Кудайга канайып јууктар
16-чы бажалык
Кудайга канайып јууктар
1. Кӧп кудайлык јаҥдар не ле тӱҥей?
БИР ӱй кижи Азияныҥ ороонына јоруктап јӱреле, будданыҥ ӧргӧӧзинде ӧткӱрилип јаткан кудайлык јаҥныҥ чӱм-јаҥдарын кӧрӧлӧ кайкаган болгон. Ондо Мария ла Христостыҥ сӱри јок то болгон болзо, кӧп чӱм-јаҥдар оныҥ серкпезин сӱреен тыҥ эске алындырып турды. Темдектезе, кудайга бӱдӱп турган улустар кол јинјилерин тоолоп ло бойлорыныҥ мӱргӱӱлдерин чӧйӧӧ айдып, кычыргылап тургандарын ол ӱй кижи ајаруга алды. Ӧскӧ улустар бого тӱҥей немелерди база ајарып темдектегилеген. Кӱнчыгышта ла Кӱнбадышта кудайга бӱдӱп турган улустар Кудайга јууктарга турганыла, эмезе бойыныҥ бажыраарына эткен немелерине јууктап турганыла сӱреен тӱҥей.
2. Мӱргӱӱл дегени ол не, нениҥ учун кӧп улустар мӱргӱгилеп јат?
2 Кӧп улустар Кудайга јууктарга анчадала мӱргӱӱл ажыра ого баштангылайт. Мӱргӱӱл дегени — «Кудайга, агару улустарга баштанганы» деп кӧбизинде оҥдолып јат («Эмдиги ӧйдиҥ орус литературалык тилиниҥ 17 томду сӧзлиги»). Је кезик улус эҥ ле озо Кудайдаҥ нени де аларга ого баштанып тургулайт. Темдектезе, канайып та бир эр кижи Иегованыҥ Керечилинеҥ: «Слер мен учун мӱргӱзер, мениҥ биледеги, иштеги ле су-кадыгымныҥ ончо уур-кӱчтери јоголор бо?» — деп сураган. Байла эр кижи бого иженген болор, је кӧп улустар мӱргӱгилеп јат, а уур-кӱчтери артат. Оныҥ учун мындый сурак чыгып келет: бистерге нениҥ учун Кудайга јууктар керек?
НЕНИҤ УЧУН КУДАЙГА ЈУУКТАР КЕРЕК
3. Бис бойыстыҥ мӱргӱӱлисти кемге баштандырар учурлу ла оноҥ кандый шылтактаҥ улам?
3 Мӱргӱӱл — учуры јок чӱм-јаҥ ла тегин ле Кудайдаҥ нени де алар эп-арга эмес. Бистиҥ Кудайга јууктарга турганыстыҥ бир тӧс шылтагы,— бу оныла јуук јаражып јӱрери. Оныҥ учун бис бойыстыҥ мӱргӱӱлисти Иегова Кудайга баштандырар учурлу. «Кайракан Оны кычырып тургандарга бастыразына јуук» — деп псаломкожоҥдоочы Давид бичиген (Псалом 144:18). Иегова оныла амыр-энчӱ таап аларын берет (Исаия 1:18). Бу шӱӱлтеге кару берип турган кижи псаломкожоҥдоочыныҥ: «Меге Кудайга јууктарга туза!» деген сӧстӧриле јӧп. Је нениҥ учун? Нениҥ учун дезе, Иегова Кудайга јууктап турган улус чындык ырыс ла кӱӱн-санаага амыр табып алгылар (Псалом 72:28).
4, 5. а) Нениҥ учун Кудайга мӱргӱӱри учурлу? б) Мӱргӱӱлдеҥ улам Кудайла бисте кандый колбулар болор?
