1, 2. Јаҥы јӱрӱмди сакып тура, биске нени эдер керек?

 УДАБАС ЛА јердиҥ ӱстинде јаҥы јӱрӱм болор деп сананып турзаас, јӱрегиске амыр, токуналу боло берет (2 Пётр 3:13). Је јаҥы јӱрӱм качан болор деп билбес те болзоос, телекейдеги болуп турган айалганаҥ, узак артпаган деп, кӧрӱп јадыс (Матф. 24:32—34, 36; Ап. ижи 1:7).

² Бу ӧйди сакып тура, чындыкта канча да јыл болгон болзоос, ончобыска ла Кудайдыҥ сӧзине бӱдӱмјибисти тыҥыдып турар керек. Нениҥ учун дезе бек те бӱдӱмји уйадап калардаҥ айабас. Апостол Павел ас бӱдӱмјини «бисти јеҥил олјолоп алатан кинчек» деп айткан (Евр. 12:1). Оныҥ учун бӱдӱмјибис бек болзын деп турган болзоос, јаҥы јӱрӱм болорын кӧргӱзип турган керелерди санаабыста эске алынып турар керек (Евр. 11:1).

3. Бу јӧрмӧлдӧ бис нени шӱӱжерис?

³ Бу јӧрмӧлдӧ бис јаҥы јӱрӱм болор деп бӱдерге болужатан ӱч эп-арга кӧрӧрис: 1) толынты керегинде шӱӱп сананары, 2) Иегованыҥ ийде-кӱчин кӧргӱзип турган керелерге ајару эдери 3) кӧгӱс керектерде туружары, оноҥ Иегованыҥ Аввакумга айткан сӧстӧри бӱдӱмјибисти канайып тыҥыдарын кӧрӧрис. Је озо ло баштап Иегованыҥ сӧзине бӱдӱп турганыс кандый айалгалардаҥ кӧрӱнерин шӱӱжип ийектер.

КАНДЫЙ АЙАЛГАЛАРДА БИСТИҤ БӰДӰМЈИБИС БЕК БОЛОР УЧУРЛУ?

4. Биске кандый айалгаларда бек бӱдӱмји керек болот?

⁴ Бис кажы ла кӱн кемле куучындажарын, канайып амыраарын, кандый ӱредӱге кирерин, анайда ок бала-барка,  иш-тош ло биле јанынаҥ сурактарда нени эдерин шӱӱп сананадыс. Бу айалгаларда Иеговага бӱдӱп турганыс кӧрӱнип јат. Оныҥ учун бойоордоҥ сурагар: «Мениҥ эдип турган керектеримнеҥ калју телекей удабас јоголор деп ле оныҥ ордына Кудайдыҥ јаҥы телекейи болор деп бӱдӱп турганым кӧрӱнет пе? Эмезе мен келер ӧйгӧ кандый да ижемји јок бир ле кӱнле јӱрӱп турган улус чылап јӱредим бе?» (Матф. 6:19, 20; Лука 12:16—21). Бис јаҥы јӱрӱм сӱреен јуук деп бӱдӱп турзаас, эдип турган керектерис Иегова Кудайысты макка чыгарып турар.

5, 6. Нениҥ учун ченелтелерде бек бӱдӱмји керек болуп јат? Тем айдып беригер.

⁵ Анайда ок истежӱлер башталза, хронический оорулу болзоос, ол эмезе колыбысты бош салгадый оноҥ до ӧскӧ ченелтелер болуп турза, биске бек бӱдӱмји керек болот. Озо баштап бис ченелтени јеҥил ӧдӧ берерис деп сананардаҥ айабазыс. Је ченелте узак ӧтпӧй турза, а ол кӧп сабада андый болуп јат, турумкай артарга ла Кудайга оноҥ ло ары сӱӱнчилӱ иштеерге биске бек бӱдӱмји керек болот (Рим. 12:12; 1 Пётр 1:6, 7).

⁶ Ченелтелердиҥ учы-кыйузы кӧрӱнбей турза, јаҥы јӱрӱм болбос деп сананардаҥ айабазыс. Је бу дезе, бӱдӱмјигис уйадап калганын кӧргӱспей јат. Мындый тем кӧрӱп ийектер. Темдектезе, бис кышкы корон-сооктор ӧтпӧй турза, јай бачым келбес деп санана бередис. Је јай качан бирде једип келет. Анайып ла, бис ал-санаага тӱжӱп калзаас, јаҥы јӱрӱм качан да болбос деп сезим келердеҥ айабас. Је бӱдӱмјибис бек болзо, Иегованыҥ айтканына бир де алаҥзыбай јадыс (Сар. 94:3, 14, 15; Евр. 6:17—19). Алаҥзыбай турзаас, јӱрӱмисте кӧгӱс керектер баштапкы јерде турар.

