1. Бир уулчактыҥ тирилишке бӱдӱп турганы недеҥ кӧрӱнген?

 МЭТЬЮ деп уулчак јаан оорула оорыган, мынаҥ улам ол кӧп операциялар этирткен. Бир катап ого јети јаш болордо, ада-энезиле кожо JW Broadcasting^®-тиҥ кажы ла ай чыгып турган программазын кӧргӧн. Программаныҥ учында јаҥы јӱрӱмде тирилген улусты уткыыры керегинде кӱӱлик видео кӧргӱзилген b. Программа божой берерде, Мэтью ада-энезиниҥ јанына базып келеле, колынаҥ тудуп, мынайда айткан: «Ада-эне, кӧрзӧӧр, мен божоп то калзам, удабас тирилип келерим. Сакып алар мени, ӱзе јакшы болор». Бу уулчактыҥ ада-энези уулыныҥ тирилишке тыҥ бӱдӱп турганын кӧрӧлӧ, не аайлу сӱӱнди не!

2, 3. Нениҥ учун тирилиш керегинде шӱӱп сананып турар керек?

² Кезикте биске ончобыска тирилиш керегинде шӱӱп сананар керек (Иоанн 5:28, 29). Нениҥ учун дезе бис кенетийин јаан ооруп калардаҥ айабазыс. Ол эмезе јуук кижибис божой берердеҥ айабас (Эккл. 9:11; Иак. 4:13, 14). Мындый ченелтениҥ ӧйинде тирилишке иженгенис болужын јетирер (1 Фес. 4:13). Агару Бичикте айдылганыла, теҥеридеги Иегова Кудайыс бисти сӱреен јакшы билер ле тыҥ сӱӱп јат (Лука 12:7). Оныҥ учун Иегова божоордоҥ озо кандый кижи болгоныс, кандый санаалу јӱргенис, анайып ла тиргизип ийер. Кудайыстыҥ сӱӱжин биске ӱргӱлји јӱрӱм берерге турганынаҥ кӧрӧдис! Божоп то калзаас, Иегова бисти тиргизип алар.

³ Бу јӧрмӧлдӧ озо ло баштап нениҥ учун бис тирилишке бӱдер аргалу деп кӧрӧрис. Оноҥ бистиҥ бӱдӱмјибисти тыҥыдатан Агару Бичиктеҥ алынган бу јӧрмӧлдиҥ тӧс ӱлгерин: «Лазарь тирилер!» (ЈТ) — деген ӱзӱкти кӧрӧрис  (Иоанн 11:23). Је учында тирилишке оноҥ тыҥ бӱдерге нени эдер керек деп суракты кӧрӱп ийерис.

4. Кемниҥ-кемниҥ берген сӧзине бӱдерге бис неде алаҥзыбас учурлу? Тем куучындап беригер.

⁴ Кижиниҥ берген сӧзине бӱдерге, бис оныҥ кӱӱнин де, аргазын да кӧрӱп јадыс. Темдектезе, турагар кандый бир јотконноҥ улам тыҥ јемирилип калган болзын. Бу ӧйдӧ слерге најыгар: «Санааркаба, тураҥды јазаарга болужып берерим» — деп айдат. Ол мыны акту јӱрегинеҥ айдып турган ошкош, оныҥ учун слер оныҥ болужарга турганында алаҥзыбай јадыгар. Анайда ок најыгар тураны тудуп билер де ошкош, ондо керектӱ јепселдери де бар, мынаҥ улам ол слерге болужып ийер аргалу деп бӱдӱп јадаар. Је божогон улусты тиргизер деп, Кудайдыҥ берген сӧзине бӱдедеер бе? Ондо мыны эдерге кӱӱн де, ийде-кӱч те бар ба?

5, 6. Бис Иегова божогондорды тиргизерге кӱӱнзейт деп, нениҥ учун бӱдӱп турганыс?