4 ‘Кудай бистиҥ Оноҥ суранарыстаҥ озо, неге керексинип турганысты билер...’ болзо, бистерге нениҥ учун ого мӱргӱӱр керек? (Матфейдеҥ 6:8; Псалом 138:4). Бис Кудайга бӱдӱп турганысты ла Кудайды «кандый ла јакшы сыйлар ла кандый ла бийик кеминдеги сыйлардыҥ» Береечизи деп турганысты мӱргӱӱл керелеп јат (Иаковтыҥ 1:17; Еврейлерге 11:6). Иегова бистиҥ мӱргӱӱлдеристи сӱӱнчилӱ угуп јат (Притчалар 15:8). Качан балазы сӱӱп турган адазына быйанын айдып турза, ого канайып јакшы, анайып ла Кудайга акту јӱректеҥ айткан быйанды ла макты угарга јакшы болот (Псалом 118:108). Адазы ла уулыныҥ ортодо колбулар јакшы болзо, олордыҥ куучындары јӱректеҥ болор. Бала, оны сӱӱп турганын сезип турза, јаантайын адазыла куучындажарын бедирер. Анайдала ок бистиҥ Кудайла колбуларыс керегинде айдарга јараар. Бис Иегова керегинде билгенисти чыннаҥ ла баалап, оныҥ сӱӱжин сӱреен кичеп турзас, бойыстыҥ сезимдеристи мӱргӱӱлисте тыҥ айдынар кӱӱндӱ болорыс (1 Иоанныҥ 4:16—18).
5 Качан бис Бастыразынаҥ бийик Кудайга баштанып турзас, бис тоомјылу болор учурлу, је бистиҥ сӧстӧрис ондый чике болзын деп ӧйинеҥ ӧткӱре санааркабас керек (Еврейлерге 4:16). Бис Иеговага јаантайын мӱргӱӱр аргалу. Мӱргӱӱлде ‘Кудайдыҥ алдына бойыгардыҥ јӱрегерди ачып айдынары’ — бу кандый јаан артыгы! (Псалом 61:9). «Кудайдыҥ најызы» деп адалган чындык ишчи Авраамныҥ ла Кудайдыҥ ортозында јӱректеҥ јаражып јӱрер јуук колбулар болгон. Иеговага быйанду болгоны мындый ла најылашка јол ачат (Иаковтыҥ 2:23). Је Бастыра Телекейдиҥ Бийине мӱргӱӱлде баштанып тура, бис чокум некелтелерге келижип тураар учурлу.
КЕМ КУДАЙГА ЈУУКТАП ТУРГАН ОЛОРГО НЕКЕЛТЕЛЕР
6, 7. Кудай мӱргӱӱлдер учун акча некебей де турган болзо, олор аайынча ол бистеҥ нени сакыйт?
6 Кудайга баштанарга акча керек пе? Кӧп улус олор учун мӱргӱзин деп, абыстарга акча тӧлӧп јат. Керек дезе кезиктери, канча ла кире кӧп сыйды берзе, ончо ло кире олордыҥ мӱргӱӱли капшай угулар деп бӱткилеп јадылар. Је Кудайдыҥ Сӧзи Иеговага мӱргӱп баштанарга акча тӧлӧӧри керек деп айтпай јат. Мӱргӱӱл ажыра ич-кӧгӱстикке болужып, алкыштар берип турганы учун Ол бистеҥ нени де некебей јат (Исаия 55:1, 2).
7 Андый болордо не керектӱ болотон? Јӱрек чын кӧрӱмдӱ болгоны сӱреен учурлу (2 Паралипоменон 6:29, 30; (Притчалар 15:11). Иегова Кудай ‘мӱргӱӱлдерди угуп турган’ ла «бедиреп тургандарга берет» деп, бис бастыра јӱрегисле бӱдер учурлу (Псалом 64:3; Еврейлерге 11:6). Анайда ок бис јобош болор учурлу (4 Царств 22:19; Псалом 50:19). Иисус Христос бир укаа сӧстӧ калан јууйтан кижи Кудайга јобош баштанып мӱргӱӱгени, бийиркек фарисейдеҥ чындык болгонын кӧргӱсти (Луканаҥ 18:10—14). Кудайга мӱргӱп тура, «Кудайдыҥ алдына кандый ла бийиркек јӱректӱ кижи јескинчилӱ» деп бис ундыбас учурлу (Притчалар 16:5).
8. Кудай бистиҥ мӱргӱӱлиске кару берзин деп кӱӱнзеп турган болзос, бис недеҥ аруталар учурлу?
