Калју тын ийделерге удура тур
12-чи бажалык
Калју тын ийделерге удура тур
1. Качан Иисуска калју тындарла туштажарга келижип турарда ол нени эткен?
ИИСУС Христос сууга чӧҥӱрилип чыгарылган кийнинде удабай ла, Иудеяныҥ чӧл јерине мӱргӱӱрге ле сананарга барган. Ондо Эрлик Јелбис оны Кудайдыҥ јасагын бузып ийзин деп кӱӱнзедип ченеди. Је Иисус Эрликтиҥ ченежин туураладып, оныҥ тузагына тӱшпеди. Бойыныҥ Кудайга иштеген јердеги ӧйинде, Иисус ӧскӧ дӧ калју тындарла тушташкан. Андый да болзо ол такып-такып удурлажып, олорго удура турды (Луканаҥ 4:1—13; 8:26—34; 9:37—43).
2. Кандый сурактарды бис шӱӱжип кӧрӧрис?
2 Библияда бичилген учуралдар калју тын ийделер чын ла бар деп бисти бӱдӱмјилеп јат. Олор улусты аскыртып саларга умзангылайт. Је олорго удурлажарга јараар. Анайдарда калју тындар канайып табылган? Нениҥ учун олор улусты тӧгӱндерге албадангылап турган? Олор бойлорыныҥ амадуларына јединерге неге баштангылайт. Бу сурактардыҥ каруулары сеге калју тын ийделерге удурлажарга болужар.
КАЛЈУ ТЫНДАР — ОЛОРДЫҤ ТАБЫЛГАНЫ ЛА АМАДУЗЫ
3. Эрлик Јелбис канайып табылган?
3 Иегова Кудай улусты јайаардаҥ канча кире озо, кӧп ангелдер јайаган (Иов 38:4, 7). Бистиҥ бичиктиҥ 6-чы бажалыгында јарталганы аайынча, бу ангелдердиҥ бирӱзи улусты Иеговага эмес, а ого бажырзын деп кӱӱнзептир. Калју ангел бого амадап, Јайаачыга удура туруп чыгала, керек дезе Кудай — тӧгӱнчи деп, баштапкы ӱй кижиге оны јамандаган. Бу тӱймеечи кӧскӧ кӧрӱнбес јайаан Эрлик — ӧштӱ ле Јелбис — тӧгӱнчи деп, јарлу боло бергени сӱреен чын (Бытие 3:1—5; Иов 1:6).
4. Нойдыҥ кӱндеринде кезик ангелдер канайып кинчек эткилеген?
4 Кийнинде Эрлик Јелбистиҥ јанына ӧскӧ дӧ ангелдер кожылды. Ной деп чындык кижиниҥ кӱндеринде, олордыҥ кезиктери теҥеридеги ижин артыргызып, бойлорыныҥ кычаларыныҥ (похоти) маказын каандырарга, ӱй улусла јуук колбуларлу болорго, улус болуп кубулгылаган. Ангелдерди мындый сӧс укпазына Эрлик јайа тартканында алаҥзу јок. Бу, олордо — улус ла ангелдердиҥ ортозындагы кандый да кайлык укту балдар табылганына экелди; бу балдар баатырлар (исполины) деп адаткандар, олор чын ла коркушту тоноштор эткилеген. Иегова Бастырателекейлик чайыкта балыр болуп калган кижиликти ле сӧс укпас ангелдердиҥ тегин эмес калдыктарын јоголтып салды. Тӱймеечи ангелдер јоголтыштаҥ кыйгандар, олор бойлорыныҥ улустый болгон эт-сӧӧгин артыргызып, кӧскӧ кӧрӱнбес тындар јӱретен јер јаар кайра баргылады. Је Кудай бу калју кӧрмӧстӧрди караҥуй јер јаар сӱрӱп ийген (Бытие 6:1—7, 17; Иуданыҥ 6). Је ондый да болзо, Эрлик — «кӧрмӧстӧрдиҥ јайзаҥы» ла, оныҥ калју ангелдери бойыныҥ тӱймеенин оноҥ ары эткилеп јат (Луканаҥ 11:15). Олор неге јединерге турган?
5. Эрлик ле оныҥ кӧрмӧстӧри кандый амадулу ла улусты бойыныҥ тузагына мекелеп экелерге олор нени эткилеп јат?
