1. Бис неде алаҥзыбайдыс?

 БИС Иегованыҥ ишчилери болодыс, оныҥ учун ол бисти сӱӱп турган ла јӱрӱм биске сӱӱнчи экелзин деп кӱӱнзеп турганын билерис (Рим. 8:35—39). Анайда ок библиялык принциптер биске туза экелип турган деп, бӱдӱп јадыс (Иса. 48:17, 18). Је сакыбаган јанынаҥ кӱчтерге табартсаас канайдарыс?

2. Бисте кандый кӱчтер болордоҥ айабас ла мынаҥ улам кандый сурактар чыгар болор?

² Иегованыҥ ончо ишчилеринде кӱчтер болот. Темдектезе, бисти билегистеҥ кем-кем ачындырып ийет. Ол эмезе кандый бир ар-бӱткенниҥ тӱбегинеҥ шыралайдыс. Ол эмезе бӱдӱмјибис учун истедип јадыс. Анайда ок су-кадыгыс уйадай берзе, јазап јарлабай барадыс. Бу кӱчтердеҥ улам бисте мындый сурактар чыгар болор: «Нениҥ учун менле мындый неме болуп калган? Мен нени јастыра эдип ийдим не? Иегова мени артыргызып салды ба?» Слерде мындый сурактар чыгып турган ба? Эйе, болзо, бир де чӧкӧбӧгӧр. Мындый санааркаштар Иегованыҥ кӧп чындык ишчилеринде болуп туратан (Сар. 22:1, 2; Авв. 1:2, 3).

3. Сарын 34:19-таҥ бис неге ӱренедис?

³ Сарын 34:19 кычырыгар. Бу сарында эки јаан учурлу шӱӱлте бар: 1) уур-кӱчтер чындык та улуста болуп јат; 2) Иегова бисти ченелтелердеҥ јайымдап јат. Ол мыны канайып эдет? Иегова бисти јӱрӱмге чын кӧрӱмдӱ болорго болужат. Бис ого иштезеес, сӱӱнчи аларыс деп, ол сӧзин берип турган да болзо, је бу телекейде бис санааркаштар јогынаҥ јӱрерис деп айтпай јат  (Иса. 66:14). Анайда ок бисти ижемјибисти јылыйтпазын деп кӱӱнзеп јат. Нениҥ учун дезе келер ӧйдӧ качан да тӱгенбейтен ырысту јӱрӱм болор (2 Кор. 4:16—18). Је эм тура Иегова биске колыбысты бош салбай, оноҥ ло ары јӱрерге болужып јат (Ыйы 3:22—24).

4. Бис бу јӧрмӧлдӧ нени шӱӱжерис?

⁴ Озогы ла эмдиги ӧйдиҥ Иегованыҥ чындык ишчилериниҥ темдеринеҥ кандый бойыска ӱредӱ аларысты кӧрӱп ийектер. Кудайдыҥ ишчилеринде сакыбаган јанынаҥ кӱчтер болуп турганын билип аларыс. Је бис Иеговага иженип турзаас, ол бисти качан да артыргыспас ла болужарга кандый бир эп-арга табар (Сар. 55:22). Слер бу темдерди кӧрӱп тура, бойоордоҥ сурагар: «Мен бу кижиниҥ ордына болгон болзом канайдар эдим? Бу тем Иеговага бӱдӱмјимди тыҥыдарга канайып болужат? Бу темнеҥ бойыма кандый ӱредӱ алдым?»

5. Лаваннаҥ улам Иаковто кандый кӱчтер болгон? (Кадарындагы јурукты кӧрӱгер.)

⁵ Озогы ӧйдӧ Иегованыҥ ишчилеринде сакыбаган јанынаҥ кӱчтер болгон. Иаковтыҥ учуралын кӧрӱп ийектер. Оныҥ адазы, Исаак, ого Лаван деп тӧрӧӧниниҥ айылына барып, оныҥ кыстарыныҥ бирӱзин ӱй кижи эдип алзын деп јакарган. Лаван база Кудайдыҥ ишчизи болгон. Исаак дезе уулын Иегова оны кайралдаар деп айткан (Баш. 28:1—4). Иаков Лаванныҥ айылына једип барала, оныҥ кичинек кызына, Рахильге, кӧзин салган. Иаков Рахиль учун јети јыл иштеерге суранган. Оныҥ учун Лаван Рахильди ого берип ийерге јӧпсинген (Баш. 29:18). Је айалга кенетийин солына берген. Той кӱнде Лаван Иаковко кичинек кызыныҥ, Рахильдиҥ, ордына, јаан кызын, Лияны берип јат. А Рахильди јӱк ле бир неделенеҥ берген. Је ол учун Иаковко база јети јыл иштеерге келишкен (Баш. 29:25—27). Анайда ок Лаван Иаковты иште де тӧгӱндеген. Анайып, ол Иаковты 20 јылдыҥ туркунына кул эдип алала коркышту этире иштендирген! (Баш. 31:41, 42).