8 Кудай бистиҥ мӱргӱӱлиске кару берзин деген кӱӱндӱ болзос, эдип турган кинчектӱ керектерди бистерге артыргызар керек. Качан Иаков деп ӱренчик ӧскӧ улусты Кудайга јууктазын деп оморкодып турарда, «Кинчек эткендер, колдорорды арутагар, эки јӱстӱлер, јӱректерерди тӱзедигер» — деп ол кошкон (Иаковтыҥ 4:8). Керек дезе, кинчектӱ улустар кородоп, бойыныҥ болгон јаман јӱрӱмин артыргызып салза, олор Иеговала јакшы колбуларды таап алар аргалу (Притчалар 28:13). Бис бойыстыҥ керектеристи јӱк ле тӱзедеечи болуп турзас, Иегованыҥ ајарузына иженер аргабыс јок. «Кайраканныҥ кӧстӧри чындык кижиге ле Оныҥ кулактары олордыҥ мӱргӱӱлине ајарып јат, је Кайраканныҥ чырайы јаман керектер эдип тургандарга удура» — деп, Кудайдыҥ Сӧзинде айдылат (1 Пётрдыҥ 3:12).
9. Бис Иеговага кем ажыра баштанар учурлу ла нениҥ учун?
9 «Јердиҥ ӱстинде јакшыны эдип тура, кинчек этпей турган чындык кижи јок» — деп Библия јетирет (Екклесиаст 7:20). Оныҥ учун, Иегова Кудайга канайып баштанатан деп сен сурап турган болорыҥ? «Кем де кинчек эткен болзо, Адагыстыҥ алдына Сураар Чындык кижи Иисус Христос бисте бар» — деп, Библия кару берет (1 Иоанныҥ 2:1). Бис кинчектӱ де болзос, бистер учун божогон Иисус Христос ажыра бис Кудайга јайым баштанар аргалу (Матфейдеҥ 20:28). Бис Иегова Кудайга јаҥыс ла Иисус ажыра баштанар аргалу (Иоаннаҥ 14:6). Бис ӧнӧтийин кинчек эдип, Иисустыҥ актап алатан тайылгазына јеҥил санаала кӧрбӧс учурлу (Еврейлерге 10:26). Бис бастыра кӱчисле јаман керектер этпеске албаданып туруп, је кезикте тӱҥейле кинчек эдип ийедис, бис тыҥ кородоп ло Кудайды јаманысты таштазын деп јайнап сураар аргалу. Бис ого јобош баштанып турзас, ол бисти угар (Луканаҥ 11:4).
КУДАЙГА КАЧАН БАШТАНАРГА ЈАРААР
10. Качан бис мӱргӱп турзас Иисуска канайып тӱҥейлежер аргалу ла кандый учуралда Кудайга бойыныҥ алдынаҥ мӱргӱӱри јараар?
10 Иисус бойыныҥ Иеговала колбуларын сӱреен бийик баалаган. Ол бойыныҥ мӱргӱӱлинде Кудайла куучындажарга аҥылу ӧй келиштирип туратан (Марктаҥ 1:35; Луканаҥ 22:40—46). Бис Иисустаҥ тем алып, јаантайын ла Кудайга мӱргӱп турзас јакшы (Римляндарга 12:12). Башталып јаткан кӱнди мӱргӱӱлле баштаары јакшы, анайда ок уйуктар алдында Иеговага јӱрӱп койгон кӱн учун алкыш-быйанды айдып салары чын болор эди. Тӱште «кандый ла ӧйдӧ» Кудайга баштанарга кичеен (Ефесяндарга 6:18). Иегова бистерди тӱҥейле угуп турганын билип, бойында да мӱргӱӱрге јараар. Кудайга бойыстыҥ алдыстаҥ баштанганыс, оныла колбуларысты тыҥыдар, анайып ла ок Иеговага кажы ла кӱн мӱргӱп турары бистерге ого оноҥ јуук болорго болужар.
11. а) Нениҥ учун бастыра билеле мӱргӱӱр керек? б) Мӱргӱӱлдиҥ кийнинде «аминь» деген сӧс нени темдектейт?
