Сени ырысту келер ӧй сакып јат!
1-кы бажалык
Сени ырысту келер ӧй сакып јат!
1, 2. Јайаачы сеге нени кӱӱнзейт?
ЈУУК кижиниҥ тыҥ кучактаганы. Најыларыла кожо ажанып отура јилбиркедер каткы. Кижи каруузыдар балдардыҥ ойыны. Мындый ӧйлӧр бистерге сӱӱнчи сыйлап јат. Је јӱрӱм кӧп улуска ээчий-деечий коркушту кӱч буудактар экелет. Сениҥ ӱлӱҥе бу келишкен болзо — санаркап чӧкӧбӧ.
2 Кудай сени јараш јерде, сӱрекей јакшы айалгада јадып, ырысту болзын деп кӱӱнзейт. Бу јаҥыс ла амаду эмес, келер ырысту ӧйгӧ Кудай сеге тӱлкӱӱр берет. Бу тӱлкӱӱр билгир болуп јат.
3. Кандый билгир ырыска тӱлкӱӱр болот ло нениҥ учун ондый билгирди Кудай берер деп бис ижемјилӱ болор аргалу?
3 Куучын-эрмек улустыҥ ойгорын артыктаар аҥылу билгир керегинде болот. Бу — «Кудай керегинде билгир» (Притчалар 2:5). 2 000 јыл кирези кайра Библияныҥ бир бичиичизи айткан: «Кандый ла тураны та кем де тудат, а ончо немени Кудай јайаган» (Еврейлерге 3:4). Ончо немениҥ Јайаачызыныҥ билгири керегинде сананып кӧрзӧҥдӧ! Кудай јылдыстарды тоолоп, олорго ат берип турган деп, Библия айдат. Јаҥыс ла бистиҥ галактикада јӱстер миллиард јылдыстар тоололот, а астрономдордыҥ айтканыла јӱс миллиардтарга јуук галактикалар бар дегенин сананып кӧрзӧ кандый кайкамчылу! (Псалом 146:4). Анайда ок Кудай бис керегинде бастыра билер, оныҥ учун бистиҥ сӱрекей керектӱ сурактарыбыска јеткил каруузын кем берер аргалу? (Матфейдеҥ 10:30).
4. Нениҥ учун бистиҥ јӱрӱмиске керектӱ башкаруны бис Кудайдаҥ сакыыр аргалу ла мындый башкаруны кандый бичик берет?
4 Кӧӧликтер јазап турган эки эр кижи керегинде сананып ал. Сыныкты јазап алар деген ижемјини бирӱзи јылыйтып, јепселдерин таштады. Экинчизи меҥдебей бузукты јазап, тӱлкӱӱрди эбиртип, кӱлӱмзиренет — ийдесалгыш (двигатель) табыштанып јакшы иштей берди. Заводтыҥ берген башкарынып тузаланар бичиги олордыҥ кемизинде болгонын табары кӱч эмес. Анайда ла ок Кудай бистиҥ јӱрӱмиске башкару берип турганы санаа-шӱӱлтелӱ эмес пе? Библияныҥ айтканыла ол бисти баштандырып јӱрер Кудайдыҥ бичиги болуп, анайда ок Кудай керегинде билгирлӱ деп, сен байла билер болбойыҥ (2 Тимофейге 3:16).
5. Библиядагы билгир канча кире баалу?
5 Библияныҥ шӱӱлтези чындык болзо, ондо канча кире кӧп баалу билгирлер барын сананып кӧрзӧҥ! Притчада 2:1—5 кӧмӱп салган байлык эрјинени бедирегендий, ойгорды — улустыҥ сананып тапкан «јеринеҥ» эмес, а Кудайдыҥ Сӧзинеҥ бедирезин деп Библия бисти кӱӱнзедет. Бис «Кудай керегинде билгирди» Библиянаҥ бедиреп турган болзобыс, оны кыйыш јогынаҥ табарыс. Кудай бистиҥ кӧп эмес аргабысты ла керексинип турган не немегисти билип, бисти нак ла ырысту јӱрӱм јӱрзин деп болужар јакарулар берет (Псалом 102:14; Исаия 48:17). Онойдо ок Кудай керегинде билгир јӱрекке тийер јакшы јетирӱ айдат.
