Христиан кижи экинчи катап кижи алза, јуунныҥ кӧзинде баштапкы ӱйи оныҥ эш-нӧкӧри болбой барат, эмди оныҥ эш-нӧкӧри экинчи ӱйи болот. Нениҥ учун мынайып айдарга јараар? Бу сурактыҥ аайына чыгарга, Иисус айрылыш керегинде ле экинчи катап биле тӧзӧӧри керегинде нени айтканын кӧрӱп ийектер.

Иисустыҥ айтканыла болзо, Кудайдыҥ кӧзинде эш-нӧкӧрлӧр јӱк ле бир шылтактаҥ улам айрылыжар аргалу. Бу шылтак Матфей 19:9-та бичилген: «Кем-кем ӱйиле, балыр керек болбогон до болзо, айрылыжала, ӧскӧ кижи алза, балыр керек (сексуальная безнравственность) эдет». Айдарда, 1) айрылыжатан библиялык сок јаҥыс шылтак — эш-нӧкӧри эмес кижиле конгоны, 2) эр кижи ӱйинеҥ кандый бир ӧскӧ шылтактаҥ улам айрылып, ӧскӧ кижи алган болзо, ол балыр керек эдет деп чотолот a.

Андый болзо, эр кижи ӱйинеҥ ӧскӧ кижиле коноло, бойыныҥ ӱйинеҥ айрылып калза, Агару Бичик андый эр кижиге ӧскӧ биле тӧзӧӧргӧ јарадып турган ба? Кезик айалгаларда јаратпай турган. Эр кижи ӱйинеҥ ӧскӧ кижиле конгон болзо, кинчек этпеген ӱйи ӧбӧӧниниҥ кинчегин таштаар ба, јок по деп сананып јат. Је ӱйи ӧбӧӧниниҥ кинчегин таштаар кӱӱни јок болзо, олор айрылып калат. Документтер аайынча айрылышкан кийнинеҥ олор экилези ӧскӧ јурт тӧзӧӧр аргалу.

Је кезик учуралдарда кинчек этпеген ӱйи билезин кичееп аларга, ӧбӧӧниниҥ кинчегин таштап салат. Оноҥ ӧбӧӧниле эптежип аларга, оныла куучындажып јат. Је ӧбӧӧни болбой, ӱйин таштап, оноҥ айрылып калза, андый эр кижиде јаҥы билелӱ болотон библиялык тӧзӧлгӧ јок. Нениҥ учун дезе ӱйи оныҥ кинчегин таштап, билезин кичееп аларга албаданган. Је оныҥ да кийнинде ӧбӧӧни библиялык нормаларды јектеп, ӧскӧ ӱй кижи алган болзо, Кудайдыҥ кӧзинде ол ойто ло катап балыр керек эткен деп чотолот. Мынаҥ улам аксагалдар база ла катап правовой комитет јуур (1 Кор. 5:1, 2; 6:9, 10).

Христиан эр кижи библиялык тӧзӧлгӧ јогынаҥ экинчи катап кижи алган болзо, јуунныҥ улузы оныҥ баштапкы билезине ле эмдиги билезине кандый кӧрӱмду болор учурлу? Агару Бичиктиҥ нормаларыла болзо, бу эр кижи баштапкы ӱйиниҥ ӧбӧӧни болуп артат па? Баштапкы ӱйи оныҥ кинчегин таштап, ойто оныла биригип алар аргалу ба? Бу эр кижиниҥ ӧскӧ кижи алганы балыр керек деп чотолор бо?

Алдында мындый сурактарга јуунныҥ кӧрӱми кандый болгон? Бис мынайып сананганыс: ӧскӧ уй кижи алган эр кижиниҥ буру јок баштапкы ӱйи тирӱ јӱрген болзо, кижиге барбаган болзо ло балыр керек этпеген болзо, ол эр кижи балыр керек эдет деп. Је Иисустыҥ Матфей 19:9-тагы сӧстӧрин ойто катап кӧрӱп ийзеес, ондо јӱк кинчек эткен эш-нӧкӧр керегинде айдылат, је буру јок эш-нӧкӧри керегинде эмес. Мында Иисус, библиялык тӧзӧлгӧ  јогынаҥ ӱйинеҥ айрылып, ойто катап биле тӧзӧгӧн эр кижи балыр керек эдет деп јартаган. Айдарда, айрылыжала, ойто катап биле тӧзӧгӧни, Кудайдыҥ кӧзине балыр керек болот. А балыр керек эдилген кийнинде баштапкы тӧзӧгӧн билези Кудайдыҥ кӧзинде биле болбой барат.

