1, 2. Биске Иисустыҥ изиле барар керек дегенин оҥдоорго кандый тем болужат?

СЛЕР ле најылараар койу агашту, караҥуй аралла барып јадаар. Кар да јаан јаап салган. Јолды јакшы билер кижи баштап апарып јат. Је кенетийин ол кижи кӧрӱнбей барарда, слер коркып, чочыбай јадаар. Нениҥ учун дезе слер карда артып калган оныҥ изиле барар аргалу.

² Бистерди, чындык христиандарды, караҥуй аралла барып јаткан деп айдарга јараар. Караҥуй арал — калју телекей. Јолды јакшы билер кижи — толо кемдӱ Иисус Христос. Биске оныҥ изиле чике барар керек (1 Петр 2:21). Библеистиканыҥ бир бичигинде, Петр Иисусты јолды јакшы билер кижиле тӱҥдештирген деп айдылат. Иисус јолды јакшы билер кижи чилеп, биске изин артыргызып салган. Оныҥ учун мындый сурактар шӱӱжип ийектер: Иисустыҥ изиле барары дегени нени темдектейт? биске оныҥ изиле нениҥ учун барар керек ле биске мыны канайып эдер керек?

3. Кандый бир кижиниҥ изиле барары дегени нени темдектейт?

³ Кандый бир кижиниҥ изиле барары дегени нени темдектейт? Агару Бичикте «барары» ла «ис» деген сӧстӧр, кижи бойыныҥ јӱрӱмин канайып јӱрӱп турганын кӧргӱзет (Баш. 6:9; Сар. 119:59). Кижиниҥ эткен керектерин, оныҥ артыргызып салган изи деп айдарга јараар. Айдарда, кижиниҥ изиле барары дегени, ол кижинеҥ тем алары дегенин темдектейт.

4. Иисустыҥ изиле барары дегени нени темдектейт?

 ⁴ Је Иисустыҥ изиле барары дегени нени темдектейт? Бу дезе, Иисустаҥ тем аларын кӧргӱзет. Темдектезе, Петрдыҥ айтканыла болзо, бис ченелтелердиҥ ӧйинде Иисустыҥ турумкайынаҥ тем алар аргалу. Је бис Иисустаҥ ӧскӧ дӧ немеге ӱренип јадыс (1 Петр 2:18—25). Иисустыҥ айткан ончо сӧстӧри ле эткен керектери биске тем болот.

5. Толо кемдӱ эмес улус Иисустыҥ изиле барып болор бо? Јартап беригер.

⁵ Бис, толо кемдӱ эмес улус, Иисустыҥ изиле барып болорыс па? Иисус чылап бир де јастырбай јӱрӱп болбос то болзоос, је оныҥ изиле чике барарга албаданар аргалу. Анайып албаданып турзаас, Иисус чылап «јӱрӱп јады[с]» (1 Иоанн 2:6).

6, 7. Иисустыҥ изиле барып турзаас, Иеговага канайып јууктап јадыс?

⁶ Иисустыҥ изиле барзаас, Иеговага јууктап јадыс. Нениҥ учун мынайып айдарга јараар? Баштапкызында, Иисус Иегованы сӱӱндирерге нени эдер керек деп кӧргӱзип салган (Иоанн 8:29). Оныҥ учун бис Иисустыҥ изиле барып турзаас, Иегованы сӱӱндиредис. Иегова дезе, оныҥ најызы болорго адбаданып турган улуска јууктап јат деп, бис бир де алаҥзыбайдыс (Иак. 4:8).

⁷ Экинчизинде, Иегованыҥ кылык-јаҥын эҥ ле јакшы Иисус кӧргӱскен. Оныҥ учун ол мынайып айткан: «Мени кӧргӧни, Аданы кӧргӧни ол» (Иоанн 14:9). Бис Иисустыҥ кылык-јаҥынаҥ ла оныҥ улуска канайып баштанганынаҥ тем алар аргалу. Темдектезе, ол  капкаш балулу кижини кӧрӱп, ичи ачыган, оору ӱй кижиге килеген, анайда ок јууктарын јылыйткан улуска болушкан. Иисустаҥ тем алып турзаас, Иегованаҥ тем аладыс (Марк 1:40, 41; 5:25—34; Иоанн 11:33—35). Иегованыҥ кылык-јаҥынаҥ канча ла кире тем алып турзаас, ого ончо ло кире јуук болуп јадыс.

