Кудайдыҥ албатызыныҥ ортозына корулан
17-чи бажалык
Кудайдыҥ албатызыныҥ ортозына корулан
1, 2. Нениҥ учун кижиликтиҥ айалгазы, јоткон ӧдӱп чыккан улустыҥ айалгазыла тӱҥей?
СЕНИҤ јадып турган јериҥниҥ ӱстиле тӱреҥилӱ јоткон ӧдӧ берген деп сананып кӧр. Сениҥ тураҥ јемирилип, бар болгон не-немеҥ ӱзе јылыйып калды. Аргаданып чыгарга сеге суу ла калаш ла келижет. Айалга ижемји јок деп билдирет. Је тӱреҥиде улуска кенетийин кайдаҥ да болуш келет. Сӱреен кӧп курсак-тамак ла кийим экелгилейт. Сеге јаҥы тура туткылап јат. Мындый болужын јетирген улустарга сен алаҥзу јок јаан быйанду болорыҥ.
2 Бӱгӱн бого ло тӱҥей неме болуп јат. Адам ла Еваныҥ байа јоткон ошкош тӱймеени бойыла ээчий бастыра кижиликти бускалаҥду учы-тӱбине апарды. Улустыҥ јадатан сӱреен јараш ла јакшы јери јылыйтылган болгон. Оноҥ ло бери кижиликтиҥ башкаруларында улусты јуу-согуштаҥ, каршуучылдардаҥ ла чынга турбас немелердеҥ кичееп алар арга болбой јат. Тӧгӱн кудайлык јаҥ миллион улусты ич-кӧгӱстик су-кадык курсактаҥ аскыртып, олорды торолоорго албадап јат. Је Иегова Кудай бистерге ич-кӧгӱстик курсагын, кийимин ле айылын берип јат. Ол мыны канайып эдип турган?
«ЧЫНДЫК ЛА САГЫШТУ КУЛ»
3. Иегова улуска ич-кӧгӱстик курсакты канайып берип турган ла бу кандый темдектердеҥ кӧрӱнип јат?
3 Кӧндӧлӧҥ кату-јоболдоҥ тӱбекке тӱшкен улустарга болуш јаҥжыккан аайынча кандый бир биригӱ организация ажыра тӧс башкарула јетирилип јат, анайдала ок Иегованыҥ бойыныҥ албатызына берип турган ич-кӧгӱстик курсагы база тӧс башкарулу јетирилип јат. Темдектезе, израиль албаты 1 500 јылга шыдар ӧйгӧ «Кайраканныҥ јууны» болгон. Иегова, оныҥ албатызын Јасакка ӱретсин деп, олордыҥ ортозында улустарды кӧстӧп салды (1 Паралипоменон 28:8; 2 Паралипоменон 17:7—9). Бистиҥ эраныҥ баштапкы чагында, Иегова христиандардыҥ биригӱ организациязын тӧзӧгӧн. Апостолдор ло аксагалдардаҥ турган башкараачы советтиҥ башкарузыла иштенгилеп турган јуундар тӧзӧлгӧн болгон (Деяниелер 15:22—31). Бистиҥ кӱндерде Иегова бойыныҥ албатызыла база тӧзӧмӧлдӱ бӱдӱмиле башкарып јат. Мыны бис кайдаҥ билерис?
4. Бистиҥ ӧйдӧ «чындык ла сагышту кул» кем болуп калды, оноҥ бис Кудайдаҥ ич-кӧгӱстик курсакты канайып алып јадыс?
4 Иисус, оныҥ каандык јаҥда отурган ӧйинде, оныҥ ӱренчиктерине «курсакты ӧйинде» ӱлештирер «чындык ла сагышту кул» болор деп айткан (Матфейдеҥ 24:45—47). Качан 1914 јылда Иисус теҥеридеги Каандыктыҥ ширеезине отура берерде, бу «кул» кем болды не? Канайтса да христиан телекейдиҥ духовенствозы эмес. Духовенство кӧбизинде бойыныҥ кабырып тургандарын Баштапкы телекейлик јуу-согушты јӧмӧжип турган башка-башка ороондордыҥ башкаруларына ууланган пропагандала «азыраган». Тузалу ла ӧйиндеги ич-кӧгӱстик курсакты «ас ӱӱр» деп Иисустыҥ адаганына кирип турган Кудайдыҥ агару тыныла майлаткан чындык христиан бӧлӱк ӱлеп турган болгон (Луканаҥ 12:32). Бу майлаткан христиандар кижиликтиҥ башкарулары керегинде эмес, а Кудайдыҥ Каандыгы керегинде куучындап таркаткан. Оныҥ учун бир канча ӧйдиҥ кийнинде майлаткан «кулдыҥ» јанында, чындык Кудай јаҥда чындык кӱӱн-санаалу миллиондор тоолу «ӧскӧ койлор» болгондор (Иоаннаҥ 10:16). Кудай «чындык кулла» оноҥ ол «кулдыҥ» Башкараачы соведиле тузаланып, бойыныҥ эптӱ-јӧптӱ башкарулу албатызына ич-кӧгӱстик курсакты, кийимди ле айылды кӱӱнзеп тургандарга канайып ӱлештирерин кӧргӱзип јат.
