1. Кезик ака-эјелерге нениҥ учун јарлаарга јарабай турган? (Јурукты база кӧрӱгер.)

 ИЕГОВАНЫҤ ишчилери теҥеридеги Адазын сӱӱп, улуска ол керегинде куучындаарга кӱӱнзейдилер. Керечилердиҥ кӧп сабазы јарлаар ишти јакшызынып јат. Је кезигине бу иш андый ла тыҥ јарабай јат. Нениҥ учун? Нениҥ учун дезе олордыҥ кезиги уйалчаҥ, улусла куучындажарга эби-јоксынып јат. Кезиги дезе кычырбаган кижиниҥ айылындӧӧн канайып киретен деп сананып јат. А кезиги дезе улус оны укпас эмезе айткылап салар деп коркып јат. А кезиги дезе Кудай јанынаҥ сӧс блаажа берерис деп чочып јат. Бу ака-эјелер ончозы ла Иегованы сӱреен тыҥ сӱӱйдилер. Је олорго таныш эмес улусла Агару Бичик керегинде куучындажарга кӱч болот. Андый да болзо, олор улуска јаантайын ла јарлап јат. Нениҥ учун дезе олор бу иш керектӱ деп оҥдоп турган. Иегова олорло сӱреен тыҥ оморкойт!

2. Јарлаар иштеҥ сӱӱнчи албай турган болзоор, нениҥ учун кунукпас керек?

² А слер јарлаар ишке база кӱӱн-кӱч јок барып јадыгар ба? Андый болзо, кунукпагар. Карын слерде јобош болгоноордоҥ улам андый сезимдер болуп турган болор. Слерге јарлаар иште сӧс блаажып турган улусла куучындажарга кӱч болуп турган болор ол эмезе улустаҥ эби-јоксынып турган болороор. Слер улуска јакшы неме куучындаарга турзагар, а улус слерди укпай јамандап турза, јаман эмей. Је теҥеридеги Адагар слерди оҥдоп јат. Ол слерди болужы јок артыргыспас (Иса. 41:13). Оныҥ учун бу јӧрмӧлдӧ јаман сезимдеристеҥ айрыларга ла јарлаар иштеҥ сӱӱнчи аларга болужатан беш јӧп кӧрӱлер.

 ИЙДЕ-КӰЧТИ КУДАЙДЫҤ СӦЗИНЕҤ АЛЫГАР

3. Иеремияга јеҥил эмес јерде јарлаарга не болушкан?

³ Иегова јебрен ӧйдӧги ишчилерине база кӱч јакылталар берген болгон. Олорго јакылтазын бӱдӱрерге не болушкан? Кудайдыҥ Сӧзи. Темдектезе, судурчы Иеремияныҥ учуралын кӧрӱп ийектер. Иегова ого јарлазын деп јакылта берген. Је ол бойын мындый ишти бӱдӱрип болбос деп сананган. Оныҥ учун: «Мен айдып билбезим, мен арай ла јиит» — деп айткан (Иер. 1:6). Је ого андый сезимдерге алдыртпаска не болушкан? Кудайдыҥ Сӧзи. «Оныҥ Сӧзи јӱрегимде от чылап кӱйет. Оны ичимде тудуп болбой јадым» — деп, Иеремия айткан (Иер. 20:8, 9). Иеремия чын ла коркышту кӱч јерде јарлаган. Је Иегованыҥ берген јары ого ийде-кӱчтӱ ле јалтанбас болорго болушкан.

4. Кудайдыҥ Сӧзин кычырып, шӱӱп сананып турганыстаҥ кандый туза болор? (Колоссыдагыларга 1:9, 10).

⁴ Кудайдыҥ Сӧзиндеги јар озогы христиандарга ийде-кӱч берген. Апостол Павел Колоссыдагы ака-карындаштарды чындыкты јакшы билзе, «јакшы керектер эдип», «Иегованыҥ ишчилерине берилген јакылталарыла јӱрер аргалу» болор деп айткан. (Колоссыдагыларга 1:9, 10, ЈТ кычырыгар.) Јакшы керектердиҥ тоозына — сӱӱнчилӱ јарды јарлаары кирет. Кудайдыҥ Сӧзин кычырып, шӱӱп сананып турзаас, Кудайга бӱдӱмјибис тыҥыыр ла улуска Каандык керегинде куучындаар керек деп, оноҥ јакшы оҥдоп баштаарыс.

