1. Кӧгӱс рай ол не? Ондо јадып турган улус нени кӱӱнзейт?

 БӰГӰНГИ кӱнде јерде рай бар. Анда амыр-энчӱ сӱӱген канча миллион улус јадат. Олордыҥ кажызы ла јаан тузалу иш эдип јат. Олор бу райда јажын-чакка јадарга кӱӱнзейдилер. Олор бу райга бастыра улусты кычырат. Эжик ончо улуска ачык. Бис мында кӧгӱс рай керегинде айдадыс a.

2. Кӧгӱс райдыҥ бар болгоны нениҥ учун кайкамчылу?

² Бӱгӱнги кӱнде телекей калју-казыр керектерле толуп калган (1 Иоанн 5:19; Ачыл. 12:12). Оныҥ учун мындый коркынчылу телекейде амыр ла јараш ортолык бар болгоны сӱреен кайкамчылу. Бу ортолыкты Иегова бисти кӧгӱс јанынаҥ ӧзӱп јаранзын деп јайаган. Агару Бичикте бу ортолык «кору» болот ло «арбынду сугарылып турган сад» деп адалат (Иса. 4:6; 58:11). Ондо јаткан улуска Иегова алкыжын берет. Оныҥ учун олор бу калганчы кӱч кӱндердиҥ ӧйинде Кудайдыҥ канаттарыныҥ алдында јаткылайт (Иса. 54:14; 2 Тим. 3:1).

3. Исайя деп бичиктиҥ 65-чи бажалыгындагы судур баштапкы катап канайып бӱткен?

³ Кӧгӱс райдыҥ кандый болорын Иегова судур ажыра бичидип салган. Бу судур Исайя деп бичиктиҥ 65-чи бажалыгында бичилген. Ол судур баштапкы катап, б. э. озо 537 јылда бӱткен. Ол јылда еврейлер кинчегин алынып, Вавилонноҥ тӧрӧл јерине јанып келген. Олор Иегованыҥ алкыжыла, јемирилип калган Иерусалимди ойтодоҥ тудуп, Израильдеги Кудайга бажыратан тӧс јерди — ӧргӧӧни — орныктырып салдылар (Иса. 51:11; Зах. 8:3).

4. Исайя деп бичиктиҥ 65-чи бажалыгындагы судур бӱгӱнги кӱнде канайып бӱдет?

 ⁴ Исайяныҥ судуры экинчи катап 1919 јылдаҥ ала бӱдӱп баштаган. Ол ӧйдӧ Иегованыҥ ишчилери Улу Вавилонныҥ олјозынаҥ чыккан. 1919 јылда кӧгӱс рай јаанай берген, нениҥ учун дезе Каандык керегинде сӱӱнчилӱ јар эрчимдӱ јарлалып баштаган. Бастыра јердиҥ ӱстиле јуундар тӧзӧлгӧн, а кӧгӱс райдыҥ улузы Христоско оноҥ тыҥ тӱҥей болуп баштаган. Алдындагы ӧйдӧ кату-казыр болгон ло балыр јӱрӱм јӱрген эр ле ӱй улустар «Кудайдыҥ табыла јайалган... јаҥы кижини» кийип алгандар (Эф. 4:24). Је Исайяныҥ судурларыныҥ кезиги јӱк ле келер ӧйдӧ, јаҥы јӱрӱмде бӱдер, је кезиги бӱгӱнги кӱнде бӱдӱп јат. Айдарда, кӧгӱс рай керегинде шӱӱжип, бу райдаҥ нениҥ учун качан да чыкпас керек деп сананып ийектер.

БИСКЕ НЕНИҤ УЧУН КӦГӰС РАЙДА ЈАРАП ТУРГАН?

5. Исайя 65:13-теги судур эмди канайып бӱдет?

⁵ Бис тойу ла су-кадык. Исайяныҥ судурында айдылганыла, кӧгӱс райда јӱрген ле оныҥ тыштында јӱрген улустыҥ эки башка болгоны сӱреен јарт кӧргӱзилген. (Исайя 65:13 кычырыгар.) Иегова Адабыс биске ӱзе немени арбындап берет. Ол бисти сӱӱнчилӱ ле тойу јӱрзин деп, агару тын, Агару Бичик ле јӱзӱн-јӱӱр кӧгӱс курсак берген. (Ачылта 22:17 тӱҥдештиригер.) Је кӧгӱс райдыҥ тыштында улустыҥ јӱрӱми кандый? Олор дезе аштап-суузап, уйатка калган јӱрет. Мыныҥ шылтагы: олор Кудайды билбес (Ам. 8:11).

6. Иоиль 2:21—24-тӧ бичиген судурын Иегова канайып бӱдӱрет?

