Сеге кандый јаҥды керекке алар керек?
14-чи бажалык
Сеге кандый јаҥды керекке алар керек?
1, 2. Кандый ла јаҥ каршу јетирет пе? Јартап бер.
«ЈАҤ» — бу сӧс кӧп улустарга чек јарабай јат. Мынызы јарт, нениҥ учун дезе јаҥла — иште де, билелерде де, башкарып та турган јерлерде јаман тузаланып турган ине. «Кижи кижиле ого каршулу этире башкарат» — деп, Библия чике айдат (Екклесиаст 8:9). Эйе, кӧп саба улустар бойлорын ла сӱӱп, ӧскӧлӧриле килемји јок бийлеп тургандар.
2 Је кажы ла јаҥ каршу јетирбей јат. Темдектезе, бисти эт-каныс башкарып турган деп айдарга јараар. Ол биске тынарга, ажанарга, ичерге, уйуктарга «јакарат». Је бу кыспактап турган ба? Јок. Бу некелтелерге јӧпсинип, бис бойыска ла туза экеледис. Бис бойыстыҥ эт-каныстыҥ некелтелерин сананбай ла бӱдӱрип турарыста, бистеҥ санаанып бӱдӱретенин некеп турган јаҥдардыҥ бӱдӱмдери бар. Кезик темдектерди шиҥдеп кӧрӧктӧр.
ЭҤ БИЙИК ЈАҤ
3. Нениҥ учун Иегова «Бастыраны тудар» деп адалып турар јаҥду?
3 Библияда Иегова кӧп катап «Бастыраны тудар» деп адалып јат. Бастыраны тудатаны — бу дезе эҥ бийик јаҥду болуп турганы. Иеговага мындый јаҥду болорын не берет? Откровениеде 4:11-де кару берилет: «Сен Кайракан, макты ла ак-чекти ле ийдени аларына јарамыкту, нениҥ учун дезе бастыраны Сен јайагаҥ ла Сениҥ кӱӱн-табыҥла ончо бар болуп јат ла јайалган».
4. Иегова бойыныҥ јаҥын канайда бӱдӱрип јат?
4 Иегова — бистиҥ Јайаачыбыс, анайдарда ол јаҥла бойыныҥ кӧрӱмиле тузаланар аргалу. Кудайда «кӧп ийде-кӱч» барын тоого алза, бу коркырына экелер аргалу. Ол «Бастыраны эдип ийер Кудай» деп адалып турган — бу сӧстӧр еврей ӱлгерлерде бастыраны јеҥип турар ийде керегинде шӱӱлтени берип јат (Исаия 40:26; Бытие 17:1). Андый да болзо Иегова бойыныҥ ийдезин кӧргӱзип тура, килеҥкей Кудай болуп артат, нениҥ учун дезе оныҥ тӧс кебедели — сӱӱш (1 Иоанныҥ 4:16).
5. Нениҥ учун Иеговага багынарга кӱч эмес?
5 Килинчектӱ улус кородобой турза, Иегова кату каруузына тургузар деп озодоҥ айдып та салган болзо, Моисей Иегованы элдеҥ озо «Чындык Кудай, бойыныҥ јӧптӧжӱзин, Оны сӱӱп ле Оныҥ јакылталарын кичееп тургандарга буурзагын кичеейт» деп билер болгон (Второзаконие 7:9). Сананып ийзеҥ де! Кудай, ончо Телекейде эҥ бийик јаҥду да болзо, ол бисти ого иштезин деп албадабай јат. Оныҥ ордына, ого бисти оныҥ сӱӱжи тартат (Римляндарга 2:4; 5:8). Керек дезе Иегованыҥ јаҥына багынары сӱӱнчилӱ, нениҥ учун дезе оныҥ јасактары бистерге јаҥыс ла туза экелип јат (Псалом 18:8, 9).
6. Едем јеринде јаҥ керегинде сурак канайып кӧдӱрилген ле бу неге экелди?