5. Агару Бичикти кычырып шиҥдегенистеҥ јаан туза аларга нени эдер керек?

⁵ Кудайдыҥ Сӧзинеҥ туза аларга, оны меҥдебезинеҥ кычырар, ӱренер ле шӱӱп сананар керек. Темдектезе, слер Агару Бичикти кычырып јадала, кандый бир кӱч ӱлгерге туштаар болороор. Бу ӱлгерди керекке албай, оноҥ ары кычырардыҥ ордына, оныҥ јартамалын «Индекс публикаций Сторожевой башни» эмезе «Путеводитель по публикациям Свидетелей Иеговы» деп бичиктердиҥ болужыла шиҥдеп кӧрӱгер. Агару Бичикти мынайып шиҥдезеер, Кудайдыҥ Сӧзинде бичилгени ӱзе чын деп, оноҥ тыҥ бӱдереер (1 Фес. 5:21). А канча ла кире тыҥ бӱтсеер, Агару Бичиктеги јетирӱлерди  улуска куучындаарга ончо ло кире тыҥ кӱӱнзереер.

ЈАРЛААР ИШКЕ ЈАКШЫ БЕЛЕТЕНИГЕР

6. Јарлаар ишке нениҥ учун јакшы белетенер керек?

⁶ Јарлаар ишке јакшы белетенип алзаар, слер ӧйинеҥ ӧткӱре ӧкпӧрбӧзӧӧр лӧ куучынды јакшы апарараар. Иисус јерде јӱрерде, ӱренчиктерин јарлаар ишке ийердеҥ озо нени-канай эдетенин јартап берген (Лука 10:1—11). Ӱренчиктер Иисустыҥ айтканын тузаланып, јарлаар ишке једимдӱ туружып ийгендер. Мынаҥ улам олордыҥ јӱректери сӱӱнчиле толгон (Лука 10:17).

7. Јарлаар ишке канайып белетенер? (Јурукты база кӧрӱгер.)

⁷ Јарлаар ишке канайып белетенип алар? Озо баштап не керегинде куучындараарды, оны бойоордыҥ сӧзӧӧрлӧ канайып айдараарды сананып кӧрӱгер. Оныҥ кийнинде улус слердиҥ айтканаарды угала, нени-нени айтса, слер олорго кандый каруу беререерди сананып ийигер. Анайып, бир де ӧкпӧрбӧй, кӱлӱмзиренип ийеле, куучынды баштагар.

8. Павел христиандарды нениҥ учун той балкаш јыракыларга тӱҥдештирген?

⁸ Апостол Павел айткан: «Бис... андый эрјине чеберлелип турган той балкаш јыракылар эдибис» (2 Кор. 4:7). Павел кандый эрјине керегинде айткан? Бу дезе сӱреен баалу јарлаар иш (2 Кор. 4:1). Нениҥ учун дезе бис Каандык керегинде јарлап тура, улустыҥ јӱрӱмин аргадап јадыс. А той балкаш јыракылар кемдерди темдектейт? Кудайдыҥ ишчилерин. Павел нениҥ учун мындый тӱҥдештирӱ эткен? Оныҥ ӧйинде садучылар баалу немелерди, темдектезе, курсак-тамакты, кызыл аракыны ла акча-манатты той-балкаш јыракыларда тартып туратан. Бис база улуска сӱреен баалу немени јетиредис — Иегованыҥ берген сӱӱнчилӱ јарын куучындайдыс. А Иегова биске бу ишти бӱдӱрерге керектӱ ийде-кӱчти берип јат.

МӰРГӰГЕР

9. Улусла куучын баштаарга коркып турзаас, нени эдер керек? (Јурукты база кӧрӱгер.)

⁹ Кезикте улус биске јаман та нени де айдып ийер эмезе эдип ийер деп коркып,  јарлабай јадыс. Коркыбаска не болужар? Апостолдорды јарлабазын деп кезеткилеп турарда, олор не керегинде мӱргӱгенин сананып ийигер. Олор коркып калган отургылабай, Иеговага мынайда мӱргӱген: «Бойыҥныҥ кулдарыҥа сӧзиҥди јалтанбай айдарга бер». Иегова тӱрген ле олорго каруу берген (Ап. ижи 4:18, 29, 31). Бис кезикте коркып турган болзоос, база Иеговага мӱргӱп, болуш сурактар. Ол тушта бис улустаҥ коркыбай, карын олорды сӱӱрис.

