Кудай керегинде билгир јерди толтырза
19-чы бажалык
Кудай керегинде билгир јерди толтырза
1, 2. Иегованыҥ јайаандары канайып «ӱрелген» болгон?
АТТУ-ЧУУЛУ јурукчы сӱреен јараш јуругын јаҥы ла јурап божоткон деп сананып ал. Јурук сӱреен јакшы — чын ла эҥ артык (шедевр) деп бастыра неме айдат! Је тӱнде кӱйӱнчек удурлажаачы јурукты ӱреп салды. Бу керек јурукчыга кандый ачу болгонын бис оҥдоп јадыбыс. Ол шок эткен кижини тӱрмеге отурзын деп канайып ол тыҥ кӱӱнзебеди! Анайда ок ол бойыныҥ эдимине озогы јаражын экелер кӱӱндӱ болгонын бис оҥдоор аргалу.
2 Бу јурукчы кижидий, Иегова эҥ артык эдим эткен — ол Јерди јайап, ого улусты јатыргыскан. Эр ле ӱй кижини эткен соҥында Јердеги бастыра эдими керегинде: «Сӱреен јакшы» — деп, адакы учында айткан (Бытие 1:31). Адам ла Ева Кудайдыҥ балдары болгон, ол олорды сӱӱген. Олор ырысту ла сӱреен јакшы јӱрӱмдӱ болзын деп Кудай озолодо кӧрӱп салган. Је Эрлик олорды Кудайга удура тӱймеенге јайа тарткан да болзо, айдары јок јараш Кудайдыҥ эдимдери тӱзедип болбос ижемјизи јок эдип ӱрелбеген (Бытие 3:23, 24; 6:11, 12).
3. «Чындык јӱрӱм» ол не?
3 Кудай бу керекти тӱзедер амадулу. Ол башталганында канайда сананып салган болгон, анайып ла бистерди јӱрӱп јатсын деп тыҥ кӱӱнзеп јат. Бистиҥ кыска ла шакпыртту јӱрӱмис ле Иегованыҥ айдып турган «чындык јӱрӱминде» бир де кичинек тӱҥей колбу јок. Кудайдыҥ биске берерге турган «чындык јӱрӱми» — ол бийик кеминдеги «ӱргӱлји јӱрӱм» (1 Тимофейге 6:12, 19, ЭмК).
4, 5. а) Бистиҥ сӱреен јараш ла јакшы Јерге јадар ижемјис ненеҥ улам бӱдер? б) Нениҥ учун бистерге келер ӧйдӧги ижемји керегинде сананып шӱӱп турар керек?
4 Кудай керегинде билгир Иегованыҥ алдына карулу болоры ла колбулу (Иаковтыҥ 4:17). Је сен бу билгирлериҥди тузаланып, ӱргӱлји јӱрӱмге амадап, кандый алкыш-быйандар аларыҥды сананып кӧрзӧҥ дӧ. Иегова Кудай бойыныҥ Сӧзинде, Библияда, сӱреен јараш ла јакшы Јерде удабас болотон јӱрӱмниҥ сӱреен јараш јуругын бичиген. Је бис, Иегова Кудайдыҥ албатызы, јӱк ле кайралга болуп иштебей јадыс. Бис Кудайды сӱӱп турганыс учун ого иштейдис (Марктаҥ 12:29, 30). Ого ӱзеери, бис Иегованаҥ ӱргӱлји јӱрӱмди иштеп алар аргабыс јок. Ӱргӱлји јӱрӱм — бу Кудайдыҥ сыйы (Римляндарга 6:23). Бу јӱрӱм керегинде сананып шӱӱри јакшы, нениҥ учун дезе сӱреен јараш ла јакшы јерге иженери, Иегова Кудай кӧп сӱӱштӱ ‘Оны бедиреп тургандарга берет’ дегенин бистерге эске алындырып јат (Еврейлерге 11:6). Бистиҥ санаагыстагы ла јӱрегистеги ижемјибис, бистерге бу эрликтиҥ телекейиндеги уур айалгаларды ӧдӱп чыгарга болужып јат (Иеремия 23:20).
5 Эмди келер ӧйдӧги сӱреен јараш ла јакшы јердеги ӱргӱлји јӱрӱмдӱ библиялык ижемјиге ајару эдип ийектер. Качан Кудай керегинде билгир јерди толтырза, бу јӱрӱм кандый болор?