«ӦЙИНДЕ КУРСАК»
5. Эмди телекей кандый ич-кӧгӱстик айалгада болот ло Иегова нени эдип турган?
5 «Кижи јаҥыс ла калашла эмес, је Кудайдыҥ оозынаҥ чыккан кандый ла сӧслӧ јӱрер» — деп, Иисус айткан (Матфейдеҥ 4:4). Је кӧп улустар Кудай нени айдып турганына кандый да ајару этпей турганы кунукчылду. Иегованыҥ судурчызы Амос ‘калашка торо эмес, сууга суузаары эмес, а Кайраканныҥ сӧстӧрин угарына суузаары болор’ деп, озолондыра айткан аайынча, ол кӱндер келди (Амос 8:11). Керек дезе ич-кӧгӱстик торолош сӱреен кудайзак та улустыҥ ортозында бийлеп јат. Је Иегова «бастыра улус аргаданып ла чындыкты билерине јединзин деп кӱӱнзеп јат» (1 Тимофейге 2:3, 4). Оныҥ учун ол бистерди ич-кӧгӱстик курсакла арбынынча јеткилдеп јат. Је оны кайдаҥ табар?
6. Иегова озодо бойыныҥ албатызын ич-кӧгӱстик курсакла канайып јеткилдеген?
6 Иегова ич-кӧгӱстик курсакла јайрадылып калган бирлиги јок улусты эмес, а бастыра бойыныҥ албатызын јаантайын јеткилдеген (Исаия 65:13). Израильдыҥ абыстары албатыны Кудайдыҥ Јасагына ӱредерге, эр де улусты, ӱй де улусты, балдарды да, јаанды ла јашты,— бастыразын јууп туратандар (Второзаконие 31:9, 12). Кажы ла кижи таскаду ла оморкоду алзын деп, баштапкы чактыҥ христиандары ол ӧйдӧги башкарып турар јӧбиле јуундар тӧзӧгилеп, туштажуларды кожо ӧткӱрип турган болгон (Римляндарга 16:4; Филимонго 1, 2). Иегованыҥ Керечилери олордыҥ темиле баргылап јат. Сени база јуундардыҥ туштажуларына келзин деп сӱӱнип кычыргылайт.
7. Христиан туштажуларга јаантайын барары билгирлер ле бӱдӱмјиле канайып колбулу?
7 Библияны таҥынаҥ ӱренип турганыҥныҥ болужыла сен кӧп немелерге ӱренип алганыҥда алаҥзу јок. Мында сеге кем де болушкан болордоҥ айабас (Деяниелер 8:30—35). Је сениҥ бӱдӱмјиҥди ӧзӱмле тӱҥейлерге јараар, кӧрӱп јазап кичеебезе кургап, оноҥ учы-тӱбинде ӧлӱп калар. Оныҥ учун сеге керекту ич-кӧгӱстик курсакты алып турар керек (1 Тимофейге 4:6). Христиан туштажуларда ич-кӧгӱстик ажанышка болужар узак ӧйгӧ ӱренетениниҥ программазы берилип јат, анайдарда сениҥ Кудай керегинде билгириҥ кӧптӧгӧн сайын бӱдӱмјиҥ де ӧзӧр (Колоссяндарга 1:9, 10).
8. Нениҥ учун бистерге Иегованыҥ Керечилериниҥ јуунындагы туштажуларына барар керек?
