1. Бис јуунныҥ туштажуларында нениҥ учун каруулар бередис?

 БИС јуунныҥ туштажуларына нениҥ учун јӱредис? Бистиҥ тӧс амадубыс — Иегова Кудайысты мактаары (Сар. 26:12; 111:1). Анайда ок калганчы ӧйлӧрдиҥ кӱчтерин ӧдӧргӧ, бой-бойыбыстыҥ кӱӱнисти кӧдӱрери (1 Фес. 5:11). Оныҥ учун колдорысты кӧдӱрип, каруулар берип турзаас, бу эки амадуга јединедис.

2. Јуунныҥ туштажуларында каруулар беретен кандый аргалар бар?

² Кажы ла неделеде болуп турган јуунныҥ туштажуларында бисте јартамалдар беретен арга бар. Темдектезе, амыраар кӱнде «Каруулчы шибеени» ӱренер тушта. А иштеер кӱндерде болуп турган туштажуларда «Кӧгӱс кӱмӱштер бедирейдис» ле «Агару Бичикти јуунда ӱренеринде» туружадыс, анайда ок программаныҥ шӱӱжетен ӧскӧ дӧ бӧлӱктеринде туружадыс.

3. Јартамалдар берери јанынаҥ кӱчтер болуп турза, Еврейлерге 10:24, 25 биске канайып болужар?

³ Бис ончобыс Иегова Кудайысты мактаарга ла ака-эјелеристиҥ кӱӱнин кӧдӱрерге кӱӱнзейдис. Је јартамалдар берип турзаас, кезикте кӱчтер болордоҥ айабас. Темдектезе, кезик улус јартамалдар берерге коркып турган. А кезик улус кӧп јартамалдар берер кӱӱндӱ де болзо, ака олорды кӧп сурабай јат. Бу айалгаларда бис канайдарыс? Апостол Павелдиҥ сӧстӧри болужар. Ол еврейлерге самара бичип, јуунныҥ туштажулары сӱреен јаан учурлу деп айдып, биске «бой-бойыбысты... сергиде[р]» керек деп кӱӱнзеткен. (Еврейлерге 10:24, 25 кычырыгар.) Айдарда, бистиҥ бӱткенисти кӧргӱзип  турган тегин де јартамалдарыс ака-эјелердиҥ кӱӱнин кӧдӱрип турган деп оҥдоп турзаас, колысты кӧптӧдӧ кӧдӱрерис. Је бисти ас сурап турган болзо, карын ӧскӧ ака-эјелер каруулар берер аргалу болгонына сӱӱнерис (1 Пётр 3:8).

4. Бу јӧрмӧлдӧ нени шӱӱжерис?

⁴ Бис бу јӧрмӧлдӧ туружатан улустыҥ тоозы ас кичинек јуундарда улустыҥ кӱӱнин канайып кӧдӱрери керегинде шӱӱжерис. Оноҥ јартамалдар беретен улустыҥ тоозы кӧп јаан јуундарда улустыҥ кӱӱнин канайып кӧдӱрери керегинде шӱӱжерис. Учында бистиҥ јартамалдарыс ака-эјелердиҥ кӱӱнин чыннаҥ ла кӧдӱрип турзын деп нени айдарын кӧрӧрис.

5. Јуун кичинек болзо, бис бой-бойыбысты канайып оморкодорыс?

⁵ Кичинек јуунда эмезе бӧлӱкте јартамалдар берип турган улустыҥ тоозы ас болот. Оныҥ учун јуун ӧткӱрип турган акага эмеш сакып аларга керек болуп јат. Мынаҥ улам шӱӱжери оморкоду бербей, узак чӧйилип турган деп билдирет. Слер нени эдер аргалу? Колоорды кӧптӧдӧ кӧдӱрерге белен болугар. Ака-эјелер слерди кӧрӱп, шӱӱжеринде эрчимдӱ туружар болор.

6, 7. Јартамал берерге тыҥ коркыбаска бис нени эдер аргалу?