⁵ Иегова божогон улусты тирилтерге кӱӱнзеп јат па? Эйе, бого бир де алаҥзу јок! Теҥеридеги Адабыс агару тынныҥ болужыла бир канча улусты тирилиш керегинде бичип салзын деп тузаланган (Иса. 26:19; Ос. 13:14; Ачыл. 20:11—13). Ол айткан сӧзин јаантайын бӱдӱрип јат (Иис. Н. 23:14). Иегова Кудай божогон улусты тирилтерге сӱреен тыҥ кӱӱнзеп јат. Нениҥ учун оной айдарга јараар?

⁶ Иовтыҥ айткан сӧстӧрин сананып ийектер. Иов бойын божоп калза, Иегова ого санаап, оны тиргизип алар деп бӱткен (Иов 14:14, 15). Иегова анайып ла бойыныҥ чындык улузын су-кадык ла ырысту јӱрӱм јӱрзин деп тиргизип аларга кӱӱнзейт. Је Кудайды билбей божоп калган канча миллиард улусты тиргизер бе? Иегова олорды сӱӱп јат. Олорды да тиргизип алар (Ап. ижи 24:15). Бу да улуска ого најы болотон ло ӱргӱлји јӱрӱм јӱретен арга берерге кӱӱнзейт (Иоанн 3:16). Айдарда, Иегова божогон улусты тиргизерге турган деп јап-јарт кӧрӱп јадыс.

7, 8. Иеговада божогон улусты тирилтерге ийде-кӱчи бар деп, нениҥ учун алаҥзыбайдыс?

⁷ Је Иеговада божогон улусты тиргизетен ийде-кӱчи бар ба? Бар эмей! Нениҥ учун дезе ол «Кӱчтӱдеҥ Кӱчтӱ Кудай» (ЈТ) (Ачыл. 1:8). Ондо кандый ла ӧштӱни, керек дезе ӧлӱмди де, јеҥип алатан ийде-кӱчи јеткилинче (1 Кор. 15:26). Мыны билгенис бисти токунадып јат ла бӱдӱмјибисти тыҥыдат. Эмма Арно́льд эјениҥ учуралын кӧрӱп ийектер. Ол ло оныҥ билези Экинчи телекейлик јуу-согуштыҥ ӧйинде коркышту јаан ченелтелерге табарткан. Јууктарын нацисттердиҥ концлагерьлеринде јылыйткан кызына Эмма мынайда айткан: «Ӧлӱм божогон улусты јажын-чакка олјодо тудуп турган болзо, оныҥ ийде-кӱчи Кудайдыҥ ийде-кӱчинеҥ канча катапка кӧп деп билдирер эмес пе?» Је Иегова Кудайдаҥ кем де, не де кӱчтӱ эмес! Айдарда, јӱрӱм берген Кӱчтӱдеҥ Кӱчтӱ Кудайыс божогон улусты тиргизер аргалу.

⁸ Кудай улусты тирилтип ийер аргалу деп бӱдетен база бир шылтагын кӧрӱп ийектер. Оныҥ санаазы кыска эмес. Ол кажы ла јылдысты адыла адап јат (Иса. 40:26). Бистиҥ Кудайыс божоп то калган улусты ундыбаган (Иов 14:13; Лука 20:37, 38). Ого тирилтетен улузыныҥ тыш кеберин, јӱрген јӱрӱмин, кылык-јаҥын ла санаазын оок-теегинеҥ бери эске алып ийерге бир де кӱч болбос.

9. Слер нениҥ учун тирилишке бӱдедигер?

 ⁹ Иегова Кудай божогон улусты тиргизер деп бӱдӱп јадыс. Нениҥ учун дезе ондо божогон улусты тиргизетен кӱӱни де, ийде-кӱчи де бар. Је тирилишке бӱдетен база бир шылтак — Иегова алдында да улусты тиргискен. Библиялык ӧйлӧрдӧ ол кезик чындык улуска, анайда ок Иисуска да божогон улусты тиргизетен ийде-кӱч берген. Эмди дезе Иисустыҥ улусты тиргискен учуралдарыныҥ бирӱзин кӧрӱп ийектер. Бу учурал Иоанныҥ 11-чи бажалыгында айдылат.