6 Бистиҥ ада-ӧбӧкӧлӧрис Кудайдыҥ бийленерин керексибей јектеп салгандар. Олор јаманды ла јакшыны бойлоры оҥдоп јӱрерге кӱӱнзегендер (Бытие 3:4—6). Мынаҥ улам олорды сӱреен јараш ла јакшы айлынаҥ сӱрӱп ийгендер. Улустар бийик кеминде эмес эл-јон до болзо, је кийнинде Иегова олорды эптӱ-јӧптӱ јатсын деп јаҥныҥ бӱдӱмин тӧзӧп алзын деп јараткан. Бу јаҥдардыҥ кезик бӱдӱмдери кандый? Бис Кудайга јараарга ол јаҥдарга кандый кемине јетире багынар учурлу?
«БИЙИК ЈАҤДАР»
7. «Бийик јаҥдар» дегени ол не, оноҥ Кудайдыҥ јаҥына кӧрӧ олор кандый јерде турат?
7 «Кажы ла кижи бийик јаҥдарга уккур болзын; нениҥ учун дезе Кудайдаҥ эмес јаҥдар јок» — деп, апостол Павел бичиген. «Бийик јаҥдар» дегени ол не? Анаҥ ары ӱлгерлерде Павелдиҥ сӧстӧри «бийик јаҥдар» — бу ороондордыҥ јаҥдары деп кӧргӱзип јат (Римляндарга 13:1—7 ЭмК; Титке 3:1). Бу јаҥдарды Иегова этпеген, је олорды бар болзын деп јарадат. Оныҥ учун: «Эмдиги бар јаҥдар Кудайдаҥ тургузылган» — деп, Павел бичиген. Бу сӧстӧр јердиҥ јаҥдары керегинде нени айдат? Олор Кудайдыҥ јаҥынаҥ камаанду эмезе јабыс туруп јат (Иоаннаҥ 19:10, 11). Оныҥ учун, качан Кудайдыҥ јасактары ла кижиликтиҥ јасактары ортодо удурлажулар болуп турганда, христиандар Библияла ӱредилген уйады аайынча башкарынар учурлу. «Улуска кӧрӧ Кудайга артык багынар учурлу» (Деяниелер 5:29).
8. Бийик јаҥдар бистерге кандый туза јетирет ле олорго багынып турганысты канайып кӧргӱзерис?
8 Је кӧп учуралдарда ээлдиҥ бийик јаҥдары ‘Кудайдыҥ кулдарындый, биске јакшыны’ эткилейт (Римляндарга 13:4). Канайып? Керектӱ немелерле јеткилдер јаан таркадылган болуштар керегинде сананып кӧр, темдектезе: почталык колбулар, милицияныҥ ижи, ӧрт чыкпазын корыры, суу јӱрериниҥ системазын ла канализацияны, анайда ок ӱредӱ алар эп-аргалар — ончо мыны биске бийик јаҥдар јетирет. «Бу учун слер олорго калан тӧлӧп јадыгар, нениҥ учун дезе олор Кудайдыҥ ишчилери, бу мыныла јантайын ла божобой иштегилейт» — деп Павел бичиген (Римляндарга 13:6). Бис калан јанынаҥ ла ӧскӧ дӧ јасак аайынча бӱдӱретен ээжилерде «бойыс чындык болор учурлу» (Еврейлерге 13:18).
9, 10. а) Кудайдыҥ тургускан бӱдӱминде бийик јаҥдар кандый иш бӱдӱрип јат? б) Нениҥ учун бийик јаҥдарга кедерлери јастыра болор эди?
9 Кезик ӧйлӧрдӧ бийик јаҥдар бойыныҥ берилген чыгартылу ижиле калју тузаланып турганы чын. Бисти олорго уккур болор карунаҥ бу јайымдар ба? Јок. Иегова олордыҥ јастыра керектерин кӧрӱп јат (Притчалар 15:3). Улустыҥ башкарып турганына, садынарына ла тӧгӱндерине ончо каршулу керектерге оныҥ чыдажып турганы ол кӧзин јуҥуп турган деп темдектебей јат; анайда ок ол бистеҥ мыны база сакыбай јат. Чын аайынча Кудай удабас «бастыра каандыктарды јемирип, јок эдер», олорды бойыныҥ чындык башкарузыла солыыр (Даниил 2:44). Је эм тургуза бийик јаҥдар бир кезек тузаны јетиргилеп јат.