⁶ Слер колоорды кӧдӱрип, јартамал беререер деп јӱк сананып ла ийеле, коркый берип турган болзоор канайдараар? Кӧп улуста андый сезимдер болот. Оныҥ учун ӧткӱре тыҥ коркыбаска болужатан эп-аргаларды не бедиреп кӧрбӧс? Оноҥ башка јуунныҥ туштажуларында јартамалдар бербезеес, бис ака-эјелердиҥ кӱӱнин канайып кӧдӱретенис? Слер нени эдер аргалу?

⁷ «Каруулчы шибеениҥ» озогы чыгармаларында берилген јӧптӧрин кычырып алыгар b. Темдектезе, ол јӧрмӧлдӧрдӧ мындый јӧптӧр болгон: јуунныҥ туштажузына јакшы белетенип туругар (Укаа 21:5). Материалды канча ла кире јакшы билзеер, колоорды кӧдӱрерге ончо ло кире јеҥил болор. Анайда ок беретен јартамалаар кыска болзын (Укаа 15:23; 17:27). Јартамал канча ла кире кыска болзо, ончо ло кире ас ӧкпӧӧрӧрӧӧр. Керек дезе ака-эјелер слердиҥ кӧп шӱӱлтелерлӱ, узун јартамалдараарды эмес, је бир-эки эрмектеҥ турган кыска јартамалаарды канча киреге јеҥил оҥдоор. Слердиҥ бойоордыҥ сӧстӧрӧӧрлӧ берген кыска јартамалдараардаҥ материалга јакшы белетенип, оны јакшы оҥдоп алганаар деп кӧрӱнип јат.

8. Бистиҥ албаданганысты Иегова канайып кӧрӧт?

⁸ Слер мындагы берилген јӧптӧрди ончозын тузаланып та турган болзогор, је тӱҥей ле ӧкпӧӧрип турганаар ӧтпӧй, бир-эки ле јартамал берип турган болзоор канайдар? Иегова слердиҥ албаданып турганаарды сӱреен тыҥ баалап јат деп бир де ундыбагар (Лука 21:1—4). Ол бисти тобрак деп оҥдоп, бистеҥ эдип болбос немени сакыбай јат (Флп. 4:5). Кӱчигер неге једерин оҥдоп алала, келиштире амаду тургузып, каруу берип јадала ӧкпӧӧрбӧскӧ, Кудайдаҥ јӱрегерге амыр сурагар. Темдектезе, та кем де баштап тарый кыска бир јартамал берерге амаду тургузып алат.

9. Јаан јуундарда кандый кӱчтер болордоҥ айабас?

⁹ Јаан јуундарда ӧскӧ кӱчтер болот. Андый јуундарда јартамал айдарга турган ака-эјелер сӱреен кӧп, мынаҥ улам слердиҥ кӧдӱрген колоор кӧрӱнбей калардаҥ айабас. Темдектезе, Даниэ́лага c јартамалдар айдарга сӱреен јарап јат. Ол анайып бойыныҥ Иегова Кудайына бажырып турган деп сананат. Анайда ок ол јартамалдар берип, библиялык чындыктарга бойыныҥ бӱткенин тыҥыдат ла ака-эјелердиҥ кӱӱнин кӧдӱрет деп сананган. Је эје јаан јуунга кӧчӱп барарда, оны каа-јаа ла сурап туратан эмезе кезикте чек сурабайтан. «Меге андый ачу болгон — деп, Даниэла куучындайт. — Кезикте меге аҥылу ижимди јылыйтып салгам деп билдиретен. Мындый неме такып-такып боло берзе, мени ӧнӧтийин сурабай турган деп санаа келетен».

10. Бисте каруу беретен арга болзын деп нени эдерге јараар?