7. Бис кандый кӧрӱмди алынбаска кӱӱнзейдис?

⁷ Бек бӱдӱмји јарлаар ишке де керектӱ болот. Бис сӱӱнчилӱ јарды јарлап јӱрзеес, кӧп улус оны угала, «мындый јакшы јӱрӱм канайып болотон» дежип, бӱткилебей јат (Матф. 24:14; Иез. 33:32). Је бистер дезе олордыҥ бу кӧрӱмин алынбаска кӱӱнзейдис. Оныҥ учун бӱдӱмјибисти тыҥыдып турар керек. Мыны канайып эдер? Ӱч арга кӧрӱп ийектер.

ТОЛЫНТЫ КЕРЕГИНДЕ ШӰӰП САНАНЫГАР

8, 9. Толынты керегинде шӱӱп сананганыс бӱткенисти канайып тыҥыдат?

⁸ Бӱткенисти тыҥыдатан аргалардыҥ бирӱзи — толынты керегинде шӱӱп сананары. Толынты, Иегова берген сӧзин алаҥзу јогынаҥ бӱдӱрип салар деп, кере болуп јат. Иегова толынтыны нениҥ учун берген? Толынтыны берерге кандый јаан баа тӧлӧлгӧнин биске тереҥ шӱӱп сананар керек. Мынайып шӱӱп сананганыс Иегова биске јажын-чакка јӱрер арга берер деп бӱткенисти тыҥыдып јат. Нениҥ учун анайып айдарга јараар?

⁹ Иегова толынты берерге нени эткен? Ол сӱӱген Уулын, эҥ јуук најызын, јердӧӧн кижи эдип ийген. Јерде јадып, Иисус башка-башка кӱчтерге табарткан. Ол коркышту шыралап, кыйнадып ӧлтӱрткен. Иегова кандый јаан баа тӧлӧгӧн! Кудайдыҥ беретен алкыштары кыска ла ӧйгӧ болотон болзо, Иегова сӱӱген Уулын андый шыралу ӧлӱмге берер беди? (Иоанн 3:16; 1 Пётр 1:18,  19). Айдарда, Иегова Кудай андый јаан баа тӧлӧӧрдӧ оныҥ берер болгон јажын-чакка болотон ырысту јӱрӱм чыннаҥ ла болор.

ИЕГОВАНЫҤ ИЙДЕ-КӰЧИН ШӰӰП САНАНЫГАР

10. Эфестегилерге 3:20-ле болзо, Иегова нени эдер аргалу?

¹⁰ Бӱдӱмјибисти тыҥыдатан экинчи арга — Иегованыҥ ийде-кӱчин кӧргӱзип турган керелерди шӱӱп сананары. Ондо бойыныҥ берген ончо сӧзин бӱдӱретен ийде-кӱч бар. Кӧп саба улус ӱргӱлји јӱрӱм болор аргазы јок деп сананып турган деп оҥдоп јадыс. Је Иегова улуска кӧрӧ, ончо немени эдер аргалу! Агару Бичикте Иегова Кӱчтӱдеҥ Кӱчтӱ Кудай деп тегиндӱ айдылбаган (Иов 42:2; Марк 10:27). Оныҥ учун ол кайкамчылу та нени де эдер деп, сӧзин берип турза, бис бӱдӱп јадыс. (Эфестегилерге 3:20 кычырыгар.)

11. Иегованыҥ берген сӧзи бӱдер аргазы јок деп билдирген учурал куучындап беригер ( «Иегованыҥ кайкамчылу эдип бӱткен сӧзи» деген рамканы кӧрӱгер.)