10. Иегова биске оныҥ Керечилери болорго канайып болужат? (Исайя 43:10—12).

¹⁰ Иегова бисти бойыныҥ Керечилери эдип јарадып салган. Ол биске јалтанбас болорго болужар. (Исайя 43:10—12 кычырыгар.) Оныҥ бистерге болужып турган аргаларыныҥ јӱк тӧртӱзин кӧрӱп ийектер. Баштапкызы, бис јаҥыскан јарлабай јадыс. Бисле кожо Иисус Христос (Матф. 28:18—20). Экинчизи, Иегова биске ангелдер ийет (Ачыл. 14:6). Ӱчинчизи, ол биске агару тын берет. Оныҥ болужыла керектӱ немени эске алып ийедис (Иоанн 14:25, 26). Тӧртинчизи, бисте јарлаар ишке кожо туружатан ака-эјелерис бар. Айдарда, Иегованыҥ ла ака-эјелеристиҥ болужыла бис јалтанбай јарлаар аргалу!

ӦСКӦ АРГА БЕДИРЕГЕР, СӰӰНЧИГЕРДИ ЈЫЛЫЙТПАГАР

11. Улусты айылында тудуп болбой турган болзоос, нени эдер керек? (Јурукты база кӧрӱгер.)

¹¹ Јарлап јӱреле, улус айылдарында јок болзо, кандый сезимдер келет? Колдороорды бош салып ийер кӱӱнеер келет пе? Бойоордоҥ мындый сурактар сурагар: «Олор айылында эмес болзо, кайда? Иште бе эмезе магазиндеп јӱрген болор бо?» (Ап. ижи 16:13). Андый болзо, тышкары јарлап кӧрӱгер. Анда слер канча киреге кӧп улуска туштараар. Джо́шуа деп бир ака куучындайт: «Меге торговый центрларда ла парковкаларда јарлаарга јарап јат». Ол ӱйиле кожо, Бри́джитле, айылдар сайын эҥирде эмезе воскресен кӱнде, тал тӱш киреде барарга албаданат. Андый ӧйдӧ  улус кӧп сабада айылдарында болот (Эф. 5:15, 16).

12. Улус чындыкла тыҥ јилбиркебей турган болзо, нени эдерге јараар?

¹² Улус чындыкла јаан ла јилбиркебей турза, олор неге бӱдӱп турганын эмезе кандый суракла јилбиркеп турганын билип алыгар. Андый айалгада Джошуа ла Бриджит нени эдип турганын кӧрӱп ийектер. Олор куучынды бистиҥ буклеттердиҥ баштапкы бӱгиндеги сурагынаҥ баштайт. Темдектезе, «Библия — слерге ол кандый бичик?» деп буклеттиҥ болужыла мынайда айдат: «Кезик улус Агару Бичикти Кудайдыҥ Сӧзи деп айдат. Кезиги билбей јат. А слер нени сананадаар?» Анайып, кӧп јакшы куучындар башталат.

13. Улус бисти укпай да турза, нениҥ учун сӱӱнчисти јылыйтпайдыс? (Укаа сӧстӧр 27:11).

¹³ Јарлаар иште бистиҥ сӱӱнчис улустыҥ укканынаҥ-укпаганынаҥ камаанду болбой јат. Нениҥ учун дезе эҥ керектӱзи — Иегованыҥ ла оныҥ Уулыныҥ, Иисустыҥ, берген јакылтазын бӱдӱрери (Ап. ижи 10:42). Кезикте бис кемге де јарлап болбозоос то сӱӱнчисти јылыйтпай јадыс. Не дезе Иегованы тӱҥей ле сӱӱндирип турганысты билерис. (Укаа сӧстӧр 27:11 кычырыгар.)

14. Чындыкла јилбиркеп турган кижини бис эмес, је ӧскӧ кижи тапса, нениҥ учун сӱӱнедис?