АРМАГЕДДОННЫҤ КИЙНИНДЕ — СӰРЕЕН ЈАКШЫ ЛА ЈАРАШ ЈЕР
6. Армагеддон ол не, оноҥ ол улустарга нени темдектеп јат?
6 Кӧргӱзилген аайынча, удабас Кудай бу калју телекейди јоголтып салар. Библияда Армагеддон деп адалган учуралга телекей коркушту тӱрген јууктап келедири. Бу сӧстӧр кезик улустарды ӧштӧжип турган ороондордоҥ улам башталган ядролык тӱбектӱ учурал (катастрофа) керегинде санаага экелип јат, је бу Армагеддон керегинде чек јастыра санаалар. Откровениеде 16:14—16-да Армагеддон — бу: «Бастыраны тудар Кудайдыҥ улу кӱниндеги јуу-согуш» — деп айдылып јат. Бу согушта «јердиҥ каандары», эмезе ончо албатылар туружар. Иегова Кудайдыҥ Уулы кӧстӧлгӧн Каан, бу јуу-согушты удабас баштаар. Оныҥ учы-тӱби озолондыра јарталып калган. Кудайдыҥ Каандыгыныҥ бастыра ӧштӱлери, анайда ок Эрликтиҥ калју телекейине кирип тургандар јоголтылып калар. Тирӱ јаҥыс ла Иеговага чындык беринген улустар артар (Откровение 7:9, 14; 19:11—21).
7. Иисустыҥ муҥјылдык башкаратан ӧйинде Эрлик ле оныҥ кӧрмӧстӧри кайда болор, бу кижиликке канайып јакшы салтарын јетирер?
7 Бу сӱрекей јаан учуралды сен ӧдӱп чыккаҥ деп сананып кӧрзӧҥ дӧ. Кудайдыҥ берер болгон јаҥы јердеги јӱрӱм кандый болгой не? (2 Пётрдыҥ 3:13). Бистер бодоштырып отырбазыбыс, не дезе Библия бойы бу ӧй керегинде куучындап јат, оныҥ јетирӱзи бистерди сӱрекей тыҥ сӱӱндирет. Иисус Христостыҥ муҥјылдык башкарузыныҥ ӧйинде, Эрлик ле оныҥ кӧрмӧстӧри бастыра јаҥдарын айрытырып, нени де эдип болбос тамыга (бездна) отургызылып саларын бис биледис. Бисти Кудайдыҥ кӱӱн-табынаҥ кыйышсын деп, кийни јанында бускалаҥ эдип турган чындык эмес ле калју улустар база болбос. Кандый јайымдалыш! (Откровение 20:1—3).
8, 9. Јаҥы телекейде кунугарыла, оорулар ла карыйтаныла не болуп калар?
8 Бойыныҥ ӧйинде улустар бастыра оорулардаҥ айрылар (Исаия 33:24). Аксак улустар туруп чыгар ла базар, јӱгӱрер ле бијелеер аргалу болор. Табыш јок телекейде болгон канча јылдардыҥ кийнинеҥ укпас улустар сӱрекей јараш, кайкамчылу симфонияныҥ кӱӱзин уккулар. Кӧзи кӧрбӧс улустар бойлорына телекейдиҥ сӱреен јараш ӧҥдӧрин ле бӱдӱмдерин ачкылар (Исаия 35:5, 6). Арт учында олор јуук улустарыныҥ чырайларын кӧргилер! Баштап таарыйын олордыҥ кӧстӧри сӱӱнчиниҥ јаштарынаҥ улам кыска ӧйгӧ јазап кӧрбӧй барар болор.
9 Јӱк ле сананып ийзеҥ де! Шили кӧс, тайактар, эм-тустар, тиш эмдеер кыптар ла оору улустар јадар эмчиликтер чек керек јок болор! Јӱӱлип оорыры ла санаазы јамандалары улусты база качан да сӱӱнеринеҥ айрыбас. Балдардыҥ бала тужындагы ӧйлӧрин кандый да оорулар санааркатпас. Карырыла колбулу керектер тескери бурылар (Иов 33:25). Бистердиҥ су-кадыгыс јакшы ла кӱчис оноҥ бек болуп калар. Кажы ла кӱн эртен тура тӱндеги јакшы сергиткен уйкунаҥ амырайла ойгонып, алдына турган кӱнди уткырга тыҥ кӱӱнзеп, эрчимдӱ јӱрӱмге кирип, јилбилӱ ишти колго алып турарыс.
