1, 2. Иегова нениҥ учун бисти улуска болушканыстаҥ сӱӱнчи алар эдип јайаган?

 БИС улуска неле-неле болужып турзаас, сӱӱнчи алып јадыс. Мындый сӱӱнчи улустаҥ неме алганыстаҥ јаан болот (Ап. ижи 20:35). Анайып бисти Иегова јайаган. Андый болзо, биске сыйлар аларга јарабай турган ба? Јок, андый эмес. Сыйлар аларга биске сӱреен јарап јат. Је андый сӱӱнчи улустаҥ сый алганыстаҥ тӱҥей ле јаан. Кудайдыҥ бисти мынайып јайаганы кандый јакшы! Нениҥ учун?

² Бис бойысты бойыс ырысту эдер аргалу эдип јайалганыс. Оныҥ учун ырысту болорго, улуска болужып турар керек. Бис кандый кайкамчылу јайалганыс дезеер! (Сар. 139:14).

3. Нениҥ учун Иегова — «ырысту Кудай» деп айдылат?

³ Агару Бичикте улуска болушканы сӱӱнчи берет деп айдылат. Оныҥ да учун Иегова — «ырысту Кудай» (1 Тим. 1:11, ЈТ). Баштапкы сыйды Иегова эткен. Ол эҥ ле кысканбас! Апостол Павелдиҥ айтканыла, бис «Оныҥ Бойында јӱрӱмдӱ, кыймыктанып, јӱрӱп јадыс» (Ап. ижи 17:28). Чын, «кандый ла јакшы сый, кандый ла толо кемдӱ јайалта» — Иегованаҥ (Иак. 1:17).

4. Оноҥ тыҥ ырысту болорго не болужар?

⁴ Улуска болужып тура, оноҥ ырысту болорго кӱӱнзейдеер бе? Андый болзо, Иегова Кудайыстаҥ тем алыгар (Эф. 5:1). Бу јӧрмӧлдӧҥ Иегова улуска канайып болужып турганын кӧрӧрис. Анайда ок бистиҥ болужысты улус баалабай турган деп билдирип турза нени эдерин шӱӱжерис. Бу ӱзе неме биске улуска болужып тура, арыбаска болужар. А учы-учында бис оноҥ ырысту болуп каларыс.

 ИЕГОВА ЧЫЛАП КЫСКАНБАС БОЛУГАР

5. Иегова биске нени берет?

⁵ Иегованыҥ кысканбазы недеҥ кӧрӱнет? Тоолу темдер кӧрӱп ийектер. Иегова биске јӱрӱмге керектӱ немени берип јат. Је бу дезе бисти јыргап-сайрап јадарын темдектебей јат. Оныҥ болужынаҥ улам керектӱ немегис јеткил болот. Темдектезе, ол кийим-тудум, курсак-тамак, јадар јер берет (Сар. 4:8; Матф. 6:31—33; 1 Тим. 6:6—8). Иегова нениҥ учун мынайып болужып турган? Биске болужар учурлу болгонынаҥ ба? Јок. Андый болзо, недеҥ улам болужып турган?

6. Матфей 6:25, 26 бисти неге ӱредет?

⁶ Иегова бисти тыҥ сӱӱп турганынаҥ улам кичееп јат. Иисустыҥ Матфей 6:25, 26-да (кычырыгар, ЈТ) айткан сӧстӧрин эске алып ийектер. Ол теҥеридеги куштар керегинде мындый сӧстӧр айткан: «Олор ӱрен чачпайдылар, аш јуубайдылар, је теҥеридеги Адагар олорды азырап турган». Оноҥ Иисус: «Слер куштардаҥ баалу эмейигер!» — деген. Бис мынаҥ неге ӱренедис? Иегова бойыныҥ ишчилерин куштардаҥ ла тындулардаҥ артык баалап јат. Ол кичинек кушкаштарды кичееп турган болордо, биске болужып болбос по? Иегова — сӱӱштӱ Ада! Оныҥ учун бойыныҥ балдарына курсак-тамак, кийим-тудум берип јат (Сар. 145:16; Матф. 6:32).

7. Иегованыҥ кысканбазынаҥ тем аларга бис нени эдер аргалу? (Јурукты база кӧрӱгер.)