6. Иаковто база кандый кӱчтер болгон?

⁶ Иаковто ӧскӧ дӧ кӱчтер болгон. Оныҥ билези јаан болгон. Уулдары бой-бойлорыла кезикте јарашпай туратан. Керек дезе олор кичинек карындажын да, Иосифти, кулданышка садып ийген. Анайда ок Симеон ло Левий деп уулдары билезиниҥ јаман адын чыгарган ла Иегова Кудайдыҥ адын уйатка тӱжӱрген. Бого коштой оныҥ сӱӱген ӱйи Рахиль, экинчи бала чыгарып јадала божоп калды. Оныҥ ӱстине, јадып турган јеринде торо башталарда, карып калган Иаковко Египеттӧӧн кӧчӧргӧ келишкен (Баш. 34:30; 35:16—19; 37:28; 45:9—11, 28).

7. Иегова Иаковко јарадузын канайып кӧргӱскен?

⁷ Мындый кӱчтер де болгон болзо, Иаков Иеговага ла оныҥ берген сӧзине бӱткен. А Иегова дезе ого јарадузын кӧргӱзип туратан. Темдектезе, Лаван оны тӧгӱндеп те турарда, Иегова оны кӧп јӧӧжӧлӧ алкаган. Анайда ок узак јылдардыҥ туркунына божоп калган деп бодогон Иосифке јолыкканы учун Иеговага ол јаан быйанду болгон болор. Бу ончо ченелтелерди ӧдӧргӧ Иаковко не болушкан? Иеговага јуук најы болгоны болушкан (Баш. 30:43; 32:9, 10; 46:28—30). Бис те Иегованыҥ јуук најызы болзоос, јӱрӱмисте сакыбаган  јанынаҥ болуп турган кӱчтерди ӧдӱп чыгарыс.

8. Давид каан нени эдерге тыҥ кӱӱнзеген?

⁸ Давид каан Кудайга ӧргӧӧ тударга сӱреен тыҥ кӱӱнзеген. Је оныҥ санаазыла болбоды. Ол бойыныҥ амадузын ӱзе судурчы Нафанга куучындап берерде, ол ого мынайып айтты: «Чындык Кудай сениле кожо, эдерге турган санааҥды ӱзе ле эт» (1 Лет. 17:1, 2). Бу сӧстӧрди угала, Давид каан кандый тыҥ сӱӱнди не! Оноҥ ол капшай ла бу мындый јаан ишти канайып эдерин шӱӱп сананып баштаган болор.

9. Давид Иегованыҥ јетирӱзин угала канайтты?

⁹ Је јаан удабай Иегованыҥ судурчызы каанныҥ кӱӱнин ӧчӱрип ийгедий јетирилӱ келген. «Ол ло тӱнде» Иегова Нафанга ӧргӧӧни Давид эмес, је оныҥ уулдарыныҥ бирӱзи тудар деп айткан (1 Лет. 17:3, 4, 11, 12). Давид бу јетирӱни угала канайтты? Ол ачынып кородоордыҥ ордына амадузын солып ийген. Давид каан Соломон тудатан ӧргӧӧгӧ керектӱ алтын-мӧҥӱнди ле агаш-ташты јууп баштаган (1 Лет. 29:1—5).

10. Иегова Давид каанды канайып алкаган?