10 «Јаҥга удурлажып турган кижи Кудайдыҥ тургусканына удурлажып јат» — деп, Павел јартаган (Римляндарга 13:2). Бийик јаҥдар — бу Кудайдыҥ «тургусканы», мынаҥ улам кандый да болзо аайы-бажы болор, а бу јок болгон болзо аай-тей јогы ла бускалаҥ бийленер эди. Библияныҥ кӧрӱмиле болзо јаҥдарга удурлашканы јастыра, анайда ок сананбазы болуп јат. Темдектезе, сен кестиртип (операция) салгаҥ деп сананып кӧр, оноҥ шырканы учуктарла кӧктӧп салгандар. Учуктар сениҥ эт-каныҥа туш та болзо, ол канча да кире ӧйгӧ аҥылу амадуга болужат. Сен олорды ӧйинеҥ эрте уштып салзаҥ бойыҥа ла каршу экелериҥ. Анайдала ээл јаҥдар Кудайдыҥ баштапкы амадуларыныҥ бӧлӱги болбогон. Је оныҥ Каандыгы эм тура јерле текши башкарбай турганда, кижиликтиҥ башкарулары эл-јонды јӧмӧп, эмдиги ӧйдӧ Кудайдыҥ берген ижин бӱдӱрип јадылар. Оныҥ учун бис, элдеҥ озо Кудайдыҥ јасактарын јарадып турган да болзобыс, бийик јаҥдардыҥ айтканын бӱдӱрер учурлу.
БИЛЕДЕГИ ЈАҤ
11. Сен башчыныҥ принцибын канайып јартап берер эдиҥ?
11 Биле — бу кижилик јонныҥ тӧзӧлгӧзи. Биледе ӧбӧгӧни ле ӱйи сӱреен јакшы најылык куучын табар, а балдары коорулу ла јажы јеткенине белен болор аргалу (Притчалар 5:15—21; Ефесяндарга 6:1—4). Билениҥ улустары эптӱ-јӧптӱ ле амыр-энчӱ јатсын деп, мындый сӱреен јакшы тӧзӧлгӧн бӱдӱмди јакшы башкарар керек. Иегова бу тӧзӧлгӧн бӱдӱмди 1 Коринфяндарга 11:3-те бичилген: «Кандый ла ӧбӧгӧнгӧ башчы Христос, ӱйине — ӧбӧгӧни, а Христоско башчы — Кудай» деген башкарар принциптиҥ болужыла бӱдӱрип јат.
12, 13. Билениҥ башчызы кем болот ло Иисустыҥ башчы теминеҥ нени ӱренип алар арга бар?
12 Ӧбӧгӧни — билениҥ башчызы. Је оныҥ ӱстинде база башчы бар — Иисус Христос. «Ӧбӧгӧндӧр, бойыгардыҥ ӱйлерерди сӱӱгер, канайып Христос Серкпени [«јуунды», ЈТ] тыҥ сӱӱген ле Бойын ол учун берип ийген» — деп Павел бичиген (Ефесяндарга 5:25). Иисус јаантайын јуунга канайып баштанып турган болгон, онойып ла ӧбӧгӧни ӱйине баштанганда, ол Христоско бойыныҥ багынып турганын кӧргӱзет (1 Иоанныҥ 2:6). Иисуска сӱреен јаан јаҥ берилген, је ол оны ла сӱреен јымжак, сагышту ла сӱӱштӱ тузаланып јат (Матфейдеҥ 20:25—28). Иисус кижи болуп тура, бойыныҥ јаҥыла качан да јаман тузаланбаган. Ол «јобош ло улуркабас јӱректӱ», бойыныҥ ӱренчиктерин «кулдар» деп эмес, а «најыларым» деп адап туратан болгон. «Мен слерди токунадып саларым» — деп, Иисус олорго айткан, ол онойдо ло керектериле эдип салган (Матфейдеҥ 11:28, 29; Иоаннаҥ 15:15).