8. Иисустыҥ изиле барып турганыс, биске телекейди јеҥип аларга канайып болужар?

⁸ Иисустыҥ изиле барзаас, калју телекейдиҥ керектерине јайылбазыс. Иисус калганчы эҥирде, мынайып айткан: «Мен телекейди... јеҥдим» (Иоанн 16:33). Бу сӧстӧрлӧ ол нени айдарга сананган? Бу сӧстӧрлӧ болзо, Иисус телекейдиҥ кӧрӱмине де, улустыҥ эткен керектерине де јайылбаган. Ол, јерге нениҥ учун келгенин — јерле јаҥыс Иегова башкарар јаҥду деп кӧргӱзерге келгенин, ундыбай јӱрген. Бис те Иегованыҥ табын бӱдӱрип јӱрзеес, бу телекейди јеҥип аларыс (1 Иоанн 5:5).

9. Ӱргӱлји јӱрӱмге апарып јаткан јолдоҥ туура барбаска, биске нени эдер керек?

⁹ Иисустыҥ изиле барзаас, ӱргӱлји јӱрӱм аларыс. Бир катап Иисуска арга-чакту јиит уул ӱргӱлји јӱрӱмди аларга нени эдер керек деп сураарда, ол ого: «Келип, Мени ээчий бар» — деген (Матф. 19:16—21). Анайда ок оны Мессия деп бӱтпей турган иудейлерге ол мынайда айткан: «[Мениҥ койлорым] Мениле кожо јӱргӱлери. Олорго Мен ӱргӱлји јӱрӱм берип јадым» (Иоанн 10:24—29). А Синедрионго кирип турган Никодим деп кижиге, Кудайдыҥ Уулына бӱткен кажы ла кижи ӱргӱлји јӱрӱм алар деп, база айткан (Иоанн 3:16). Бис дезе, Иисустыҥ айтканын бӱдӱрип, оноҥ тем алып турзаас, ого бӱдӱп турганысты кӧргӱзедис. Анайып, ӱргӱлји јӱрӱмге апарып јаткан јолдоҥ туура барбазыс (Матф. 7:14).

10. Иоанн 17:3-ле болзо, Иисус керегинде билгирлер алып турар керек дегени нени темдектейт?

¹⁰ Биске Иисустыҥ изиле барарга, ол керегинде билгирлерди јаантайын алып турар керек. (Иоанн 17:3 кычырыгар.) Ӧскӧртӧ айтса, биске оныҥ кылык-јаҥын, кӧрӱм-санаазын, оныҥ нормаларын јакшы оҥдоп турар керек. Бистиҥ чындыкта болгоныс удап та калган болзо, Иегова ла Иисус керегинде билгирлерди оноҥ ло ары алар керек.

11. Сӱӱнчилӱ јардыҥ тӧрт бичигинде не керегинде айдылган?

¹¹ Иегова бисти оныҥ Уулын јакшы билзин деп јат. Оныҥ учун Агару Бичикте оныҥ јӱрӱми ле јарлаар ижи кере гинде бичидип салган. Анайып, бис Матфейдиҥ, Луканыҥ, Марктыҥ ла Иоанныҥ Сӱӱнчилӱ јарынаҥ Иисустыҥ айткан сӧстӧрин, эткен керектерин, керек дезе сезимдерин де билип аладыс. Бу бичиктер биске Иисустыҥ темин јазап шӱӱп сананып турарга болужат (Евр. 12:3). Ӧскӧртӧ айтса, бис Иисустыҥ артырып салган изин кӧрӱп турган болодыс. Бу тӧрт Сӱӱнчилӱ јарды шиҥдеп турзаас, Иисусты јакшы билип аладыс. А Иисусты јакшы билип алзаас, оныҥ изиле чике барып јадыс.

12. Кычырганыс тузалу болзын деп турган болзоос, биске нени эдер керек?

