Кудайга ӱргӱлјиге иштеерим деп амаду тургузып ал
18-чи бажалык
Кудайга ӱргӱлјиге иштеерим деп амаду тургузып ал
1, 2. Кижи Кудай керегинде билгирлерлӱ болгон кийнинде, база не керектӱ?
БЕКТӰ эжиктиҥ алдына сен турадыҥ, је оныҥ ары јанында ума јок кӧп акча-јӧӧжӧ кичеелип јаткан деп сананып ал. Та кем де сен оноҥ нени аларга тургаҥ ал деп јарадып, сеге тӱлкӱӱр берген болзын. Бу тӱлкӱӱрле тузаланбаганчаҥ сеге ол нени де бербес. Анайдала ок билгирлер керегинде айдарга јараар, олорло тузаланар керек, ол тушта олордыҥ баазын сен оҥдоорыҥ.
2 Бу анчадала Кудай керегинде билгирлерге келижип јат. Иегова Кудай ла Иисус Христос керегинде билгирлер ӱргӱлји јӱрӱмге апарып јаткан ине (Иоаннаҥ 17:3). Је бу ижемји чыннаҥ болзын деп, јаҥыс ла билгирлӱ болгоны ас. Сен канайып баалу тӱлкӱӱрле тузаланар эдиҥ, онойдо ло Кудай керегинде билгирди сеге бойыҥныҥ јӱрӱмиҥде тузаланар керек. Кудайдыҥ кӱӱн-табын бӱдӱрип турган кижи «Каандыкка кирер» деп Иисус айткан. Мындый кижиде Кудайга ӱргӱлјиге иштеер аҥылу арга болор! (Матфейдеҥ 7:21; 1 Иоанныҥ 2:17).
3. Кудайдыҥ кӱӱн-табы ла болзо, ол бистеҥ нени некейт?
3 Кудайдыҥ кӱӱн-табы недеҥ турганын билип алган соондо, оны бӱдӱрери учурлу. Је сениҥ санааҥла болзо, Кудайдыҥ кӱӱн-табы сенеҥ нени некейт? Оны эки сӧслӧ — Иисуска тӱҥейлежери — деп айдарга јараар. 1 Пётрдыҥ 2:21-де: «Слер ого кычырылганар; нениҥ учун дезе бисти Христостыҥ изиле барзын деп, Ол бистерге тем артыргызып, бистер учун шыралаган» дегенин бистер кычырадыс. Анайдарда, Кудайдыҥ кӱӱн-табын бӱдӱрерге, сеге Иисустыҥ темине канча ла кире артык тӱҥейлежер керек. Мынайда сен Кудай керегинде билгирди тузаланар аргалу.
ИИСУС КУДАЙ КЕРЕГИНДЕ БИЛГИРЛЕРИЛЕ КАНАЙЫП ТУЗАЛАНГАН
4. Нениҥ учун Иисус Иегова керегинде андый кӧп билер, ол бойыныҥ билгирлериле канайып тузаланган?
4 Иисус Христос Кудайды ӧскӧлӧрине кӧрӧ канча катапка артык билер. Јерге келердеҥ озо, ол теҥериде узаак ӧйдиҥ туркунына Иегова Кудайла кожо иштенип, јӱрген (Колоссяндарга 1:15, 16). Ончо бу билгирлериле Иисус нени эткен? Ол бу билгирлерлӱ болгоны ла јеткилзинбеген. Иисус бу билгирлерди јӱрӱмде тузаланган. Бот нениҥ учун ол улусла сӱӱштӱ, јалакай ла чыдамкай болгон. Бу јанынаҥ Иисус теҥеридеги Адазын ӧткӧнип, Иегова керегинде билгирлериле, оныҥ јолдорыла ол башкарынган (Иоаннаҥ 8:23, 28, 29, 38; 1 Иоанныҥ 4:8).
5. Нениҥ учун Иисус чӧҥӱрилип чыгарылган, оноҥ ол бойыныҥ чӧҥӱрилген учуры аайынча канайып јӱрген?