¹⁰ Даниэладагы санаалар слерде болгон бо? Андый санаалар болгон болзо, слер колоорды бош салып ийеле, бир де јартамал бербей, јӱк ле угуп отурайын деп сананар болороор. Је андый да болзо, чӧкӧбӧгӧр. Слер нени эдер аргалу? Темдектезе, кажы ла туштажуга бир канча каруулар белетеп алыгар. Ол тушта слерди јуунныҥ бажында сурабаза, јуунныҥ учында сурап ийер болор. «Каруулчы шибееге» белетенип јатсаар, кажы ла абзац темала канайып колболып турганын тереҥжиде шӱӱп сананыгар. Ол тушта слерде абзацта бичилбеген јакшы шӱӱлте кожуп ийетен арга болор (1 Кор. 2:10). База бир јакшы арга — тереҥ чындыктарды јартап турган абзацтарга јакшы белетенип алары — нениҥ учун дезе мындый абзацтарга јартамал беретен улустыҥ тоозы астай берердеҥ айабас. Је бу ӱзе јӧптӧрди слер тузаланып та турган болзогор, тӱҥей ле канча туштажулардыҥ туркунына слерди бир де сурабай турган болзо  канайдар? Ол тушта келер туштажуны ӧткӱретен акага слер кандый абзацка каруу берерге турганаарды айдып салыгар.

11. Филиппыдагыларга 2:4-тӧги сӧстӧр бисти неге кӱӱнзедет?

¹¹ Филиппыдагыларга 2:4 кычырыгар. Апостол Павел Кудайдыҥ агару тынына баштадып, христиандарды ӧскӧ улустыйын сананзын деп кӱӱнзеткен. Бис бу јӧпти јуунныҥ туштажуларында канайып тузаланар аргалу? Ӧскӧ улус база каруулар берерге турган деп ундыбай турзаас.

12. Бис јуунныҥ туштажуларында ака-эјелердиҥ кӱӱнин канайып кӧдӱрер аргалу? (Јурукты база кӧрӱгер.)

¹² Бу айалгага ӧскӧ јанынаҥ кӧрӱп ийзеер де. Темдектезе, слер најылараарла куучындажып турзаар, олорго сӧс тӧ айдар арга бербей, јӱк ле слер куучындайдаар ба? Јок эмей! Олор до бойыныҥ санаа-шӱӱлтезин айдып турзын деп кӱӱнзеп турган эмейигер. Анайып ла ок, ака-эјелер јуунныҥ туштажуларында јартамалдар берзин деп кӱӱнзеп турганыс. Улустыҥ кӱӱнин кӧдӱретен аргалардыҥ бирӱзи — олорго бойыныҥ бӱдӱмјизин кӧргӱзетен арга берери (1 Кор. 10:24). Мыны бис канайып эдер аргалу деп кӧрӱп ийектер.

13. Јуунда канча ла кире кӧп ака-эјелер каруулар берип турзын деп, слер нени эдер аргалу?

¹³ Јуунда кӧп ака-эјелер каруулар берип турзын деп турган болзоос, баштапкы јӧп — карууларды кыскарта беригер. Бу јанынаҥ аксагалдар ла ченемелдӱ јарчылар тем кӧргӱзер аргалу. Каруулараар кыска да болзо, кӧп шӱӱлтелер айдарга албаданбагар. Нениҥ учун дезе абзацта шӱӱлтелерди ӱзе айдып салзаар, ӧскӧ кижиге кожуп айдарга не де артпас. Темдектезе, бу абзацта эки јӧп берилген: баштапкызы, кыскарта айдыгар; экинчизи, бастыра шӱӱлтелерди айдарга албаданбагар  деп. Берилген абзацка слер баштапкы ла каруу берип јаткан болзоор, шӱӱлтелердиҥ јӱк ле бирӱзин айтса јакшы болор эди.

14. Канча кире каруу берерим деп сананып тура, нени ајаруга алар керек? (Јурукты база кӧрӱгер.)

¹⁴ Канча кире каруу берерин сананып турар керек. Бис колысты ӧйинеҥ ӧткӱре кӧп кӧдӱрип турзаас, туштажуны ӧткӱрип јаткан ака јӱк ле бисти сураар керек деп сананардаҥ айабас. Ол тушта ӧскӧ ака-эјелердиҥ кол кӧдӱрер кӱӱни ӧчӧ берер болор (Эккл. 3:7).

15. а) Слерди бир де сурабаган болзо, нени эдер керек? б) Туштажуны ӧткӱрип јаткан ака кажы ла кижини сураарга нени эдер аргалу? ( «Шӱӱжерин ӧткӱрип јаткан акага нени ундыбас керек?» деген рамканы кӧрӱгер.)