11 Анайда ок Иегова бӧлӱк улус учун айткан мӱргӱӱлди угуп јат (3 Царств 8:22—53). Бис бастыра билеле Кудайга баштанар аргалу, је мындый учуралда мӱргӱӱлди билениҥ башчызы айдып јат. Бу билелик колбууны тыҥыдып јат, анайда ок балдар ада-энелериниҥ Кудайга јобош мӱргӱп турганын угуп турза, Иегова чын ла бар деп олор оҥдоп јат. Кем-кем бӧлӱк улус учун мӱргӱӱлде баштанып јатса, темдектезе Иегованыҥ Керечилериниҥ јуунында, ондо канайдар керек? Бис туштажуда болгон болзос, мӱргӱӱлди јазап угуп алактар, оноҥ учында бастыра јӱрегистеҥ «аминь» деп айдактар, бу «андый болзын» дегенин темдектеп јат (1 Коринфяндарга 14:16).
ИЕГОВА УГУП ТУРГАН МӰРГӰӰЛДЕР
12. а) Нениҥ учун Кудай кезик мӱргӱӱлдерге кару бербей турган? б) Нениҥ учун мӱргӱӱлдерде бис јаҥыс ла бойыс керегинде сананбас учурлу?
12 Кезик улус Кудайга Христос ажыра мӱргӱп турган да болзо, олордыҥ мӱргӱӱлине Иегова кару бербей турган деп билдирилет. «Качан Оныҥ кӱӱн-табыла немени сурап турзас, Ол бисти угуп јат» — деп, апостол Иоанн айткан (1 Иоанныҥ 5:14). Анайдарда, Кудайдыҥ кӱӱн-табына не келижип турган, ол керегинде бис сураар учурлу. Ол бистиҥ ич-кӧгӱстигис јакшы болзын деп јилбиркеп турган учун, бу мыныла не колбулу болгоны керегинде мӱргӱгени јакшы. Бис јаҥыс ла эди-каныстыҥ керексиништери керегинде сананарыла тартыжар учурлу. Темдектезе, ооруп турган ӧйдӧ турумкай ла сагышту болоры керегинде мӱргӱӱри чын да болзо, је су-кадыгы керегинде санааркары, ич-кӧгӱстиктиҥ јилбӱлеерин бӧктӧбӧс учурлу (Псалом 40:2—4). Бир христиан ӱй кижи бойыныҥ су-кадыгына ӧйинеҥ ӧткӱре санаркап турганын билип ийеле, бойыныҥ ооруларына чын кӧрӧри керегинде ол Иегованаҥ суранган. Учы-тӱбинде су-кадыгыла колбулу уур-кӱчтер оны тыҥ санаркатпай барган, оноҥ ол «ийдени артыгынча» алганын сести (2 Коринфяндарга 4:7). Ол ӱй кижи ӧскӧ улуска ич-кӧгӱсле болужарга оноҥ кӧп кӱӱнзей береле, оныҥ учун Каандыктыҥ текши јарлаар ишчизи болды.
13. Матфейде 6:9—13-те кӧргӱзилген аайынча, не керегиинде мӱргӱӱрге јараар?
13 Мӱргӱӱлдер Иеговага јарап турзын деп, олорго нени кожорго јараар? Иисус Христос бойыныҥ ӱренчиктерин мӱргӱӱрине ӱредип салган. Матфейде 6:9-таҥ ала 13-ке јетире бичилген кӧргӱзӱ мӱргӱӱлде ол не керегинде мӱргӱӱрге јараарын бириктирип салган. Бистиҥ мӱргӱӱлдеристе тӧс ајаруны неге эдер керек? Элдеҥ озо — Кудайдыҥ Иегова адына ла оныҥ Каандыгына. Анайда ок сӱрекей керектӱ немелер керегинде сураары база чын болор эди. Анайда ок, кинчектеристиҥ јамананын таштаары керегинде ле ченелтелердеҥ кыйарын ла тӧгӱнчинеҥ — Эрлик Јелбистеҥ коруланары керегинде мӱргӱӱри учурлу. Бис бу мӱргӱӱлди оныҥ учуры керегинде сананбай кожоҥдогон кептӱ, эмезе такып-такып ээчий айдып турактар деп Иисус кӱӱнзебеген (Матфейдеҥ 6:7). Балазы адазыла куучындажарда јаантайын ла бир тӱҥей сӧстӧр айдып турган болзо, бу кандый колбулар болотон?
14. Суранарынаҥ башка бис бойыстыҥ мӱргӱӱлдеристе нени айдар аргалу?