10. Армагеддонды ӧдӱп чыккан улус, кандый ишке турушкылар?
10 Армагеддонды ӧдӱп чыккан улустарга кӧп јилбилӱ иш болор. Олор јерди сӱреен јараш ла јакшы јер эдип кубултар. Бастыра кирленген эски телекейдиҥ арткан калганы јоголып калар. Ээн ле јыра јерлердиҥ ордына јазалган јараш јерлер (парк) болуп, чечектеп јайылар. Ончо улуста эптӱ ле јараш туралар болор (Исаия 65:21). Јайаачыныҥ Едем деген чечектеп турар јеринде болгон јаражына, бастыра јердиҥ ӱсти тӱҥейлежип, арайынаҥ сӱреен јараш ла јакшы јер болуп кубулар. Бу орныктырар иште туружарга кандый јилбилӱ болор!
11. Улустар айландыра турган не-немеге канайып кӧрӧр, олор ло тындулар ортодо кандый колбулар болор?
11 Эбиреде турган не-неме тӱбекке тӱшпезин деп, бастыра неме Кудайдыҥ башкарузыла бӱдер. Улус тындуларла кожо амыр-энчӱ јадар. Ол тушта олор буурзагы јогынаҥ малды ӧлтӱрериниҥ ордына, олорды сӱӱштӱ кичееп, јердиҥ ӱстинде сагышту бийленер. Бӧрӱлер ле кураандар, карагулалар ла бозулар кожо ажанып јӱргенин сананып кӧр — ол тушта айылдагы мал амыр-энчӱде јӱргилер. Керек дезе кичинек балдар да аҥ-куштардаҥ коркыбас, јаҥы телекейдиҥ амыр-энчӱзи јӱреги јок калју-кату улустарла база качан да бузулбас (Исаия 11:6—8). Ол тушта јӱрӱм кандый амыр-энчӱ болор!
КИЖИЛИКТИҤ ЭЛ-ЈОНЫНДАГЫ ӦСКӦРТӰЛЕР
12. Исаияда 11:9-та сӧстӧр бӱгӱн канайып бӱдӱп јат, бу сӧстӧр сӱреен јараш ла јакшы Јерде канайып бӱдер?
12 Јердиҥ ӱстинде калју нениҥ учун база бир де эдилбес деп, Исаияда 11:9-та айдылган. Анда: «Кудай керегинде билгирле [«Иегова керегинде билгирле», ЈТ] Јер толо берер канайып талайды суу толтырат» — деп айдылып јат. Бу сӧстӧр јаҥыс ла улуска берилген, нениҥ учун дезе инстинктле башкарынып турган тындулар «Иегова керегинде билгирди» алып, ол аайынча солынтылар эдип болбос. Мыныҥ ордына Јайаачы керегинде билгир улустарды ӧскӧртип јат. Кудай керегинде билгирди сен јӱримиҥде быжу тузаланып, кезик ӧскӧртӱлерди эмди эткен болорыҥ. Анайып миллиондор улус эдип јат. Анайдарда, судурлап айтканы Иеговага иштеп турган улуска эмди бӱдӱп башталып калды! Је бу судурда анайда ок бастыра јердиҥ ӱстинде улус јаман кычанаҥ, базынчыкка тартынарынаҥ јайымдалары ла чактыҥ-чакка амыр-энчӱ сӱӱри керегинде ӧйгӧ ајару эдилет.
13. Јердиҥ ӱстинде ӱредӱниҥ кандый программазы ӧткӱрилер?
13 Качан Иегова керегинде билгир јердиҥ ӱстин бастыра толтырза кандый кайкамчылу болор! Ол тушта Иисус Христос Каанныҥ ла оныҥ 144 000 кожо башкараачыларыныҥ башкарузыла јаан программалу ӱредӱ ӧткӱрилер. Ондо јаҥы «бичиктер» тузаланылар. Бу Кудайдыҥ бичиген јакарулары јердеги јаткан улустарды ӱредерине тӧзӧлгӧ болоры јарт (Откровение 20:12). Улустар јуулажарына эмес, је амыр-энчӱде јадарына ӱренгилер. Ӧлӱм экелип турган ончо мылтык-јепсел чактыҥ-чакка јоголор (Псалом 45:10). Јаҥы телекейде јаткан улустар бой-бойлорына сӱӱштӱ болорына ла, тоомјылу ла кӱндӱлӱ болуп јӱрерине ӱренгилеп алгылар.
