Иисус божоор алдында нениҥ учун Сарын 21:1-деги Давидтиҥ сӧстӧрин цитировать эткен?

Матфей 27:46-да ла Марк 15:34-тӧ Иисустыҥ божоор алдында: «Кудайым! Кудайым! Мени не таштадыҥ?» — деп кыйгырган сӧстӧри бичилген. Иисустыҥ бу сӧстӧриле Сарын 22:1-деги судур бӱткен. Иисус бу сӧстӧрди Иеговага бӱтпей барганы эмезе оноҥ чӧкӧй бергени учун айткан эмес. Иисус нениҥ учун божоор учурлу болгонын билер болгон, божоорго до белен болгон (Матф. 16:21; 20:28). Анайда ок чек ле божоор алдында Иегова оны артыргызып салар деп билген (Иов 1:10). Мынайып Иисуста, ол кандый да шыралгалу ӧлӱм кӧрӧтӧн болзо, Кудайга чындык артатан арга болгон (Марк 14:35, 36).

Иисус нениҥ учун мындый сӧстӧр айткан? Каруузын бис билбезис. Је нениҥ учун мынай айтканыныҥ кезик шылтактарын кӧрӱп ийектер *.

Иисус бу сӧстӧрди Иегова оны ӧлӱмнеҥ корулабас деп кӧргӱзерге айткан болор. Ол толынты тайылганы Иегованыҥ болужы јогынаҥ экелер учурлу болгон. Анайда ок оныҥ јӱрӱми ончо улус учун берилер учурлу болгон (Евр. 2:9).

Иисус бу сӧстӧрди, улустыҥ санаазына бӱдӱн сарын кире берзин деп айткан болор. Ол ӧйдӧ, кӧп саба иудейлер сарындарды бӱдӱнге ӱренип алатан. Оныҥ учун олор бир ле ӱлгерди угуп ийзе, олорго бӱдӱн сарын санаазына кирип келетен. Мыныҥ  да учун Иисус бу сӧстӧрди айткан болор. Бу сӧстӧрди угуп, улуска Иисустыҥ ӧлӱмиле колбулу ӧскӧ дӧ судурлар санаазына кирип келер эди (Сар. 22:7, 8, 15, 16, 18, 24). Анайда ок сарынныҥ калганчы ӱлгерлеринде, Иегованы — Каан деп мактаганы санааларына кирип келген болор (Сар. 22:27—31).

Иисус бойыныҥ буру јогын кӧргӱзерге сананган болор. Иудейлер јасакты бузып туруп, Иисусты јаргылап јат. Олор оны Кудайды јамандап турган деп бурулаган (Матф. 26:65, 66). Олор юридический нормаларды бузып туруп, тӱнде меҥдей-шиҥдей јаргы ӧткӱргилеген (Матф. 26:59; Марк 14:56—59). Айдарда, Иисус: «Кудайым! Кудайым! Мени не таштадыҥ?» — деп айткан сӧстӧриле ӧлӱмге тургадый кандый да кинчек этпегенин кӧргӱскен болор.

Иисус бу сарынды бичиген Давид керегинде айдарга сананган болор. Давидтиҥ кӱчтери Иегова оны артыргызып салган деп кӧргӱспей јат. Бу сарынныҥ бажында берилген Давидтиҥ сурагынаҥ, ол Иеговага бӱтпей барган деп билдирер болор. Је ол андый эмес. Нениҥ учун дезе бу сурактыҥ кийнинеҥ ле барган ӱлгерлерде, Иегова бойыныҥ албатызын корулап алар деп, Давидтиҥ бӱдӱп турганы кӧрӱнет. Анайда ок Давидтиҥ алкыштарын кӧрзӧ, Иегованыҥ јарадузында артып турганы кӧрӱнет (Сар. 22:23, 24, 27). Анайып ла ок Иисус Христос, «Давид Уулы», столмого божогон до болзо, Иегова оны артыргызып салган деп сананбас керек (Матф. 21:9).

Бу сӧстӧрлӧ Иисус, Адазы оны артыргызып салганынаҥ улам, јӱрегиндеги ачу-сызын кӧргӱскен болор. Је анайып, Иисуста Иеговага чындык болгонын кӧргӱзетен арга болгон. Иисус бир де јаман неме этпеген, неде де бурулу болбогон. Је Адам ла Еваныҥ кинчегиниҥ кийнинеҥ, Иеговага бойыныҥ Уулын ӧлӱмге ийерге келишкен. Нениҥ учун дезе ӧлӱм ажыра Иисус Сатананыҥ кӧдӱрген сурагына каруу берер аргалу болгон (Марк 8:31; 1 Петр 2:21—24). Анайда ок толынтыныҥ баазын Иеговага берер аргалу болгон. Иегова бойыныҥ Уулын шыралап, ӧлӱп калзын деп качан да кӱӱнзебеген. Ол ого јаантайын болушкан. Је шак ла Иисустыҥ ӧлӱминиҥ алдында Иегова оны корулаган болзо, Сатананыҥ кӧдӱрген сурактарына да каруу берилбес эди, толынты тайылга да эдилбес эди.

Иисус бойыныҥ ӱренчиктерине, Иегова Уулын нениҥ учун андый кыйналганду ӧлӱмге бергенин оҥдоп алзын деп, болужарга кӱӱнзеген болор *. Иисус Кудайды јамандаган деп буруладарын ла кӧп улуска бӱдӱрилетен таш болорын озодоҥ билген (1 Кор. 1:23). Је оныҥ ӱренчиктери Иисус нениҥ учун божогон деп тереҥ шӱӱп сананган болзо, олор оны кинчек эткен кижи деп кӧрбӧй, је Аргадаачы деп кӧрӱп, бӱдер эди (Гал. 3:13, 14).

Айдарда, Иисус Сарын 22:1-деги Давидтиҥ сӧстӧрин нениҥ учун айткан деп, јарт билбезис. Је бир немени јап-јарт билерис — Иисус бу ӱзе неме Иегованыҥ табыла болуп јат деп билетен болгон. Ол оныҥ да учун тыны ӱзӱлердиҥ алдында: «Бӱтти!» — деп айткан (Иоанн 19:30; Лука 22:37). Эйе, Иегова бойыныҥ табын бӱдӱрерге, Иисусты кыска ӧйгӧ артыргыскан болгон. Мынаҥ улам Иисус «Моисейдиҥ Јасагында, јарлыкчылардыҥ бичигинде, сарындарда» бичилген судурларды бӱдӱрип салды (Лука 24:44).