ӰРГӰЛЈИ ЈӰРӰМ!
6. Иисус улусты Кудайдыҥ билгири керегинде неде бӱдӱмјилеген?
6 Тӱӱки јӱрӱми јакшы јарлу Иисус Христос, бу јанынаҥ Кудайдыҥ билгири керегинде јарт айдып берген. «Сени, јаҥыс чындык Кудайды, Сениҥ ийген Иисус Христосты билери, ӱргӱлји јӱрӱм дегени бу» деп ол айткан (Иоаннаҥ 17:3). Сананып кӧр — бу билгир ӱргӱлји јӱрӱмге апарат!
7. Кудай бисти ӧлӱп турзын деп кӱӱнзебегенине, кандый чын јартамалдар бар?
7 Ӱргӱлји јӱрӱмди качан да болбос амаду деп јеектерге меҥдебе. Оныҥ ордына, кижиниҥ эт-каны канайып јайалганын темдектеп ајаруга алып кӧр. Бисте угар, кӧрӧр, сезер, амтан билер, јыт алар сезимдер бар, бу мыны ӱзе кайкамчылу сананып шӱӱп салган. Јердиҥ ӱстинде андый кӧп немелер: амтанду курсак, куштардыҥ кӱӱзе кожоҥдоры, јараш јытту чечектер, јилбилӱ јердиҥ бӱдӱми, јакшы најылык колбулар — бу немелер бистердиҥ сезим органдар ажыра сӱӱнчи экелет! Ончо бу немеле бис кандый бир суперкомпьютердеҥ канча кире артык бойыстыҥ меегис ажыра јилбиркеп јакшызынар аргалу. Сениҥ санааҥ ла болзо бистиҥ Јайаачыбыс бисти ӧлӱп, ончо бу немелерди јылыйтып алзын деп турган эмеш пе? Ол бисти ырысту ла ӱргӱлјиге јатсын деген тӱп-шӱӱлте эткени јакшы эмес пе? Кудай керегинде билгир нени кӧргӱзип турганын эмди сен билип алдыҥ.
СӰРЕЕН ЈАКШЫ ЛА ЈАРАШ ЈЕРДЕГИ ЈӰРӰМ
8. Кижиликтиҥ келетен ӧйи керегинде Библия нени айдат?
8 Библияда јер ле кижиликтиҥ келер ӧйин — сӱреен јакшы ла јараш Јер (Рай) — деп айдарга јараар! «Менле кожо сӱреен јакшы ла јараш Јерде болорыҥ» — деп, Иисус бир ӧлӱп јаткан кижиге темдектеп айткан (Луканаҥ 23:43). Јараш ла јакшы Јер болор дегени, ол кижиниҥ сагыжына бистиҥ ада-ӧбӧкӧлӧристиҥ, Адам ла Еваныҥ, ырысту јаткан јерин алаҥзу јогынаҥ эбелткен. Кудай олорды јайаарда, олор бийик кеминде болуп, Јайаачыныҥ эдип берген парк ошкош садында јаткылаган. Ондый айалгага келиштире ол Едем сад деп ададып, «јилбиркеп јакшызынар садты» темдектеген.
9. Сӱреен јакшы ла јараш Јердеги јӱрӱм кандый болгон?
9 Бу сад кандый јараш болды не! Бу чыннаҥ ла сӱреен јараш ла јакшы јер болгон. Ондо кеен кӧктиҥ ортозында јулукту јиилектер экелер агаштар ӧскӧн. Адам ла Ева бойлорыныҥ ээленерин шиҥжӱӱлеп, кристалдый ару, амтанду суу ичкилеп, агаштардаҥ јиилектер јуугылаган — олорго не де чаптыгын јетирбеген де, коркытпаган да. Керек дезе тындулар да олорго кандый да каршуузын јетирбеген, Кудай Адам ла Евага тындуларды сӱӱшле башкарзын деп јакару берген. Ого ло коштой баштапкы эш улуста сӱрекей јакшы су-кадык болгон. Олор Кудайды угуп турган ӧйдӧ, олордо ӱргӱлјиге ырысту јӱрериниҥ аргазы болгон. Кудай олорго бойлорыныҥ сӱреен јараш ла јакшы јердий туразын кичеезин деп, јилбилӱ иш јакарып берген. Ол Адам ла Евага: «Ончо јерди текши толтырып, оныҥ ээзи болыгар» — деп јакару берген. Бастыра јердиҥ ӱсти јараш ла тыҥ сӱӱнетен јер болбогончо, олор ло олордыҥ бала-барказы сӱреен јакшы ла јараш Јерди ээлбедер учурлу болгон (Бытие 1:28).