8 Јуунныҥ туштажулары база бир јӱрӱмге учурлу амадуга болужат. «Бой-бойлорыска ајарыҥкай болуп, сӱӱшке ле јакшы керектерге оморкодып мактайлы; бойыстыҥ јуунысты артыргыспактар» — деп Павел бичиген (Еврейлерге 10:24, 25). «Оморкодып мактайлы» деп кӧчӱрилген грек сӧс, анайда ок «курчыдар» деген учурлу болор аргалу. «Темир темирле курчыдылат, кижи бойыныҥ најызыныҥ кӧрӱмин курчыдат» — деп, библиялык укаа сӧс айдат (Притчалар 27:17). Бистиҥ кажыбыс ла јаантайын «курчыдынар» учурлу. Токтобой турган телекейдиҥ јаба базары бистиҥ бӱдӱмјисти «мокодып» салар аргалу. Је христиан туштажуларда бис омоксырап турарыныҥ кемин аладыс (Римляндарга 1:11, 12). Јуунныҥ кӱрелештери апостол Павелдиҥ «оморкодып, бой-бойлорын ич-кӧгӱстикле тыҥытсын» деген кычырузыла баргылап јат, нениҥ учун дезе бу бистиҥ бӱдӱмјибисти «курчыдат» (1 Фессалоникийецтерге 5:11, ЭмК). Бис Кудайды сӱӱп турганысты анайда ок христиан јуундардагы туштажуларга ӱзӱк јок келип турганыс кӧргӱзет, бу бистиҥ алдыска оны мактап јарлаар арга ачып јат (Псалом 34:18).
«СӰӰШКЕ КИЙИНИГЕР»
9. Иегова сӱӱш аайынча кандый тем берген?
9 «Сӱӱшке кийинигер, нениҥ учун дезе ол бирликтиҥ бийик кеминдеги колбуузы» (Колоссяндарга 3:14). Иегова быйанзак болуп биске мындый кийимди сыйлап јат. Канайып? Сӱӱш — бу Иегованыҥ сыйлап берген оныҥ агару тынныҥ једимдериниҥ бирӱзи болгонынаҥ улам, христиандар сӱӱшти јетирип јадылар (Галаттарга 5:22, 23). Бисти ӱргӱлји јӱрӱмдӱ болзын деп, бойыныҥ јаҥыскан туулган Уулын аткарып, Иегова бойы улу сӱӱшти кӧргӱскен (Иоаннаҥ 3:16). Мындый сӱӱшти кӧргӱзип, Кудай ого тӱҥейлежетен эҥ ле артык тем берген. «Кудай бисти ондый тыҥ сӱӱген болзо, бистер де бой-бойлорысты сӱӱр учурлу» — деп, апостол Иоанн бичиген (1 Иоанныҥ 4:11).
10. «Карындаштыкла» куучындашканы нези ле тузалу?
10 Качан сен Каандыктыҥ Кыбындагы туштажууларга барып турзаҥ, сенде сӱӱш јетирерге сӱреен јакшы арга бар. Сен јӱзӱн-башка улустарла туштажып јадыҥ. Олордыҥ кӧп сабаларына сен алаҥзу јогынаҥ белен тартылып, јакшы кӱӱндӱ болгоныҥды сезип ийериҥ. Анайткажын, Иегованыҥ ишчилериниҥ ортозына керек дезе башка-башка улустар туштагылап јат. Сенеҥ кылык-јаҥыла, эмезе јилбӱлериле аҥыланып турган улустардаҥ, байла озодо сен кыйып турган болгоҥ. Је христиандар ‘карындаштыкты сӱӱр’ учурлу (1 Пётрдыҥ 2:17). Оныҥ учун Каандыктыҥ Кыбына келип турган, бастыра улусла, керек дезе сениле јажыт эмес, сенеҥ кылык-јаҥыла, терезиниҥ ӧҥиле, эмезе ӱредӱзиле де аҥыланып тургандарла таныжып алар амаду тургузып ал. Сен олордыҥ кажызында ла сӱреен јакшы кебеделдер барын јазым јок ајарып ийериҥ.
11. Иегованыҥ албатызы сӱреен башка-башка улустаҥ турганы нениҥ учун сеге буудак болбос учурлу?