10. Иисус Иордан сууныҥ ол јанында болордо, Вифания деп јуртта не болгон ло оноҥ Иисус не этти? (Иоанн 11:1—3).

¹⁰ Иоанн 11:1—3 кычырыгар. Б. э. 32-чи јылыныҥ учында Вифания деп јуртта болгон учуралды кӧрӱп ийектер. Ондо Иисустыҥ најылары Лазарь ла оныҥ кожо чыккандары, Мария ла Марфа, јадып тургандар (Лука 10:38—42). Лазарь кенетийин тыҥ ооруп јат. Мынаҥ улам Мария ла Марфа тыҥ санааркай бергиледи. Олор ол керегинде Иисуска айттыру ийип јат. Је Иисус Вифаниянаҥ эки кӱнниҥ туркунына баратан Иордан сууныҥ ол јанында болгон (Иоанн 10:40). Айттыру Иисуска једип келерде, оныҥ јуук најызы, Лазарь, божой берген. Иисус Лазарьдыҥ божой бергенин билген де болзо, база эки кӱнге ондо артып калды. Оноҥ ол Вифаниядӧӧн шыйдынды. Је Иисус Вифаниядӧӧн једип келерде, Лазарьдыҥ божогонынаҥ бери тӧрт кӱн ӧдӱп калды. Иисус најыларын јӧмӧйтӧн лӧ Кудайдыҥ адын мактайтан кайкамчылу та нени де эдерге сананды (Иоанн 11:4, 6, 11, 17).

11. Бу учурал бисти најылажары јанынаҥ неге ӱредет?

¹¹ Мынаҥ бис чын најылар кандый болор керек деп кӧрӱп јадыс. Мария ла Марфа элчини, Иисусты келзин деп айттыртарга эмес, је Иисуска најызы ооруп калганын айттыртарга ийген (Иоанн 11:3). Иисус божой берген Лазарьды ыраактаҥ ла тиргизип ийер эди. Андый да болзо, Мария ла Марфаныҥ јанында кожо болорго, Вифанияга једип келди. Слерде кандый бир кӱч айалга боло берзе, айттыру јогынаҥ болужарга једип келетен најы бар ба? Андый најыларга бис кыйын-шыраныҥ ӧйинде иженер аргалу (Укаа 17:17). Айдарда, андый најы болорго Иисус чылап албаданып турактар! Је Вифанияда оноҥ ары не болды? Куучынысты улалтып ийектер.

12. Иисус Марфага нени айткан ла нениҥ учун ол куру сӧс эмес? (Иоанн 11:23—26).

¹² Иоанн 11:23—26 кычырыгар. Иисустыҥ Вифания деп јерге јууктап келгенин Марфа угуп ийди. Оноҥ ол капшай ла ого удура барала, мынайып айтты: «Кайракан, сен мында јӱрген болзоҥ, Лазарь ӧлбӧс эди!» (Иоанн 11:21, ЈТ). Је чын ла, Иисус Лазарьды јазып ийер аргалу болгон. Је ол оноҥ кайкамчылу неме  эдерге турган. Ол сӧзин берип јат: «Лазарь тирилер!» — деп. Оныҥ сӧзине бӱдерге, Марфада база бир шылтак бар. Иисус мынайып айдып јат: «Мен — тирилери ле јӱрӱм». Эйе, Кудай Иисуска ӧлӱм ле јӱрӱмди бийлейтен јаҥ берген. Мынаҥ озо ол кичинек кызычакты тиргискен, оноҥ бир јиит уулды тиргискен. Байла, Иисус оны ол ло божогон кӱн тиргискен болор (Лука 7:11—15; 8:49—55). Је Лазарьдыҥ божогонынаҥ тӧрт кӱн ӧдӱп калган. Оныҥ эди-каны јытанып баштаган. Андый кижини Иисус тирилтип болор бо?

13. Иоанн 11:32—35-ле болзо, Иисус Мария ла ӧскӧ дӧ улустыҥ ыйлап турганын кӧрӧлӧ канайтты? (Јурукты база кӧрӱгер.)

