Мындый учуралды сананып кӧр: Карина јииттер јуулышкан јерге келген. Он до минут ӧткӧлӧктӧ, кийни јанында таныш ӱн угулды:

Карина кайра бурылып келерде, колында јаҥы ла ачкан эки шилдӱ Вика најызы турды. Вика аракыныҥ бирӱзин Каринага берип, айтты: «Сен јаш эмезиҥ не, дезеҥ?»

Карина: «Јок» — деп айдар кӱӱндӱ, је Вика оныҥ најызы. Анай-да ок Карина најызыныҥ кӧзине уйан кӧрӱнбеске кӱӱнзейт. Ого ӱзеери, Вика јакшы кыстардыҥ тоозына кирип тургандардыҥ бирӱзи. Оныҥ учун, ол ичип турган болордо, мында јаман ла неме јок болбой. «Бу наркотик эмес не» — деп, Карина бойын токунадат.

Сен Каринаныҥ ордына болгон болзоҥ, нени эдер эдиҥ?

Мындый айалгада ойгор чечим эдерге, бек ич-кӧрӱмдӱ болор керек. Сен кандый кижи болгоныҥды ла бойыҥныҥ кӧрӱм-санааларыҥды билип турзаҥ, ӧскӧ улустыҥ айтканына јайылбай, бойыҥныҥ јӱрӱмиҥди бойыҥ башкарарыҥ (1 Коринфтегилерге 9:26, 27).

Бойына бӱдӱмјилӱ болорго нени эдер керек? Озо баштап мындый сурактарга каруу бер.

Бойыҥныҥ аргаларыҥды ла јакшы јандарыҥды билип турганыҥ, бойыҥа бӱдӱмјилӱ болорго болужар.

АГАРУ БИЧИКТЕҤ ТЕМ. «Тилим чечен эмес те болзо, је менде билим бар» — деп, элчи Павел бичиген (2 Коринфтегилерге 11:6, ЈТ). Павел Агару Бичимелди јакшы билгениле, ол нени де эдип болбос деп айдыжып тургандарга бӱдӱмјилӱ каруу берер аргалу болгон. Улустыҥ јамандап айдышканынаҥ улам Павел бойын уйан деп сананбайтан (2 Коринфтегилерге 10:10; 11:5).

БОЙЫҤДЫ ШИҤДЕП КӦР. Сенде кандый јайалта барын эмезе сен нени эдип билериҥди бичип сал.

Эмди бойыҥныҥ кылык-јаҥыҥныҥ кандый бир јакшы јаны керегинде бичип сал. Сананып кӧр, сен кандый кижи: кичееҥкей? кысканбас? сӧзине турар? оройтыбас?

Чичке јер ӱзӱлер, јука јер јыртылар деген сӧстӧр бар. Сен бойыҥныҥ кӱӱниҥле јӱрзеҥ, ак-чек јӱрерге сананып алган ич-кӧрӱмиҥле јӱрӱп болбой барарыҥ.

АГАРУ БИЧИКТЕҤ ТЕМ. Павел бойында уйан јандар бар деп, оҥдоп турган болгон. Ол: «Ичимдеги кижи Кудайдыҥ Јасагына сӱӱнип јат, је эди-каным ӧскӧ јасакла јӱрӱп јат. Ол санаам јарадып турган јасакка удура тартыжып, эди-канымдагы кинчектӱ јасакка мени олјолоп јат» — деп бичиген (Римдегилерге 7:22, 23).

БОЙЫҤДЫ ШИҤДЕП КӦР. Сеге кандый уйан јандарыҥла тартыжарга ӱренип алар керек?

Сен таксиге отурып, бензин божогончо таксистти бир оромло ары-бери маҥтатсын деп сураар бедиҥ? Јок эмей! Мындый маҥтадыш тенексӱ, баазы да баалу болор.

Ӱредӱ: амадулар кижиге јаҥыс јерге токтоп калбай, ичкери барарга болужат. Нениҥ учун дезе сен неге амадап турганыҥды ла ого канайып једериҥди јакшы билип јадыҥ.

АГАРУ БИЧИКТЕҤ ТЕМ. «Амадулу кижи чилеп јӱгӱрип... јадым» — деп, Павел бичиген (1 Коринфтегилерге 9:26). Павел јӱрӱмниҥ айалгаларына багынып, бош салынбаган, карын амадулар тургузып, олорго једерге албаданган (Филиппыдагыларга 3:12—14).

БОЙЫҤДЫ ШИҤДЕП КӦР. Сен јыл туркунына кандый ӱч амадуга једерге турганыҥды бичип сал.

Бӱдӱмјилериҥ бек болбозо, сен алаҥзып турарыҥ. Ӧҥин солып турган хамелеон чылап, улуска јараарга албаданарыҥ — је мынызы бойыҥда бек ич-кӧрӱм де, бӱдӱмји де јогын керелейт.

Бойыҥныҥ бӱдӱмјилериҥ аайынча јӱрзеҥ, улус нени де эдип турза, сен эки јӱстенбей јадыҥ.

АГАРУ БИЧИКТЕҤ ТЕМ. Судурчы Даниилди јиит тужында кожо чыккандарынаҥ айрып салган. Андый да болзо, ол Кудайдыҥ јасактарын бӱдӱрер деп, «бойыныҥ јӱрегинде сананып алган» (Даниил 1:8). Мынайып ол бойына чындык артып турган деп кӧргӱскен. Даниил чынынча бойыныҥ бӱдӱмјилериле јӱрген.

БОЙЫҤДЫ ШИҤДЕП КӦР. Сен неге бӱдӱп тургаҥ? Темдектезе: Кудайга бӱдӱп тургаҥ ба? Эйе болзо, нениҥ учун? Кудай бар деп, сени не бӱдӱмјилейт?

Кудайдыҥ ак-чек болорыныҥ нормалары сеге туза экелет деп јӧпсинедиҥ бе? Эйе болзо, нениҥ учун анайып сананып јадыҥ?

Анайдарда, сен кандый кижи? Јерге тӱшкен, эзинге учуртып турган јалбырак па, эмезе јотконго до јыгылбас агаш па? Бойыҥныҥ ич-кӧрӱмиҥди тыҥыдып ал, анайып бек агаштый болорыҥ. Ол тушта сен: «Мен кандый кижи?» — деп суракка каруу берип болорыҥ.