⁶ Иоиль деп ӧскӧ судурчы аш керегинде, кызыл аракы ла оливковый ӱс керегинде айдат. Бу дезе јебрен Израильдиҥ јип турган курсагы болгон. Мынайып Иегова Иоиль ажыра албатызын кӧгӱс курсакла јеткилдеерин кӧргӱскен (Иоиль 2:21—24). А бӱгӱнги кӱнде Иегова биске кандый курсактар берет? Бисте Агару Бичик, Агару Бичикке тӧзӧлӧнгӧн бичиктер, сайт, јуунныҥ туштажулары ла курултайлар бар. Бис кажы ла кӱн тойу ажанар аргалу. Оныҥ да учун бис тойу ла су-кадык албаты.

7. Бис недеҥ улам сӱӱнип турганыс? (Исайя 65:14).

⁷ Бис ырысту ла токуналу. Иегованыҥ ишчилери «јӱректеги сӱӱнчинеҥ улам», сӱӱнип кыйгырып јат. (Исайя 65:14 кычырыгар.) Бис Иеговага чындык учун, Агару Бичикте берген сӧстӧри учун, анайда ок Иисус Христостыҥ тайылгазына тӧзӧлӧнгӧн ижемји учун сӱреен јаан быйанысты айдадыс. Ака-эјелерисле бу алкыштар керегинде куучындажып турзаас, јердиҥ ӱстинде бистеҥ ырысту албаты јок деп, оноҥ јакшы оҥдоп јадыс! (Сар. 34:8; 133:1—3).

8. Кӧгӱс райдыҥ эҥ ле јакшызы неде?

⁸ Кӧгӱс райдыҥ эҥ ле јакшы немези дезе, Иегованыҥ албатызыныҥ сӱӱжи ле бирлик болгоны. Бис бӱгӱнги ле кӱннеҥ ала јуундарыста амыр ла сӱӱш болзын деп албаданадыс. Је келер ӧйдӧ бисте бу оноҥ артык келижер (Кол. 3:14). Бир эје Иегованыҥ Керечилериниҥ туштажузына баштапкы ла катап келеле, нени сескени керегинде мындый сӧстӧр айткан: «Мен бойымныҥ билемде качан да бойымды ырысту деп сеспейтем. Је Иегованыҥ Керечилериниҥ туштажузына келеле, улус бой-бойын чыннаҥ канайып сӱӱр учурлу деп кӧрӱп ийгем». Улус дезе чыннаҥ ырысту  ла токуналу болоры ол не дегенин јӱк ле кӧгӱс райга келзе кӧрӱп ийер. Олор Иегованыҥ Керечилери керегинде кӧп јаман неме уккан болор, је бистиҥ туштажуларга келеле, бисте аҥылу бир неме бар — Иегованыҥ алкыжы бар — деп оҥдоп ийер (Иса. 65:15).

9. Исайя 65:16, 17-де айдылганыла, Иегова бисти кыйын-шырадаҥ канайып айрыыр?

⁹ Бис бир де санааркабай јадыс. Исайя 65:14-тӧ кӧгӱс райга јадарга кӱӱнзебей турган улус «јӱрегиндеги ачуунаҥ улам онтоп, калактаар» деп айдылат. Је бӱгӱнги кӱнде Кудайдыҥ да ишчилери шыралап турган эмей. Мынызы чын. Је бис билерис, удабас «кыйын-шыра ундылып... јоголып калар» деп. (Исайя 65:16, 17 кычырыгар.) Иегова јаҥыс та кыйын-шыраны јоголтып салар эмес, је бистиҥ бажыста артып калган јаман санааларды да јоголтып салар.

10. Биске ака-эјелерле кожо болорго нениҥ учун јарап јат? (Јурукты база кӧрӱгер.)

¹⁰ Бӱгӱнги кӱнде бистиҥ туштажуларыс сӱреен амыр јер болот. Бу туштажуларга келип, бис бойыстыҥ санааркаштарыстаҥ ла кӱчтеристеҥ амырап аладыс. Бис бойыстыҥ јаныстаҥ Кудайдыҥ агару тыныныҥ тӱжӱмине кирип турган кылык-јаҥдарды: јалакай, јымжак, буурзак, јобош болорын кӧргӱзип турзаас, јуунныҥ амырына јӧмӧжӧдис (Гал. 5:22, 23). Кудайдыҥ организациязында болгоныс кандый јакшы! Бу кӧгӱс райдаҥ чыкпаган улус удабас Иегова «јаҥы теҥери ле јаҥы јер» керегинде судурын канайып бӱдӱрерин бойыныҥ кӧстӧриле кӧрӧр.

11. Исайя 65:18, 19-ла болзо, Иегованыҥ кӧгӱс райында болгоныстаҥ нени сезедис?