11 Јуун сӱреен башка-башка улустардаҥ турат, је бу сеге буудак болбос учурлу. Темдектезе, барып јаткан кӧӧлӱктердиҥ ортозында сен кӧӧлӱктӱ маҥтадып бараткаҥ деп сананып кӧр. Бастыра кӧӧлӱктер бир маҥла барбай јат, оноҥ ол кӧӧлӱктердиҥ бастыразы јакшы кеминде эмес. Кезиктери ас эмес чакырымдарды ӧдӱп салган, ӧскӧлӧри сенле чилеп јаҥы-јаҥы ла маҥын кӧндӱктирип јат. Је мындый башка-башка аҥыланыштарга ајару этпей, олор ончозы бир јолло барып јадылар. Бу јуундагы улустарды сӱреен эске алындырат. Бистердиҥ ончобыс христиан кебеделдерди бир тӱҥей тӱргенниҥ кемиле алынбай јат. Ого ӱзеери, бистер ончобыс эт-каныс ла сезимдерис ле башка болуп јадыбыс. Кезиктери Иеговага узаак јылдардыҥ туркунына бажыргылап келген, ӧскӧлӧри олорго бу јуукта бириккендер. Андый да болзо, бис ончобыс «бир амадулу ла санааларлу... бирлик болуп» ӱргӱлји јӱрӱмниҥ бир јолында болодыс (1 Коринфяндарга 1:10, ЭмК). Оныҥ учун јуундагы улустыҥ уйан јандарын эмес, а јакшы јандарын ајарып тур. Мынаҥ улам сеге јӱк ле сӱӱнчилӱ боло берер, нениҥ учун дезе Кудай бу улустарды чыннаҥ ла тооп турганын сен кӧрӱп ийериҥ. Сен олордыҥ ортозында болор кӱӱниҥ келбейт эмеш пе? (1 Коринфяндарга 14:25).
12, 13. а) Сени јуунда кем де ачындырып ийген болзо, нени эдер керек? б) Нениҥ учун чугуулды јуубазы учурлу?
12 Бастыра улус бийик кеминде эмес учун кезикте јуунда кем де сени сӧслӧ эмезе эткен керегиле ачындырып ийердеҥ айабас (Римляндарга 3:23). Ӱренчик Иаков мыны оҥдоп турган болгон, оныҥ учун бичиген: «Бис ончобыс кӧп кинчек эдедис. Кем сӧстӧ кинчек этпей турган, ол кижи бийик кеминде» (Иаковтыҥ 3:2). Сени кем де ачындырып ийген болзо, сен канайдар эдиҥ? «Ойгор болоры кижини чыдамкай эдет. Јаманды јетирип турган улустыҥ јаманын ойгор кижи таштап турза, сӱреен јакшы» — деп, Библиялык укаа сӧс айдат (Притчалар 19:11, ЭмК). Сагышту болоры — бу кижиниҥ аҥылу айткан сӧстӧриниҥ эмезе эткен керектериниҥ чындык шылтактарын кӧрӱп ийери ле олорды оҥдооры. Бистиҥ кӧп сабаларыс бойыстыҥ коомой кылыктарысты кату-карузына тургузып турзас, бойыска ас эмес килемји эдип јадыс. Ӧскӧ улустарды ла олордыҥ јастыраларын оҥдоорго ло јаманын таштаарга нениҥ учун мындый ла сагышту болбозыс? (Матфейдеҥ 7:1—5; Колоссяндарга 3:13).
13 Бис Иегованаҥ јаманысты таштаарын кӱӱнзеп турган болзос, бойыс ӧскӧ улустыҥ јаманын таштаар учурлу деп, качан да ундыбас керек (Матфейдеҥ 6:9, 12, 14, 15). Бис чындыкла јӱрӱп, ӧскӧ улустарга сӱӱш јетирер учурлу (1 Иоанныҥ 1:6, 7; 3:14—16; 4:20, 21). Оныҥ учун кемле-кемле кериш болорго турза, качан да чугулды јууп кӧптӧтпӧ. Сӱӱшле кийинген кижи кемди-кемди ачындырып ийген болзо, удатпайла јаманымды таштазын деп келип, кӱчтердиҥ аайына чыгарга кичеенер (Матфейдеҥ 5:23, 24; 18:15—17).
14. Бис кандый кебеделдерди кийип алар учурлу?
14 Бистиҥ ич-кӧгӱстик кийимис ӧскӧ дӧ сӱӱшле колбулу кебеделдердеҥ турар учурлу. «Буурзак, јобош, быйанзак ла узаак чыдажарын кийинигер...» — деп, Павел бичиген. Кудайга јараар «јаҥы» кижиге келишкедий бу кебеделдер сӱӱшле теҥ (Колоссяндарга 3:10, 12). Сен «јаҥы» кижи болуп кийинерге бастыра кӱчиҥди саларыҥ ба? Качан сениҥ ич-кӧгӱстик кийимиҥ ага-карындаштарга сӱӱштӱ болоры болзо: «Бой-бойыгардыҥ ортогордо сӱӱш болзо, мынаҥ улам ончозы слерди Мениҥ ӱренчиктерим деп таныгылар» — деп айткан, Христостыҥ ӱренчиктериниҥ аҥыланып турар темдеги сенде боло берер (Иоаннаҥ 13:35).
