1. Иисус удабас кандый јаргы эдер?

 БИС сӱреен јаан солынталар болотон ӧйдӧ јададыс! Удабас Иисус бастыра јердиҥ ӱстинде јаткан улусты јаргылаар. Ол бойыныҥ ӱренчиктерине јаргыныҥ алдында ла «чак тӱгенердиҥ» алдында не болорын айдып салган (Матф. 24:3). Иисустыҥ бу судурлары Матфейдиҥ 24-чи ле 25-чи бажалыктарында, Марктыҥ 13-чи бажалыгында ла Луканыҥ 21-чи бажалыгында бичилген.

2. Бу јӧрмӧлдӧ нени кӧрӧрис, нениҥ учун?

² Иисус биске ӱредӱ болотон ӱч укаа сӧс куучындаган. Баштапкы укаа сӧс койлор ло эчкилер керегинде. Экинчизи, керсӱ ле сагыжы јетпес кыстар керегинде, ӱчинчизи, таланттар керегинде. Бу укаа сӧстӧрдӧҥ Иисустыҥ биске кандый јаргы чыгарары эткен керектеристеҥ камаанду болор деп кӧрӧрис. Бу укаа сӧстӧрдӧ биске ӱредӱлер бар. Озо баштап койлор ло эчкилер керегинде кӧрӱп ийектер.

КОЙЛОР ЛО ЭЧКИЛЕР

3. Иисус улусты качан јаргылаар?

³ Иисус койлор ло эчкилер керегинде укаа сӧстӧ улус эткен керектериле јаргыладар деп айткан. Ол јаргы улустыҥ сӱӱнчилӱ јарды канайып алынганынаҥ ла майлаткандарга канайып болушканынаҥ камаанду  болор (Матф. 25:31—46). Бу јаргы «улу тӱбектиҥ» ӧйинде, чек ле Армагеддонныҥ алдында, болор (Матф. 24:21, ЈТ). Бу ӧйдӧ Иисус бойыныҥ майлаткандарын, койлордоҥ эчкилерди айрыганы чылап, олорго болушпаган улустаҥ айрып ийер.

4. Иисустыҥ јаргызы чындык болор деп, бис нениҥ учун алаҥзыбай турганыс? (Исайя 11:3, 4). (Кадарындагы јурукты база кӧрӱгер.)

⁴ Агару Бичикле болзо, Иисусты јаргычы эдип Иегова тургускан. Оныҥ учун Иисус чындык јаргы эдер. (Исайя 11:3, 4 кычырыгар.) Иисус улустыҥ сӧстӧрин, эдип турган керектерин, санааларын ла оныҥ майлаткан карындаштарына канайып баштанып турганын эмди ле кӧрӱп турган (Матф. 12:36, 37; 25:40). Ол оныҥ учун майлаткандарга кем јӧмӧшкӧн, кем јӧмӧшпӧгӧн јаргыныҥ ӧйинде билер болор a. А бис майлаткандарга канайып болужар аргалу? Болужатан аргалардыҥ бирӱзи — олорло кожо јарлаар ишке туружары. Мынайып эткен улус чындык улус деп адалар ла келер ӧйдӧ јажын-чакка јӱрер аргалу болор (Матф. 25:46; Ачыл. 7:16, 17). Кандый јакшы кайрал дезеер! Олордыҥ ады-јолы, улу тӱбектиҥ ӧйинде ле улу тӱбектиҥ кийнинде Кудайга чындык артса, «јӱрӱмниҥ тӱрбегинде» артып калар (Ачыл. 20:15).

5. Койлор ло эчкилер керегинде укаа сӧстӧҥ бис неге ӱренедис? Бу укаа сӧс кемге айдылган?

⁵ Чындык ла керсӱ болугар. Иисустыҥ койлор ло эчкилер керегинде укаа сӧзи озо ло баштап, јерде јадатан ижемјилӱ улуска айдылган. Олор бойыныҥ бӱдӱмјизин канайып кӧргӱзер аргалу? Христостыҥ майлаткан карындаштарына јарлаар иште болушканыла, анайда ок «бӱдӱмјилӱ ле керсӱ кулдыҥ» јакаруларын бӱдӱргениле кӧргӱзер аргалу (Матф. 24:45). Је бу укаа сӧскӧ теҥеридӧӧн баратан ижемјилӱ христиандар база ајару эдер учурлу. Нениҥ учун? Нениҥ учун дезе Иисус олордыҥ куучынын, нени эдип турганын, санааларын лаптап кӧрӧт. Айдарда, олор до чындык болор учурлу. Иисус олорго ӧнӧтийин база да эки укаа сӧс айткан. Олор Матфейдиҥ 25-чи бажалыгында айдылат. Озо баштап керсӱ ле сагыжы јетпес кыстар керегинде укаа сӧсти кӧрӱп ийектер.