¹¹ Иегова Кудай јебрен ӧйдиҥ ишчилерине сӧзин берген учуралдар кӧрӱп ийектер. Ол учуралдардыҥ кажызында ла Кудайдыҥ берген сӧзи бӱдер аргазы јок деп билдирген. Темдектезе, Иегова јажы јаанап калган Авраам ла Саррага олордо уул бала чыгар деп айткан (Баш. 17:15—17). Анайда ок ол Авраамга оныҥ бала-барказы Ханаан јерди энчиленип алар деп сӧзин берген. Је Авраамнаҥ барган албаты канча јылдардыҥ туркунына Египетте кулдар болуп јӱрген. Оныҥ учун Кудайдыҥ Авраамга берген сӧзи качан да бӱтпес деп билдирген. Је ол бӱдӱп калды. Кийнинде Иегова карып калган Елизаветага ондо бала чыгар деп сӧзин берген. А кижиге барбаган Мария деп кыска ондо Кудайдыҥ Уулы чыгар деп айткан. Бу керегинде Иегова канча муҥ јылдар озо Эдем садта судурлап айткан. Бу судур база бӱдӱп калды! (Баш. 3:15).

12. Иисус Навин 23:14 лӧ Исайя 55:10, 11 Иегова берген сӧзин бӱдӱрип салар аргалу деп бисти канайып бӱдӱмјилейт?

¹² Иегованыҥ берген сӧзи ле ол оны канайып бӱдӱргени керегинде шӱӱп сананганыс кандый туза экелет? Бу дезе Иеговада јаҥы јӱрӱм берер ийде-кӱчи бар деп бӱдӱмјибисти тыҥыдат. (Иисус Навин 23:14; Исайя 55:10, 11 кычырыгар.) А бек бӱдӱмји дезе, јаҥы јӱрӱм — ол куру санаа эмезе чӧрчӧк эмес деп јартаарга болужат. Иегова бисти бойы јаҥы теҥери ле јаҥы јер болор деп бӱдӱмјилейт: «Бу сӧстӧр чындык ла чын» (Ачыл. 21:1, 5).

КӦГӰС КЕРЕКТЕРГЕ ТУРУЖЫГАР

13. Јуунныҥ туштажулары бӱдӱмјибисти канай тыҥыдып турган? Јартап беригер.

¹³ Бӱдӱмјибисти тыҥыдатан ӱчинчи арга — Иеговага јууктаарга болужатан кӧгӱс керектерге туружары. Бу јанынаҥ биске јуунныҥ туштажулары болужат. Темдектезе, кӧп јылдардыҥ туркунына агару иштиҥ башка-башка бӱдӱмдерине турушкан Анна b эје мындый сӧстӧр айткан: «Туштажулар мениҥ бӱдӱмјимди тыҥыдат. Керек дезе куучын-эрмек айдып јаткан аканыҥ ченемели ас та болзо, ол эмезе ака куучын-эрмегинде јаҥы неме куучындабаза да мен тӱҥей ле Агару Бичиктиҥ чындыктарын јакшы оҥдоорго болужатан ла бӱдӱмјимди тыҥыдып турган шӱӱлтелер угадым». Бого ло коштой ака-эјелердиҥ  јартамалдары бистиҥ бӱдӱмјибисти база тыҥыдат (Рим. 1:11, 12; 10:17).

14. Јарлаар иш бӱдӱмјибисти канайып тыҥыдат?

¹⁴ Анайда ок бистиҥ бӱдӱмјибисти јарлаар ишке турушканы́с тыҥыдат (Евр. 10:23). Иеговага 70 јылдыҥ туркунына иштеп келген Ба́рбара эје мынайып куучындаган: «Јарлаар иш бӱдӱмјимди сӱреен тыҥыдат. Иегова келер ӧйдӧ кандый алкыштар берерге турганын улуска канча ла кире кӧп куучындазам, ончо ло кире бойымныҥ бӱдӱмјим тыҥыйт».

15. Бӱткенисти Агару Бичикти таҥынаҥ ӱренгенис канайып тыҥыдат? (Јурукты база кӧрӱгер.)

¹⁵ Бӱткенисти тыҥыдатан керектердиҥ база бирӱзи — Агару Бичикти таҥынаҥ ӱренери. Сью́зан нени качан ӱренерин озолодо пландап, график тургузып алат. Ол куучындайт: «Воскресен кӱнде мен келер неделениҥ „Каруулчы шибеезине“ белетенип јадым. Понедельник, вторник кӱндерде неделениҥ ортозында болуп турган туштажуга белетенедим. Арткан кӱндерде бойымга јилбилӱ темалар шиҥдейдим». Мындый график Сьюзанга бӱткенин тыҥыдарга болушкан. А канча јылдардыҥ туркунына тӧс башкаруда иштеп турган Айри́н эје бӱткенин судурларды шиҥдеп турганыла тыҥыдат. Ол айдат: «Иегованыҥ судурлары оок-теек те јанынаҥ бӱдӱп калганы кандый кайкамчылу!» c

«ОЛ ОРОЙТЫБАЙ БӰДӰП КАЛАР»

16. Иегованыҥ Аввакумга айткан сӧстӧри биске де айдылган деп нениҥ учун айдарга јараар? (Еврейлерге 10:36, 37).