14. Кижилик бир биледий болзо, телекей канайып солунар?
14 Ол тушта кижилик нак биле болор. Карындаштыкка ла бирликке бир де неме чаптык этпес (Псалом 132:1—3). Бир де тураны урчылардаҥ бектеери керек јок болор. Кажы ла јӱректе, кажы ла турада, бастыра јердиҥ ӱстиле амыр-энчӱ башкарар (Михей 4:4).
СӰӰНЧИЛӰ ТИРИЛИШ
15. Јерде кандый эки бӧлӱк улустар тиргизилер?
15 Муҥјылдыктыҥ ӧйинде улустар тирилери болор. Ӧнӧтийин Кудайдыҥ агару тынына, оныҥ иштеп турар ийдезине, удура кинчек эдип, Кудайдыҥ јарт айдылган кӱӱн-табына удурлажып, бойыныҥ јастыразын алынбаган улус качан да тиргизилбес (Матфейдеҥ 23:15, 33; Еврейлерге 6:4—6). Је, агару тынга удура кем кинчек эткен, а кем этпеген онызын Кудай бойы кӧрӧр. Је эки бӧлӱк улустыҥ тиргизилери быжу болор — ол «акту ла акту эместер» (Деяниелер 24:15). Анайдарда, улустар тиргизилери айлу-башту болор учурлу учун, јердиҥ ӱстинде јадарга озо баштап Иеговага чындык иштеген акту улустар бурылар — деп сананып бодооры сагышту (Еврейлерге 11:35—39).
16. а) Јерде тиргизилген «акту» улустардыҥ ортозында кем болор? б) Сен јебрен ӧйдӧги чындык ишчилердиҥ кемизиле таҥынаҥ таныжып алар кӱӱндӱ ле нениҥ учун?
16 Јуу-согуштардыҥ, кӧндӧлӧҥ кату-јоболдордыҥ ла божогон улустар керегинде јетирӱлердиҥ ордына, Иегованыҥ ишчилери тирилери керегинде сӱӱнчилӱ јарлар уккулар. Авель, Енох, Ной, Авраам, Сарра, Иов, Моисей, Раав, Руфь, Давид, Илия, Есфирь — бу сӱрекей чындык эр ле ӱй улустардыҥ тирилгени керегинде угарга кандый сӱӱнчилӱ ле кайкамчылу болор ине. Олор кижиниҥ јӱрегине тийип, јымырадар кайкамчылу библиялык кӧп учуралдарды чокум куучындап берер аргалу! Эрликтиҥ системазы јоголып калганына ла Иегова бойыныҥ адын агару эдип, бойыныҥ Јер-телекейле бийлеерин актаганын, олорго, анайда ок божогоны јаан удабаган акту улустарга билерге ырысту болорында бир де алаҥзу јок.
17. Кудайдыҥ чындык ишчилери, ӧскӧ тиргизилген улустарга кандый болужын јетиргилер?
17 Ээчий барган «акту эмес» миллиардтар улус ӧлӱмниҥ олјозынаҥ јайымдалар тушта, бу бӱдӱмјилӱ чындык ишчилер тиргизилеринде јаан болуш јетирер аргалу! Кӧп саба улустарда Иегова керегинде билгирди алар арга јок болгон. Эрлик «[олордыҥ] санаазын астыктырып салган» (2 Коринфяндарга 4:4). Је Јелбистиҥ ижи калас болор. Акту эмес улустар јердеги кеен, амыр-энчӱ јӱрӱмге бурылар. Олорды, Иегова ла оныҥ башкарып турган Уулы, Иисус Христос керегинде ӱредерге сӱрекей јакшы тӧзӧмӧлдӱ албаты кӱндӱлеп уткыыр. Качан миллиардтар тоолу тирилгендер бойыныҥ Јайаачызын билип ле сӱӱп баштаза, Иегова керегинде билгир мынаҥ озо качан да болбогон кеминде јерди толтырар.
18. Тиргизилген јуук улустарыҥды уткуп тура, сен сананзаҥ кандый сезимдерлӱ болорыҥ?