¹⁰ Иегова Давид каанга: «Сен ӧргӧӧни тутпазыҥ» — деп айткан ла кийнинеҥ, оныла јӧптӧжӱ тургускан. Бу јӧптӧжӱле болзо, оныҥ бала-барказынаҥ барган бир кижи јажын-чакка башкарар (2 Сам. 7:16). Јаҥы телекейде Давид оныҥ бала-барказынаҥ барган Иисус каанныҥ башкарузында јадып турганын билип ийеле не аайлу сӱӱнгей не! Бу библиялык учуралдаҥ бойыска кандый ӱредӱ аларыс? Бис эмди Кудайдыҥ ижине эдерге турганысты эдип болбой до турган болзоос, келер ӧйдӧ Иегова биске ондый јаан сыйлар белетеп салган! Бис оны эм тура јетире оҥдобой до турган болорыс.

11. Баштапкы чакта Кудайдыҥ Каандыгы христиандардыҥ сакыганы аайынча келбеген де болзо, Иегова олорды канайып алкаган? (Апостолдордыҥ ижи 6:7).

¹¹ Баштапкы чактыҥ христиандары Кудайдыҥ Каандыгыныҥ качан келерин билбеген де болзо, оны сӱреен тыҥ сакыган (Ап. ижи 1:6, 7). Оныҥ учун олор колын бош салбай, сӱӱнчилӱ јарды кӧптӧдӧ јарлап баштагандар. Сӱӱнчилӱ јарды олор мынайда јарлаарга албаданарда, Иегованыҥ алкыжын оноҥ јарт кӧргӧн. (Апостолдордыҥ ижи 6:7 кычырыгар.)

12. Ачана-торо ӧйдӧ христиандар нени эткилеген?

¹² Баштапкы чактыҥ христиандары база бир кӱчке табарткылаган — «бастыра телекейде улу ачана-торо» башталган (Ап. ижи 11:28). Олорго кандый кӱч болды не! Билениҥ бажы болуп турган улус билегисти канайып азыраарыс деп санааркаган болор. А Кудайдыҥ ижинде кӧптӧдӧ туружарга сананган јииттер керегинде нени айдарга јараар? Олор бу ачана-торо божогончо сакыыр керек деп сананган болор. Је айалга ондый кӱч те болгон болзо, ака-эјелер бого эптежип алган. Олор бастыра эп-аргаларды тузаланып, јарлаар ишти оноҥ ло ары улалткан. Анайда ок Иудей јеринде јадып турган ака-эјелерле бары-јогыла ӱлешкен (Ап. ижи 11:29, 30).

13. Иегова ачана-торо тушта ака-эјелерди канайып алкаган?

¹³ Иегова ачана-торо тушта ака-эјелерди канайып алкаган? Гуманитарный болуш алган улус Иегованыҥ болужын бойыныҥ кӧзиле кӧргӧн (Матф. 6:31—33). Олор, байла, болуш јетирген  ака-эјелерге оноҥ јуук болуп калган. А акча-јӧӧжӧлӧ болушкан улус јаан сӱӱнчи алгандар (Ап. ижи 20:35). Айдарда, Иегова олордыҥ ончозын бу айалгага эптежип, бой-бойына болушканы учун сӱреен јаан алкыжын берген.

14. Павел ле Варнавада кандый учурал болды, мынаҥ кандый туза болгон? (Апостолдордыҥ ижи 14:21, 22).

¹⁴ Баштапкы чактыҥ христиандарында сакыбаган јанынаҥ кӧп истежӱлер болуп туратан. Темдектезе, апостол Павел ле Варнава Листрада јарлап турарда кандый учурал болгонын кӧрӱп ийектер. Озо баштап улус олорды јылу уткыган. Је оноҥ бу улустыҥ кезиги, ӧштӱлердиҥ кӧрӱмине киреле, Павелди таштарла шыбалап салган. Мынаҥ улам ол арай божобогон (Ап. ижи 14:19). Је Павел ле Варнава мындый табаруга табарткан да болзо, бир де јалтанбай, оноҥ ло ары ӧскӧ јерде јарлаган. Мынаҥ кандый туза болды? Олор «кӧп ӱренчиктер» белетеген ле ака-эјелердиҥ бӱдӱмјизин тыҥыткан. (Апостолдордыҥ ижи 14:21, 22 кычырыгар.) Айдарда, Павел ле Варнаваныҥ истежӱлердеҥ јалтанбай јарлаганынаҥ кӧп улуска јаан туза болды. Анайып ла ок бис те Иегованыҥ берген јакылтазын оноҥ ло ары јалтанбай, чӧкӧбӧй бӱдӱрип турзаас, кӧп алкыштар аларыс.