¹⁴ Чындыкла јилбиркеген кижини бис эмес, је ӧскӧ кижи тапкан болзо, бис тӱҥей ле сӱӱнип јадыс. Бир катап «Каруулчы шибееде» јарлаар иш јылыйып калган баланы бедирегенине тӱҥдештирилген. Баланы кӧп улус бедирезе де, је оны бир ле кижи табып алат. Андый да болзо, олор бастыразы сӱӱнип јат. Анайып ла ок Христостыҥ ӱренчигин белетеери — бир ле кижиниҥ ижи эмес. Бу ишке јуунныҥ кажы ла ака-эјези туружат. Олор бастыразы јуунныҥ јерине иштенип јат. Оныҥ учун јуунныҥ туштажузына јаҥы кижи келзе, бис ончобыс сӱӱнер аргалу.

ИЕГОВАНЫ ЛА УЛУСТЫ СӰӰГЕР

15. Матфей 22:37—39-тагы принцип јарлаар иштеҥ јаан сӱӱнчи аларга канайып болужар? (Кадарындагы јурукты база кӧрӱгер.)

¹⁵ Бис Иегованы ла јуугысты сӱӱп турзаас, јарлаар иштеҥ кӧп сӱӱнчи аларыс. (Матфей 22:37—39, ЈТ кычырыгар.)  Јарлаар иште јӱрзеес, Иегова бисти кӧрӱп, сӱӱнип јат! А улуска Агару Бичикти ӱренип баштаганы не аайлу јаан сӱӱнчи экелер! Анайда ок бистиҥ јарды уккан улус ӱргӱлји јӱрӱм алар аргалу деп ундыбай туругар (Иоанн 6:40; 1 Тим. 4:16).

16. Бис айылыстаҥ чыкпай турган да болзоос, јарлаар иштеҥ сӱӱнчини канайып аларыс? Тем куучындап беригер.

¹⁶ Слер кандый бир шылтактаҥ улам айлаардаҥ чыгып болбой турган болороор. Андый да болзо, слер тӱҥей ле Иеговага ла јуугаарга сӱӱжеерди кӧргӱзер аргалу. COVID-19 деп пандемияныҥ ӧйинде Самве́л ле Да́ния айылынаҥ чыгып болбой барган. Је олор телефон ажыра јарлаган, самаралар бичиген ле зум ажыра ӱредӱлер ӧткӱрген. Самвел ака больницада рактаҥ эмденип турган ӧйдӧ, туштаган ла улуска јарлаар болгон. Ол куучындайт: «Мындый кӱчтер бисти эмоциональный јанынаҥ, эт-кан ла кӧгӱс јанынаҥ уйадатпазын деп, биске Иеговага иштееринеҥ јаан сӱӱнчи алар керек». Бу кӱчтердиҥ ӱстине, Дания эје јыгылала, ӱч айдыҥ туркунына орыннаҥ турбай јаткан. Оноҥ јарым јылдыҥ туркунына кенектердиҥ колясказына отурган. Эје куучындайт: «Мениҥ айалгамда мен нени эдер аргалу деп јазап шӱӱп сананала, бистиҥ айылыстӧӧн келип турган медсестрага ла доставщиктерге јарлагам. Анайда ок бир клиниканыҥ ишчизиле телефон ажыра куучындажып турган болгоныс». Самвел ле Дания алдындагызындый чылап иштенер аргазы јок то болгон болзо, Иеговага аргазы јеткенче ле иштеген. Мынайып, олор сӱӱнчизин јылыйтпаган.

17. Бу јӧрмӧлдӧги јӧптӧрдиҥ тузазы јаан болзын деп, нени эдер керек?

¹⁷ Бу јӧрмӧлдӧги јӧптӧрдиҥ тузазы јаан болзын деп турган болзоос, биске олордыҥ ӱзезин тузаланар керек. Бу јӧптӧрди дезе рецептке тӱҥейлеерге јараар: рецептеги ингредиенттердиҥ бирӱзин де ундыбазаас, аскан курсагыс амтанду болор. Анайып ла бис бу јӧрмӧлдӧги беш јӧпти тузаланарга албаданзаас, јаман сезимдеристи јеҥип чыгарыс ла јарлаар иштеҥ кӧп-кӧп сӱӱнчи аларыс.