18 Тиргизилери биске канча кире сӱӱнчи экелгей не! Бистердеҥ ӧлӱм деген текши ӧштӱнеҥ кандый да болзо тӱбекке кемигис тӱшпеди деер? Оорунаҥ, карырынаҥ, јеткерлӱ учуралдаҥ, эмезе базынчыктаҥ улам сӱӱш ле најылыктыҥ колбузын ӱзип бистиҥ јуук кижибисти ӧлӱм апарганда кем ачу-коронго тӱшпеди? Јӱк ле сананып кӧр, олорло сӱрекей јакшы ла јараш Јерде биригерге кандый сӱӱнчилӱ болор. Адалары ла энелери, уулдары ла кыстары, најылары ла тӧрӧӧндӧри сӱӱнчидеҥ улам ыйлажып ла каткырыжып, бой бойлорын кучактажар.
АРТ УЧЫНДА БИЙИК КЕМИНЕ ЈЕТКЕНДЕР!
19. Муҥјылдыктыҥ ӧйинде кандый кайкал болор?
19 Христостыҥ муҥјылдык башкараар ӧйинде кайкал болор. Улустарга бу эҥ ле сагышка арткадый учурал болорында алаҥзу јогы јарт. Иегованыҥ башкарузыла оныҥ Уулы бойыныҥ актап алар тайылгазыныҥ баазын, кажы ла сӧс уккур ла чындык кижиге тузалу болзын деп тузаланар. Мынайып кинчек јайладылар, улустар бийик кемине једер (1 Иоанныҥ 2:2; Откровение 21:1—4).
20. а) Бийик кеминде болоры дегени ол не? б) Армагеддонды ӧдӱп чыккан ла тиргизилген улустар сӧстиҥ тереҥ учурыла качан тирилгилер?
20 Бийик кеми! Бу не мындый? Бу дезе, Адам ла Ева Иегова Кудайга удура кинчек эдеринеҥ озо кандый јӱрӱмдӱ болгон эди, ойто ондый јӱрӱмдӱ болоры дегени. Эт-каны, санаазы, сезимдери, кылык-јаҥдары, ич-кӧгӱстик ле оноҥ до ӧскӧ јандарынаҥ улустар бийик кеминде болуп, бӱдӱнге Кудайдыҥ ээжилерине келижер. Је бу ончо улус бир тӱҥей болорын темдектеп јат па? Чек јок! Иегованыҥ јайаандары: агаштар, чечектер, тындулар — Кудай јӱзӱн-башканы сӱӱп турганын ончо керелеп јат. Бастыра бийик кеминдеги улустардыҥ кажызында ла кемге де тӱҥей эмес бойлорыныҥ кылык-јаҥы ла јайалталары болор. Олор ончозы Кудайдыҥ белетеп салган јӱрӱмине сӱӱнип, јакшызынып јӱргӱлер. «Бир муҥ јыл тӱгенбегенче, арткан ӧлӱп калган улустар тирилбеген» — деп Откровениеде 20:5-чи ӱлгерде айдылып јат. Армагеддонды ӧдӱп чыккан кӧп тоолу улустар, оноҥ тиргизилген улустар качан бийик кемине јеткилей берзе, олор сӧстиҥ толо учурыла тирилгилер.
21. а) Иисустыҥ муҥјылдык башкарганыныҥ учында не болор? б) Эрлик ле оны јӧмӧжип тургандарла учы-тӱбинде не болор?
21 Бийик кеминде улустарга калганчы ченелтелер болор. Муҥ јылдыҥ учында Эрлик ле оныҥ кӧрмӧстӧри ас ӧйгӧ тамынаҥ чыгарылар, олорго калганчы катап улустарды Иегованаҥ туура апарарга чырмайып кӧрӧр арга берилер. Кезиктери Кудайга сӱӱжин ундып, бойлорыныҥ тӱбектӱ кӱӱнзегендериниҥ кийнинеҥ баргылар, је олордыҥ тӱймеени базылар. Јаҥыс ла бойын сӱӱп турар улустарды, анайда ок Эрликти ле оныҥ бастыра кӧрмӧстӧрин Иегова кату карузына тургузар. Ончо калју керектер эдип тургандар чактыҥ-чакка јоголып калар (Откровение 20:7—10).
СЕН НЕНИ ЭДЕРИҤ?
22. Сен сӱреен јараш ла јакшы Јерде нени эдер кӱӱндӱ?
