1, 2. Нениҥ учун Кудайдыҥ ишчилери ырысту улус? (Иаков 1:22—25).

 ИЕГОВА ла оныҥ кару Уулы бисти ырысту болзын деп кӱӱнзейт. Сарын 119:2-де мынайып айдылат: «Оныҥ јӧптӧриле јӱргендер оны бастыра јӱрегинеҥ бедиреп тургандар ырысту». Иисус бого тӱҥей шӱӱлте айткан: «Кудайдыҥ сӧзин угуп, бӱдӱрип јӱргени кежиктӱ [ырысту]!» (Лука 11:28).

² Иегованыҥ албатызы — ырысту албаты. Бис нениҥ учун ырысту? Шылтактардыҥ бирӱзи — бис кажы ла кӱн Агару Бичикти кычырадыс ла билип алганысты јӱрӱмисте тузаланарга албаданадыс. (Иаков 1:22—25 кычырыгар.)

3. Библиялык јӧптӧрлӧ јӱрзеес, кандый туза аладыс?

³ Бис «сӧсти бӱдӱрип» турзаас, ӧскӧртӧ айтса, Кудайдыҥ Сӧзиндеги принциптерле јӱрӱп турзаас, јӱрӱмис јаранып јат. Анайып Иегованы сӱӱндиредис. Бу бисти ырысту эдет (Эккл. 12:13). Анайда ок биледе улусла, јуунда ака-эјелерле колбуларыс тыҥып, бой-бойыска јуук болуп каладыс. Слер бу сӧстӧрлӧ јӧп болбойоор? Бого коштой библиялык принциптер бисти Кудайдыҥ јасагын јектеп турган улуста болуп турган кӧп кӱчтердеҥ корулап јат. Бис Давид каанныҥ сӧстӧриле јӧп. Ол Иегованыҥ јасагы, јакарулары ла јӧптӧри керегинде мындый сӧстӧр айткан: «Олорды тузаланган кижи улу кайрал алат» (Сар. 19:7—11).

4. Кудайдыҥ Сӧзиле јӱрерге кезикте нениҥ учун јеҥил эмес?

⁴ Биске Кудайдыҥ Сӧзиле јӱрерге, Агару Бичикти кычырар ла ӱренер керек. Је чынынча айтса, шакпыртту јӱрӱмисте ижис-тожыс кӧп болгонынаҥ улам ӧйди табарга  јеҥил эмес болот. Оныҥ учун Агару Бичикти кычырарга, кычырганысты шӱӱп сананарга ла оныҥ јӧптӧрин јӱрӱмисте тузаланарга не болужарын шӱӱжип ийектер.

КУДАЙДЫҤ СӦЗИН КЫЧЫРАРГА ӦЙ ТАБЫГАР

5. Христиан кижиниҥ ӧйи неге барат?

⁵ Иегованыҥ ишчилеринде ижи-тожы сӱреен кӧп болот. Бис христиандар болорыста башка-башка молјулар бӱдӱредис. Темдектезе, бистиҥ кӧп сабагыс бойын азыранарга ла јуук улузын кичеерге, иштеп јат. Бого ло коштой кезигис оору ла карып калган јуук улузын кичееп јат (1 Тим. 5:8). Анайда ок кажыбыс ла бойыстыҥ су-кадыгысты кичеейдис, а бого кӧп ӧй барат. Мыныҥ ӱстине јуунда биске јакылталар берилет. Эҥ учурлу јакылта — сӱӱнчилӱ јарды јарлаары. Бу мындый кӧп иштӱ, шакпыртту ӧйдӧ Агару Бичикти кычырарга, шӱӱп сананарга ла оныҥ јӧптӧрин јӱрӱмде тузаланарга ӧйди кайдаҥ табар?

6. Агару Бичикти кажы ла кӱн кычырарга бистиҥ кажыбыска ла нени эдер керек? (Јурукты база кӧрӱгер.)