⁷ Иегованаҥ тем алзаас, бис те сӱӱжисти кӧргӱзер аргалу. Сен јуунда кемге-кемге курсак ла кийим керек болуп турганын билериҥ бе? Иегова ол кижиге сен ажыра болужар аргалу. Иегованыҥ албатызы тӱбектиҥ ӧйинде бой-бойына тӱрген болужып турганыла јарлу. Бастыра јердиҥ ӱстинде COVID-19 деп пандемия болуп турарда ака-эјелер бойыныҥ кийимиле, курсагыла ӱлешкен. Анайда ок кемде аргазы бар бастыра телекейлик ишке акчала болужын јетирген. Анайып, Иегованыҥ организациязыныҥ чыгымдары бӧктӧлгӧн. Бу ака-эјелер Еврейлерге 13:16-дагы: «Јакшыны эдерге ле ӧскӧ улусла ӱлежерге ундыбагар. Андый тайылгалар Кудайга јарап јат» — деп јӧпти тузаланган.

8. Слер Иеговага ийде-кӱч берип турганына нениҥ учун быйанду? (Филиппыдагыларга 2:13).

 ⁸ Иегова ийде-кӱч берет. Иегованыҥ ийде-кӱчине учы-кыйузы јок. Ого бу ийде-кӱчин бойыныҥ ишчилерине берерге јарап јат. (Филиппыдагыларга 2:13, ЈТ кычырыгар.) Слер кандый бир ченелтени ӧдӱп чыгарга ол эмезе кӱчтерди чыдажарга, болуш сураганаар ба? Ол эмезе база да бир кӱнди чыдажарга, мӱргӱгенеер бе? А оноҥ Иегова слердиҥ мӱргӱлдереерге каруу берип турганын кӧрӱп, слер Павелдиҥ: «Меге кӱч берип турган Кудайдыҥ болужыла ончоны эдер аргам бар» — деп айткан сӧстӧрин эске алынган болороор (Флп. 4:13, ЈТ).

9. Бис Иегованаҥ тем алып, ийде-кӱчисти канайып тузаланар аргалу? (Јурукты база кӧрӱгер.)

⁹ Бистиҥ ийде-кӱчис Иегованыйы чылап учы-кыйузы јок эмес. Анайда ок бис ийде-кӱчисти улуска берип болбозыс. Је бис оны ака-эјелериске болужарга тузаланар аргалу. Темдектезе, јажы јаанай берген акага эмезе эјеге ол эмезе ооруп турган улуска болужар аргалу. Олордыҥ айылыныҥ ижин эдип берерге јараар, магазинге барып келерге јараар, эмезе ӧскӧ дӧ болуш эдерге јараар. Арга бар болзо, Каандыктыҥ Туразын арутаар, јазаар иштерге туружарга јараар. Анайып бис Иегованы сӱӱп турган улуска бойыстыҥ ийде-кӱчисле кӧп болужар аргалу.

10. Бис сӧстӧрисле улуска канайып болужар аргалу?

¹⁰ Анайда ок слер бойоордыҥ сӧстӧрӧӧрлӧ кемниҥ-кемниҥ кӱӱнин кӧдӱрип ийер аргалу деп ундыбагар. Санаагарга кемди акту јӱректеҥ мактап ийер керек деп кирип келди? Ол эмезе та кемге де токунал керек болуп турган болор. Кижи керегинде јӱк ле сананып отурардыҥ ордына, ого јылу сӧстӧр айдып ийзе торт болор эди. Оныҥ учун айылдап барып келигер, телефон согуп ийер, открытка бичип ийигер эмезе сообщение аткарып ийерге јараар. Је јылу сӧстӧр табылбай турган болзо, алдырбас. Кӧп сабада кижиниҥ кӱӱнин акту јӱректеҥ айдылган сӧстӧр кӧдӱрип јат. А кижиге база да бир кӱн Иеговага чындык артарга, шак ла кӱӱн кӧдӱретен сӧстӧр јетпей турган болордоҥ айабас (Укаа 12:25; Эф. 4:29).

11. Иегова бойыныҥ ойгорын канайып тузаланат?

¹¹ Иегова ойгорды берет. Иаков мынайда бичиген: «Ойгор болорго турган кижи, ойгорды ончо улуска акту кӱӱнинеҥ  артыктай берип турган Кудайдаҥ суразын, ого берилер» (Иак. 1:5, сноска, ЈТ). Бу сӧстӧрлӧ болзо, Иегова бойыныҥ ойгорын јажырбай, сураган улуска артыктай берет. Ол оны акту кӱӱнинеҥ эмезе сноскада айдылганыла, «јамандабай» берет. Ол болуш сураган улусты качан да арбанбай да јат, уйаттабай да јат. Карын ойгорды сурап турзын деп, бойы кӱӱнзедет (Укаа 2:1—6).