14 Мӱргӱӱлисте јайну ла јӱректеҥ суранарынаҥ башка, бис Кудайга бойыстыҥ быйанысты ла макты айдар учурлу (Псалом 33:2; 91:2; 1 Фессалоникийецтерге 5:18). Бис ӧскӧ улустар учун база мӱргӱӱр аргалу. Бистиҥ кожо Кудайга бӱдӱп турган карындаштарыс тӱбекке тӱшкен эмезе истежӱге табарткан болзо, олор учун мӱргӱзес бу олор керегинде кичеенип турганысты кӧргӱзет, оноҥ бу Иеговага јарап јат (Луканаҥ 22:32; Иоаннаҥ 17:20; 1 Фессалоникийецтерге 5:25). Бу мынаҥ улам «Не де учун санаркабагар, је јаантайын мӱргӱӱлерде ле суранганарда Кудайдыҥ алдына бойыгардыҥ кӱӱнигерди быйанду ачыгар, кижиниҥ кандый ла сагыжынаҥ бийик Кудайдыҥ амыр-энчӱзи, бистиҥ јӱректеристи ле бистиҥ санааларысты Иисус Христосло корулап турзын» — деп, апостол Павел бичиген (Филиппийецтерге 4:6, 7).
МӰРГӰӰЛДЕ ТУРУМКАЙ БОЛ
15. Бистердиҥ мӱргӱӱлдерис кару јок артып турган деп бодоп турзас, нени ундыбас керек?
15 Сен Кудай керегинде билгирди алып та турган болзоҥ, сениҥ мӱргӱӱлдериҥ кару јок артып турган деп кезикте сен сезер аргалу. Мындый болордоҥ айабас, нениҥ учун дезе кандый да аҥылу мӱргӱӱлге Кудайдыҥ кару берер ӧйи келбеген (Екклесиаст 3:1—9). Ончо неме ол ло бойы артсын деп Иегова канча да кире ӧйгӧ јарадар аргалу, је чынынча ол мӱргӱӱлдерге каруны берип, мыны качан эдерин артык билип јат (2 Коринфяндарга 12:7—9).
16. Нениҥ учун бис мӱргӱӱлде болор учурлу ла бу Кудайла јаражып јӱрерине канайып салтарын јетирип јат?
16 Кудайга айдып турганыс биске јаан учурлу болуп турганын бис турумкай мӱргӱп кӧргӱзедис (Луканаҥ 18:1—8). Темдектезе, бис кандый бир уйанысты ӧдӱп чыгарга Кудайдаҥ болуш сурар аргалу. Бис бу керегинде мӱргӱӱрин улалтып, бойыстыҥ суранганыс аайынча эдип тура, канча кире ак-чек болуп турганысты кӧргӱзедис. Бойыстыҥ сурагыста бис ачык ла чокум болор учурлу. Анчадала бис ченелтелерге тӱжӱп турзас, тыҥ мӱргӱӱри учурлу (Матфейдеҥ 6:13). Мӱргӱп, оноҥ бойыстыҥ кинчектӱ кӱӱнисти шиҥжӱлеп тура, Иегова биске канайып болужып турганын бис кӧрӱп ийерис. Бу бистиҥ бӱдӱмјибисти ле Кудайла колбуларысты тыҥыдар (1 Коринфяндарга 10:13; Филиппийецтерге 4:13).
17. Мӱргӱӱлдӱ санаа Кудайга иштеерине канайып салтарын јетирет?
17 Иегова Кудайга агару иштеерге, мӱргӱӱлдӱ санааны тазыктырып тура, бу иш бистиҥ кӱчисле болбой турганын бис оҥдоп аларыс. Ол јаҥыс ла Иегованыҥ болужыла болор аргалу (1 Коринфяндарга 4:7). Бис мыны оҥдоп турган болзос јобош болорыс, анайып Кудайла колбуларысты тыҥыдып аларыс (1 Пётрдыҥ 5:5, 6). Мӱргӱӱлде турумкай болорына бисте бастыра тӧзӧлгӧлӧр бары чын. Бистиҥ ак-чек мӱргӱӱлдерис, анайда ок теҥеридеги сӱӱп турган Адабыска канайып јууктары керегинде баа јок бистиҥ билгирис, бисти чыннаҥ ла ырысту эдип салар.