5 Анайда ок билгирлер Иисусты тӧс учурлу алтам эдерге кӱӱнзеткен. Анайда ол Галилей јеринеҥ Иорданга келерде, оны Иоанн сууга чӧҥӱрип чыгарды (Матфейдеҥ 3:13—15). Иисустыҥ сууга чоҥӱрилип чыгарылганы нени темдектеп јат? Иисус еврей болгон — ол Кудайга учурлап салган албатыныҥ ортозына туулган. Анайдарда, Иисус туулганынаҥ ла ала Кудайга учурлалып салган болыптыр (Исход 19:5, 6). Сууга чӧҥӱрилип чыгарылала, ол тушта ого Кудайдыҥ кӱӱн-табы кандый болгонын бӱдӱрерге Иеговага бойын беринген (Еврейлерге 10:5, 7). Эйе, Иисус сууга чӧҥӱрилип чыгарылганына келиштире јӱрген. Ол Иеговага иштеерине бастыра ийде-кӱчин берип, кажы ла келишкен учуралда Кудай керегинде билгирлерин улуска куучындаган. Кудайдыҥ кӱӱн-табын бӱдӱрип тура, Иисус сӱӱнип туратан, керек дезе ого бу курсакка тӱҥей деп ол айткан (Иоаннаҥ 4:34).
6. Канайып Иисус «бойын јектеп салган»?
6 Иегованыҥ кӱӱн-табын бӱдӱрерге кандый баалу келижерин, керек дезе ол оныҥ јӱрӱминиҥ баазы да болорын, Иисус сӱреен јакшы оҥдоп турган болгон. Андый да болзо Иисус бойыныҥ јилбӱлерин экинчи јерге тургузып «бойын јеектеди». Кудайдыҥ кӱӱн-табы ого јаантайын баштапкы јерде болгон. Иисустыҥ бийик кеминдеги темиле биске канайып барар керек?
ӰРГӰЛЈИ ЈӰРӰМГЕ АПАРЫП ТУРГАН АЛТАМДАР
7. Чӧҥӱрилип чыгарыларынаҥ озо кандый кезик алтамдар бар?
7 Иисуска кӧрӧ бис бийик кеминде эмезис, анайдарда јаҥыс ла мындый учурлу алтамдар эткен соҥында сууга чӧҥӱрилип чыгарына келерге јараар. Озо ло баштап Иегова Кудай ла Иисус Христос керегинде билгирлерди бастыра јӱрегисле алынар керек. Бу бисти Кудайга тереҥ сӱӱш сезинерине ле бӱдӱмји кӧргӱзерине оморкодып кӱӱнзедер (Матфейдеҥ 22:37—40; Римляндарга 10:17; Еврейлерге 11:6). Кудайдыҥ јасактарына, принциптерине ле ээжилерине уккур болоры, бисти јаманысты таштаарына ла ӧткӧн кинчектерис керегинде Кудайга јараар эдип кородоп турганыска экелер учурлу. Бу Кудай керегинде билип алганыстаҥ озо кандый ла јастыра эткен керектеристеҥ айрылып, солунарына апарат (Деяниелер 3:19). Анайткажын, бистер чындык эдериниҥ ордына јажытту кандый бир кинчекти анаҥ ла ары улалтып турзас, бис лаптап тӱзедилбегенис, Кудайды бис тӧгӱндеп болбозыс јарт. Иегова улустардыҥ кандый ла эки јӱстенип турганын кӧрӱп јат (Луканаҥ 12:2, 3).
8. Сенде Каандык керегинде јарлап куучындар иште туружар кӱӱн бар болзо, нени эдер керек?