¹¹ Бис быйанзак ла сӱӱнчилӱ. Оныҥ кийнинде Исайя бис нениҥ учун кӧгӱс райда сӱӱнчилӱ јӱрӱп турганысты јартап јат. Бу кӧгӱс райдыҥ Јайаачызы — Иегова. (Исайя 65:18, 19 кычырыгар.) Оныҥ да учун Иегова улуска кӧгӱс јанынаҥ чӧл чылап какшап калган эски телекейдиҥ организацияларынаҥ чыгарга болужат. А бис дезе чечектеп, јаранып јаткан јараш кӧгӱс райда јӱредис. Бу райга бастыра улусты кычырарга кӱӱнзейдис (Иер. 31:12).

12. Исайя 65:20—24-тӧ бичилген судурлардыҥ слерге кажызы эҥ тыҥ јарайт, нениҥ учун?

¹² Кӧгӱс райда јадып турган улуста быйанзак ла сӱӱнчилӱ болотон база бир шылтак бар — јаҥы јӱрӱмде јадарга иженип турганы. Ол ӧйдӧ јӱрӱм кандый  болор деп, кажыбыс ла сананып ийектер. Агару Бичикле болзо, «тоолу ла кӱн јӱрген јаш балдар божобос, кӱндериниҥ учына јетире јӱрбеген јажы јаанап калган улус божоп калбас». Бис дезе, «туралар тудуп јадар[ыс], виноград ӧскӱрип јиир[ис]». Иегованыҥ алкыжынаҥ улам бис база качан да «калас... иштен[безис]». Иегова бисти кажы ла јанынаҥ корулаар. Јӱрӱмисти куру јерге ӧткӱрбезис. Нени-нени сураганыстаҥ да озо, биске не керек болуп турганын Иегова билип турар. Ол «кажы ла тирӱ јайаанныҥ кӱӱнин» бӱдӱрип салар деп, сӧзин берет (Иса. 65:20—24; Сар. 145:16).

13. Исайя 65:25-те айдылганыла, Иеговага иштеп баштаган улустыҥ јӱрӱми канайып солынат?

¹³ Бис амыр-энчӱ јӱредис ле коруда јададыс. Кӧп улус Кудайдыҥ агару тыныныҥ болужыла, јӱрӱминде јаан солынталар эткен. Олор озо јерлик тындулар ошкош калју-казыр улус болгон. (Исайя 65:25 кычырыгар.) Эмди олордыҥ јаман кылык-јаҥыныҥ изи де артпаган (Рим. 12:2; Эф. 4:22—24). Је бис эм тура толо кеминде эмезис, оныҥ учун јастыралар этпей јӱрер арга јок. Андый да болзо, Иегова бисти, башка-башка улусты, сӱӱшке ле амыр-энчӱ јӱрерге ӱредип салган (Тит. 2:11). Мындый кайкалды јӱк ле Кӱчтӱдеҥ Кӱчтӱ Кудай эдер аргалу!

14. Исайя 65:25-теги сӧстӧр чын деп, бир аканыҥ учуралынаҥ канайып кӧрӱнет?

¹⁴ Кижи чын ла бойыныҥ кылык-јаҥын солып алар аргалу ба? Бир учурал кӧрӱп ийектер. Бир јиит уул коркышту калапту, аайы-бажы јок кижи болгон. 20 ле јашту бойы тӱрмеге канча катап отурган. Ол кӧп машиналар уурдаган, ӧскӧ дӧ немелер уурдаган, оноҥ до јаман керектер эткен. Анайда ок јаантайын ла улусла согужып-уружып јӱрер кижи болгон. Је оноҥ ол чындыкла танышкан кийнинеҥ Иегованыҥ Керечилериниҥ туштажуларына јӱрӱп баштаган. Бу туштажулардаҥ ол кӧгӱс рай керегинде билип алала, бу кӧгӱс рай учун јӱрер керек туру не деп оҥдоп ийген. Оноҥ сууга чӧҥӱрилген кийнинде, ол Исайя 65:25-теги бичилген сӧстӧрди сананып, бу сӧстӧр чек ле мениҥ солынганымды кӧргӱзип турган деп, кӧп катап сананып туратан. Айдарда, бу аканы јерлик карагуланаҥ кураан болуп калган деп айдарга јараар.

15. Бис нениҥ учун кӧгӱс билегиске кӧп улус кожулзын деп кӱӱнзейдис? Мыны канайып эдерис?