¹⁵ Јуунда каруулар берерге турган ака-эјелер сӱреен кӧп болгонынаҥ улам, слерди бир-эки ле катап сураар болор. Эмезе бастыра туштажуныҥ туркунына слерди чек сурабастаҥ да айабас. Мынаҥ улам бис санааркай берер болорыс. Је јӱрегерге јуук алынбагар (Эккл. 7:9).

16. Јартамалдар айдып турган ака-эјелердиҥ кӱӱнин бис канайып кӧдӱрерис?

¹⁶ Слердиҥ кӱӱнзегенеерле кӧп сурабай турган болзо, слерге нени эдер керек? Кандый да болзо, улустыҥ айткан карууларын лаптап угала, олорды мактап туругар. Ака-эјелерге слердиҥ мактап айткан сӧстӧрӧӧр јартамалдараар ла ошкош оморкоду берет (Укаа 10:21). Бой-бойыбыстыҥ кӱӱнисти кӧдӱретен аргалардыҥ бирӱзи — мактап турары.

17. а) Ада-энелер балдарына јартамалдар белетеерге канайып болужар аргалу? б) Јартамалдар белетеерге кандый тӧрт алтам болужар? (Сносканы кӧрӱгер.)

¹⁷ Туштажуларда ака-эјелердиҥ кӱӱнин база канайып кӧдӱрерис? Слерде балдар бар болзо, олордыҥ јажына келишкедий јартамал белетеп аларга болужып беригер (Матф. 21:16). Кезикте туштажуларда јаан учурлу темалар шӱӱжилет, темдектезе, биле јанынаҥ эмезе нравственный сурактар јанынаҥ. Андый да болзо, балдар каруу берип ийгедий бир-эки абзац тӱҥей ле болуп јат. Анайда ок ада-энелер балдарына олорды јаантайын ла сурабастаҥ айабас деп јартап берер керек. Балдар мыны оҥдоп алза, олорды сурабаза тыҥ ачынбас болор (1 Тим. 6:18) d.

18. Јартамалдар берип турзаас, бойыска ӧйинеҥ ӧткӱре кӧп ајару этпеске нени эдер керек? (Укаа сӧстӧр 27:2).

¹⁸ Иегованы мактайтан ла ака-эјелердиҥ кӱӱнин кӧдӱретен јартамалдарды бистиҥ кажыбыс ла белетеп ийер аргалу (Укаа 25:11). Кезикте бойоор керегинде куучындап ийерге јараар, је ӧйинеҥ ӧткӱре кӧп куучындабазаар јакшы болор (Укаа сӧстӧр 27:2 кычырыгар; 2 Кор. 10:18). Оныҥ ордына ајаруны Иегованы мактаарына, оныҥ Сӧзине ле оныҥ албатызына этсе јакшы болор (Ачыл. 4:11). Је абзацта сезимдер керегинде куучындазын деп сурак болзо, ол тушта бойоор керегинде куучындазаар јакшы болор. Андый сурак оноҥ ары кӧрӧтӧн абзацта болор.

19. а) Кажы ла кижи јуунныҥ туштажузында ӧскӧ кижини сананып турза, кандый туза болор? (Римдегилерге 1:11, 12). б) Слерге јартамалдар берерге нениҥ учун јарап турган?

¹⁹ Јуунныҥ туштажуларында кандый јартамалдар берерге јараар, а кандыйы јарабас деп ээжилер тургузылбай јат. Кажы ла кижи ака-эјелердиҥ кӱӱнин кӧдӱретен јартамалдар берер аргалу. Мыны канайып эдер? Кезик айалгаларда јартамалдарды эмеш кӧптӧдӧ берзе јакшы болор. А кезик айалгаларда јартамалдараарды астадып, карын ӧскӧ улустыҥ јартамалдарын угуп, сӱӱнер керек. Айдарда, јуунныҥ туштажуларында кажы ла кижи ака-эјелерди сананып турза, бис «бӱдӱп турганыс ажыра бой-бойыстаҥ кӧкӱдӱ аларыс». (Римдегилерге 1:11, 12 кычырыгар.)