Мындый учуралды сананып кӧр: Анна ла Максимниҥ танышканы јӱк ле эки ай болгон. Је Аннаныҥ санаазыла болзо, олор бастыра јӱрӱминде таныш ошкош. Олор ӱзӱги јогынаҥ бой-бойына СМС-тар ийгилейт ле телефонло узак куучындашкылайт. Бирӱзи кандый бир шӱӱлтени айдып баштап ла ийзе, экинчизи учурын оҥдоп ийеле, шӱӱлтени оноҥ ары улалтып јат. Је эмди, Максим оноҥ кӧпти кӱӱнзейт...

Бу эки айдыҥ туркунына Максим ле Анна јӱк ле јединижип туратан ла Максим Аннаны окшоп ийетен болгон. Анна эм тургуза оноҥ кӧбин кӱӱнзебейт, је Максимди јылыйтар кӱӱни база јок. Ол јӱк ле оныла кожо бойын эҥ јараш ла эҥ керектӱ деп сезет. «Анайда ок, бис бой-бойысты сӱӱп турганыс» — деп сананат.

Сениҥ кемле-кемле туштажатан јажы-кемиҥ једип калган болзо, мындый айалгада нени эдер эдиҥ?

Сен физиканыҥ гравитация деп јасагын бузып ийзеҥ, бойыҥа јаан каршу јетирериҥ. Анайып ла, балыр керек этпегер деген јасакты бузып ийзеҥ, бойыҥа јаан каршу эдериҥ (1 Фессалоникадагыларга 4:3).

Мынаҥ улам не болор? Агару Бичикте айдылат: «Балыр јӱрӱмдӱ кижи акту бойыныҥ эди-канына удура кинчек эдет» (1 Коринфтегилерге 6:18). Бу сӧстӧр нени темдектейт?

 Шиҥжӱ ӧткӱргениле болзо, кӧп јииттер алыжарынаҥ озо кожо конгонынаҥ улам, мындый сезимдердиҥ ас ла салза бирӱзин сескен болгон:

• БОЙЫНА АЧЫНАТ. Алыжарынаҥ озо кожо конгон јииттердиҥ кӧп сабазы кийнинде бойына ачынып турганын айдыжат.

• БӰТПЕЙ БАРГАН. Кийнинде кыс ла уул экилези мынайып сананып баштайт: «Ол база кемле кожо конды не?»

• ИЖЕМЈИЗИН ЈЫЛЫЙТКАН. Кыс јӱрегинде оны кандый бир немени немени чилеп тузаланала, таштап ийзин деп эмес, карын кичееп турзын деп кӱӱнзейт. Кӧп уулдар, кысла кожо конгоныныҥ кийнинеҥ, кыс јарабай барат деп айдыжат.

• Тӱп-шӱӱлте. Алыжарынаҥ озо кожо конорына јӧпсинип, сен бойыҥды уйатка тӱжӱредиҥ ле сӱреен баалу немени јылыйтадыҥ (Римдегилерге 1:24). Сениҥ эди-каныҥ сӱреен баалу — оны турбас немеге толыбас керек!

Бойыҥныҥ јӧпсинбей турганыҥды ла балыр јӱрӱм јӱрбес керек деп, Кудайдыҥ јакылтазына багынарга бек шӱӱп алганыҥды кӧргӱс (1 Фессалоникадагыларга 4:3). Кийнинде биле тӧзӧзӧҥ, эр ле ӱй кижиниҥ ортодо болотон колбуларды јасак аайынча тузаланарыҥ. Ол тушта бойын јаман кӧрӧри де, бойына ачынары да, бойын эш немеге турбас деп сананары да, алыжарынаҥ озо кожо конгонынаҥ улам болуп турган ӧскӧ дӧ јаман неме сениҥ сӱӱнчиҥди буспас (Укаа сӧстӧр 7:22, 23; 1 Коринфтегилерге 7:3).

• Сени чыннаҥ ла сӱӱп турган кижи эди-каныҥа ла сезимдериҥе каршу јетирер беди?

• Сени Кудайла колбуларыҥды бузатан керектерге ийде салар беди? (Еврейлерге 13:4).