¹⁵ Исайя 65:13 мындый сӧстӧрлӧ башталат: «Бий Кайракан Иегова мынайып айдат». А бу ла бажалыктыҥ 25-чи ӱлгериниҥ учында: «Иегова айдат» — деп бичилген. Иегова берген сӧзин јаантайын бӱдӱрип салат (Иса. 55:10, 11). Кӧгӱс рай эмди ле бар. Иегованыҥ албатызы чыннаҥ ла аҥылу ла кайкамчылу албаты! Ол албаты амыр-энчӱ јӱрет ле коруда јадат. Бистиҥ организация бу соок, калју телекейде эҥ амыр јер болот (Сар. 72:7). Бистиҥ кӧгӱс билегиске канча ла кире кӧп улус кожулзын деп кӱӱнзейдис. Оныҥ учун барар керек, ӱренчиктер белетеер керек (Матф. 28:19, 20).

УЛУС КӦГӰС РАЙГА КИРЕРГЕ КӰӰНЗЕЙ БЕРЗИН ДЕП, БИС НЕНИ ЭДЕР АРГАЛУ?

16. Улус недеҥ улам кӧгӱс райга кирерге кӱӱнзей берет?

¹⁶ Улус кӧгӱс райга кирерге кӱӱнзей берзин деп, бистиҥ кажыбыс ла кӧп неме эдер аргалу. Мында биске Иегованыҥ теми болужар. А Иегова  улусты кӧгӱс райга канайып кычырып јат? Ол бойыныҥ албатызына улусты албан кӱчле кийдирбей јат. Карын дезе ол кажы ла кижини кӧгӱс райга кирерге бойы кӱӱнзей берзин деп кычырат (Иер. 31:3; Иоанн 6:44). Анайып јымжак јӱректӱ улус Кудайдыҥ јакшы кылык-јаҥдарын кӧрӱп ийеле, бойлоры ла ого јууктаарга кӱӱнзей берет. Оныҥ учун улус бисти кӧрӱп, кӧгӱс райга кирерге кӱӱнзей берзин деп, бис нени эдер аргалу?

17. Улус бистиҥ туштажуларга келзе нени кӧрӧдилер?

¹⁷ Улус бистиҥ туштажуларга баштапкы ла катап келзе, бистиҥ бой-бойыска сӱӱжисти ле јалакай болгонысты кӧрӱп ийет. Каандыктыҥ Туразына баштапкы катап келген улуста кандый сезимдер болот? Олорды Коринфтеги улустыҥ айтканы ла чылап: «Чындаптаҥ Кудай ортогордо» — деп айтсын деп кӱӱнзеп јадыс (1 Кор. 14:24, 25; Зах. 8:23). Андый болзо, Агару Бичиктеги айдылган «ортогордо амыр болзын» деген сӧстӧрди биске оноҥ ло ары бӱдӱрер керек (1 Фес. 5:13).

18. Нениҥ учун улус Кудайдыҥ организациязына кожуларга кӱӱнзейт?

¹⁸ Бис ака-эјелериске Иегова ла чылап кӧрӱп јадыс. Оныҥ да учун олордыҥ уйан јандарына эмес, карын јакшы кылык-јаҥдарын кӧрӧргӧ албаданадыс. Нениҥ учун дезе удабас олордыҥ јастыраларынаҥ не де артпас. Је кезикте бис бой-бойысты тӱҥей ле оҥдошпой каладыс. Мындый неме боло берзе, сӱӱшке тайанып, «бой-бойыгарга јалакай, килеҥкей болугар» деген јӧпти тузаланып, бой-бойыстыҥ јаманысты акту јӱректеҥ таштап саладыс (Эф. 4:32, ЈТ). Мыны кӧрӱп, телекейдеги улус кӧгӱс  райга кирерге кӱӱнзей берет. Нениҥ учун дезе олор до сӱӱштӱ ле јалакай улустыҥ ортозында болорго кӱӱнзеп јадылар b.

КӦГӰС РАЙДАҤ КАЧАН ДА ЧЫКПАГАР

19. а) Кӧгӱс райга јанып келген улус нени сезет? ( «Олор кӧгӱс райга кайра јанып келген» деп рамканы кӧрӱгер.) б) Бис кӧгӱс райды баалап турганысты канайып кӧргӱзерис? (Јурукты база кӧрӱгер.)

¹⁹ Кӧгӱс рай биске сӱреен јарап јат. Ол кажы ла кӱн там ла јаранып јат ла ондо Иеговага бажырып турган улустыҥ тоозы кӧптӧп јат. Бис Иеговага бу кайкамчылу сый учун јаантайын быйанду болорыс. Бис бу райдаҥ ырыс, сӱӱнчи, токунал, амыр ла кору аладыс. Биске оноҥ качан да чыкпас керек. Је ајарыҥкай болор керек, нениҥ учун дезе Сатана бисти бу райдаҥ чыгара тартып аларга албаданат (1 Пётр 5:8; Ачыл. 12:9). Оныҥ тузагына тӱшпектер. Кӧгӱс райдыҥ јаражын, арузын ла амырын оноҥ ло ары корулап јӱректер!