⁶ Агару Бичик бистерди эҥ артыгын талдазын деп кӱӱнзедет (Флп. 1:10). Андый керектердиҥ тоозына — Агару Бичикти кычырары кирет. Баштапкы сарында ырысту кижи керегинде мынайып айдылган: «[Ол] сӱӱнчини Иегованыҥ јасагынаҥ табат, Оныҥ јасагын јарым ӱнле тӱн-тӱш кычырат» (Сар. 1:1, 2). Бу сӧстӧрлӧ болзо, Агару Бичикти кычырарына биске ӧйди јеткилинче берер керек эмтир. Оны кандый ӧйдӧ кычырза эптӱ? Бистиҥ ӱзегис башка, оныҥ учун Кудайдыҥ Сӧзин кажыбыс ла башка-башка ӧйдӧ кычырадыс. Андый да болзо, биске оны кажы ла кӱн кычырарга албаданар керек. Виктор ака мынайда куучындаган: «Меге Агару Бичикти эртен тура кычырарга јарап јат, эрте турарга кӱч те болуп турган болзо. Кычырарга ла шӱӱп сананарга бу эҥ ле эптӱ ӧй болот, нениҥ учун дезе бажыска јӱзӱн-јӱӱр санаалар  киргелек болуп јат». А слер керегинде нени айдарга јараар? Бойоордоҥ сурагар: «Меге Агару Бичикти кычырарга кандый ӧйдӧ эптӱ болот?»

КЫЧЫРГАНААРДЫ ШӰӰП САНАНЫГАР

7, 8. Кычырганыстаҥ кезикте нениҥ учун туза болбой јат? Тем куучындап беригер.

⁷ Бӱгӱн јетирӱлер сӱреен кӧп, је оныҥ кезиги кижиниҥ бажына артпай јат. Слерде мындый болгон болор: та нени да кычырып алала, оны тоолу ла кӱннеҥ ундып саладаар. Андый неме бастыра улуста болуп јат. Агару Бичикти кычырары јанынаҥ база мындый болордоҥ айабас. Слер кажы ла кӱн Агару Бичиктиҥ канча да бажалыгын кычырараар деп амаду тургускан болороор. Бу сӱреен јакшы амаду! Биске ончобыска амадулар тургузып, ого јединер керек (1 Кор. 9:26). Агару Бичикти кычырарга баштап ийзеер, сӱреен јакшы, је бого токтобос керек. Кудайдыҥ Сӧзи туза экелзин деп турган болзоор, ӧскӧ дӧ неме эдер керек.

⁸ Мындый тем кӧрӱп ийектер. Јаҥмыр ӧзӱмге ӧзӧргӧ болужат. Је јааш кыска ла ӧйгӧ ӧйинеҥ ӧткӱре кӧп јааза, јер сас боло берердеҥ айабас. А јааш бир эмештеҥ јааза, суу јерге араайынаҥ шиҥер. Анайып ӧзӱм де јакшы ӧзӧр, тӱжӱм де кӧп болор. Анайып ла бис Агару Бичикти меҥдей-шиҥдей, бир ле уунда кӧп бажалыктарды кычырып турзаас, туза болбос. Бис кычырганысты аайлабазыс, санаага да неме артпас, керек дезе оны јӱрӱмисте тузаланып та болбозыс (Иак. 1:24).

9. Агару Бичикти кычырып јадала учурын оҥдобой турзаар, нени эдерге јараар?

⁹ Слер кезикте Агару Бичикти меҥдей-шиҥдей кычырып турган болороор. Мындый айалгада нени эдерге јараар? Меҥдебей кычыраар, слердиҥ амадугар — Агару Бичикти јӱк ле кычырары эмес, је шӱӱп сананары. Кезик улус шӱӱп сананар керек деп угала, кӱчсинип јат. Је ондо узак ла неме јок— јаҥы ла кычырган немени чӱрче ле сананып ийигер. Мынайып, кычырып јаткан  тушта сананарга јараар ол эмезе кычырып божодоло шӱӱп сананарга јараар. Кезик ака-эјелер шӱӱп сананатан ӧйди узадып јат. Је слерге анайып келишпейтен болзо, канча кире ӧйгӧ шӱӱп сананарга темигип калганаар, анайып ла эдигер, је ас ӱлгерлер кычыраар. Ӧрӧги айдылган Виктор айдат: «Мен эртен тура бир ле бажалык кычырып јадым. Оноҥ кычырып алганымды кере тӱжине шӱӱп сананадым». Је канайып та кычырып турган болзоор, кычырганаар слерге кӧп туза экелзин (Сар. 119:97;  «Шӱӱп сананатан сурактар» деп рамканы кӧрӱгер).