8 Бир канча ӧйгӧ сен Кудай керегинде билгирди алып јадыҥ, бойыҥныҥ ич-кӧгӱстик амадуларыҥ керегинде тереҥ сананар ӧй келбеди бе? Сен нени билип алганыҥды тӧрӧӧндӧриҥе, најыларыҥа ла ӧскӧ дӧ улустарга куучындарга байла чыдажып болбой турган болорыҥ. Иисус аргалу болордо јакшылыкту јетирӱ керегинде канайып куучындап турган болгон, анайып ла сен де эдип турган болорыҥ (Луканаҥ 10:38, 39; Иоаннаҥ 4:6—15). Эмди сен мынаҥ да кӧп эдер кӱӱндӱ болорынаҥ маат јок. Иегованыҥ Керечилериле ӱзӱк јок јакшылыкту јетирӱ јарлаар ишке сени белен бе деп кӧрӱп оҥдоорго, христиан аксагалдар акту кӱӱнинеҥ сениле куучындашкылаар. Белен болзоҥ, аксагалдар сени Керечилердеҥ кемле-кемле кожо ишке барарга јараар деп кичеенер. Иисустыҥ ӱренчиктери оныҥ јакаруларын бӱдӱргилеп, бойлорыныҥ ижин эптӱ-јӧптӱ эткилеген (Марктаҥ 6:7, 30; Луканаҥ 10:1). Качан сен Каандык керегинде јетирӱни айылдар сайын эмезе ӧскӧ кандый да эп-аргала куучындап, јарлаар болзоҥ, сеге мындый болуш тузалу болор (Деяниелер 20:20, 21).
9. Кижи Кудайга канайып учурлап беринет ле, оныҥ јӱрӱмине берингени канайып салтарын јетирип јат?
9 Јакшылыкту јетирӱни јуунныҥ јерлериндеги бастыра улустарга куучындап јарлаары — бу ак-чек јӱректӱ улустарды табар эп-сӱме, анайда ок бойыныҥ бӱдӱмјизин кӧргӱзер арга (Деяниелер 10:34, 35; Иаковтыҥ 2:17, 18, 26). Ӱзӱк јок христиан туштажуларга келип турганы ла јарлап јӱрерине оҥдоп туружары — сен јастыраларыҥды оҥдоп, кородоп, солунганыҥды, анайда ок эмди Кудай керегинде билгирлериҥ аайынча јӱрерге шӱӱп алганыҥды кӧргӱзер. Ээчий барар чын чике алтам кандый? Иегова Кудайга учурлап беринери. Бу дезе бастыра јӱрегиҥнеҥ бойыҥныҥ јӱрӱмиҥди Кудайга берип јатканыҥды ла оныҥ кӱӱн-табын бӱдӱрерге кӱӱнзеп турганыҥды акту јӱректеҥ мӱргӱӱлде айдарын темдектеп јат. Мынайда Иегова Кудайга учурлап беринерге ле Иисус Христостыҥ јакшы тӧҥӧзин (иго) аларга јараар (Матфейдеҥ 11:29, 30).
ЧӦҤӰРИЛИП ЧЫГАРЫЛАРЫ — ОЛ СЕГЕ НЕНИ ТЕМДЕКТЕП ЈАТ
10. Нениҥ учун Иеговага учурлап берингенниҥ кийнинде чӧҥӱрилип чыгарылар керек?
10 Иисустыҥ бастыра ӱренчиктери чӧҥӱрилип чыгарылар учурлу деп ол айткан (Матфейдеҥ 28:19, 20). Сен Кудайга учурлап беринген кийнинде бу нениҥ учун керектӱ? Сен Иеговага бойыҥды учурлап берингеҥ учун, сен оны сӱӱп тургаҥ деп ол билер. Је сениҥ Кудайды сӱӱп турганыҥ керегинде ӧскӧ дӧ улустар билзин деп, сен алаҥзу јок кӱӱнзеп турган болорыҥ. Бойыҥныҥ Иегова Кудайга учурлап берингениҥ керегинде бастыразына угузып ийер арганы чӧҥӱрилип чыгарылары берип јат (Римляндарга 10:9, 10).
11. Чӧҥӱрилип чыгарылары нени темдектеп јат?