15. Макмиллан аканыҥ теми слерди неге ӱредет?

¹⁵ Иегованыҥ ишчилери 1914 јыл јууктап келедерде, јаан солынталар сакыган. Александр Макми́ллан аканыҥ темин кӧрӱп ийектер. Ол ӧйдӧ Макмиллан ака мен удабас ла теҥери барарым деп сананган. Керек дезе ол 1914 јылдыҥ сыгын айында куучын-эрмегинде мынайда айткан: «Бу мениҥ калганчы куучын-эрмегим болордоҥ айабас». Је аканыҥ санаазы јастыра болгон деп, бис те эмди билерис. Кийнинде ол мынайда айткан: «Теҥериге барарга арай ла меҥдеген эмтирис». Оноҥ: «Кайраканыска оноҥ ло ары эрчимдӱ иштенер керек» — деген. Макмиллан ака бойы да бу сӧстӧри аайынча јӱрген: ол эрчимдӱ јарлаган, черӱге барбаганы учун тӱрмеде отурган карындаштардыҥ кӱӱнин кӧдӱрген. Карып та каларда, јуундарды бир де божотпой туратан. Макмиллан ака кайралын сакып тура, кӧп иштегенинеҥ кандый туза алган? 1966 јылда божоордоҥ озо, самаразында ол мынайда бичиген: «Мениҥ бӱдӱмјим алдындагызынаҥ кӧрӧ оноҥ бек болуп калган». Макмиллан аканыҥ теминеҥ кӧп немеге ӱренерге јараар. Анчада ла кӱчтерисле узак тартыжарга келижип турза (Евр. 13:7).

16. Херберт ле оныҥ ӱйинде сакыбаган јанынаҥ кандый ченелте болгон? (Иаков 4:14).

¹⁶ Иегованыҥ ишчилеринде су-кадыгы јанынаҥ сакыбаган ченелтелер база болот. Мындый ченелте Хе́рберт Дже́ннингс b акада болгон. Ол бойыныҥ биографиязанда ӱйиле кожо Ганада миссионерлер болуп иштегени керегинде куучындаган. Олорго бу ижи сӱреен тыҥ јарап туратан. Је кенетийин бир ӧйдӧ Дженнингс акада психический јаан оору табылган. Ол Иаков 4:14 (кычырыгар) цитировать эдип, мынайып айткан: «Эмди биске бу ӱлгерде айдылган эртенги кӱн келди. Мындый јаан ченелтени бис сакыбаганыс. Оныҥ учун Гананы ла ондогы јуук кӧп  најыларысты артыргызып, [эмденерге], Канададӧӧн јанарга келишкен». Дженнингс ака ла оныҥ ӱйи јӱрӱминиҥ мындый кӱч ӧйинде де Иегова олорды бойыныҥ кӱчтӱ колыла оноҥ ло ары алып јӱрген деп јаантайын кӧрӱп турдылар.

17. Дженнингс аканыҥ теми ака-эјелерге канайып болушкан?

¹⁷ Херберт Дженнингс аканыҥ биографиязы кӧп ака-эјелерге сӱреен јаан тузазын јетирген. Бир эје мындый сӧстӧр айткан: «Херберт Дженнингс аканыҥ биографиязы чылап јӱрегимди не де томылтпаган. [...] Ол ака ижин артыргызып, су-кадыгына јаан ајару эткен. Оныҥ теми меге бойымныҥ айалгамга чын кӧрӱмдӱ болорго болушкан». А бир ака мынайып куучындаган: «Мен 10 јылдыҥ туркунына аксагал болгом. Кенетийин менде психический оору табылган. Мынаҥ улам меге сӱреен тыҥ јарап турган молјуларымды бӱдӱрип болбой баргам. Оныҥ учун Иеговага једимдӱ иштеп турган ака-эјелердиҥ биографияларын кычырзам, бойымды эш-кереги јок кижи деп сезип, тыҥ кунугып туратам. Је Дженнингс аканыҥ турумкайы кӱӱнимди сӱреен тыҥ кӧдӱрген». Айдарда, сакыбаган јанынаҥ кӱчтер болуп турган ӧйлӧрдӧ дӧ, бис ака-эјелердиҥ кӱӱнин кӧдӱрип турар аргалу. Јӱрӱмис кенетийин солынып турза, Кудайга чындык ла турумкай иштеп јӱргенисле ака-эјелерге тем болуп јадыс (1 Пётр 5:9).