10. Кычырганысты канайып тузаланарга јараар? Тем куучындап беригер. (1 Фессалоникадагыларга 5:17, 18).

¹⁰ Айдарда слер качан ла канча кире кычыратанын билип алдаар. База бир алтам — билип алганаарды тузаланары. Кандый бир ӱзӱкти кычырып ийеле, бойоордоҥ сурагар: «Бу јетирӱ меге эмди эмезе келер ӧйдӧ канайып болужар?» Темдектезе, слер 1 Фессалоникадагыларга 5:17, 18-ти (кычырыгар) кычырып јадаар, оноҥ токтой тӱжеле, бойоордоҥ мынайда сурайдаар: «Мен кӱнине канча катап мӱргӱйдим? Акту јӱрегимнеҥ мӱргӱйдим бе?» Оноҥ Иеговага не учун быйанду болгоноорды шӱӱп сананала, темдектезе, Иегованыҥ кандый бир ӱч сыйы учун быйаныгарды айдадыгар. Эмди сананып ийзеер де: слер јаҥы ла, тоолу ла минутка Агару Бичикти кычырып, Иегованыҥ айткан сӧстӧрин јӱк ле уккан эмезигер, је укканаарды тузаланып та ийдигер. Не аайлу кайкамчылу дезеер?! А кажы ла кӱн мынайып этсеер, слерге Кудайдыҥ Сӧзи аайынча јӱрерге там ла там јеҥил болор. Је тӱзедетен немелер эмди де кӧп деп билдирип турза канайдар?

ЈЕДИНГЕДИЙ АМАДУЛАР ТУРГУЗЫГАР

11. Кезикте бис нениҥ учун колысты бош салып ийердеҥ айабазыс? Тем куучындап беригер.

¹¹ Агару Бичикти кычырган кийнинде слерге кандый кӧп немени солыыр керек деп аайлап ийеле, кезикте колоорды бош салып ийер кӱӱнеер келер болор. Мындый айалганы сананып ийектер. Темдектезе, бӱгӱн слер улусты ылгабас керек деп кычырадаар (Иак. 2:1—8). Оныҥ учун слер улуска канайып баштанып турганаарды солыыр керек деп сананадаар. Бу сӱреен јакшы амаду! А эртезинде дезе айдып турган сӧстӧрӧӧрди кӧрӱп турар керек деп јӧп кычырадаар (Иак. 3:1—12). Анайып, слердиҥ сӧстӧрӧӧр кезикте улусты ачындырып турган эмезе кӱӱнин ӧчӱрип турган деп аайлап ийедеер. Оныҥ учун акыр, нени-нени айдардаҥ  озо јазап сананып турар керек деп шӱӱп аладаар. А ӱчинчи кӱнде Агару Бичикти кычырып јадала, слерге телекейле најылашпас керек деп билип алдаар (Иак. 4:4—12). Оныҥ учун слерге канайып сооттоп амырап турганаарды кӧрӱп турар керек деп санандаар. Тӧртинчи кӱнде дезе кандый кӧп немени солыыр керек деп аайлап ийеле, јӱрегер чек сыстай берет.

12. Агару Бичикти кычырып тура, слерге кӧп немеде солынар керек деп оҥдоп ийзеер, нениҥ учун чӧкӧбӧс керек? (Сносканы база кӧрӱгер.)