Эр кижи ӱйинеҥ айрылып, ӧскӧ ӱй кижи алган болзо, билезин кичееп аларга кӱӱнзеп турган буру јок ӱйинде ӧбӧӧниле ойто биригетен арга јок. Нениҥ учун дезе оныҥ ӧбӧӧни ӧскӧ кижи алган. Айдарда, ол эмди оныҥ эш-нӧкӧри болбой јат. Оныҥ учун ӧбӧӧниниҥ кинчегин таштайтан ба, јок по деп сурак оныҥ алдына турбас керек. Анайда ок јуунныҥ улузы бу эр кижиниҥ экинчи ӱй кижи алганын балыр керек деп кӧрбӧй јат b.

Бис ӧбӧӧни ӧскӧ кижиле конордо айрылышкан учурал кӧрдис. Је мынаҥ да башка учуралдар болуп јат. Эр кижи ӱйинеҥ ӧскӧ кижиле конбогон до болзо, ӱйиле айрылыжала, ӧскӧ кижи алат. Ол эмезе ӧбӧӧни ӧскӧ ӱй кижиле конбогон до болзо, айрылыжып калала, ӧскӧ кижиле коноло, ӱйи оныҥ кинчегин таштаарга белен де болордо, јаҥы биле тӧзӧп алат. Бу учуралдарда ӱзезинде ле айрылышканы ла ӧскӧ кижи алганы балыр керек эткени деп чотолот. Мынаҥ улам бу эр кижи баштапкы ӱйиле айрылып калган болот. Айдарда, јасакла болзо, эмди бу эр кижиниҥ ӱйи — экинчи алган ӱй кижи, баштапкызы эмес. Бу керегинде 2006 јылдыҥ сыгын айыныҥ 15-чи кӱниниҥ «Каруулчы шибеезиниҥ» 30-чы бӱгинде мынайда айдылган: «Бу эр кижи эмди јаҥы билелӱ. Ондо эмдиги ӱйинеҥ айрылала, баштапкы ӱйине јанар јаҥы јок. Нениҥ учун дезе ол баштапкы билезинеҥ айрылып калган, ӧскӧ кижиле конгон, јаҥы биле тӧзӧп алган».

Бу јаҥы оҥдомолдоҥ улам биле агару эмес болуп калган ла эш-нӧкӧрлӧрдиҥ балыр керек эткенин андый ла уур кинчек эмес деп сананбас керек. Эр кижи библиялык тӧзӧлгӧ јогынаҥ айрылып, Агару Бичиктиҥ нормаларын бузала, ойто катап биле тӧзӧгӧн болзо, балыр керек эткенинде бурулу болот. Оныҥ учун оныҥ керегин правовой комитет кӧрӧр. (Оныҥ алган экинчи ӱйи база Иегованыҥ Керечили болзо, оныҥ да керегин правовой комитет кӧрӧр.) Бу эр кижиниҥ экинчи катап биле тӧзӧгӧнин јуун балыр керек деп кӧрбӧйтӧн дӧ болзо, ого узак јылдардыҥ туркунына јуунда молјулар берилбес. Бу ака јакшы репутациялу болбогончо ло ака-эјелер оныҥ јескинчилӱ керегин ундыбаганча, ого молјулар берилбес. Анайда ок ого молјулар берердеҥ озо, аксагалдарга мындый сурактарды јазап шӱӱп сананып ийер керек: ол ӱйинеҥ кандый санаадаҥ улам айрылган? он сегис јашка јетпеген балдарын таштап ийген бе? таштап ийген болзо, олор эмди кандый айалгада јадып турган? (Мал. 2:14—16).

Библиялык тӧзӧлгӧ јогынаҥ айрылып, ӧскӧ биле тӧзӧгӧн кижи бойына да, айландыра улуска да кӧп кыйын-шыра ла ачу экелет. Оныҥ учун христиандар билени, Иегова ла чылап, агару деп кӧрӧр учурлу (Эккл. 5:4, 5; Евр. 13:4).