КОРУЛАНАР ЈЕР
15. Нениҥ учун јуунды коруланар јерле тӱҥейлештирерге јараар?
15 Онойдо ок, јуун кижиге јеткер јогын сезер айыл ла коруланар јер болот. Јуунда јаантайын Кудайдыҥ кӱӱн-табыла келиштире эдер амадулу акту јӱректӱ улустарды сен таап аларыҥ. Олордыҥ кӧп сабалары јаман кылыктарынаҥ ла темиккендеринеҥ айрылгылап калган, сеге ол кылыктарды јеҥери керектӱ болордоҥ айабас (Титке 3:3). Бу улустар сеге болужар аргалу, нениҥ учун дезе ‘бой-бойыгардыҥ уур јӱктерерди алып јӱрӱгер’ деп бистерге айдылган (Галаттарга 6:2). Анайткажын, ӱргӱлји јӱрӱмге апарып јаткан јолло сен учун кем де барбас (Галаттарга 6:5; Филиппийецтерге 2:12). Је Иегова биске јаантайын болуш ла јӧмӧжӧрин тап алар сӱреен јакшы бӱдӱм — христиандардыҥ јуунын — озолодо билип эткен. Сениҥ уур-кӱчтериҥ кандый ла кӱч болзо, сенде толо сӱӱштӱ токунадар баалу — јуун бар, тӱбектӱ ле јоксыраар ӧйдӧ олор јӧмӧжип болужар аргалу. (Луканаҥ 10:29—37; Деяниелер 20:35 тӱҥейлештир.)
16. Јуунныҥ аксагалдары бистерге кандый болуш јетиргилеп јат?
16 Сеге болужарга келер улустыҥ ортозында јуунныҥ кӧстӧлгӧн аксагалдары эмезе «улус бӱдӱмдӱ сыйлар» кичееп кӧрӧӧчилер (надзиратель), олор «ӱӱрди» кӱӱнзеп ле кичеенип кӱдӱп тургулайт (Ефесяндарга 4:8, 11, 12, ЈТ; Деяниелер 20:28; 1 Пётрдыҥ 5:2, 3). «Олордыҥ кажызы ла салкыннаҥ кору ла јуттаҥ јабынчы, чӧлдӧ суу чыгып турар јердий, какшап калган јердеги бийик кайаныҥ кӧлӧткӧзиндий болор» — деп, судурчы Исаия олор керегинде бичиген (Исаия 32:2).
17. а) Иисус баштапкызында ла кандый болуш јетирерге кӱӱнзеген? б) Кудай бойыныҥ албатызына нени берер болгон?
17 Качан Иисус јерде болордо, кудайлык јаҥныҥ башчылары мындый сӱӱштӱ кичеерин јетиргилебегени кунукчылду. Албатыныҥ јӱрген айалгазы Иисусты тереҥ токунатпай турган болгон, оноҥ ол улустарга — баштапкызында ла ич-кӧгӱстик јанынаҥ болужарга тыҥ кӱӱнзеген. Иисус улусты килеп турган болгон, нениҥ учун дезе «олор кӱдӱчи јок тыҥ јобоп ло чачылып калган койлордый болгон» (Матфейдеҥ 9:36). Бу сӧстӧр бистиҥ кӱндерде база башка-башка уур-кӱчтердеҥ улам шыралап, ич-кӧгӱстик болушка баштанар кижизи јок кӧп улустардыҥ комудалду айалгазын канайып чечен кӧргӱзип јат! Је Иегованыҥ албатызында мындый ич-кӧгӱстик болуш бар, нениҥ учун дезе, «Мениҥ койлорым јылыйгылабазын ла коркыгылабазын деп, олорды кичееп турарына јаҥы кӱдӱчилер берерим» — деп, Кудай сӧзин берген болгон (Иеремия 23:4, ЭмК).
18. Ич-кӧгӱстик болуш керек болзо, нениҥ учун аксагалдарга баштанары учурлу?