13 Иисустыҥ теми ӧбӧгӧндӧргӧ христиан башкару кату-калју болорго јаҥ бербей турганына ӱредет. Оныҥ ордына, ол тоомјылу ла бойына килебес сӱӱштӱ болорына молју берет. Бу ӱйине — сӧслӧ дӧ болзын, эт-канына да болзын кату-калју эдерин токтодып јат (Ефесяндарга 4:29, 31, 32; 5:28, 29; Колоссяндарга 3:19). Христиан эр кижи ӱйине комой баштанып турар болзо, ӧскӧ јакшы керектеринеҥ туза болбос, мӱргӱӱлинде буудактар болорынаҥ айабас (1 Коринфяндарга 13:1—3; 1 Пётрдыҥ 3:7).
14, 15. Кудай керегинде билгир ӱйине канайып ӧбӧгӧнине багынарга болужып јат?
14 Качан ӧбӧгӧни Христостыҥ темине тӱҥейлежип турза, Ефесяндарга 5:22, 23-теги «Ӱйлери, Кайраканга чылап бойыгардыҥ ӧбӧгӧндӧрӧргӧ уккур болыгар, нениҥ учун дезе ӧбӧгӧни ӱйиниҥ башчызы, канайып Христос Серкпениҥ башчызы» деген сӧстӧр аайынча ӱйине эдерге јеҥил болор. Канайып ӧбӧгӧни Христоско уккур болот, онойып ла ӱйи ӧбӧгӧнине уккур болор учурлу. Онойдо ок, керсӱ ле јалакай ӱй кижи, бойыныҥ Кудайга јараар ойгоры ла иш эдерин сӱӱп турганы учун мактап ла тооп турарын иштеп алат деп Библия кӧргӱзет (Притчалар 31:10—31).
15 Христиан ӱй кижи бойыныҥ ӧбӧгӧниниҥ сӧзинеҥ чыкпазы бӱдӱнге эмес је ӧйи-кеминде. Бу дезе, ӧбӧгӧниниҥ сӧзин угары Кудайдыҥ јасагын бузып турза, кижини укпай, Кудайдыҥ сӧзин угар керек. Је керек дезе мындый да учуралда ӱйиниҥ јана баспас кӧрӱми јымжак, «јобош ло унчукпас кӱӱндӱ» болор учурлу. Кудай керегинде билгирдеҥ улам, ол јакшы ӱйи болуп калганы иле кӧрӱнип турар учурлу (1 Пётрдыҥ 3:1—4). Мынайып ла бӱтпей турган ӱйлӱ христиан эр кижи керегинде база айдарга јараар. Оныҥ библиялык принциптерди тузаланып турары, оны јакшы ӧбӧгӧни эдер учурлу.
16. Качан Иисус бала болгон тужында, ол балдарга кандый тем берген?
16 Ефесяндарга 6:1-де: «Балдар, Кайраканда ада-энегердиҥ сӧзине уккур болыгар, мыны чындык некеп јат» деп, аҥылу ајару балдарга эдилип јат. Јиит христиандар Иисустаҥ тем алгылайт: ол чыдап турган тушта бойыныҥ ада-энезиниҥ сӧзине уккур болгон. Иисус сӧс уккур уулчак болуп, «чыдап, ойгор болуп, Кудайда да кижилерде де сӱӱжи тыҥып турды» (Луканаҥ 2:51, 52).
17. Ада-энелер бойлорыныҥ јаҥдарын тузаланып, балдарына кандый салтарын јетирер аргалу?