12. Бис ойгорысты канайып тузаланар аргалу?

¹² А бис Иегованаҥ тем алып, ойгорысты канайып тузаланарыс? (Сар. 32:8). Улуска билгирлерди берип турзаас. Темдектезе, бис јуунда јаҥы јарчыларды јарлаарга ӱредедис. А аксагалдар болушчы ишчилерди ле чӧҥӱрилген ӧскӧ дӧ акаларды ӱредип јат. Анайып бу акалар јуунда башка-башка јакылталар бӱдӱрерге ӱренет. Анайда ок бистиҥ организацияда туралар тудуп ла јазап билер улус ака-эјелерге бу јанынаҥ ченемелдӱ болуп каларга болужат.

13. Улусты ӱредери јанынаҥ бис Иегованаҥ кандый тем аладыс?

¹³ Бис улусты неге-неге ӱредип тура, Иегованаҥ тем аларга кӱӱнзейдис. Ол бойыныҥ ойгорын кемнеҥ де јажырбай јат. Оныҥ учун биске де улусла билгирлерисле, ченемелисле ӱлежер керек. Бистиҥ ӱредип турган кижибис бистиҥ јериске туруп алар деп коркыбас керек. Бисте мындый санаалар болбос учурлу: «Мени де кемде ӱретпеген, олор до бойы ӱренип алзын». Бу чек јастыра санаалар. Иегованыҥ ишчилери улуска јӱк ле билгирлерин берип турган эмес, је бис «бойысты да берерге» белен болор учурлу (1 Фес. 2:8, ЈТ). Анайда ок бистиҥ ӱреткен улузыс оноҥ ары «ӧскӧ дӧ улусты ӱредип койор» деп иженедис (2 Тим. 2:1, 2). Анайып кажыбыс ла ойгорысла ӱлежип турзаас, бис бойыс та, айландыра улус та оноҥ ойгор ло ырысту болуп каларыс.

ЈАКШЫ КЕРЕКТЕРИСТИ БААЛАБАЙ ТУРГАН ДЕП БИЛДИРИП ТУРЗА

14. Бис улуска јакшы неме этсеес, олор неге кӱӱнзедилет?

¹⁴ Бис улуска нени-нени эдип ийзеес, анчада ла ака-эјелериске, олор биске быйанын айдып јат. Кезикте ака-эјелер быйанын кӧргӱзерге, открыткалар бичийт эмезе ӧскӧ дӧ неме эдет (Кол. 3:15). Олор быйанын айтса, биске сӱреен јарап јат эмей.

15. Биске улус быйанын айтпаза да, кандый кӱӱн-санаалу артар керек?

¹⁵ Је кезик учуралдарда улус биске быйанын айтпай јат. Бис олорго ийде-кӱчисле, ӧйисле, акча-манадысла болушкан болорыс. А олор оны бир де баалабай турган деп билдирер болор. Бу айалгада сӱӱнчибисти јылыйтпаска ла улустаҥ чӧкӧбӧскӧ не болужар? Бу јӧрмӧлдиҥ тӧс ӱлгерин, Апостолдордыҥ ижи 20:35-ти, эске алып ийектер. Ондо айдылганыла, бистиҥ сӱӱнчибис бистиҥ бойыстаҥ ла камаанду. Је улус биске быйанын айтпаза да бис сӱӱнчибисти јылыйтпас аргалу. Улуска ачынбаска биске кандый јӧптӧр болужарын кӧрӱп ийектер.

16. Улуска болужып тура, бис Иегованаҥ кандый тем алар учурлу?

¹⁶ Иегованаҥ тем алыгар. Иегова оныҥ болужын баалабай да турган улусты кичееп јат (Матф. 5:43—48). Бис те «[«нени де», ЈТ] аларым  деп сакыбай», улуска болужып турзаас, «улу кайрал» аларыс деп, Иегова айдат (Лука 6:35). Нени де дегени чыннаҥ ла нени де сакыбазын, ол тоодо јакшы сӧс тӧ сакыбазын, темдектейт. Улус биске быйанын айтпаза да, Иегова бистиҥ јакшы керектеристи кӧрӱп, кайрал берер (Укаа 19:17). Нениҥ учун дезе ол «сӱӱнип берип турган кижини» сӱӱп јат (2 Кор. 9:7).

17. Улуска јакшыны эдерге кандый принцип болужат? (Лука 14:12—14).