КЕРСӰ ЛЕ САГЫЖЫ ЈЕТПЕС КЫСТАР

6. Нениҥ учун Иисус беш кысты керсӱ деп адаган? (Матфей 25:6—10).

⁶ Иисус колтуны уткыырга чыккан он кыс керегинде укаа сӧс айткан (Матф. 25:1—4). Олор ончозы колтула кожо тойго барарга иженгилеген. Иисус олордыҥ бежӱзин — керсӱ, арткан бежӱзин — сагыжы јетпес деп айткан. Керсӱ кыстар јазап белетенеле келгилеген. Олор колтуны канча кире керек, ончо ло кире сакыырга белен болгон. Ол оройтып, орой тӱнде де келзе, олор јарыткыштарын, анайда ок уратан ӱстерин кожо алала келгилеген. (Матфей 25:6—10 кычырыгар.) Колту једип келерде, керсӱ кыстар оныла кожо тойго барган. Анайып ла майлаткан христиандар Христостыҥ келетен кӱнине јетире ойгу болуп, ого чындык артар учурлу. Ол тушта олор кайралын алып, теҥеридеги  Каандыкта колтуга, ол эмезе Иисуска, кожулар (Ачыл. 7:1—3) b. А сагыжы јетпес беш кысла не болгон?

7. Сагыжы јетпес беш кысла не болгон? Нениҥ учун?

⁷ Сагыжы јетпес кыстар, керсӱ кыстарга кӧрӧ, колтуныҥ келер ӧйине белен эмес болгон. Олордыҥ јарыткыштары ӧчӧ берерде, урар ӱзи јок болгон. Оныҥ учун бу кыстар колтуныҥ келип јатканын угуп ийеле, ӱс садып аларга баргандар. Је олор кайра једип келерде, оройтып калган. «Белен кыстар оныла кожо тойлоп барган, эжик дезе јабылып калган» (Матф. 25:10). Кийнинде бу кыстар тойго кирерге албадангылаарда, колту олорго: «Слерди билбезим» — деген (Матф. 25:11, 12). Сагыжы јетпес кыстар јазап белетенбеген, оныҥ учун колтуны сакып болбогон. Мында майлаткандарга кандый ӱредӱ бар?

8, 9. Кыстар керегинде укаа сӧс майлаткандарды неге ӱредет? (Јурукты база кӧрӱгер.)

⁸ Ойгу ла белен болугар. Иисус улу тӱбектиҥ ӧйинде оныҥ келерине белен болгон ло белен эмес болгон эки бӧлӱк майлаткандар болор деп айтпаган. Ол дезе майлаткандар учына јетире чындык артпаза, кайрал албас деп кӧргӱзерге сананган (Иоанн 14:3, 4). Бу санаа-шӱӱлте биске ойгу болорго болужат. Майлаткандарга да, јерде јадатан улуска да кыстар керегинде укаа сӧскӧ јаан ајару эдер керек. Бистиҥ кажыбыс ла ойгу болуп, учына јетире чындык артарга белен болор учурлу (Матф. 24:13).

⁹ Иисус кыстар керегинде укаа сӧслӧ бисти белен болзын ла ойгу болзын деп ӱреткен. А оноҥ арыгы таланттар керегинде укаа сӧстӧ ол албадаҥкай болорына ајару эткен.

 ТАЛАНТТАР

10. Нениҥ учун эки кул чындык деп адалган? (Матфей 25:19—23).