¹⁶ Иегованыҥ кезик Керечилериниҥ бу телекейдиҥ учын сакып турганы удап калган. Кижиниҥ кӧзиле кӧрзӧ, Иегованыҥ кӱни удап турган деп билдирет. Је Иегова бойыныҥ ишчилериниҥ  сезимдерин оҥдоп турганы Аввакумга айткан сӧстӧринеҥ кӧрӱнет: «Бу кӧрӱлте бойыныҥ ӧйинде кыйалта јогынаҥ бӱдерге тӱргедеп јат. Удап та турза, оны сакы, нениҥ учун дезе, ол оройтыбай бӱдӱп калар» (Авв. 2:3). Бу сӧстӧр јӱк ле Аввакумга айдылган ба? Эмезе бистерге де айдылып турган ба? Апостол Павел Кудайдыҥ агару тынына баштадып, бу сӧстӧрди келер ӧйди сакып турган христиандарга база айткан. (Еврейлерге 10:36, 37 кычырыгар.) Чын ла, Кудайдыҥ кӱни удап турган деп билдирип турган да болзо, ол тӱҥей ле оройтыбай бӱдӱп калар!

17. Иегованыҥ Аввакумга айткан јӧбин бир эје канайып бӱдӱрген?

¹⁷ Кӧп Керечилер Кудайдыҥ кӱнин канча јылдардыҥ туркунына сакып турган да болзо, Иегованыҥ: «Удап та турза, оны сакы» — деген сӧстӧрин ундыбай јӱредилер. Темдектезе, Луиза эје 1939 јылда Иеговага иштеп баштаган. Ол айдат: «Ол ӧйдӧ школды божоткологымда ла Армагеддон једип келер деп санангам. Је мениҥ санаамла болбоды. Бу јылдардыҥ туркунына мениҥ адап алганымла — „сакылталу бичиктер“ болужын јетирген. Ондо Кудайдыҥ кӱнин база узак сакыган Ной, Авраам, Иосиф, анайда ок Кудайдыҥ ӧскӧ дӧ чындык ишчилери керегинде бичилген. Мынайып сакыганыс меге де, ака-эјелерге де јаҥы јӱрӱм удабас ла келер деп ундыбаска болужат». Бу сӧстӧрлӧ кӧп јылдардыҥ туркунына Иеговага чындык иштеген ака-эјелер де јӧпсинер.

18. Јаҥы јӱрӱм чыннаҥ ла болор деп бӱдерге јайаандар канайып болужат?

¹⁸ Јаҥы јӱрӱм келгелек. Је эм тура бисте бар немени шӱӱп сананып ийектер. Темдектезе, јылдыстарды, айландыра ар-бӱткенди, тындуларды ла улусты. Кандый да ӧйдӧ бу неме ӱзе јок болгон. Иегова олорды јайабаган болзо, олор болбос эди (Баш. 1:1, 26, 27). Айдарда, Иегова јаҥы јӱрӱм болор деп сӧзин берген болордо, ол до бӱдӱп калар. Улустыҥ су-кадыгы бек болор, олор јажын-чакка ырысту јӱрер (Иса. 65:17; Ачыл. 21:3, 4). Бу сӧстӧрин Иегова тургузып салган ӧйдӧ бӱдӱрер деп, бис алаҥзыбай јадыс.

19. Слер бӱдӱмјигерди канайып тыҥыдар аргалу?

¹⁹ Эм тура бойыгардыҥ бӱдӱмјигерди тыҥыдатан кандый ла эп-арганы тузаланыгар. Толынты учын быйанду болыгар, Иегованыҥ ийде-кӱчин сананыгар, кӧгӱс керектерге туружып туругар. Ол тушта слер «бӱдӱп, узак чыдажып, Кудайдыҥ берер болгонын энчиленип турган улустыҥ» тоозында болороор (Евр. 6:11, 12; Рим. 5:5).