10. Качан Иисус јакшы ла јараш Јер керегинде айдарда, нени темдектеген болгон?
10 Је Иисус јакшы ла јараш Јер керегинде айдып турарда, ол божоп јаткан кижиге озогы ӧдӱп калган кӱндердеги учуралдарды сананзын деп ченеп албадабаган. Иисус келер ӧй керегинде айткан! Качан да бистиҥ јер деген бӱдӱн турабыс сӱреен јараш ла јакшы јер болуп каларын ол билген. Кудай кижилик ле јер керегинде бойыныҥ баштапкы кӱӱнзеген амадуларын мынайып бӱдӱрер (Исаия 55:10, 11). Сӱреен јакшы ла јараш јер орныктырылып калар! Ол кандый болгой не? Бу суракка Кудайдыҥ Сӧзине, Библияга, карууны берзин деп јай беректер.
ОРНЫКТЫРЫЛГАН СӰРЕЕН ЈАКШЫ ЛА ЈАРАШ ЈЕРДЕГИ ЈӰРӰМ
11. Орныктырылган сӱреен јакшы ла јараш јерде карыырыла, ӧлӱмле, оору-јоболло не болуп калар?
11 Оору-јобол, карыыры ла ӧлӱм база болбос. «Ол тушта кӧзи кӧрбӧс улустыҥ кӧстӧри ачылар ла укпас улустыҥ кулактары јарыыр. Ол тушта аксак кижи аҥ чылап калыыр ла тил јок кижиниҥ тили кожоҥдоор» (Исаия 35:5, 6). «Олорло [кижиликле] Кудай бойы болор... Кудай олордыҥ кӧстӧриниҥ јажын арчып салар, ӧлӱм де болбос, ый-сыгыт та, комудал да, оору-јобол до база болбос; нениҥ учун дезе азыйгы ӧй ӧдӱп калган» (Откровение 21:3, 4).
12. Нениҥ учун бис келетен јакшы ла јараш јерде јаман керек эдери, базыныш ла коомой неме болбос деп бӱдӱмјилӱ болор аргалу?
12 Јаман керек эдери, базынары ла ончо коомой неме токтоп калар. «Ончо коомой неме эдеечилер јоголтылар... База эмеш ле, калју улус болбос; кӧрӱп ийзеҥ... ол јок. А јобоштор јерди энчиркенер» (Псалом 36:9—11). «Јасакјоктор јердеҥ јоголтылар ла, куурмакчылар оноҥ јайладылар» (Притчалар 2:22).
13. Кудай амыр-энчӱни канайып эдер?
13 Ончо јерде амыр-энчӱ болор. Кудай, «јердиҥ учы-кырына јетире јуу-согушты токтодып тура, саадакты оодып ла јыданы сындырды» (Псалом 45:10). «Ай токтоп калганча амыр-энчӱ толо болор ло чындык кижи чечектеер» (Псалом 71:7).
14, 15. Библияда орныктырылган јараш Јерде јадар тура, иш ле курсак-тамак керегинде не айдылат?
14 Јакшы јадар тура ла бойына јарап турар иш болор. «Туралар тудуп, анда јаткылаар... ӧскӧ кижи јатсын деп туткулабас, ӧскӧ кижи јизин деп отургыскылабас, нениҥ учун дезе Мениҥ албатымныҥ кӱндери агаштардыҥ кӱндериндий болор, Мениҥ талдап алгандарым бойлорыныҥ колыла эткен эдимдериле узакка тузалангылар. Калас тегин иштенгилебес ле ачу-коронго балдар чыгаргылабас» (Исаия 65:21—23).