11 Чӧҥӱрилип чыгарылары сӱр темдектӱ учурла толо. Качан сени чӧҥӱрзе эмезе темдектеп айтса, сууныҥ алдында «јууза», сен ӧткӧн јӱрӱмиҥе ӧлӱп калгандый болуп јадыҥ. Качан сен суунаҥ чыгып келзеҥ, сен бойыҥныҥ кӱӱн-табыныҥа эмес, а Кудайдыҥ кӱӱн-табына багынып, јаҥы јӱрӱмге киргендий болодыҥ. Анайткажын, сен база јастыралар этпезиҥ деп бу темдектебей јат, нениҥ учун дезе бис ончобыс бийик кемине эмезис ле кӱнӱҥ ле јастырадыс. Је учурлап беринген ле чӧҥӱрилген Иегованыҥ ишчизи болуп, сен оныла аҥылу јаражып јӱрерин аларыҥ. Иегова сениҥ тузелгениҥди ле јобош чӧҥӱрилгениҥди кӧрӱп, Иисустыҥ актап алар тайылгазына тӧзӧлӧнип, сениҥ кинчектериҥниҥ јаманын таштаарга белен. Анайдарда, чӧҥӱрилип чыгарылары Кудайдыҥ алдына ару уйат берип јат (1 Пётрдыҥ 3:21).
12. а) «Адазыныҥ адына»? б) «Уулыныҥ адына...»? в) «Агару Тынныҥ адына...»? чӧҥӱрилип чыгарылары не дегени?
12 Иисус бойыныҥ ӱренчиктерине «Адазыныҥ, Уулыныҥ ла Агару Тынныҥ адына» јаҥы ӱренчиктерди сууга чӧҥӱрип чыгарзын (крестить) деп јакарган (Матфейдеҥ 28:19). Иисус нени айдарга сананган? «Адазыныҥ адына» чӧҥӱрилип чыгарылары — чӧҥӱрилип јаткан кижи бастыра јӱрегиле Иегова Кудайды Јайаачы ла Телекейдиҥ текши јаҥду Бийи деп, јарадып турганын кӧргӱзип јат (Псалом 35:10; 82:19; Екклесиаст 12:1). «Иисустыҥ адына...» чӧҥӱрилип чыгарылганы — Иисус Христосты — анчадала оныҥ актап алар тайылгазын — Кудайдыҥ берген сок јаҥыс аргаданар эп-аргазы деп јӧпсинип турганын темдектеп јат (Деяниелер 4:12). «Агару Тынныҥ адына...» чӧҥӱрилип чыгарылганы — ол, Иегованыҥ тыныла, эмезе оныҥ иштеп турар ийдезиниҥ болужыла Кудай бойыныҥ амадуларын бӱдӱрип, оныҥ тыныла башкарылып турган биригӱ организациязыла кожо чындык кӱӱн-табын бӱдӱрерге турган ишчилерин бойыныҥ ийдезиле јеткилдеп турган эп-арга деп, чӧҥӱрилетен кижи јарадып турганын темдектеп јат (Бытие 1:2; Псалом 103:30; Иоаннаҥ 14:26; 2 Пётрдыҥ 1:21).
ЧӦҤӰРИЛИП ЧЫГАРЫЛАРГА СЕН БЕЛЕН БЕ?
13, 14. Качан Иегова Кудайга иштеерин талдап алзас, нениҥ учун бис коркыбас учурлу?
13 Чӧҥӱрилип чыгарылары ондый јаан учурлу ла кижиниҥ јӱрӱмине баратан јолында эҥ учурлузын темдектеп турган болзо, оноҥ јалтанар керек пе? Јок эмей база! Чӧҥӱрилип чыгарылар тӱп-шӱӱлтени сананбай эдерге јарабас та болзо,— бу алаҥзу јогынаҥ, сениҥ эҥ ле ойгор тӱп-шӱӱлтеҥ.