¹⁷ Анайда ок Лука 14:12—14-тӧ (кычырыгар) айдылган принципти ундыбас керек. Кайра јандырып берер улусты айлына кычырарында јаман неме јок. Је бис јаантайын ла улустыҥ јандыра берерин сакып турган болзоос, канайдарыс? Биске Иисустыҥ берген јӧби болужар. Темдектезе, айылыска биске кайра јандырып болбойтон улусты кычырарга јараар. Ол тушта Иегованаҥ тем алып турганыстаҥ сӱӱнчи аларыс. Бу принцип улус биске быйанын айтпаза да, сӱӱнчилӱ артарга болужар.

18. Улуска јаман сананбаска не болужар?

¹⁸ Улуска јаман сананбагар (1 Кор. 13:7). Кижи слерге быйанын айтпаган болзо, бойоордоҥ мынайда сурагар: «Ол кижи чыннаҥ ла быйанзак эмес пе эмезе ол быйан айдарга ундып салган ба?» А кезик улус акту јӱректеҥ быйанду да болзо, оны канайып айдарын билбей јат. Не дезе олор алдынаҥ ла бери улуска бойлоры болужып туратан, оныҥ учун улустыҥ болужын аларга олорго эби јок болуп турган. Кандый да болзо, христиан сӱӱш ака-эјелериске јаман сананбаска болужат. Анайып, сӱӱнчибисти јылыйтпай јадыс (Эф. 4:2).

19, 20. Улуска болужып тура, нениҥ учун чӧкӧбӧс керек? (Јурукты база кӧрӱгер.)

¹⁹ Чӧкӧбӧгӧр. Бир катап Соломон каан мынайып бичиген: «Калажыҥды  сууга агызып тур, не дезе кӧп кӱндердеҥ оны ойто таап аларыҥ» (Эккл. 11:1). Бу ӱлгерле болзо, кижи быйанын бир канча ӧйдиҥ бажынаҥ айдар аргалу. Андый учурал бистиҥ бир эједе болгон.

²⁰ Бир катап аймак кӧрӧӧчиниҥ ӱйи јаҥы чӧҥӱрилген эјеге Иеговага оноҥ ары чындык артсын деп кӱӱнзеткен сӧстӧрлӱ открытка бичиген. Је карууны эје сегис јыл кире ӧткӧн кийнинде алган. Самара мындый сӧстӧрлӧ башталган: «Билер болзоҥ, сениҥ открыткаҥ меге коркышту тыҥ болушкан. Сениҥ сӧстӧриҥ меге сӱреен јараган. Је анчада ла ондогы ӱлгер ийде-кӱч берген» a. Кезик кӱчтерин тоолоп ийген кийнинде ол мынайда бичиптир: «Меге кезикте коркышту кӱч болуп туратан. Бӱдӱрип турган молјуларымды да, керек дезе чындыкты да таштап ийер кӱӱн келетен. Јаман санаалар эбелип ле келзе, санаама открыткадагы ӱлгер кирип келетен. Бу меге чӧкӧбӧскӧ болушкан». А учында эје мындый сӧстӧр бичиген: «Бу ӧйдиҥ туркунына меге эҥ ле јаан болушты сениҥ открыткаҥ ла ондогы ӱлгер берген». Аймак кӧрӧӧчиниҥ ӱйи «кӧп кӱндер» ӧдӱп калган да болзо, бу самараны алып, не аайлу сӱӱнди не! Бисте де мындый болордоҥ айабас.

21. Слер нениҥ учун Иегова ла чылап кысканбас болорго кӱӱнзейдеер?

²¹ Бу јӧрмӧлдиҥ бажында айдылганыла, Иегова бисти улустаҥ болуш алганыстаҥ сӱӱнчи алар эмес, је улуска болушканыстаҥ сӱӱнчи алар эдип јайаган. Бис ака-эјелериске акту кӱӱнистеҥ болужадыс. Олордоҥ быйанду сӧстӧр угарга биске сӱреен јарап јат. Је олор быйанын айтпаза да, бис сӱӱнчилӱ артар аргалу. Нениҥ учун дезе «Иегова... [слерге] оноҥ кӧпти берер аргалу» деген сӧстӧрди ундыбай јадыс (2 Лет. 25:9). Оныҥ кысканбазына кем де тӱҥейлежип болбос! Быйанды Иегованаҥ артык кем айдатан эмеш? Оныҥ учун теҥеридеги кысканбас Адабыстаҥ оноҥ ло ары тем алактар!