¹² Сӱӱнчилӱ јардыҥ тӧрт бичиги биске туза экелзин деп турган болзоос, оны јаҥыс кычырар керек эмес. Бу тӧрт бичикти шиҥдеерге ле јазап шӱӱп сананарга ӧй табып турар керек. (Иисус Навин 1:8 тӱҥдештиригер.) Је эмди кычырганысты шӱӱп сананарга ла тузаланарга биске кандый эки арга болужарын кӧрӱп ийектер.

13. Сӱӱнчилӱ јарда бичилгенин шӱӱп сананарга биске не болужар?

¹³ Сӱӱнчилӱ јарда бичилгенин санаагарда јурап туругар. Мынайып эдип турзагар, улустыҥ сезимдерин, кӧргӧн-уккан немезин јакшы билип алараар. Слерге мындый шиҥжӱ эдерге, Иегованыҥ организациязы чыгарып турган бичиктер болужар. Анайда ок кычырып јаткан учуралдыҥ контекстин кӧрӱгер, ӧскӧртӧ айтса, бу учуралдаҥ озо эмезе кийнинде не айдылганын ајаруга алыгар. Бого коштой, бу учуралда бичилген улус керегинде эмезе бу учурал кайда болгонын тереҥжиде кӧрӱп ийерге јараар. Ол эмезе бу учурал керегинде Сӱӱнчилӱ јардыҥ ӧскӧ бичигинде не бичилип калганын кычырып кӧрӱгер. Нениҥ учун дезе кандый бир учурал Сӱӱнчилӱ јардыҥ тӧрт бичигинде бир тӱҥей бичилбеген.

14, 15. Сӱӱнчилӱ јардаҥ билип алганысты тузаланарга биске не болужар?

 ¹⁴ Билип алганаарды тузаланыгар (Иоанн 13:17). Сӱӱнчилӱ јарда бичилген кандый бир учуралды кычырган кийнинде бойыгардаҥ мынайып сурагар: «Кычырганымнаҥ мен бойымга кандый ӱредӱ алдым? Кемге-кемге болужарга канайып тузаланар эдим?» Је билип алганысты канайып айдарын ла качан айдарын јазап сананып турар керек. Оноҥ башка, кижини ачындырып ийердеҥ айабазыс.

¹⁵ Је эмди бу эки арганыҥ болужыла тул ӱй кижи керегинде учуралды шӱӱжип ийектер.

16. Марк 12:41-деги учуралды куучындап беригер.

¹⁶ Кычырганаарды санаагарда јурагар. (Марк 12:41 кычырыгар.) Б. э. 33 јылы, 11 нисан. Иисустыҥ божоорына јетире бир неделенеҥ ас ӧй арткан. Бу кӱнде Иисус ӧргӧӧдӧ улусты ӱреткен. Кудай јаҥныҥ башчылары Иисуска удурлажып тургулады. Олор оны мынаҥ да озо јамандап, ого бӱткилебей туратан. Кезиги дезе Иисустыҥ оозын јабарга, ого сӱмелӱ сурактар бергилейтен (Марк 11:27—33; 12:13—34). Је оноҥ Иисус ӧргӧӧниҥ ӧскӧ јанына, ӱй улустыҥ кӱрентигине, барып алат. Ондо, стенеге коштой, акча салатан кӧп јыракылар турган. Иисус улустыҥ акча салып турганын кӧрӱп турды. Бай улус келип акча салза, јыракыныҥ тӱбине тӱшкен акчаныҥ табыжын Иисус уккан болор.

17. Марк 12:42-де айдылган јокту тул ӱй кижи нени эткен?

¹⁷ Марк 12:42 кычырыгар. Оноҥ Иисус јокту тул ӱй кижини кӧрӱп ийет. Ол акчага јединбей јӱрген. Эҥ керектӱ немени де јӱк арайдаҥ алып туратан. Је кандый да болзо, јыракыга кичинек эки акча салып јат. Акчаныҥ табыжы да угулбаган болор. Бу ӱй кижи канча кире акча салганын Иисус билген. Ол ӧйдӧ андый акча јаҥыс болчок боро кушкашты да садып аларга јетпес эди. Боро кушкаш дезе курсак эдип јийтен кушкаштардыҥ эҥ ле јеҥили болгон.