5 Эрликтиҥ ле оныҥ кӧрмӧстӧриниҥ калју санаазы — улусты Иегова Кудайга удура тургузары. Оныҥ учун олор бастыра кижиликтиҥ тӱӱкизиниҥ туркунына улусты тӧгӱндеп, коркыдып, олорго табару эдип турган болгон (Откровение 12:9). Кӧрмӧстӧрдиҥ табарулары ӧйинеҥ ӧткӱре калју болуп калганын бӱгӱнги темдектер кӧргӱзип јат. Кӧрмӧстӧр улусты бойыныҥ тузагына мекелеп экелерге, јаантайын ла башка-башка спиритизмниҥ бӱдӱмине келгилейт. Кӧрмӧстӧр бу јемле канайып тузаланат, оноҥ сен бойыҥды канайып корулап алар аргалу?
КАЛЈУ ТЫНДАР СЕНИ АСКЫРТЫП САЛАРЫНА КАНАЙЫП ЧЕНЕШКИЛЕЙТ
6. Спиритизм дегени ол не, оныҥ кезик бӱдӱмдери кандый?
6 Спиритизм дегени ол не? Бу — кӧрмӧстӧрлӧ, калју тындарла тудуш болгоны ол эмезе медиум ажыра колбу. Байа аҥчы јемле тындуны канайып мекелегендий, анайып ла спиритизм кӧрмӧстӧргӧ болужат. Аҥчылар тындуларды тузагына мекелеп экелерге канайып башка-башка сӱмелер эткилейт, анайдала калју тындар улустарды ээлеп аларга јӱзӱн-башка спиритизмниҥ бӱдӱмдерине јӧмӧшкилеп јат. (Псалом 118:110-ды тӱҥейлештир.) Кезик спиритизмниҥ бӱдӱмдери — бу белгелеери, магия, ырым сезер темдектер ајыктаары, каргаары, тармалары, медиумдарга баштанаары ла ӧлӱп калгандарла куучындажары.
7. Спиритизм канча кире таркадылды, ол нениҥ учун христиан ороондор деп адалып турган јерлерде ӧзӱм алынат?
7 Бу јем — сӱреен јакшы, нениҥ учун дезе спиритизм улусты текши јайа тартат. Јурттарда јадып тургандар эмчи-томчыларга баштангылайт, а каланыҥ улустары астрологтордоҥ јӧп сурагылайт. Керек дезе, спиритизм христиан деп адалып турган оромдордо текши ӧзӱм алынат. Јаҥыс ла Бириктирген Штаттарда тиражы 10 000 000 ажыра экземлярлу 30 кире бичиктер башка-башка спиритизмниҥ бӱдӱмине учурлалган деп шиҥжӱӱ кӧргӱзет. Јылдыҥ ла сайын Бразилияныҥ улустары 500 миллион доллардаҥ ажыра акчаны јӱзӱн-јӱӱр спиритизмниҥ немелерине чыгымдайдылар. Је бу ороондо спиритизимдик тӧс бажырарына келип тургандардыҥ 80 проценти олло ок ӧйдӧ серкпениҥ ижине јӱрӱп турган креске тӱшкен католиктер. Кезик абыстар спиритизмле тузаланып турган болордо, кӧп Кудайга бӱдӱп турган улустар бу Кудайга јарап турган болор деп санангылайт. Је бу мындый ба?
НЕНИҤ УЧУН БИБЛИЯ СПИРИТИЗМДИ ТУЗАЛАНАРЫН ЈАРАТПАЙ ЈАРГЫЛАП ЈАТ
8. Библия спиритизм керегинде нени айдат?
8 Кезик спиритизмниҥ бӱдӱмдери јакшы тындарла куучындажарыныҥ колбузы деген шӱӱлтеге сени ӱредип салган болзо, Библия спиритизм керегинде нени айдып турганын билип алзаҥ, сен кайкаар болорыҥ. Иегованыҥ албатызы: «Ӧлгӧндӧрди алдыртып тургандарга баштанбагар, тармаачыларга барбагар, олордоҥ бойыгарды быјарзытпагар» — деп озолондыра айттыртып салган (Левит 19:31; 20:6, 27). Откровение деген библиялык бичикте, «тармачыларды... отло, чаганала кӱйӱп јаткан кӧл» сакып јат, «бу — экинчи ӧлӱм [ӱргӱлјиге]» деп озолондыра айдылганы бар (Откровение 21:8; 22:15). Иегова Кудай кандый ла спиритизмниҥ бӱдӱмин јаратпай јат (Второзаконие 18:10—12). Је нениҥ учун?