22 Ӱргӱлји бойыныҥ эжиктерин сӱреен јараш ла јакшы јерге јадып, Иегова Кудайды сӱӱп турган улустардыҥ алдына јайа ачар. Ондо болотон сӱӱнчини бис јӱк ле арайдаҥ сананып кӧрӧдис; је ол улустыҥ ортозына сен де болор аргалу. Бийик кеминдеги улустардыҥ эткен эдимдери: кӱӱде, билгиринде ле ӧскӧ дӧ узаныштарда бу азыйгы телекейдиҥ улу ус улустарыныҥ эҥ артык кӧрӱмјилӱ эдимдерин канча катапка артыктар! Улустар бийик кеминде болор ине, ӧйгӧ база токтодулар болбос. Сен бийик кеминде кижи болуп, нени эдер аргалу болорыҥ, сананып кӧрзӧҥ. Анайда ок сананып кӧр, сен ле ӧскӧ дӧ улустар Иегованыҥ јайаандары керегинде — бистиҥ Телекейдиҥ миллиард галактикаларынаҥ баштайла, субатомлык эҥ ок бӧлӱгештерине јетире кандый кӧп немелерди билип алгыларар. Кижиликтиҥ бастыра једимдери, бистиҥ сӱӱп турган теҥеридеги Иегова Адабыстыҥ јӱрегин сӱӱндирер (Псалом 150:1—6).
23. Нениҥ учун јараш ла јакшы Јердеги јӱрӱм качан да кунукчыл болбос?
23 Јӱрӱм кунукчылду болбос. Јӱрӱм канча ла кире улалза, ончо ло кире јилбилӱ болор. Анайдарда, Кудай керегинде билгирге учы јок деп сен кӧрӱп јадыҥ (Римляндарга 11:33). Ӱргӱлјиниҥ улалып барганында, јаҥы шиҥжӱлерге учы-тӱби јок эп-аргалар ачылар (Екклесиаст 3:11). Оноҥ ары Иегова Кудайды билип тура, сен бойыҥныҥ јӱрӱмиҥди кандый да тоолу јылдарга эмес, а чактыҥ-чакка улалтып аларыҥ! (Псалом 21:27).
24, 25. Нениҥ учун сен Кудай керегинде билгирлерле эмди башкарынып јӱрер учурлу?
24 Сӱреен јараш чечектеп турар јакшы јердеги келер ӧй кандый ла јылыйтуга ла албаданышка турбайт па? Мында кандый да алаҥзу јок! Иегова сеге сӱреен кайкамчылу келер ӧйгӧ тӱлкӱӱр берип јат. Бу тӱлкӱӱр — Кудай керегинде билгир. Сен мыныла тузаланарыҥ ба?
25 Сен Иегованы сӱӱп турган болзоҥ, оныҥ кӱӱн-табын бӱдӱрип тура, чындык сӱӱнчини табарыҥ (1 Иоанныҥ 5:3). Бу јолго туруп, сен сӱреен кайкамчылу алкыш-быйандар аларыҥ! Керек дезе бу ӧлӱп бараткан телекейде де Кудай керегинде билгирди тузаланып тура, сен канча кире ырысту болорыҥ. А келер ӧйдӧги кайрал чек баа јок, нениҥ учун дезе бу билгир ӱргӱлји јӱрӱмге апарып јат! Эмди эҥ ле кыймыктанатан ӧй. Кудай керегинде билгир аайынча јӱрерге јалтанбас бол. Иеговага бойыҥныҥ сӱӱжиҥди кӧргӱзип тур. Оныҥ агару адын тооп, Эрлик — тӧгӱнчи деп чынын јартап тур. Чындык ойгорло билгирдиҥ Тӧзӧӧчизи, Иегова Кудай, сен учун бастыра јӱрегиле тыҥ сӱӱнер (Иеремия 31:3; Софония 3:17). Ол сени ӱргӱлјиге сӱӱр!
БОЙЫҤНЫҤ БИЛГИРЛЕРИҤДИ ШИҤДЕП КӦР
«Чындык јӱрӱм» дегени ол не?
Армагеддонныҥ кийнинде јердиҥ ӱстинде не болор?
Јердиҥ ӱстинде кем тиргизилер?
Кижилик бийик кемине канайып јединер ле учы-учында ол канайып ченелер?
Сӱреен јараш ла јакшы Јерди сананып, сен не керегинде амадап сананадыҥ?
[Ӱренериниҥ сурактары]
[188, 189 бӱктердеги јурук]
Качан Кудай керегинде билгир јерди толтырза, сӱреен јараш ла јакшы Јерде јадарга сен иженбейдиҥ бе?