¹⁰ Иисустыҥ база бир укаа сӧзинде бир кижи айылынаҥ ыраак барардаҥ озо бойыныҥ ӱч кулын кычырып, олорго кажызына ла таланттар — кӧп акча берген (Матф. 25:14—18). Олордыҥ экӱзи иштеҥкей ле албаданчак болгон, берген акчаны да ойгор тузаланган. Кийнинде бийи једип келерде, эки кул дезе берген акчаны эки катапка кӧптӧдип салтыр. Оныҥ учун бийи кулдарын мактап: «Бийиҥле кожо сӱӱн» — деп айткан. (Матфей 25:19—23 кычырыгар.) А ӱчинчи кул акчала нени эткен?

11. Јалку кулла не болгон, нениҥ учун?

¹¹ Бир талант алганы «јалку» кижи болгон. Ол талантты алала, оны кӧптӧдӧрдиҥ ордына јерге кӧмӱп салган. Качан олорды ээзи акчаны тооложорго алдыртып ийерде, бу јалку кул ол ло талантты ойто кайра экелип берген. Керек дезе ээзин «кату кижи» деп айткан. Бу кул кара санаалу кижи болгон. Ол бойыныҥ јаманын да алынбаган. Оныҥ да учун ээзи ого тыҥ ачынган. Оныҥ талант акчазын айрыйла, бойын сӱрӱп ийген (Матф. 25:24, 26—30).

12. Иштеҥкей эки кул кемди темдектейт?

¹² Иштеҥкей эки кул майлаткан христиандарды темдектейт. Олорды бийи, ӧскӧртӧ айтса Иисус, оныла кожо сӱӱнзин деп кычырат. Олор теҥеридеги кайралын алар. Бу баштапкы тирилиш (Матф. 25:21, 23; Ачыл. 20:5б). А јалку кулдыҥ теми майлаткандарга јаман тем болот.

13, 14. Таланттар керегинде укаа сӧс майлаткандарды неге ӱредет? (Јурукты база кӧрӱгер.)

¹³ Албадаҥкай болугар. Иисус кыстар да керегинде укаа сӧстӧ, таланттар да керегинде укаа сӧстӧ майлаткандар јалку болуп калар деп айдарга сананбаган. Је Иисус майлаткандар јалкуурып баштаза не болуп каларын  айткан. Андый майлаткандар «Кудай кычырып ла талдап алганын јӱрӱмде кӧргӱзерге» кичеенбезе, теҥеридеги Каандыкка кирбес (2 Пётр 1:10).

¹⁴ Иисустыҥ кыстар ла таланттар керегинде укаа сӧстӧри ончо майлаткандар оныҥ келерине белен болор учурлу ла ойгу ла иштеҥкей болор учурлу деп кӧргӱзет. Је Иисус олорды база да бир немеге ӱредерге сананган. Матфей 24:40, 41-ди кӧрӱп ийектер.

КЕМДИ «АЛЫП БАРГЫЛААР»?

15, 16. Матфей 24:40, 41-деҥ майлаткандар ойгу болор учурлу деп канайып кӧрӱнет?

¹⁵ Иисус бу ӱч укаа сӧсти куучындардаҥ озо кижини чыннаҥ ла Кудай майлап салган деп канайып оҥдоп ийерин јартап берген. Ол дезе јалаҥда иштенип јаткан эки эр кижи керегинде ле кол теерменле иштенип јаткан эки ӱй кижи керегинде куучындаган. Эр де улус, ӱй де улус ӱзези иштенип јаткан болзо, је Иисус «бирӱзин алып баргылаар, бирӱзин дезе артырып койгылаар» — деп айткан. (Матфей 24:40, 41 кычырыгар.) Оноҥ Иисус ӱренчиктерин: «Ойгу болыгар, нениҥ учун дезе Кайраканыгар кандый кӱнде келерин билбезигер» — деп кӱӱнзеткен (Матф. 24:42). Бу сӧстӧр майлаткандарга айдылган ба? Эйе ошкош. Нениҥ учун дезе кыстар керегинде укаа сӧзин Иисус бого тӱҥей сӧстӧрлӧ божоткон (Матф. 25:13). Јӱк ле чыннаҥ Кудайдыҥ агару тыныла майлалган ла учына јетире чындык арткан улус Иисусла кожо башкарарга теҥеридеги Каандыкка алылар (Иоанн 14:3).

¹⁶ Сергелеҥ болугар. Майлаткандардыҥ кажы бирӱзи кӧгӱс јанынаҥ ойгу болбозо, ангелдер талдалгандарды јууп келген тушта, теҥеридӧӧн алылбас (Матф. 24:31). Је Иисустыҥ сӧстӧрин јерде де ӱргӱлјиге јадатан ижемјилӱ улус ајаруга алар учурлу. Олорго до ойгу болор керек ле чындык артар керек.