9. Кӧрӱнбес тындардыҥ телекейиниҥ бӱгӱнги «јетирӱлери» Иегованаҥ чыкпай турган деген тӱп-шӱӱлтеге нениҥ учун бис келер аргалу?
9 Библияны бичиири учына јеткелекте, Иегова јакшы тындарды, ол эмезе чындык ангелдерди кезик улустарла куучындашсын деп аткарган болгон. Библияныҥ бичиири тӱгенип калган ӧйдӧҥ бери, Иеговага јараар айынча иштеерге керектӱ башкару, улуска Кудайдыҥ Сӧзи ажыра берилип јат (2 Тимофейге 3:16, 17; Еврейлерге 1:1, 2). Ол јетирӱлерди медиумдар ажыра берип, бойыныҥ агару Сӧзин керексибей турган деп болбой јат. Бӱгӱн тындардыҥ телекейинеҥ келип турган бастыра јетирӱлер калју тындардаҥ чыгып јат. Спиритизмле тузаланганы, кӧрмӧстӧр кижиге амыр бербезине ле эмезе олорды олјолоп аларына экелер аргалу. Оныҥ учун Кудай сӱӱжинеҥ улам бисти јӱзӱн-јӱӱр спиритизмле тузаланып урушпазын деп токтодып јат (Второзаконие 18:14; Галаттарга 5:19—21). Анайда ок, бис Иегованыҥ кӧрӱмин билип алала спиритизмле тузаланып турзас, ол тушта бис тӱймеечи калју тындардыҥ јанына кӧчӱп, Иегованыҥ ӧштӱлери боло бередис (1 Царств 15:23; 1 Паралипоменон 10:13, 14; Псалом 5:5).
10. Озолондыра айдары ол не дегени ле бис нениҥ учун оноҥ кыйыжар учурлу?
10 Бир текши таркадылган спиритизмниҥ бӱдӱми — озолондыра айдары. Бу кӧрӱнбей турган тындардыҥ болужыла кандый да јарт эмес немени эмезе келер ӧйди билерге умзанганы болуп јат. Озолондыра айдатаныныҥ кезик бӱдӱмдери ол: астрология, магиялык кристаллдыҥ болужыла белгелеери, тӱштерди јартаары, алаканды ајыктаары ла кӧзӧрлӧрлӧ белгелеери. Кӧп саба улус белгелеерин каршулу эмес соот деп бодогылайт, је Библия озолондыра айдып тургандар ла калју тындар ӧмӧ-јӧмӧ иштегилеп турган деп кӧргӱзет. Темдектезе, Деяниелерде 16:16—19-та «озолондыра айдар тын», бир кыска «озолондыра айдары» ла иштеер арга берип турганына ајару эдилет. Је качан оноҥ кӧрмӧсти сӱрӱп ийерде, оныҥ озолондыра айдар аргазы јок болуп калган. Белгелеери — бу, кӧрмӧстӧр улусты бойыныҥ тузагына јайа тартып туратан јем болгоны јарт.
11. Нениҥ учун ӧлгӧндӧрлӧ куучындажарга умзанганы тузакка экелип јат?
11 Сен тӧрӧӧн кижиҥниҥ эмезе јуук најыҥныҥ ӧлӱмине тыҥ кунугып карыккан болзоҥ, сен ӧскӧ тузакка јеҥил тӱже берер аргалу. Спиритизмниҥ медиумы сеге аҥылу јетирӱлерди берер, эмезе сениле ӧлӱп калган кижиниҥ ӱниле куучындажар аргалу. Ајарыҥкай бол! Ӧлӱп калгандарла куучындажарга умзанганы тузакка экелип јат. Нениҥ учун? Нениҥ учун дезе ӧлгӧндӧр куучындажып болбос. Сениҥ сагыжыҥа байла кирип турган болор, Кудайдыҥ Сӧзинде кижи ӧлгӧн кийнинде «бойыныҥ јерине кайра бурылат; ол ло кӱн оныҥ ӱзе санаалары јылыйып јат» деп јарт айдылган. Чын, ӧлгӧндӧр «нени де билбес» (Псалом 145:4; Екклесиаст 9:5, 10). Анайда ок, ӧлгӧндӧр керегинде спиритизмниҥ медиумдарына јетирӱлерди јӱк ле кӧрмӧстӧр берип јат деп билерис (1 Царств 28:3—19). Оныҥ учун кандый ла «ӧлгӧндӧрди алдыртып турган кижи» калју тындарга туттуртат, оноҥ Иегова Кудайдыҥ кӱӱн-табына удура эдет (Второзаконие 18:11, 12; Исаия 8:19).