14 Чӧҥӱрилип чыгарылары — сениҥ Иегова Кудайга иштеерге талдап алганыҥ керегинде керелеп јат. Сен ончо таныш улустарыҥ керегинде сананып ийзеҥ. Олордыҥ кажызы ла бойлорыныҥ «ээзине» канайып та болзо иштебей јат па? Кезиктери акча-јӧжӧӧгӧ иштегилеп јат (Матфейдеҥ 6:24). Кезиктери једимдӱ болорго албадангылайт, эмезе јӱк ле бойлоры керегинде санааркагылап јат, анайтканда бойлорыныҥ кӱӱнин бӱдӱрери олорго ӧлӱм ле јӱрӱмниҥ сурагы боло берет. Ӱчинчи бӧлӱк улустар тӧгӱн кудайларга иштегилейт. Је сен чындык Кудайга — Иеговага — иштеерге артыксынгаҥ ине. Мындый кӧп сӱӱшти ле быйанзак ла килеҥкей болорын кем де јетирбей јат. Кудай улустарды амадулу керектерле бийик санаалу эдип, олорды аргаданарына апарып јат. Ол бойыныҥ ишчилерин ӱргӱлји јӱрӱмле кайралдайт. Чын, Иисустаҥ тем алып, Иеговага бойыстыҥ јӱрӱмисти учурлап беринеринде јалтангадый неме јок. Чынынча, бу Кудайга јараар чике учурлу сок јаҥыс неме (3 Царств 18:21).
15. Чӧҥӱрилип чыгарына кандый буудактар болот?
15 Андый да болзо, чӧҥӱрилип чыгарыларына сени кем де ийде салбас учурлу. Бу јаҥыс ла сен ле Иегова ортодогы керек (Галаттарга 6:4). Сен ич-кӧгӱстик једимдерге јеткен болзоҥ, чӧҥӱрилип чыгарыларына не буудак эдип турган деп, сен байла сананып турган болорыҥ (Деяниелер 8:35, 36). Сен бойыҥды сурар аргалу: тӧрӧӧндӧримниҥ удурлаштары мени токтодып турган ба? Библияныҥ кӧрӱмиле болзо мен јастыра немеле эмдиге ле колбулу ба, кандый бир кинчек эдип тургам ба? Айса болзо, мен эл-јон нени айдарынаҥ коркып тургам? Мында сананып кӧрӧтӧни бар, је бастыра немени јазап шӱӱп кемјип кӧрӧри јакшы болор эди.
16. Иеговага иштегени сеге кандый туза экелер?
16 Иеговага иштеер артыкту арганы ајаруга албай, јылыйткан не-немелерди кемјиири — сагышту эмес. Тем эдип биле келтейинеҥ удурлаштарды алактар. Иисустыҥ ӱренчиктери, оныҥ кийнинеҥ барып јатканынаҥ улам, тӧрӧӧндӧрин јылыйтып салар да болзо, олор оноҥ јаан ич-кӧгӱстик (духовный) билени таап алар деп Иисус айткан (Марктаҥ 10:29, 30). Кожо бӱдӱп тургандар сеге карындаштык сӱӱшти јетирип, истежӱлерди чыдажарга болужып, јӱрӱмге баратан јолго сеге јӧмӧшкилер (1 Пётрдыҥ 5:9). Анчадала уур-кӱчтердиҥ ле оноҥ до ӧскӧ буудактардыҥ аайы-бажына чыгарга сеге јуунныҥ аксагалдары болужар (Иаковтыҥ 5:14—16). Бу эл-јонныҥ санаазын алар болзос сен бойыҥды сурап кӧр: мениҥ талдап алган јолым Телекейдиҥ Јайаачызына сӱӱнчи экелип, ол мени јарадып турганыла не тӱҥейлежер аргалу? (Притчалар 27:11).
УЧУРЛАП БЕРИНГЕНИ ЛЕ ЧӦҤӰРИЛИП ЧЫГАРЫЛАРЫ ААЙЫНЧА КАНАЙЫП ЈӰРЕР
17. Нениҥ учун чӧҥӱрилип чыгарылары учы эмес, а башталганы деп сананар керек?