17. Иегова кемди, качан агару тынла майлап турганына нениҥ учун санааркабас керек?

¹⁷ Бис Иегованы јакшы билерис ле оныҥ чыгарган јӧптӧри ончозы чын. Оныҥ учун бӱгӱнги кӱнде јаҥы майлаткандар кожылза, бис санааркабайдыс c. Иисустыҥ виноградту садта бир саат иштеген улус керегинде нени айтканын эске алып ийектер (Матф. 20:1—16). Бир де саат иштеген улустыҥ, бӱдӱн де кӱн иштеген улустыҥ јалы бир тӱҥей болгон. Анайып ла майлаткан христиандарла: Иегова олорды качан да талдаган болзо, олордыҥ ӱзези теҥеридеги кайралын алар.

УКАА СӦСТӦРДӦҤ ӰРЕДӰ АЛЫГАР

18, 19. Бу јӧрмӧлдӧ айдылган укаа сӧстӧрдӧҥ неге ӱренедис?

¹⁸ Бис нени шӱӱштис? Озо баштап койлор ло эчкилер керегинде укаа сӧс кӧргӧнис. Бу укаа сӧслӧ болзо, јерде јажын-чакка јӱрерге турган улус Кудайга чындык ла керсӱ болор учурлу, эмди де, улу тӱбектиҥ де ӧйинде. Иисус бастыра улусты јаргылаза, Кудайга чындык улусты акту деп айдар. Олорго јажын-чакка јӱрер арга берилер (Матф. 25:46).

¹⁹ Анайда ок майлаткандарга айдылган эки укаа сӧс кӧргӧнис. Он кыс керегинде  укаа сӧстӧ јӱк беш кыс керсӱ болгон. Олор ойгу ла белен болгон. Колтуныҥ тойго кийдирбеген сагыжы јетпес кыстарга кӧрӧ, олор колтуны канча кире керек, ончо ло кире сакыырга белен болгон. Биске де канча кире керек, ончо ло кире сакыырга белен болор керек. Нениҥ учун дезе Иисустыҥ бу телекейди јоголторго качан келерин бис билбезис. Оноҥ ары бис таланттар керегинде укаа сӧс кӧргӧнис. Анда иштеҥкей эки кулдыҥ темин шӱӱшкенис. Олор бийиниҥ айтканын бӱдӱрип саларда, бийи олорды мактаган. Је јалку кулды ол јаман кул деп адап, оныҥ бары-јогын айрып салган. Бис мынаҥ неге ӱренедис? Биске де Иегованыҥ берген јакылталарын акту јӱрегистеҥ учына јетире бӱдӱрер керек. Учында дезе майлаткандар сергелеҥ болор учурлу деп кӧргӧнис. Оноҥ башка олор Иисусла кожо теҥериде башкаратан кайралын албас. А олор дезе Иисусла кожо теҥериде јуулатан ӧйин коркышту тыҥ сакып јадылар. Армагеддонныҥ кийнинеҥ Кураанныҥ той-јыргалы болор. Иисус — колту болор, тирилген майлаткандар — сыргалјызы болор (2 Фес. 2:1; Ачыл. 19:7, 9).

20. Иегова сӧсуккур улуска нени эдер?

²⁰ Иисус удабас улусты јаргылаар. Је бисте коркыйтан неме јок. Нениҥ учун дезе чындык артып калзаас, теҥеридеги сӱӱштӱ Адабыс биске «артыкташкан кӱч» берер. Анайып, бис «кижи Уулыныҥ алдына турар» аргалу болорыс (2 Кор. 4:7; Лука 21:36). Бис теҥериде де, јерде де јадатан ижемјилӱ болзоос, бистиҥ ончобыска Иисустыҥ укаа сӧстӧринеҥ ӱренер керек. Анайып, теҥеридеги Адабысты сӱӱндирерис. А Иегова сӱреен јалакай Кудай. Ол бойыныҥ кажы ла ишчизин јӱрӱмниҥ «бичигинде бичилген» болзын деп кӱӱнзейт (Дан. 12:1; Ачыл. 3:5).