МЕКЕЛЕГЕНИНИҤ КИЙНИНДЕ ТАБАРУГА
12, 13. Кӧрмӧстӧр анайдала ок улустарды ченеп, олорго амыр бербей турганына кандый чынын керелеери бар?
12 Качан сен Кудайдыҥ Сӧзиндеги спиритизм керегинде јӧпти тузаланып турзаҥ, сен кӧрмӧстӧрдиҥ јемдерин јектеп јадыҥ. (Псалом 140:9, 10 тӱҥейлештир; Римляндарга 12:9.) Калју тындар сени олјолоп аларга база чырмайбас деп бу темдектейт пе? Јок эмей база! Эрлик Иисусты ӱч катап ченегениниҥ кийнинде, ол «оноҥ артык келижетен учуралга јетире туура јӱре берген» (Луканаҥ 4:13, ЭмК). Бу ла мынайда јана баспас тындар улусты јаҥыс ла ээлеп аларга эмес, је олорго табару да эткилейт.
13 Эрлик канайып Кудайдыҥ ишчизине, Иовко, табарганын бис шиҥдеп куучындашканыс санааҥа кирет пе? Иов айылдыҥ малы ла кӧп саба кулдары јок болуп артып калганына Јелбис јединген. Керек дезе Эрлик Иовтыҥ балдарын ӧлтӱрип койгон. Оноҥ ол Иовтыҥ бойын шыралгалу оорула табарып бастырткан. Је Иов Кудайдыҥ алдына турумкай бололо, арбынду алкыш-быйан алган (Иов 1:7—19; 2:7, 8; 42:12). Оноҥ ло бери кӧрмӧстӧр кезик улустардыҥ кӧрӧр лӧ куучындар аргаларын айрып, кижиликтиҥ шыразына маказын каандырып улалткылайт (Матфейдеҥ 9:32, 33; 12:22; Марктаҥ 5:2—5). Бӱгӱн кӧрмӧстӧр кезик улустарды, эр ле ӱй улус ортодогы колбуларда амыр бербей јат, кезик улусты сагыш јок болорына экелет деп јетирӱлер кӧргӱзет. Онойдо ок олор улусты бой-бойлорын эмезе бойын ӧлтӱрзин деп, Кудайга удура кинчекке ийде салып јат (Второзаконие 5:17; 1 Иоанныҥ 3:15). Је муҥдар улус качан бирде бу калју тындардыҥ шӱӱнине тутурткан да болзо, олор олордоҥ айрылгандар. Бу олорго канайып келишти? Олор јаан учурлу алтамдар эткенинеҥ улам.
КАЛЈУ ТЫНДАРГА КАНАЙЫП УДУРА ТУРАР
14. Баштапкы чактагы эфес христиандардыҥ теми ле барып, сен калју тындарга канайып удура турарыҥ?