17 Ада-энелер бойлорыныҥ бӱдӱретен керектерине канайып баштангылап турарынаҥ улам, балдары јаҥдарды тоор эмезе удурлажар (Притчалар 22:6). Оныҥ учун ада-энелер, мен бойымныҥ јаҥдарымла кату эмезе сӱӱштӱ тузаланып тургам ба? — деп бойлорынаҥ сураары јолду. Мен ӧйинеҥ ӧткӱре килеҥкей бе? Кудайдаҥ јалтанып турган ада-энелер сӱӱштӱ, ајарыҥкай болгылазын, је бу ла ок ӧйдӧ качан керек Кудайга јараар принциптерге тийип турганда, олорлор јана баспас болор учурлу. Шак бу керегинде Павел бичиген: «Адалар, бойыгардыҥ балдарыгарды ачындырбагар [сӧстӧҥ сӧскӧ «олорды чугулданарына оспоктоп, ийде салбагар»], је олорды Кайраканныҥ ӱредӱзине таскадып ӱредигер» (Ефесяндарга 6:4; Колоссяндарга 3:21).
18. Ада-энелер балдарын канайып таскадып ӱредер учурлу?
18 Ада-энелер бойлорыныҥ таскадып ӱредип турганына тереҥ санаанып кӧрӧр учурлу, анчада ла балдар сӧс уккур ла олорды сӱӱндирип турзын деп кӱӱнзегилеп турган болзо (Притчалар 23:24, 25). Библияда ӱредери дегени, ӱредип, чын јолго таскадаарын темдектеп јат (Притчалар 4:1; 8:33). Ол кату-калју ла чугулду эмес, а јымжак ла сӱӱштиҥ колбуларыла ӧдӧр керек. Оныҥ учун христиан ада-энелер бойыныҥ балдарын каруузына тургузып турган тушта, бойлорын токтодынып, ойгор баштанар учурлу (Притчалар 1:7).
ЈУУНДАГЫ ЈАҤ
19. Кудай христиан јуундарда јакшы аай-тӧй керегинде канайып кичеенген?
19 Иегова — чындык Кудай болордо, ол бойыныҥ албатызына ижемјилӱ ле јакшы тӧзӧмӧлдӱ башкару берерине кичеенген деп бодооры чын. Эйе, ол Иисусты христианлык јуунныҥ Башчызы эдип кӧстӧп койгон (1 Коринфяндарга 14:33, 40; Ефесяндарга 1:20—23). Кудай Христос башкарып турган кӧрӱнбес башкару кийдирген, бу мындый башкарунаҥ улам кажы ла јуунда кӧстӧп койгон аксагалдар ӱӱрди кичеенип, кӱӱнзеп ле сӱӱштӱ кабырат (1 Пётрдыҥ 5:2, 3). Олорго кӧп немелерде болушчы ишчилер болушкылап, јуунда баалу иш иштегилейт (Филиппийецтерге 1:1).
20. Бистерге нениҥ учун кӧстӧлгӧн христиан аксагалдарга багынар керек ле нениҥ учун бу бистерге тузалу?
20 Христиан аксагалдар керегинде Павел бичиген: «Бойыгардыҥ ӱредӱчилерердиҥ айтканына уккур ла сӧстӧҥ чыкпас болугар, нениҥ учун дезе олор каруузын беретен учурлу болуп, амыры јок слердиҥ јӱрӱмер учун кичеенгилейт; олор мыны ӱшкӱрбей сӱӱнчилӱ эткилезин, нениҥ учун дезе ӱшкӱргени слерге тузалу эмес» (Еврейлерге 13:17). Ойгор Кудай христиан кичееп кӧрӧӧчилерге (надзиратель) јуунныҥ ич-кӧгӱстик некелтелери јанынаҥ килеп болушсын деп јакару берген. Бу аксагалдар духовенстволык класс тӧзӧбӧй јадылар. Олор Кудайдыҥ кулдары ла ишчилери, кожо бажырып турган христиандардыҥ керексиништерине килеп, бистиҥ Ӱредӱчи Иисус Христос канайып эткен, онойдо ло болужын јетиргилеп јат (Иоанныҥ 10:14, 15). Библяныҥ кӧрӱмине келижип турган эр улустар бистиҥ ич-кӧгӱстик ӧзӱмиске ле једимиске јилбиркеп турганын билип тура, бис олорло кожо иштеерге ле олордыҥ айтканын бӱдӱрерге кӱӱнзеткенин сезедис (1 Коринфяндарга 16:16).