¹² Слерге кӧп немеде солынар керек деп оҥдоп ийген болзоор, бойоордоҥ чӧкӧбӧгӧр. Карын Агару Бичикти кычырып, тӱзединерге турганаар ол јакшы a. Мынаҥ слердиҥ јобош ло бойоорды тӧгӱндебес јакшы јӱректӱ кижи болгоноор кӧрӱнет. Ундыбагар: јаҥы кижи болуп солынарга ӧй керек ле јаантайын албаданар керек (Кол. 3:10). Агару Бичик аайынча оноҥ ары јӱрерге слерге не болужар?

13. Билип алганаарды канайып тузаланза јакшы болор? (Јурукты база кӧрӱгер.)

¹³ Кычырып алган шӱӱлтелерди капшай ла бастыразын тузаланарга албаданбагар. Оныҥ ордына јобош болуп, тоолу ла амадулар тургузып алзаар, јакшы болор (Укаа 11:2). Мындый эп-арга тузаланып кӧрӧргӧ јараар. Озо баштап неде тӱзединерге турганаардыҥ списогын тургузып алыгар. Бу списоктыҥ бир-эки ле пунктын талдап алыгар, артканын оноҥ эдереер. Недеҥ баштаар?

14. Кандый амадулардаҥ баштаарга јараар?

¹⁴ Амадулардыҥ эҥ ле јеҥилинеҥ баштагар ол эмезе эҥ ле озо тӱзедерге турган кылык-јаҥнаҥ баштагар. Амадуны  талдап алган кийнинде, «Индекс публикаций Сторожевой Башни» эмезе «Иегованыҥ Керечилериниҥ бичиктериниҥ путеводителиниҥ» болужыла шиҥжӱ ӧткӱригер. Анайда ок Иеговага мӱргӱп, солынарга «кӱӱн де, ийде-кӱч те» сурагар (Флп. 2:13). Оноҥ билип алганаарды тузаланыгар. Тургузып алган амадугарга јединип алганаарды кӧрӱп ийзеер, база да ӧскӧ амадуга јединерге кӱӱнзей беререер. Анайып тӱзединип алганаарды, кандый бир христиан кылык-јанга ӱренип алганаарды, кӧрӱп турзаар, слерге оноҥ дӧ ӧскӧ солынталар эдерге јеҥил болор.

КУДАЙДЫҤ СӦЗИ СЛЕРДЕ «ИЖИН ЭТСИН»

15. Иегованыҥ ишчилери Агару Бичикти кычырып турган ӧскӧ дӧ улустаҥ незиле башка? (1 Фессалоникадагыларга 2:13).

¹⁵ Кезик улус Агару Бичикти кӧп-кӧп катап кычырганыла оморкоп јат. Је олор Агару Бичикке бӱдет пе? Оныҥ јӧптӧрин тузаланат па? Билип алганы аайынча јӱрӱмин солыйт па? Кӧп сабада «јок». Је Иегованыҥ Керечилери Агару Бичикти баалап турган. Олор баштапкы чактыҥ христиандары чылап «оны... Кудайдыҥ сӧзин чилеп алынган[дар]. Бу сӧс чындаптаҥ андый». Бис Кудайдыҥ Сӧзин јӱрӱмисте тузаланып турганыс. (1 Фессалоникадагыларга 2:13, ЈТ кычырыгар.)

16. Сӧсти бӱдӱрип јӱрерге биске не болужар?

¹⁶ Кудайдыҥ Сӧзин кычырарга эмезе тузаланарга, кезикте јеҥил эмес болот. Биске оны кычыратан ӧй табарга јеҥил эмес болуп турган болор. Эмезе бис меҥдей-шиҥдей кычырып, тереҥ сананбай турганыс. Ол эмезе бойыста канча кире кӧп немени солыыр керек деп кӧрӱп ийеле, кӱӱнис ӧчӧ берет. Је кандый да кӱчтер болуп турган болзо, Иегованыҥ болужыла бис олорды ӧдӧ берерис. Оныҥ болужын качан да јектебей турактар. Агару Бичиктеҥ укканысты ундыбай, Сӧсти бӱдӱрип јӱректер. Кудайдыҥ Сӧзин канча ла кире кӧп кычырып, јӱрӱмисте тузаланып турзаас, ончо ло кире ырысту болорыс (Иак. 1:25).