14 Калју тындарга удура турарга ла олордыҥ шӱӱндеринеҥ бойыҥныҥ билеҥди ле бойыҥды коруп алатан эп-арга неде болуп јат? Ефесте баштапкы чактагы христиандар, Кудайга бӱдеринеҥ озо спиритизмле тузаланган болгон, је олор чын алтамдар эткендер. «Тармадаарыла тузаланган кӧп улустар, бойлорыныҥ бичиктерин јууйла бастыразыныҥ алдына экелеле ӧртӧп салдылар» деп бис кычырадыс (Деяниелер 19:19). Керек дезе сен спиритизмле тузаланбаган да болзоҥ, спиритизмле эмезе оныла колбулу ончо не-немелердеҥ айрыл. Бого бичиктер, журналдар, видеофильмдер, плакаттар, кӱӱлик бичимелдер ле спиритизмниҥ амадуларына тузаланып турган не-немелер кирип јат. Онойдо ок олорго чалулар, амулеттер ле коруланарына тагынып турган немелер ле, олордыҥ тоозына спиритизмле колбулу улустардыҥ сыйлары кирип јат (Второзаконие 7:25, 26; 1 Коринфяндарга 10:21). Темдектезе, Таиландта јадып турган бир билеге кӧрмӧстӧр узаак ӧйгӧ амыр бербеген. Ол тушта ӧбӧгӧни ле ӱйи спиритизмле колбулу немелердеҥ айрылгандар. Анаҥ ары не болды? Олор кӧрмӧстӧрдиҥ табаруларынаҥ јайымдалып, мыныҥ кийнинде ич-кӧгӱстик (духовный) чын једимдерге јеткендер.
15. Калју тын ийделерге удура турарга, база кандый алтам керек?
15 Калју тындарга удура турарга база бир алтам эдер керек — апостол Павелдиҥ јӧбин тузаланып, Кудайдыҥ берген бастыра ич-кӧгӱстик јепселдерин кийери (Ефесяндарга 6:11—17). Христиандар калју тындардаҥ бойлорыныҥ коруланар эп-аргаларын тыҥыдар учурлу. Бу не дегени? «Элдеҥ озо, тӧгӱнчиниҥ ончо кызыдып койгон окторын ӧчӱрип ийер бӱдӱмјиниҥ куйагын алыгар» — деп Павел айткан. Чын, сениҥ бӱдӱмјиҥ канча ла кире тыҥ болзо, ончо ло кире калју тын ийделерге артык удура турарыҥ (Матфейдеҥ 17:14—20).
16. Сен бойыҥныҥ бӱдӱмјиҥди канайып тыҥыдар аргалу?
16 Сен бойыҥныҥ бӱдӱмјиҥди канайып тыҥыдар аргалу? Библияны ӱренерин улалтып, оныҥ јӧптӧрин јӱрӱмге тузаланып тур. Бӱдӱмјиниҥ ийдези оныҥ бек тӧзӧлгӧзинеҥ — Кудай керегинде билгирдеҥ — камаанду. Библияны ӱренип тура, сен чике билгирди јӱрегиҥе аларыҥда, сениҥ бӱдӱмјиҥ ӧзӱп барганына сен јӧп эмезиҥ бе? (Римляндарга 10:10, 17). Оныҥ учун сен ӱренерин бу мынайда улалтып, оноҥ бойыҥа ээжи эдип Иегованыҥ Керечилериниҥ туштажуларына барып турзаҥ, сениҥ бӱдӱмјиҥ оноҥ кӧп тыҥырында бир де алаҥзу јок (Римляндарга 1:11, 12; Колоссяндарга 2:6, 7). Бу кӧрмӧстӧрдиҥ табаруларынаҥ ийде-кӱчтӱ кору болор (1 Иоанныҥ 5:5).
17. Калју тын ийделерге удура турарга, база кандый алтамдар керек болор?
17 Калју тын ийделерге удура турарга шӱӱп алган кижи, база кандый алтамдар эдер аргалу? Ефестеги христиандарга кору керек болгон, нениҥ учун дезе олор кӧрмӧстӧрлӧ толуп калган калада јаткылаган. Оныҥ учун олорго: «Кандый ла ӧйдӧ ич-кӧгӱзигерле (духом) мӱргӱгер» — деп Павел айткан (Ефесяндарга 6:18). Бис бу кӧрмӧстӧрлӧ ажынып калган телекейде јадып турганыс учун, калју тындарга удурлажарга Кудайга кору керегинде тыҥ мӱргӱӱри сӱреен учурлу (Матфейдеҥ 6:13). Бу јанынаҥ христиан јуундарда тургузылган аксагалдардыҥ ич-кӧгӱстик болужыла мӱргӱӱлдери тузалу (Иаковтыҥ 5:13—15).
КАЛЈУ ТЫНДАРЛА ТАРТЫШ
18, 19. Кӧрмӧстӧр кижиге оноҥ ло ары амыр бербей турган болзо, нени эдер керек?