21. Кӧстӧлгӧн аксагалдар кожо христиан болуп тургандарга кандый кӱӱн-санааныҥ болужын јетирерге амадагылап јат?
21 Кезикте койлор ӱӱринеҥ астыгып барарынаҥ айабас, эмезе олорго телекейдиҥ сӱреен каршулу салтары јаманын јетирердеҥ маат јок. Тӧс Кӱдӱчиниҥ башкарузыла аксагалдар иженип берген койлордыҥ керектерине ајарыҥкай болгылап, олорго таҥынаҥ бойлоры ајару эдерге кичеенгилейт (1 Пётрдыҥ 5:4). Олор јуунныҥ улустарына барып, олорды оморкодып тургулайт. Јелбис Кудайдыҥ албатызыныҥ амыр-энчизӱн бузарга албаданып турганын аксагалдар билип, ӱстинеҥ келип турган ойгорло јӱзӱн-јӱӱр уур-кӱчтердиҥ аайы бажына чыккылайт (Иаковтыҥ 3:17, 18). Бӱдӱмјиде бир санаа-шӱӱлте ле бирлик болзын деп олор бастыра ийдезиле јӧмӧшкилейт,— шак бу керегинде Иисус бойы мӱргӱген (Иоаннаҥ 17:20—22; 1 Коринфяндарга 1:10).
22. Кем-кем кинчек эдип јастырган болзо, аксагалдар кандый болуш јетиргилеп јат?
22 Је христиан кижи кандый бир шылтактаҥ улам шыралап, эмезе кинчек эткенинеҥ санааркап турган болзо не болот? Библиялык токунадар јӧп лӧ аксагалдардыҥ акту јӱрегинеҥ айткан мӱргӱӱлдери ол кижиге ич-кӧгӱстик су-кадыгын орныктырып аларга болыжын јетирер (Иаковтыҥ 5:13—15). Анайда ок агару тынла кӧстӧлгӧн бу эр улустарга, јуун ич-кӧгӱстик ле кылык-јаҥы јанынаҥ ару болзын деп, кинчектиҥ јолыла барып, јеткер экелип турган кандый ла кижини уйалтып, тӱзедер кеми берилген (Деяниелер 20:28; Титке 1:9; 2:15). Јуунды ару болзын деп кичееп аларга, јеткерлӱ ле кинчектӱ керектер керегинде айдарга келижердеҥ айабас (Левит 5:1). Христиан кижи јеткерлӱ кинчек эткен соҥында, Библияга тӧзӧлӧнгӧн уйалтып токтодорын ла тӱзедер кемин алынып, анайда ок чын ла кородоорын кӧргӱзип турза, ого болуш јетирилер. Кудайдыҥ јасагын бузып, кородоорын кӧргӱспей кедерлеп тургандарды кыйалта јогынаҥ куучындажарынаҥ айрып салар (1 Коринфяндарга 5:9—13).
23. Јуунныҥ јакшы болоры учун христиан кичееп кӧрӧӧчилер нени эткилейт?
23 Иисус Христос Каанныҥ башкарузыла, Кудайдыҥ албатызын токунадып, корулап ла тыҥыдып турарына, ич-кӧгӱзиле бай эр-јажына јеткен эр улустар кӧстӧлип тургузылар деп Библияда озолондыра айдылган (Исаия 32:1, 2). Олор бойлорына јакшылыкту јардыҥ таркадачыларыныҥ, кӱдӱчилердиҥ ле ӱредӱчилердиҥ башкарузын алынып, анайда ок ич-кӧгӱстик ӧзӱмине јӧмӧжӧр учурлу (Ефесяндарга 4:11, 12, 16). Христиан кичееп кӧрӧӧчилер (надзирательдер) кезикте уйалтып токтодор, чеберлеер ле кожо бӱдӱп тургандарды јакарар аргалу да болзо, Кудайдыҥ Сӧзине тӧзӧлӧнгӧн аксагалдардыҥ јакшы ӱредӱзин тузаланары бастыразына јӱрӱмниҥ јолына артарга болужып јат (Притчалар 3:11, 12; 6:23; Титке 2:1).