17 Чӧҥӱрилип чыгарылары — бу сениҥ ич-кӧгӱстик ӧзӱмиҥниҥ учы эмес деп ундыбазы учурлу. Бу Кудайдыҥ јарадылган ишчизи ле Иегованыҥ Керечилериниҥ бирӱзи болуп, ого ӱргӱлјиге иштеериниҥ башталганы болот. Чӧҥӱрилип чыгарылганы јаан учурлу да болзо, ол аргаданып алган деп кӧргӱспей јат. «Кажы ла чӧҥӱрилип чыгарылган кижи аргаданар» — деп, Иисус айтпаган. «Учына јетире чыдашканы аргаданар» деген (Матфейдеҥ 24:13). Оныҥ учун элдеҥ озо Кудайдыҥ Каандыгын бедиреп, оны бойыҥныҥ јӱрӱмиҥде эҥ ле тӧс јерге тургузары учурлу (Матфейдеҥ 6:25—34).
18. Чӧҥӱрилип чыгарылганыныҥ кийнинде кандый амадуларга албаданарга јараар?
18 Иеговага оноҥ ары иштеерге, бойыныҥ алдына ич-кӧгӱстик амадулар тургузып алары јакшы болор эди. Мындый амадулардыҥ бирӱзи — ӱзӱк јогынаҥ оныҥ Сӧзин таҥынаҥ ӱренип, бойыныҥ Кудай керегинде билгирин тереҥжидери. Кӱнӱҥ ле Библияны кычырар амаду тургузып ал (Псалом 1:1, 2). Христиан туштажуларга ӱзӱк јок барып тур, нениҥ учун дезе ондо куучындашканы сеге ич-кӧгӱстик ийде берер. Иегованы мактап ла ӧскӧ улустарды оморкодорго јуундарда јартамалдар айдарга амадулар не тургузып албазыҥ? (Римляндарга 1:11, 12). Ого ӱзеери бойыҥныҥ мӱргӱӱлдериҥди оноҥ јаан учурлу эдип алар амаду тургузып ал (Луканаҥ 11:2—4).
19. Агару тын сеге кандый кебеделдерлӱ болорго болужар?
19 Сен бойыҥныҥ чӧҥӱрилип чыгарылганыҥ аайынча јӱрерге турган болзоҥ, сеге јаантайын бойыҥныҥ кылыктарыҥа ајару эдип турар керек. Оноҥ сӱӱш, сӱӱнчи, амыр-энчӱ, узаак чыдажары, быйанду болоры, килеҥкей, бӱдӱмјилӱ, јобош ло бойын тудунар кебеделдерлӱ болорго Кудайдыҥ агару тынына багынар керек (Галаттарга 5:22, 23; 2 Пётрдыҥ 3:11). Ундыба, Иегова бойыныҥ агару тынын Оноҥ сурап, Оны чын ла угуп турган ончо улуска берип јат (Луканаҥ 11:13; Деяниелер 5:32). Оныҥ учун Иеговага тын керегинде мӱргӱ, Кудайга јарап турган кебеделдерлӱ болорго болушты сурап тур. Сен Кудайдыҥ тыныныҥ башкарузын канайып угуп турганыҥнаҥ улам, бу кебеделдер сениҥ кылыктарыҥнаҥ ла сӧстӧриҥнеҥ бастыра кӧрӱмјилӱ болуп турар. Христиан јуундарда кажы ла кижи Христоско канча ла кирези тӱҥейлежип, «јаҥы» кижи болорго кичеенип турганы чын (Колоссяндарга 3:9—14). Кажызында ла бойыныҥ уур-кӱчтери бар, нениҥ учун дезе бис ич-кӧгӱстик байлыктыҥ ӧзӱминде башка-башка кеминде болодыс. Сен бийик кеминде эмес учун, Христоско тӱҥейлежерге сеге кӧп албаданып кичеенер керек. Је качан да чӧкӧнбӧ, нениҥ учун дезе Кудайдыҥ болужыла бу болор аргалу.