18 Је кезик улустар тӧс алтамдарды эткен де болзо, калју тындар эмдиге ле амыр бербей јат. Темдектезе, бир кижи Кот-д’Ивуареде Иегованыҥ Керечилериле Библияны ӱренип тура, бастыра бойыныҥ амулеттерин јоголтып салган болгон. Оныҥ кийнинде ол јакшы једимдер эдип, Иеговага бойыныҥ јӱрӱмин учурлап, сууга чӧҥӱрилип чыгарылган. Је сууга чӧҥӱрилип чыгарылган соондо, неделе ӧткӧн кийнинде кӧрмӧстӧр ойтоло амыр бербей бардылар: бу эр кижиге јаҥы бӱдӱмјизин таштазын деп ӱндер јакаргылап турды. Сени ле мындый неме болгон болзо, Иегова сени коорулабай турган деп бу темдектер бе? Јок андый эмес.
19 Иисус Христос бийик кеминдеги јӱрӱмдӱ ле Кудайдаҥ коорулу кижи де болгон болзо, ол калју тын јайаанныҥ — Эрлик Јелбистиҥ ӱнин уккан. Мындый учуралда нени эдерин Иисус кӧргӱзип берген. «Менеҥ туура тур эрлик!» — деп, ол Јелбиске айткан (Матфейдеҥ 4:3—10). Бу темди тузаланып, сен кӧрӱнбес тындардыҥ телекейинеҥ угулган ӱндерди укпас учурлу. Иегованы болушка кычырып, калју тындарга удура тур. Эйе, Кудайдыҥ адын адап, ӱнденип угуза мӱргӱ. Притчаларда 18:10-до: «Кайраканныҥ [«Иегованыҥ», ЈТ] ады — бекем шибее: чындык јӱрер кижи оныҥ ичине качып кирип, коркуры јок болот» — деп айдылат. Кот-д’Ивуаредеги христиан кижи мынайдала этти, оныҥ учун калју тындар оны амырына артыргызып салдылар (Псалом 123:8; 144:18).
20. Чынынча, калју тындарга сен канайып удура турар аргалу болор эдиҥ?
20 Иегова калју тындарды јӱрзин деп јараткан да болзо, ол анчадала бойыныҥ албатызына ла оныҥ ады бастыра јерле јарлаларына бойыныҥ ийдезин јетирет (Исход 9:16). Сен Иегованаҥ тудунып турган болзоҥ, сеге калју тындардаҥ коркубас керек (Числа 23:21, 23; Иаковтыҥ 4:7, 8; 2 Пётрдыҥ 2:9). Олордыҥ ийдези киреледилген. Олор Нойдыҥ кӱндеринде каруузына тургузылган болгон, теҥеринеҥ тӱжӱре сӱрдӱргени удабаган, эмди калганчы јаргыны сакыгылап јат (Иуданыҥ 6; Откровение 12:9; 20:1—3, 7—10, 14). Чынынча айтканда, олор келип јаткан јоголтышаҥ улам коркуп сертилдеегилейт (Иаковтыҥ 2:19). Оныҥ учун сени калју тындар кандый бир јемле тартып аларга, эмезе сеге кандый-кандый табарулар этсе, сен олорго удура турар аргалу (2 Коринфяндарга 2:11). Спиритизмниҥ кандый ла бӱдӱмин јеекте, Кудайдыҥ Сӧзиндеги јӧпти тузалан, Иегованыҥ јарадарын бедире. Мыны узакка артыргыспай ла эт, нениҥ учун дезе сен канайып калју тын ийделерге удура турарыҥнаҥ, сениҥ јӱрӱмиҥ камаанду!
БОЙЫҤНЫҤ БИЛГИРЛЕРИҤДИ ШИҤДЕП КӦР
Калју тындар улусты аскыртып саларына канайып ченешкилейт?
Нениҥ учун Библия спиритизмди јаратпай јаргылап јат?
Калју тын ийделердеҥ кижи канайып айрылар аргалу?
Нениҥ учун калју тындарга анаҥ аары удура турар керек?
[Ӱренериниҥ сурактары]
[110 бӱктеги јурук]
Спиритизмниҥ јӱзӱн-башка бӱдӱмдерине сен канайып кӧрӧдиҥ?