¹³ Иоанн 11:32—35, ЈТ кычырыгар. Бу учуралда оноҥ ары не болгонын кӧрӱп ийектер. Мария база Иисуска удура базып келеле, Марфа чылап: «Кайракан, сен мында јӱрген болзоҥ, Лазарь божобос эди!» — деген. Мария ла оныҥ јанында турган улус ачу-коронго бастырткан болды. Иисус олордыҥ ла најыларыныҥ ыйлап турганын кӧрӧлӧ, ичи ачып, олорло кожо ыйлай берди. Ол јуук улузын јылыйткан улустыҥ ачу-коронын јакшы оҥдогон. Оныҥ учун Иисус ачу-коронго алдырткан улусты токунадарга кӱӱнзеген.

14. Иисустыҥ Марияла кожо ыйлаганынаҥ Иегова керегинде нени билип алдыс?

¹⁴ Иисус Марияныҥ ыйлап турганын кӧрӧлӧ, ыйлай берген. Мынаҥ Иегова Адабыс сӱреен килеҥкей Кудай деп билип јадыс. Нениҥ учун мынай айдарга јараар? Ӧткӧн јӧрмӧлдӧ айдылганыла, Иисус Адазыныҥ сезимдерин ле санаазын бойыныҥ јӱрӱминде оной тӱҥей этире кӧргӱскен (Иоанн 12:45). Иисус најыларыныҥ ачу-коронго бастыртканын кӧрӧлӧ, олорды карамдап, ыйлай берди. Айдарда, Иеговага да бистиҥ ыйлап, кородоп јӱргенисти кӧрӧргӧ база ачу болот (Сар. 56:8). Бис андый килеҥкей Адабысты кӧрӱп, ого оноҥ јуук болорго кӱӱнзебезис пе?

15. Лазарьдыҥ сӧӧги салылган јердиҥ јанында не болгонын куучындап беригер (Иоанн 11:41—44). (Јурукты база кӧрӱгер.)

¹⁵ Иоанн 11:41—44, ЈТ кычырыгар.  Иисус сӧӧк салган јерге базып келеле, оны бӧктӧп турган ташты алып ийзин деп сурайт. Марфа ого јӧпсинбей, Иисуска: «Кижи јытана бертир» — деп айдат. Је Иисус каруу јандырды: «Бӱдер болзоҥ, Кудайдыҥ магын кӧрӧриҥ деп, мен сеге айтпаган бедим?» (Иоанн 11:39, 40, ЈТ). Оноҥ Иисус теҥериге кӧрӱп, мӱргӱп ийген. Ол оноҥ ары болотон неме учун бастыра мак Иеговага јетсин деп кӱӱнзеп јат. Оноҥ Иисус: «Лазарь, бери чык!» — деп айтты. Сӧӧк салган јердеҥ Лазарь чыгып келди. Иисус, кезик улустыҥ санаазыла болзо, эдип болбос кайкамчылу неме эдип ийди c.

16. Иоанныҥ 11-чи бажалыгында бичилгени тирилишке бӱткенисти канайып тыҥыдат?

¹⁶ Иоанныҥ 11-чи бажалыгында бичигени бӱткенисти тыҥыдат. Канайып? Иисустыҥ Марфага айткан сӧзин эске алып ийектер: «Лазарь тирилер!» (ЈТ) (Иоанн 11:23). Иисуста Иеговада ла чылап бу сӧстӧрди бӱдӱрер кӱӱн де, кӱч те бар. А Иисустыҥ ыйлаганы оныҥ ӧлӱм ле кыйын-шыраны јоголторго тыҥ кӱӱнзеп турганын кӧргӱзет. Лазарьдыҥ сӧӧк салган јердеҥ чыгып келгени Иисуста божогон улусты тиргизер ийде-кӱч бар деп, база ла катап керелейт. Иисустыҥ Марфага айткан сӧстӧрин сананып ийзеер де: «Бӱдер болзоҥ, Кудайдыҥ магын кӧрӧриҥ деп, мен сеге айтпаган бедим?» (Иоанн 11:40). Бис, Кудай божогон улусты тиргизип ийер деп, кыйалта јогынаҥ бӱдӱп јадыс. Нениҥ учун дезе бисте бӱдетен тӧзӧлгӧлӧр бар. Тирилишке ижемјибисти тыҥыдарга бис база нени эдер аргалу?