20. Сен иштеерине канайып Иисуска тӱҥей болор аргалу?
20 Сениҥ ич-кӧгӱстик амадуларыҥныҥ ортозында анайда ок Иисустыҥ сӱӱнип билеринеҥ канча ла кире јакшы тем алатан амаду болор учурлу (Еврейлерге 12:1—3). Ол иштеерин сӱӱген. Сенде Каандык керегинде куучындап јарлаар арга бар болзо, куучындап јарлаары керектиҥ учурына ајару салбай куучындары болуп калбазын. Качан сен Кудайдыҥ Каандыгы керегинде ӱредип турзаҥ, Иисус канайып јакшызынып туратан болгон, онойып ла эдерге кичеен. Кудайдыҥ Сӧзиниҥ јакшы ӱредӱчизи болзын деп амадулу јуундагы берилип турган јӧптӧрди тузаланып тур. Иегова сеге оноҥ ары ижиҥди улалтарга ийде-кӱчти берер деп бӱдӱмјилӱ бол (1 Коринфяндарга 9:19—23).
21. а) Иегова чӧҥӱрилип чыгарылган улустарын баалап турган деп бис кайдаҥ билерис? б) Кудай бу калју телекейди јоголтор јаргыны бӱдӱрер кӱнде бистер аргаданып алар аргалу болорго, чӧҥӱрилип чыгарылганыныҥ учурлузы недеҥ кӧрӱнет?
21 Анчадала, Иисуска чын ла тӱҥей болорго кичеенип, учурлап беринген ле чӧҥӱрилип чыгарылган кижи Кудайга баалу. Иегова миллиардтар тоолу кижилердиҥ јӱректерин кӧрӱп, мындый улус кандый ас деп ол билер. Ол олорго баалу эрјинедий, «кӱӱнзеп сакыган» немедий кӧрӱп јат (Аггей 2:7, ЈТ). Кудай бу калју телекейди јоголтор јаргыны бӱдӱрер кӱнде, олорды аргадап аларга темдектеп салган деп, библиялык судурлар кӧргӱзет (Иезекииль 9:1—6; Малахия 3:16, 18). Сен ӱргӱлји јӱрӱмге чын кӧрӱп јадыҥ ба? (Деяниелер 13:48). Сен Кудайдыҥ темдектедип салган ишчизи болор кӱӱниҥ бар ба? Учурлап беринери ле чӧҥӱрилип чыгарылары — мындый темдектиҥ бӧлӱги, олор аргаданарына керектӱ.
22. «Кӧп тоолу» улус неге иженер аргалу?
22 Бастырателекейлик чайыктыҥ кийнинде Ной ло оныҥ билези аруталган јерге керептеҥ чыккылаган. Анайдала бӱгӱн, Кудай керегинде билгирди бойыныҥ јӱрӱмине тузаланып турган «кӧп тоолу» улус Иегованыҥ јаратканын алгылап, бу калју телекейдиҥ учын ӧдӱп чыгып, текши арутап салган јерге ӱргӱлјиге јадар ижемјилӱ болгылап јат (Откровение 7:9, 14). Ол тушта јӱрӱм кандый болор?
БОЙЫҤНЫҤ БИЛГИРЛЕРИҤДИ ШИҤДЕП КӦР
Иегованыҥ кӱӱн-табы аайынча ол керегинде билгириҥди сен канайып тузаланар аргалу?
Чӧҥӱрилип чыгарыларына озо кандый алтамдар эдер керек?
Нениҥ учун чӧҥӱрилип чыгарылары јолдыҥ учы эмес, а башталганы?
Бис бойыстыҥ учурлап берингенис ле чӧҥӱрилип чыгарылганыс аайынча канайып јӱрер аргалу?
[Ӱренериниҥ сурактары]
[172 бӱктеги јурук]
Сен мӱргӱӱлиҥде бойыҥды Кудайга учурлап бериндиҥ бе?
[174 бӱктеги јурук]
Сеге чӧҥӱрилип чыгарыларга не чаптык эдип јат?