ИЕГОВАНЫҤ КӦРӰМИН ЈАҤГА АЛ
24. Бистер кӱнӱҥ ле кандый ченелтелерле туштажып јадыбыс?
24 Баштапкы эр ле ӱй кижи јаҥга багынарыныҥ ченелтезине тӱшкен. Бого тӱҥей ченелтелерге бис кӱнӱҥ ле туштап турганыс кайкамчылу эмес. Эрлик Јелбис улустыҥ ортозына тӱймеенниҥ кӱӱн-санаазын јӧмӧп јат (Ефесяндарга 2:2). Ненеҥ де камаанду болбозыныҥ јолы багыныштыҥ јолынаҥ канча катапка јилбилӱ.
25. Тӱймеендӱ кӱӱн-санааны јектери ле Кудай тузаланып, эмезе јарадып турган јаҥдарга багынары нениҥ учун тузалу?
25 Је бис бу телекейдиҥ тӱймеендӱ кӱӱн-санаазын јеектер учурлу. Мынайда эдип тура, Кудайга јараар багыныш јаан кайралдар экелип турганын бис кӧрӱп ийерис. Темдектезе, јаҥдарга кедерлежип, соҥында амыры јок болуп, кунугып турган улустардыҥ сезимдериндий сезимдердеҥ бис айрыларыс. Кӧп билелердеги јаҥжыгып калган кериш-урушты бис астадып саларыс. Кожо христиан болуп тургандардыҥ ортозында акту јӱректеҥ ле сӱӱшле тоолгон куучындарла сӱӱнип јакшызынарыс. Је эҥ ле учурлузы — бистиҥ Кудайга јараар багыныжыс эҥ бийик јаҥныҥ Ээзиле — Иеговала — јакшы колбуларга экелер.
БОЙЫҤНЫҤ БИЛГИРЛЕРИҤДИ ШИҤДЕП КӦР
Иегова бойыныҥ јаҥыла канайып тузаланып јат?
«Бийик јаҥдар» дегени кемдер ле бис олорго канайып багынып јадыс?
Билениҥ кажы ла кижизин башкарту принцип неге јакарат?
Христиан јуунда багынып турганысты бис канайып кӧргӱзер аргалу?
[Ӱренериниҥ сурактары]
[134 бӱктеги рамка]
СӦС УККУР, А ЈАҤДЫ БУСПАЙ ЈАДЫЛАР
Иегованыҥ Керечилери јакшылыкту јетирӱни таркадар ишти ачык эдип тура, чып-чын амыр-энчӱ ле јеткер јогын кӱӱнзеген улустыҥ сок јаҥыс ижемјизи — ол Кудайдыҥ Каандыгы деп кӧргӱскилейт. Је бу Кудайдыҥ Каандыгыныҥ кичеенкей јарлаачылары јадып турган јерлеринде кандый да учуралда башкарулардыҥ тоомјызын буспай јадылар. Оныҥ ордына Керечилер — эҥ ле тоомјылу ла јасакуккур албаты. «Бастыра кудайлык јаҥдардыҥ бӧлӱктери Иегованыҥ керечилери ошкош болгон болзо — деп, бир африкан орооныныҥ ээл ишчизи айдат,— бистерде ӧлтӱриштер, тоноп уурданатаны, јажы јетпеген каршучылдар, тӱрмеде бектелген улустар, анайда ок атомныҥ бомбалары болбос эди. Улустар јаантайын эжиктерин бектегилебес те эди».
Мыны баалап, кӧп ороондордогы јаҥныҥ органдары Керечилерге јакшылыкту јетирӱни таркадар ишти буудак јогынаҥ ӧткӱрерин јараткылайт. Ӧскӧ ороондордо Иегованыҥ Керечилери улуска јакшы болорына болужып турганын јаҥдар оҥдогон соҥында, токтодуларды ла киреледишти алып салдылар. Апостол Павел јаҥга уккур болоры керегинде мынайда бичиген: «Јакшыны эдип тур, оноҥ мактуны аларыҥ» (Римляндарга 13:1, 3).