18. Нигериядагы эјениҥ теминеҥ слер неге ӱренедигер? (Фотојуруктарды база кӧрӱгер.)

¹⁸ Кезик ака-эјелер башка-башка тӱбектердеҥ улам шыралап јат. COVID-19 деп пандемияныҥ ӧйинде мындый учурал болгон: Нигерияда кызычагын јаҥыскан чыдадып турган эједе курсак-тамагы да, акча-манады да божоп јатты. Бир катап эртен тура кызычагы энезинеҥ: «Арткан калган ристи кайнадып јип ийзеес, оноҥ ары нени јиирис?»  — деп сураган. Бого энези: «Бисте мынаҥ ӧскӧ акча да, курсак та јок. Је бис, балам, Сарептадагы тул ӱй кижиниҥ теми аайынча арткан-калган курсагысты кайнадып ийеле, Иеговага иженерис» — деген (1 Каан. 17:8—16). Оноҥ обедте нени јиир деп, олор санангалакта ла ака-эјелердеҥ гуманитарный болуш келген. Бу курсак дезе олорго эки неделенеҥ ажыра јеткен. Оноҥ ары эје мынайда куучындайт: «Кызычагыма айткан сӧстӧримди Иегова оной лаптап укканын коркышту кайкагам». Оныҥ учун ундыбактар: кенетийин боло берген кӱчтердиҥ ӧйинде Иеговага иженип турзаас, бис ого оноҥ јуук болуп каларыс (1 Пётр 5:6, 7).

19. Алексей Ершов акада кандый истежӱлер болгон?

¹⁹ Калганчы јылдарда бистиҥ кӧп ака-эјелер сакыбаган јанынаҥ болгон истежӱлерге табарткан. Темдектезе, Россияда јадып турган Алексей Ершов ака. Алексей ака дезе Россияда јайым болгон ӧйдӧ, 1994 јылда, сууга чӧҥӱрилген. Кийнинде, айалга солына берген. 2020 јылда аканыҥ айылында тинтӱ болордо, оныҥ кӧп немелерин конфисковать эдип алгандар. Тоолу айдаҥ јаҥдар акага уголовный керек ачкан. Кӧрӧр болзо, Алексей аканыҥ Агару Бичик ӱренип турган кижизи бир јылдаҥ ажыра ӱзе немени видеого согуп турган болуптыр. Бу кандый јаман кылык! Акага не аайлу ачынчылу болды не.

20. Алексей Ершов Иеговала колбуларын тыҥыдарга нени эдет?

²⁰ Ченелтелер Алексей аканыҥ бӱдӱмјизин уйадатпаган. Оныҥ Иеговала колбулары оноҥ до бек болуп калган. Алексей ака мынайда куучындаган: «Ченелтелердиҥ ӧйинде ӱйимле кожо кӧптӧдӧ мӱргӱп баштаганыс. Бу айалгада Иегованыҥ болужы јогынаҥ канайдар эдим не? Анайда ок меге Агару Бичикти таҥынаҥ ӱренери болужат. Мен озогы ишчилердиҥ темдерин шӱӱп сананадым. Анда токуналу артып, Иеговага иженетен учуралдар сӱреен кӧп».

21. Бу јӧрмӧл бисти неге ӱредет?

²¹ Бу јӧрмӧлдӧҥ бис неге ӱренедис? Јӱрӱм кенете солынардаҥ айабас, је бис Иеговага иженип турган болзоос, ол биске болужар. Бу јӧрмӧлдиҥ тӧс ӱлгериле болзо, «чындык кижиде кӧп уур-кӱчтер болот. Је Иегова оны олордыҥ ончозынаҥ јайымдап јат» (Сар. 34:19). Оныҥ учун кӱчтерди эмес, је Иегова Кудайыстыҥ берип турган ийде-кӱчин сананып јӱректер. Ол тушта бис те апостол Павел чилеп: «Меге кӱч берип турган Кудайдыҥ болужыла ончоны эдер аргам бар» — деп айдар аргалу болорыс! (Флп. 4:13, ЈТ).