15 Тузалу курсак арбынынча болор. «Кырдыҥ ӱстинде ле јерде калаш толо болор» (Псалом 71:16). «Јер бойыныҥ јиилегин берди: алказын бисти Кудай, Кудайыс бистиҥ» (Псалом 66:7).
16. Нениҥ учун јараш Јердеги јӱрӱм јилбилӱ ле јакшы болор?
16 Сӱреен јакшы ла јараш јердеги ӱргӱлји јӱрӱм сӱӱнип јакшызынарына болор. «Чындык улус јерди энчиркенип, чактыҥ-чакка ондо јадар» (Псалом 36:29). «Ээн чӧл лӧ кургак јер сӱӱне берер, кижи јатпай турган ороон сӱӱнип, нарцисстий чечектей берер» (Исаия 35:1).
БИЛГИР ЛЕ СЕНИҤ КЕЛЕР ӦЙИҤ
17. а) Сен сӱреен јакшы ла јараш Јерге јадарга турган болзоҥ, сеге нени эдер керек? б) Кудай јерге тӧс солунталар эдерге турганын бис кайдаҥ билерис?
17 Сен сӱреен јакшы ла јараш Јерде јадарга турган болзоҥ, Кудай керегинде билгирди аларга сеге не де чаптык этпес учурлу. Улусты Кудай сӱӱйт ле јерди сӱреен јараш ла јакшы эдип саларына кичеенер. Ого коштой, телекейдеги чынга турбас немени јоголторы ла бастыра шыраны токтодоры сениҥ колыҥда болгон болзо, сен мыны этпес бедиҥ? Бис мыны Кудайдаҥ сакыыр учурлу эмезис пе? Библия бу ӧӧн-бӧкӧндӱ системаны Кудай јоголтып, јастыразы јок чындык башкарула солыыр ӧй керегинде ачык айдат (Даниил 2:44). Је Библия јаҥыс ла бу керегинде айдып турган эмес. Ол келип јаткан јоголтышты канайып ӧдӱп чыгарын ла Кудайдыҥ эдер болгон јаҥы телекейинде јӱрерге артарын јартап јат (2 Пётрдыҥ 3:13; 1 Иоаннаҥ 2:17).
18. Кудай керегинде билгир эмди ле сениҥ јӱрӱмиҥде канайып туза јетирер?
18 Кудай керегинде билгир сеге эмди ле тузазын јетирер аргалу. Библияда бистиҥ јӱрӱмниҥ эҥ тереҥ ле јӱрекке тийер сурактардыҥ каруузы бар. Оныҥ башкарузын сен алынзаҥ, Кудай ла најылыкты тыҥыдып алар аргалу болорыҥ. Бу сӱреен јаан арга! Сениҥ јӱрегиҥ токунап амыраар, мыны јӱк ле Кудай берер аргалу (Римляндарга 15:13, 33). Бастыра мыны билип аларга шӱӱген болзоҥ, сен бойыҥныҥ јӱрӱмиҥде эҥ ле учурлу ла тоомјылу керек алганыҥ бу. Сен ӱргӱлји јӱрӱмге апарып турган Кудай керегинде билгир аларга кӱӱнзезеҥ, ол керегинде качан да карамдабазыҥ.
19. Ээчий бажалыкта кандый сурак шӱӱжилер?
19 Бис Библияга баштанадыс, нениҥ учун дезе јӱк ле ондо Кудай керегинде билгир јажырылган. Бу тегин ле кижиликтиҥ ойгор бичиги эмес деп бис кайдаҥ билерис? Бу суракты келер бажалыкта шӱӱжерис.
БОЙЫҤНЫҤ БИЛГИРЛЕРИҤДИ ШИҤДЕП КӦР
Нениҥ учун Кудай керегинде билгир ӱргӱлји ырыска экелер аргалу?
Келип јаткан сӱреен јакшы ла јараш јердеги јӱрӱм кандый болор?
Кудай керегинде билгир эмди ле кандый тузазын јетирет?
[Ӱренериниҥ сурактары]