18. Марк 12:43, 44-тӧ Иисус тул ӱй кижи керегинде нени айткан?

¹⁸ Марк 12:43, 44 кычырыгар. Иисус бу тул ӱй кижини кӧрӧлӧ, ӱренчиктерине оны мактап, мындый сӧстӧр айткан: «Бу јокту тул ӱй кижи кайырчакка салгандардыҥ ончозынаҥ кӧп салды. Ончозы [анчада ла бай улус] артыкташканынаҥ салгандар, ол дезе, андый јокту бойы, не барын ончозын, курсак алар акчазын салган». Анайып, бу ӱй кижи арткан-калган акчазын јыракыга салганыла, Кудайга иженип турганын кӧргӱскен (Сар. 26:3).

19. Иисустыҥ тул ӱй кижи керегинде айткан сӧстӧринеҥ кандый ӱредӱ аладыс?

¹⁹ Билип алганаарды тузаланыгар. Бойыгардаҥ сурагар: «Иисустыҥ тул ӱй кижи керегинде айткан сӧстӧринеҥ мен неге ӱренедим?» Байагы тул ӱй кижи, аргазы бар болгон болзо, јыракыга кӧп акча салар эди. Је ол Иеговага бары-јогын берип ийген. Оныҥ айалгазында бу эҥ артыгы болгон. Бу ӱй кижиниҥ берген сыйын Иегова сӱреен тыҥ баалаган. Бис те бойыстыҥ айалгабыста Иеговага эҥ артыгын берип турзаас, ӧскӧртӧ айтса, ого бастыра јӱрегистеҥ иштеп турзаас, оны сӱӱндирип јадыс (Матф. 22:37; Кол. 3:23). Бого јарлаар ишке ле јуунныҥ туштажулары на берип турган ӧйис ле ийде-кӱчис кирет.

20. Тул ӱй кижи керегинде учуралды канайып тузаланарга јараар? Тем куучындап беригер.

²⁰ Бу учуралды канайып тузаланарга јараар? Слердиҥ јуунаарда, бойлорын Кудайга ас иштеп турган деп сананып турган ака-эјелер бар болор. Темдектезе, јажы јаанап калган эје алдындагызындый чылап Кудайга кӧп иштеп болбой турганынаҥ улам санааркап јат. Ол бойын бурулап, эш-кереги јок деп сананат. Ол эмезе хронический оорулу ака кезикте јуундарга барып болбой турганынаҥ улам кунугып јат. Андый ака-эјелердиҥ кӱӱнин кӧдӱретен сӧстӧр айдыгар (Еф. 4:29). Олорго јокту тул ӱй кижи керегинде учуралды куучындап берерге јараар. Слердиҥ айткан сӧстӧрӧӧр, олорды Иегова тӱҥей ле баалап турган деп сананарга болужар (Укаа 15:23; 1 Фес. 5:11). Слер ака-эјелерди, олордыҥ албаданып эдип турган ижи учун, Иеговага эҥ артыгын берип турганы учун мактап турзаар, Иисустыҥ изиле барып јадаар.

21. Бу јӧрмӧл слерди неге кӱӱнзетти?

²¹ Сӱӱнчилӱ јардыҥ тӧрт бичигинде Иисустыҥ јӱрӱми бичилип калганы кандый јакшы! Бис бу бичиктерди кычырып, Иисустыҥ изиле барарга ӱренип јадыс. Оныҥ учун бу бичиктерди, Агару Бичикти таҥынаҥ ӱренген ӧйдӧ эмезе билелик бажырыштыҥ ӧйинде шиҥдегер. Је ондогы бичилген учуралдар, слерге туза экелзин деп турган болзоор, бу учуралдарды санаагарда јурагар ла билип алганаарды тузаланыгар. Биске дезе Иисустыҥ јӱк эткен керектеринеҥ эмес, је айткан сӧстӧринеҥ де тем алар керек. Келер јӧрмӧлдӧ, Иисус божоор алдында нени айтканын ла бис оныҥ сӧстӧринеҥ неге ӱренер аргалу деген сурактар кӧрӱлер.