17. Агару Бичикте тирилиш керегинде учуралдарды кычырып турала, нени шӱӱп сананар керек?

¹⁷ Озогы ӧйдӧ болгон тирилиштерди кычырып, шӱӱп сананыгар. Агару Бичикте јерде јӱрерге тирилген улустыҥ  сегис учуралы бичилген d. Оныҥ кажызын ла не шиҥдеп кӧрбӧс? Шиҥдеп јатсаар ундыбагар, бу чын ла болгон улус: эр улус, ӱй улус, балдар. Мынаҥ бойоорго ӱредӱ алыгар. Бу темдердиҥ кажызында ла Иеговада улусты тирилтер кӱӱн де, ийде-кӱч те бар деп канайып кӧргӱзип турганын сананыгар. Је элдеҥ озо эҥ јаан тирилишти, Иисустыҥ тирилгенин, сананыгар. Ундыбагар: оныҥ тирилгенин канча јӱс улус кӧргӧн. Бу дезе — келер ӧйдӧ Иегова канча миллиард улусты тирилтер деп бӱдетен тӧзӧлгӧ (1 Кор. 15:3—6, 20—22).

18. Тирилиш керегинде кожоҥдор слердиҥ бӱдӱмјигерди тыҥытсын деп, нени эдерге јараар? (Сносканы база кӧрӱгер.)

¹⁸ Тирилиш керегинде кожоҥдорды угыгар ла кожоҥдогор (Эф. 5:19) e. Андый кожоҥдордыҥ болужыла тирилиш санаагарда оноҥ јарт јуралар. Анайда ок бӱдӱмјигерди тыҥыдар. Оныҥ учун бу кожоҥдорды угугар, кожоҥдогор, билелик бажырышта олордыҥ сӧстӧрин шӱӱжигер. Кожоҥды ӱренип алзаар, оныҥ сӧстӧри јӱрегерде ле санаагарда артып калар. Кийнинде, кандый бир кӱчтер башталза, ол эмезе јуук кижигерди јылыйтсаар, Иегованыҥ агару тыны слерге бу кожоҥдордыҥ сӧстӧрин эске алындырып, токунадар ла ийде-кӱч берер.

19. Тирилиш керегинде шӱӱп сананып тура, нени сананарга јараар? ( «Слер олордоҥ нени сурап угар эдеер?» деген рамканы кӧрӱгер.)

¹⁹ Санаагарда јурап туругар. Карын Иегова биске бойысты јаҥы телекейде кӧрӱп турар арга берген. Бир эје мынайда куучындаган: «Мен бойымды райда розалардыҥ јараш јыдын јыткарып, базып јӱргенимди кӧрӧдим». Озогы ӧйдиҥ Кудайдыҥ чындык ишчилери тирилип келзе, слер олорды канайып уткыыраарды сананыгар. Слер кемди кӧрӧргӧ кӱӱнзейдеер? Ол кижинеҥ нени сураар эдеер? Бого коштой јуук улузыгарды канайда уткыыраарды јаҥду-маҥду сананбай, карын элбеде шӱӱп сананыгар. Слер олорго озо баштап нени айдараар? Олорды канайда уткыыраар? Тыҥ сӱӱнгенеердеҥ улам, байла ыйлаараар.

20. Бис нени эдерге шӱӱп алдыс?

²⁰ Божогон улусты тирилтерге сӧзин берген Иегова Кудайыска бис јаан быйанду. Бис оныҥ берген сӧзине бир де алаҥзыбай јадыс. Нениҥ учун дезе мыны эдерге Иегова Кудайда кӱӱн де бар, кӱч те бар. Оныҥ учун тирилишке бӱдӱмјибисти тыҥыдактар. Анайып Иегова Кудайыска оноҥ јуук болуп каларыс. А ол бистиҥ кажыбыска ла: «Божогон јуук улузыҥ тирилер!» — деп айдат.