18 Јуунныҥ аксагалдарыла таныжып ал. Бу улустарда Кудай керегинде билгирди канайып јӱрӱмге тузаланарына ас эмес ченемел бар, нениҥ учун дезе олордыҥ кажызы ла кичееп кӧрӧӧчилердиҥ библиялык некелтелерине келижет (1 Тимофейге 3:1—7; Титке 1:5—9). Сеге Кудайдыҥ некелтелерине јарабай турган кылык-јаҥдардаҥ ла кебеделдердеҥ айрыларга ич-кӧгӱстик болуш керек болзо, аксагалдарга баштанарга уйалба. Аксагалдар Павелдиҥ јӧбиле: «Коркунчак улустарды токунадыгар, кӱч јокторго јӧмӧжигер, бастыразына узаакка чыдамкай болыгар», дегенине келиштире эдип турганын сен кӧрӱп ийериҥ (1 Фессалоникийецтерге 2:7, 8; 5:14).
ИЕГОВАНЫҤ АЛБАТЫЗЫНЫҤ ОРТОЗЫНДА ЈЕТКЕР ЈОГЫЛА ЈИЛБИРКЕП ЈАКШЫЗЫНЫП ЈӰР
19. Коруланар јерди Иегованыҥ биригӱ организациязынаҥ бедиреп турган кижини, ол кандый алкыштарла сыйлап јат?
19 Бис бийик кемине эмес айалгада јадып турган да болзос, Иегова ич-кӧгӱстик курсакты, кийимди ле айылды сыйлап јат. Сӱреен јараш ла јакшы јердеги јӱрӱмниҥ алкыш-быйандарын сезерге, Кудайдыҥ эдер болгон јаҥы телекейин сакыыр керек. Је Иегованыҥ биригӱ организациазына кирип тургандар, эмди ле јеткер јок ич-кӧгӱстик јакшыла (духовный рай) јилбиркеп јакшызынат. Мындый улустар керегинде: «Олор јеткер јок јадар, олорды кем де коркытпас» — деп, Иезекииль судурлап айткан (Иезекииль 34:28; Псалом 4:9).
20. Иеговага бажырары учун сен нени јылыйтканыҥды ол канайып кайралдаар?
20 Иегова бойыныҥ Сӧзи ле биригӱ организациязы ажыра бистерге канча кире сӱӱштӱ ич-кӧгӱстик сыйларды берип турганы учун, ого бис канайып быйанду болор аргалу! Кудайдыҥ албатызына биригип ал. Иегованы мынаҥ артык билерге турган амадуҥ керегинде најыларыҥ эмезе тӧрӧӧндӧриҥ нени сананар деген коркыду сени токтодорына јай бербе. Сен Иегованыҥ Керечилериле куучындажып, Каандыктыктыҥ Кыбында јуундардыҥ туштажуларына барып турганыҥ учун сени јаратпай јамандагылардаҥ да айабас. Је сен Кудайга бажырарга болуп јылыйткан не немеҥди ол артыкту эдип бастыра сеге јандырып берер (Малахия 3:10). Ол јанынаҥ Иисус айткан: «Чынын айдадым: кем айлы-јуртын, эмезе ага-ийнилерин, эмезе эје-сыйынын, эмезе энезин, эмезе адазын, эмезе бала-барказын, эмезе јерин Меге ле Јакшылыкту Јарга болуп артыргыскан, бу кызалаҥду да чакта болзо јӱс катап артыктай айлы-јурттарын, ага-ийнилерин, эје-сыйныларын, энелерин, бала-баркаларын, јерлерин албаган кижи јок, а келер чакта дезе ӱргӱлји јӱрӱмди энчиркенер» (Марктаҥ 10:29, 30, ЭмК). Эйе, сен нени де артыргыскан болзоҥ, сен нени де чыдашкан болзоҥ, Кудайдыҥ албатызыныҥ ортозында сен кайкамчылу карындаштыкты ла ич-кӧгӱстик коруны аларыҥ.
БОЙЫҤНЫҤ БИЛГИРЛЕРИҤДИ ШИҤДЕП КӦР
«Чындык ла сагышту кул» ол кем?
Иегова бисти кандый ич-кӧгӱстик бӱдӱмниҥ болужыла азырап јат?
Христиан јуундарга кирип турган улус биске канайып болужып јат?
[Ӱренериниҥ сурактары]
[Бӱдӱн 165 бӱкке берилген јурук]
