурда, «јакылтаныҥ башчызы», ол эмезе Мессия, бу башкараачыныҥ орочызыныҥ кӱндеринде «јоголтылар» деп, озолондыра айдылган болгон. Августтыҥ орочызы, Тиберийдиҥ башкарып турган кӱндери тушта Иисус ӧлтӱртип салган (Даниил 11:20—22).
^ Јебрен еврейлер ортодо јылдык неделелер керегинде кӧрӱм ээлбеде таркадылган болгон. Темдектезе, кажы ла јетинчи кӱн суббот кӱн болгонына бодоштой, јетинчи јыл суббот јыл деп чотолгон (Исход 20:8—11; 23:10, 11).
БОЙЫҤНЫҤ БИЛГИРЛЕРИҤДИ ШИҤДЕП КӦР
Иисустыҥ угы-тӧзи ол Мессия деп канайып јартайт?
Кандый мессиялык судурлар Иисуска бӱтти?
Иисус Кудайдыҥ Майлатканы болгонын Кудай канайып чике кӧргӱсти?
Нениҥ учун Иисус — Кудай керегинде билгирге тирӱ тӱлкӱӱр?
[Ӱренериниҥ сурактары]
[37 бӱктеги таблица]
ЈАРЛУ КЕЗИК МЕССИЯЛЫК СУДУРЛАР
СУДУР УЧУРАЛ БӰТКЕНИ
ОНЫҤ ЭРТЕ ЈӰРӰМИ
Исаия 7:14 Кыстаҥ туулганы Матфейдеҥ 1:18—23
Иеремия 31:15 Оныҥ туулганыныҥ кийнинде Матфейдеҥ 2:16—18
балдарды ӧлтӱргени
ОНЫҤ ИШТЕГЕНИ
Исаия 61:1, 2 Кудай ого јаҥдар берген Луканаҥ 4:18—21
Исаия 9:1, 2 Оныҥ иштеген шылтагы учун Матфейдеҥ 4:13—16
улус улу јарыкты кӧргӧн
Псалом 68:10 Иегованыҥ туразы учун Иоаннаҥ 2:13—17
кӱнӱркегени
Исаия 53:1 Ого бӱткилебеген Иоаннаҥ 12:37, 38
Захария 9:9 Эштекке минип Иерусалимге; Матфейдеҥ 21:1—9
Псалом 117:26 кийдире јорткон
оны Иегованыҥ адыла
келип јаткан каан деп
мактагылаган
САДЫП ИЙГЕНИ ЛЕ ӦЛӰМ
Псалом 40:10; 108:8 Бир апостол чындык Деяниелер 1:15—20
эмес болуп калды;
Ол Иисусты садып ийген,
мынаҥ улам оныҥ ордына
ӧскӧзи туруп алган
Захария 11:12 30 мӧҥӱнге садылган Матфейдеҥ 26:14, 15
Псалом 26:12 Ого удура тӧгӱн керечилерди Матфейдеҥ 26:59—61
тузалангылаган
Псалом 21:19 Оныҥ кийими учун маргаан эткиледи Иоаннаҥ 19:23, 24
Исаия 53:12 Шокчыл, калју улуска кошкылап салган Матфейдеҥ 27:38
Псалом 21:8, 9 Ӧлӧр алдында јамандагылаган Марктаҥ 15:29—32
Псалом 68:22 Уксус берген Марктаҥ 15:23, 36
Исаия 53:5 Ойо сайдырып салган Иоаннаҥ 19:34, 37
Исаия 53:9 Сӧӧгин бай кижиде јууган Матфейдеҥ 27:57—60
Псалом 15:8—11 Ӱрелиш јогынаҥ тирилген Деяниелер 2:25—32;
[35 бӱктеги јурук]
Кудай Иисуска оору улусты јассын деп ийде берген.
