Мындый учуралды сананып кӧр: Дима најыларыла ойнойт. Ол мечикле ойноп турала, билбес јанынаҥ айылдаш кижиниҥ машиназыныҥ кӧзнӧгин оодып ийди.

Сен Диманыҥ ордына болгон болзоҥ, нени эдер эдиҥ?

СЕНДЕ ӰЧ АРГА БАР:

1. Кача берер.

2. Ӧскӧ кемди-кемди бурулап салар.

3. Не болгонын куучындап, чыгымныҥ баазын тӧлӧйин деп айдар.

Мындый учуралда 1-кы арганы тузаланар кӱӱниҥ келер. Је, кӧзнӧкти сен откоҥ бо эмезе база кандый бир немеде бурулу болгоҥ бо, бойыҥныҥ јастыраларыҥды качан да јажырбай айтканыҥ эҥ артык болор. Мынайып эдерге тоолу шылтактар бар.

1. Мынызы чын.

   Агару Бичикте: «Ончозында чын эдип јӱрерге кӱӱнзейдис» — деп айдылып јат (Еврейлерге 13:18).

2. Бойыныҥ јастыраларын алынып тургандардыҥ јаманы капшай ташталат.

   Агару Бичикте айдылган: «Бойыныҥ бурузын јажырган кижи једимдӱ болбос, је бурузын алынып, тӱзедилген кижиге буурзаш једер» (Укаа сӧстӧр 28:13).

3. Эҥ учурлузы — мынайып Кудайды сӱӱндиредиҥ.

   «Куурмакчы кижи Иеговага јескинчилӱ, је тӧгӱндебес улусла Ол јакшы колбуларлу» — деп, Агару Бичикте айдылат (Укаа сӧстӧр 3:32).

20 јашту Карина ӧйинеҥ ӧткӱре тӱрген маҥтатканы учун штрафтатканын адазына куучындабаска сананган. Је оны узакка јажырып болбогон. «Бир јылдаҥ адам мениҥ адыма бичилген штрафтыҥ квитанциязын кӧрӱп ийген. Мынаҥ улам мен јаман айалгаларга киргем» — деп, Карина эске алат.

Кандый тӱп-шӱӱлте эдерге јараар? Карина айдат: «Јастыраларыҥды јажырып турзаҥ, там кӱч болор. Учы-тӱбинде олор учун тӱҥей ле кату каруузына турарыҥ!»

«Бис ончобыс кӧп јастырып јадыбыс» — деп, Агару Бичикте айдылат (Иаковтыҥ самаразы 3:2). Бу учуралдаҥ бурулу болгоныҥды тургуза ла алынып турар керек деп кӧрӱнип јат. Мынызы кижиниҥ јобожын ла санаа-укаалу болуп калганын кӧргӱзет.

База бир алтам — бойыныҥ јастыраларынаҥ ӱренери. Вера деп кыс мынайда айдат: «Јастыраларымды бойыма ӱредӱ деп кӧрӱп, мындый ла айалга боло берзе, база катап анайып ла јастырбаска ла јакшы јанына солынарга болужатан ӱредӱ аларга албаданадым». Мынайып ла эдерге, сен нени эдер аргалу деп кӧрӱп ийек.

Сен адаҥнаҥ велосипед алып, оны ӱреп салгаҥ. Сен нени эдериҥ?

• Адаҥ ајаруга албас деп иженип, кылынганыҥды јажырарыҥ.

• Адаҥа тӧгӱндеш јоктоҥ ӱзе куучындап берериҥ.

• Адаҥа куучындап берериҥ, је ӧскӧ кижини бурулап саларыҥ.

Белетенбегениҥнеҥ улам экзаменди табыштырып болбогоҥ. Сен канайдар эдиҥ?

• Экзамен коркышту кӱч болгон деп айдарыҥ.

• Бойыҥныҥ бурууҥды алынарыҥ.

• Ӱредӱчиҥ сени јаман кӧрӧт деп айдарыҥ.

 Эмди ӧрӧги бичилген айалгаларга такып кӧрӱп, бойыҥды 1) адаҥныҥ ла 2) ӱредӱчиниҥ ордына тургузып, сананып кӧр. Бурууҥды јажырбай алынып ийзеҥ, адаҥ ла ӱредӱчиҥ сен керегинде нени сананар эди? Ол эмезе бурууҥды алынбазаҥ, олор нени сананар эди?

Је эмди ӧткӧн јылда эткен јастыраҥды эске алып, мындый сурактарга каруу бер.

Кандый јастыра эткеҥ? Оноҥ нени эттиҥ?

• Јастырамды јажыргам.

• Ӧскӧ кижини бурулагам.

• Јастырамды тургуза ла алынгам.

Јастыраҥды алынбаган болорыҥда сенде кандый сезимдер болгон?

• Санаам јеҥилген. Карын не де болбогон!

• Бойымды бурулагам. Чынын айдар керек болгон.

Нени эдер керек болгон?

Бойыҥныҥ јастыраҥнаҥ неге ӱренип алдыҥ?

Кезик улус бойыныҥ јастыраларын нениҥ учун кӱӱн-кӱч јок алынат?

Бойыҥныҥ бурууҥды јаантайын ла јажырып турзаҥ, улус сен керегинде нени сананар эди? Бурууҥды алынып турзаҥ, улус сен керегинде нени сананар эди? (Лука 16:10).