Сӧзликте айдылганыла болзо, чертенери — ол «кандый-бир керекти эдерим деп улус алдына сӧзин бергени. Мындый черт кандый бир јаан учурлу, агару немени эдердеҥ озо берилет» a. Кезик черт чаазынга бичилген болот.

Иисус айткан: «Качан да чертенбегер... Айдар сӧзигер мындый болзын: эйе болзо, „эйе“, јок болзо, „јок“. Кожуп айтканы,— јаманнаҥ [Дьяволдоҥ]» (Матф. 5:33—37). Кезик улус бу сӧстӧрди кычырала, чертенерге јарабас деп сананат. Је бу чын ла андый ба? Иисус, Моисейдиҥ јасагыла болзо, кезик учуралдарда израильтяндар черт берер учурлу болгон ло Иегованыҥ ӧскӧ дӧ чындык ишчилери черт берип туратан деп билер болгон (Баш. 14:22, 23; Чыг. 22:10, 11). Иегова бойы да кезикте чертенип јат (Евр. 6:13—17). Айдарда, Иисус чертенерге јарабас деп ӱретпеген. Ол дезе, чертти јазап сананала берзин деп ӱреткен. Берген сӧзиске турары — Кудайдыҥ алдында молјубыс болот. Сӧзисти берген болзоос, оны бӱдӱрер керек.

Слерди черт берзин деп некеп турган болзо, нени эдер керек? Озо ло баштап сананып ийигер, слер берген сӧзӧӧрди бӱдӱрип болороор бо деп. Је бӱдӱрип болбойтон болзоор, чертти бербезегер артык болор. Агару Бичикте мынайып айдылган: «Айткан сӧзӧӧрди бӱдӱрип болбойтон болзоор, черт бербезегер торт» (Эккл. 5:5). Анайда ок библиялык принциптерди шиҥдеп кӧрӱгер, оноҥ Агару Бичикле ӱредилген уйадыгарла эдигер. Је кандый библиялык принциптерди шӱӱп сананар керек?

Кезик черт Кудайдыҥ табын буспай јат. Темдектезе, Иегованыҥ Керечилери айыл-јурт тӧзӧп јатса, эки бойына сӧзин берип јат. Сӧзин бергениниҥ ле черт бергениниҥ учуры тӱҥей. Кыс ла уул алыжып јатса, улустыҥ ла Кудайдыҥ алдына мындый сӧстӧр айдат: «Бис экӱ божоордыҥ божогончо бой-бойысты сӱӱп ле тооп јӱрерис». Олордыҥ сӧстӧри чек ле бу сӧстӧргӧ тӱҥей эмес те болзо, Кудайдыҥ кӧзинде бу тӱҥей ле чертенгени деп чотолот. Мыныҥ кийнинде кыс ла уул эш-нӧкӧрлӧр болуп калат, олордыҥ јурты качан да чачылбас учурлу (Баш. 2:24; 1 Кор. 7:39). Мындый черт Кудайдыҥ табын буспай јат.

Кезик черт Иегованыҥ табын бузат. Христиан кижиге мылтык тудунып, ороонын корулазын деп ол эмезе Кудайга база бӱтпезин деп некелте тургузылза, ол андый некелтени бӱдӱрбес. Бу Кудайдыҥ јакылталарын  бузып јат. А христиандар бу телекейдеҥ эмес (Иоанн 15:19). Оныҥ учун олор бу телекейдиҥ сурактарына, јуу-чактарына турушпай јат (Иса. 2:4; Иак. 1:27).

Кезик айалгаларда черт берери — уйатла башкарынатан сурак болот. Кезикте христиан кижиге, бичилген чертти берердеҥ озо, ол черттиҥ сӧстӧрин: «Кагандыйын каганга беригер, Кудайдыйын — Кудайга» — деп Иисустыҥ сӧстӧриле шӱӱп сананып ийер керек (Лука 20:25).

Темдектезе, христиан кижи гражданство аларга эмезе паспорт аларга заявление берген болзын, а кезик ороондордо паспортты эмезе гражданствоны аларга присяга берер керек болот. Мындый учуралда присяганыҥ сӧстӧри Кудайдыҥ јасагын бузып турган болзо, Агару Бичикле ӱредилген христиан кижиниҥ уйады ого андый присяга берерге болдыртпас. Је кезик ороондордо јаҥдар присяганыҥ сӧстӧрин эмеш солып ийерге јарадат. Андый учуралда христиан кижи уйады амыр болзын деп, сӧстӧрин солып ийер аргалу.

Римдегилерге 13:1-де айдылат: «Кажы ла кижи јаҥдуга баксын». Оныҥ учун христиан кижи сӧстӧрин солып койгон присяганы берер аргалу, нениҥ учун дезе кезик присягадагы сӧстӧр Кудайдыҥ некелтелериндий ок болуп јат.

Анайда ок слерге чертти кандый бир немениҥ эмезе жесттиҥ болужыла берзин дезе слерге бойоордыҥ уйадаарла башкарынар керек. Темдектезе, јебрен римляндар ла скифтер черт берген тушта кылыштарын тузалангылаган. Анайып олор јуу-согуштыҥ кудайына баштанганыла тӧгӱндебей турганын кӧргӱскилеген. Гректер дезе, черт бергилеп јатса, колдорын теҥеридӧӧн кӧдӱргилеп туратан. Мынайып олор јердиҥ ӱстинде не болуп турганын кӧрӱп турган кудайлык ийде-кӱч бар, ол олорды кату каруузына тургузардаҥ айабас деп кӧргӱскилеген.

Иегованыҥ ишчизи ороонныҥ кандый бир сӱр-темдегине ол эмезе тӧгӱн кудай јаҥныҥ немезине чертенбей јат. Је слерди јаргы болуп јаткан ӧйдӧ колоорды Агару Бичикке салала, бир де тӧгӱн неме айтпазыгар деп, черт берзин дезе канайдараар? Мындый учуралда христиан кижи јӧпсинердеҥ айабас. Алдындагы ӧйлӧрдӧ Кудайдыҥ ишчилери бого тӱҥей черт бергилеп туратан (Баш. 24:2, 3, 9; 47:29—31). Је бу тушта слер сӧзигерди Иегованыҥ алдында берип јаткан болороор. Оныҥ учун слер берилген сурактарга карууларды тӧгӱндебей берер учурлу.

Бис Иеговала колбуларысты баалап јадыс. Оныҥ учун чертенердеҥ озо Иеговага мӱргӱп, бу черт библиялык принциптерди буспай турган ба, оноҥ Агару Бичикле ӱредилген уйадыс бу чертти бӱдӱрерге јарадар ба деп шӱӱп сананар керек. Чертти берген кийнинде, оны бӱдӱрер керек (1 Пётр 2:12).