ИЕГОВАЛА КУУЧЫНДАЖАРЫ БИР ЈАНДУ ЭМЕС
18. Бис Кудайды канайып угар аргалу?
18 Бистиҥ мӱргӱӱлисти Кудай угуп турзын деп кӱӱнзеп турган болзос, бис ого уккур болор учурлу (Захария 7:13). Ол бойыныҥ ийде-кӱчиле оморкоткон судурчылар ажыра улустарла база куучындашпай јат, оноҥ мыны эдерге спиритизмле тузаланбай турганы алаҥзу јоктоҥ јарт (Второзаконие 18:10—12). Је качан бис оныҥ Сӧзин, Библияны, ӱренип турзас Кудайды угуп турар аргалу (Римляндарга 15:4; 2 Тимофейге 3:16, 17). Канайып бис јакшы су-кадык курсак-тамакка кӱӱнисти тыҥыдадыс, онойып ла бис «ару сӧстиҥ сӱдин» сӱӱр учурлу. Кудайдыҥ Сӧзин кӱнӱҥле кычырып тура, ич-кӧгӱстик курсакка кӱӱниҥди тыҥыдып тур (1 Пётрдыҥ 2:2, 3; Деяниелер 17:11).
19. Библиянаҥ кычырып алганды шӱӱп сананары нениҥ учун тузалу?
19 Библиянаҥ кычырып алганыҥа шӱӱп сананып тур (Псалом 1:1—3; 76:12, 13). Кычырып алганыҥныҥ учурын аайлап оҥдоп кичеен. Бу — курсак-тамак шиҥип эт-канга таркаарыла тӱҥей. Сен кычырып алган ич-кӧгӱстик курсагыҥды озо билип алганыҥ ла колбоп, шиҥдиртип тур. Берилген материалды јӱрӱмиҥе канайып тузаланарга јараарына эмезе ондо Иегованыҥ кебеделдери ле оныҥ керектериниҥ бӱдӱмдери керегинде не айдылганына шӱӱп сананып тур. Мынайда таҥынаҥ ӱреништиҥ болужыла, Иегованыҥ берип турган ич-кӧгӱстик курсакты сен аайлап турар аргалу болорыҥ. Бу сени Кудайга јууктадар, оноҥ кӱнӱҥ ле туштап турган уур-кӱчтердиҥ аайы-бажына чыгарга чыннаҥ ла болужар.
20. Христиан јуундардыҥ туштажуларына барып турганыс, бисти Кудайла канайып јуукташтырып јат?
20 Качан Израиль албаты Кудайдыҥ Јасагын бастыра албатыга текши кычырарга јуулып турарда, олор лаптап угар болгон, анайда ок качан Кудайдыҥ Сӧзи христиан туштажу јуундарда шӱӱжилип турза, сен лаптап угуп тура, ого јууктар аргалу. Албаты кычырганын оҥдоп, мыны јӱрӱмге тузаланзын деп, олордыҥ ӱредӱчилери Јасакты јартагылап туратан. Мынайда шӱӱжип турганы улу сӱӱнчиле ээчий улалып туратан (Неемия 8:8, 12). Анайдарда, Иегованыҥ Керечилериниҥ јууныныҥ туштажуларына јаантайын барып турарына кичеен (Еврейлерге 10:24, 25). Бу Кудай керегинде билгирге јединерге, анайда ок олорды јӱрӱмге тузаланарына болужып, сеге ырыс экелер. Бастырателекейлик христиан карындаштык сеге Иеговала јуук јаражып јӱрерине артарга болужар. Је Кудайдыҥ албатызыныҥ ортозында ижемјилӱ коруланар јерди канайып сен табып аларыҥды бис келер бажалыкта кӧрӧрис.
БОЙЫҤНЫҤ БИЛГИРЛЕРИҤДИ ШИҤДЕП КӦР
Нениҥ учун сеге Иеговага јууктар керек?
Кудайга јууктарга не керектӱ?
Сен бойыҥныҥ мӱргӱӱлдериҥе нени айдар аргалу?
Нениҥ учун мӱргӱӱлде турумкай болор керек?
Иегованы бӱгӱн канайып угарга јараар?
[Ӱренериниҥ сурактары]
[Бӱдӱн 157 бӱкке берилген јурук]
